Nganhx zoz zux Yên Bái sir jos uô tiêr tsưr ziv shông cơưv tưz tso tơưv

Pos Lò Thị Tuyết Dung, Trưởng phongx Zoz zux thị xar Nghĩa Lộ puz pâuz: txơưv nhiv kruôr txêik tok 17 taz viv tsêr cơưv ntơưr txix huyện Văn Chấn lok đros yuôr ntâu kror phiv liv, taz sik hâux lưv kriê thiêz cơưv ntơưr tưz tâu kriz uô jông. 15.000 ntâu lênhx shux xênhz nhoz thị xar puôr lênhx tưz tuôx cơưv ntơưr cxix cxuô. Khov lơưr six hơưv cơưv tsênhv yuôr txos kaz kỳ, chor tsêr cơưv ntơưr tưz thiêz tsênhv tsưr tsix kriê nzir chor môn cơưv kênhz, taz por cơưv tiêr tâu tsaz yênhx lớp 9 uô ntêx hnuz 5/7, chor lớp txơưr mak uô ntêx hnuz 11/7 zuôr txos:

“Pêz tưz hêik chor tsêr cơưv ntơưr tsưr tsix qênhz yuôx, ntâuk gri shux xênhz hâor kỳ 2. Đros chor môn toán, văn, anh phòng zuôr tsưr tsix tso đề kiểm tra trâu tas nro chor lớp cơưv thiêz chấm thik trâu kaz lớp 9. Đros chor bộ môn thiêz chor lớp cơưv txơưr mak choz trâu hiệu trưởng chor tsêr cơưv ntơưr tso đề, xav six hơưv kiểm tra, tsưr tsix chấm thiêz hêik lok trâu phong zoz zux pâuz”.

Ntơưv huyện tox siêz Mù Cang Chải, tiv six hơưv so ntơưr truz ntêr viv li têx hnuz xuz thơưx, chor shux xênhz tuôx cơưv ntơưr tsik tâu chôngz. Taz sik đhâu chor cưk kriê ntơưr thiêz chính quyền tiv phaz muk yax kriê. Txos nhiv no, chor shux xênhz nhoz têx tsêr cơưv ntơưr tưz tuôx cơưv ntơưr cxix cxuô. Đhâu ciês chor shux xênhz tror tuôx cơưv ntơưr, côngz xưv phax tar caz moz cux tror tâu kriz uô jông. Đros chor tôv chiv chir sêiz car, chor cưk kriê ntơưr cux tâu choz hâux lưv sêiz shuôk jông yênhx lênhx shux xênhz. Côngz xưv vêv xênhz tsêr cơưv ntơưr, qơư shux xênhz nhoz, tsêr uô jâuz mor nox, vêv xênhz ngaz tuk zav nox cux  tâu taz por cov jông tiv zix.

Zơưv Nguyễn Văn Tuấn, Phưv trưởng phongx Zoz zux huyện Mù Cang Chải puz pâuz: đros taz por têx tsênhv njiêz cơưv, six hơưv kriê thiêz cơưv ntơưr, chor tsêr cơưv ntơưr cux kriz uô truôx jông têx tsênhv chêi paz trâu shux xênhz tox siêz:

“Uô jông têx tsênhv chêi paz trâu shux xênhz niêv txir zus mor, shux xênhz nox su, thiêz trâu chor nhuôs zâu. Lok tsưr tsix uô jâuz mor nox mak bax cov txâuk pluôs nox, taz por ngaz tuk vêv xênhz zav nox”.

Lơưr Sở Zoz zux thiêz Thox cxov tỉnh Yên Bái, chor qơư zoz zux nhuôs zâu, phôv thôngz sâuv thax tsav tưz tâu kruôz kriê jông hâur qênhz yuôx, txo grêk tsơưs têx tsênhv njiêz cơưv; kruôz kriê kiểm tra, ntâuk gri shux xênhz; tsưr tsix kriê nzir trâu chor môn cơưv kênhz chiê uô tiêr six hơưv cơưv hâur shông cơưv. Đhâu tsês iz ciêz chiê tsưr tsix cơưv nzir têx txux chi tưz cơưv đhâu trực tuyến thiêz choz zok jax cơưv ciês ntơưr tsêr trâu shux xênhz hâur ntu so ntơưr, chor tsêr cơưv cux tưz tsưr tsux kiểm tra, ntâuk gri shux xênhz, txix co njuôk xav têx tsưr ziv kriê ntơưr, cơưv nzir trâu chor shux xênhz pâuz tsik tâu tsênhz…Zơưv Đào Anh Tuấn, Phưv Giám đốc Sở Zoz zux tỉnh Yên Bái puz pâuz, jiês no, luôs hâux lưv qênhz yuôx, hêik pâuz, kruôz kriê hâux lưv kriê ntơưr ntơưv têx tsêr cơưv cux tâu sở sir jos kriz uô:

“Ntu zuôr txos no Sở chox kriê chor Phongx zoz zux, chor tsêr cơưv ntơưr qênhz shuôk đuô tsaz yênhx, six hơưv cơưv têx môn, tsar tov qar cơưv ntơưr chiê cê taz por cơưv tâu ntơưr thiêz taz por chiê kriê nzir trâu chor shux xênhz. Đros chor lớp cơưv nzir mak tưz cxiv tsa tsưr ziv uô txix ciês thâuv suôv câuv shông cơưv txos trâu bax kriz cơưv shông cơưv yiêz, taz por uô huv zos six hơưv li Bôv Zoz zux-Thox cxov tưz tso  tơưv”.

Chor hnuz xuz thơưx thâuv tror tuôx cơưv ntơưr, tas nro chor shux xênhz tuôx cơưv ntơưr tsuôk muôx 80% ntâu, taz sik txos nhiv no, shux xênhz chor tsêr cơưv ntơưr tưz tuôx cơưv cxix cxuô. Yênhx lênhx cưk kriê ntơưr thiêz chor tsêr cơưv ntơưr tsênhv sir jos, uô cov tiêr tâu jông luôs hâux lưv tso tơưv./.

                      (TTTB-Lik Thox cxêik nhênhv)

Nông Viết Toại- Tox siêz Việt Bắc li lênhx nênhs sâu văn, sâu pax huôv jông

Zơưv Nông Viết Toại

          Lênhx nênhs sâu văn, sâu pax huôv Nông Viết Toại muôx bê krêz xênhz zos Nông Đình Hân, xênhz shông 1926 ntơưv Nà Cọt, huyện Ngân Sơn, tỉnh Bắc Kạn. 94 shong, zơưv tâu seiz zos văn học nghệ thuật têx mênhx cxưx Việt Nam li iz lênhx lâuk nênhs sâu văn, sâu pax huôv jông. Zơưv Nông Viết Toại li luz tsêr mê nhoz đrâuv niêv đrôngs Bắc Kạn tsuôk tsês chiê tso ntơưr-zos zơưv li têx fâu ntơưr zơưv tsês iz tiêv nênhx nhênhz chơưv thiêz sâu. Heik lok lik zơưx zơưv nhiêv văn học nghệ thuật, zơưv puz pâuz:

          “Shông 1963, muk cơưv lớp zos Hội lênhx nênhs sâu văn krêz xuz thơưx mak hâur tuv ntơưr muôx Guy-đờ-Mô-pa-xăng li fâu ntơưr, cur nhênhv mak pov cur cux sâu tâu, zôngv zuk mênhx cxưx li luk heik chiê sâu mak zôngx ziv đuô. Tiv 2 zos hâur six hơưv uô côngz xưv nhoz Đoàn văn công, đhâu co uô côgnz xưv nhoz Đeix nta suôz qơư tự trị, đeiv ntơưr văn nghệ Việt Bắc cux uô cur lok six nhiêv txos luk mênhx cxưx, co cux zos qir tiv uô cur nhiêv sâu văn, pax huôv...”

          Lênhx nênhs sâu văn, sâu pax huôv Nông Viết Toại tưz muôx ntâu jax sâu, jax pax huôv jông lok têz qơưk, lok lênhx nênhs li “Việt Bắc Boong hây”. Têx jax pax huôv xuz thơưx zơưv sâu cux jông li lênhx nênhs sâu pax huôv Hoàng Đức Hậu- lênhx nênhs sâu pax huôv ntơưr Tày, cux zos zơưv Nông Viết Toại li cưk kriê ntơưr thiêz kriê sâu pax huôv. Tov kaz no, pax huôv Nông Viết Toại muôx têx hlôngr yiêz huv đros thiêz qênhx shênhx yiêz. Zơưv tsênhv zos lênhx nênhs cxeik luk Tày trâu ntâu jax gâux thiêz tâu ntâu lênhx nênhs hâur côngv thôngx mênhx cxưx Tày, Nùng nhoz Việt Bắc nhiêv thiêz heik. Lênhx nênhs sâu văn, sâu pax huôv Nông Viết Toại cux xar tơưv ntâu jax pax huôv cxôngx luk Tày lơưr têx jax cưr cxiêx then thax tsav Cao Bằng, Bắc Kạn, tâu Đoanx văn công qơư tự trị Việt Bắc xeir muk piêr kriê hâur ntâu shông.

          “Muôx têx lênhx nênhs heik tiêk tso tsês xav, nênhs Tày nyei 100 shông thiêz zuôr yênhx tas nênhs choz tsiz, cur mak ho tsi xar li ntơư, 100 shông thiêz mak cux tsi xưk nênhs choz tsiz, cux tsi xưk nênhs Tày mak zuôr xưk nưs iz zav txơưr, thôngx cxix cux muôx têx huôv tsar jông”.

          Lok văn xuôi, zơưv Nông Viết Toại cux muôx ntâu yênhx tix tâu sâu jênhv. Zơưv đros lênhx nênhs sâu văn Nông Minh Châu zos 2 lênhx nênhs xuz thơưx sâu tiểu thuyết cxôngx luk Tày. Tov kaz no zơưv Nông Viết Toại tsênhv sâu ntâu jax đaz nênhs cxôngx luk Tày tâu ntâu lênhx nênhs ntâu grê siêz cux cxôngx co lơưr hu zơưv zos nênhs sâu văn Nông Viết Toại. Zos lênhx nênhs thâuv tưs cux kruôk txos zơưv Nông Viết Toại li pênhr xưv thiêz têx gôngr côngv, zơưv Dương Khâu Luông- Chủ tịch Hội văn học nghệ thuật tỉnh Bắc Kạn heik:

          “Nênhs sâu văn Nông Viết Toại tưz muôx ntâu gôngr côngv lox trâu văn học têx mênhx cxưx tsơưs nênhs Việt Nam, zơưv zos đeiv iêr chi cax luk trâu cxênhx nênhs sâu văn, sâu pax huôv hluôk tov kaz no cơưv shâuv uô lơưr, viv zơưv thâuv tưs cux moz siêz txos văn học, muôx txơưx jênhv hâur lox tôngv nghệ thuật”

          Đrâuv pax huôv, đaz nênhs, zơưv tsênhv nhênhz chơưv vênhx huôv mênhx cxưx tsơưs nênhs. Zơưv muk nriêr pâuz têx mênhx cxưx tsơưs nênhs li têx jax cưr cxiêx trâur lâuk, têx jax đaz nênhs muôx cxôngx nzor... tiv zix zos mênhx cxưx Tày. Thâuv tưz muôx hnuz nhôngs siêz, zơưv tsênhv sir jos cxiv sâu fâu ntơưr cxeik luk Tày yênhx luk choz tsiz, tsês chiê trâu cxênhx nênhs tov kaz no iz fâu ntơưr tsiv grê.

          Đros zuk têx gôngr côngv lox, shông 2019 Hội văn học nghệ thuật têx mênhx cxưx tsơưs nênhs Việt Nam tưz tsưr tsix Phêv thảo “ Heik lok lênhx nênhs sâu văn mênhx cxưx Tày Nông Viết Toại li luz nênhx thiêz hâux lưv uô” chiê kruôk thiêz sâu jênhv zơưv li têx gôngr côngv lok cơưx mênhv thiêz xar tơưv văn học nghệ thuật... zuôr trâus tâu tuôr tsês, phuôx huiz./.

                                           (VOV Đông Bắc- Txâur Vax cxeik nhênhv)