Sơn La tuôr cov sor si trâu shux xênhz tox siêz

viv ntux no njiv ntêr

          Mê nhuôs nhoz tsêr cơưv mê nhuôs zâu Bình Minh nhoz xã tox siêz Co Mạ, huyện Thuận Châu, tỉnh Sơn La li pluôs nox su têx hnuz no tâu uô cuz sor chiê taz por trâu mê nhuôs nox. Tiv muox 10 qơư cơưv mê, shux xênhz nhoz tsi chêx chôngk, viv li tsi tsưr tsix nox nhoz ntơưv tsêr cơưv mak nox nhoz đros tsôngv box. Sơưr nzor niêv txir zuôr gra mor, mix tôm tuôx lớp cơưv, têx cưk kriê vâuv mor cov sor, mix tôm mak tâu cưk kriê uô trâu mê nhuôs nox.

          Cưk kriê Lò Thị Hồng puz pâuz: Têx hnuz ntux no njiv no, shux xênhz tuôx cơưv ntơưr cxuô viv tuôx lớp cơưv mê nhuôs tâu tsoz phưz jông đuô, tâu ntê tơưs lok sik muôx tênhz cxiêz cov sor. Zos nhoz tsêr, niêv txir muk uô têz yênhx hnuz tsoz phưz tsi tâu trâu mê nhuôs:

          “Cheix ntux no têx mê nhuôs njiz ntâu phêv liv, muôx tsi txâuk chuôz zênhx chuôz tas, tsi muôx nhiêx txiêx zuôr trik yo sor trâu mê nhuôs hnhar muk cơưv ntơưr, muôx têx lênhx khâu cux tsi muôx chiê trâu”.

          Yuôr ntơuv tsêr cơưv phổ thôngz mênhx cxưx niêv txir zuk mor cxênhx 2 Co Mạ, nhiv no muôx 500 ntâu lênhx shux xênhz tâu sơưv chế độ nox nhoz ciês ntơưv tsêr cơưv. Iz hnuz, tsêr cơưv li tuêv uô jâuz mor nox thâuv tưs cux sir jos uô têx pluôs mor sor si, kaz thiêz muôx txâuk tsơưr pưr trâu mê nhuôs shux xênhz. Lok cheix ntux no, mê nhuôs tâu nox cxaz greix chiê tuôr chuôz cxaz đas jos tir tar ntux no. Tiv zix, tsêr cơưv cux muôx tsưr ziv hlôngr pluôs nox hâur niêx hnuz, chiê mê nhuôs shux xênhz nox pov kaz luk đuô. Cưk kriê Nguyễn Như Thành, Hiệu trưởng tsêr cơưv heik:

          “ Têx hnuz ntux no jêx tưv kis đuô 7 tưv, tsêr cơưv muôx shux xênhz nox nhoz hâur tsêr cơưv viv li cux muôx tsưr ziv uô cov huv đros, zos kis đuô 7 tưv mak hlôngr cơưv ntơưr trâu zar hnuz keix”.

          Zơưv Triệu Nam Bình, Tsar phongx zaoz zux thiêz thox cxov huyện Thuận Châu, tỉnh Sơn La puz pâuz: Huyện muôx 84 tsêr cơưv têx cấp đros 1 cxênhz 430 ntâu lớp cơưv thiêz zuôr xar 50 cxênhz shux xênhz. Nhiv no, qiv hơưv muôx ntâu txơưr txar, ntux no njiv ntêr. Chiê tir tar ntux no nganhx zaoz zux huyện Thuận Châu tưz muôx ntâu ntâuz ntơưr heik kriê têx tsêr cơưv chuv tôngv tir tar têx jiês ntux no zuôr txos:

          “Đros shux xênhz li têx qơư so tưz tâu tsêr cơưv their cov jông, tsi chiê chuô njơưx lok hâur qơư nhoz, taz por đas jos trâu mê nhuôs. Chox kriê têx tsêr cơưv muôx shux xênhz nox nhoz ntơưv tsêr cơưv mak tsuv taz por mê nhuôs nox sor, hâuk bâu, muôx txâuk tsơưr pưr chiê taz por đas jos trâu shux xênhz”.

          Lơưr njuôs pov, têx hnuz zuôr txos nhoz Sơn La tror muôx têx jiês ntux no njiv ntêr, têx qơư zaoz zux nhoz tox siêz thâuv tưs cux tsuv chuv tôngv cxuô faz tsưr ziv chiê phax tar ntux no, taz por đas jos trâu shux xênhz./.

(Thanh Thủy-Txâur Vax cxeik nhênhv)

Faz tsưr ziv phax tar moz gênhk trâu nênhs lâuk, hnuz nhôngs siêz hâur chêix ntux no

Iz cxiê zav moz gênhk chor lâuk hnuz nhôngs siêz khênhr njiz trâus hâur chêix ntux no, ntơư zos moz poz khâuk trâu têx tơưr grêix. Viv hâur luz chêix co muôx ntux no njiv, uô trâu têx tơưr grêix kruôr, tsik muôx đêx tsik yuô tơưv hưk. Chênhr zos li hêik ntơư, hâur chêix ntux no, chor lâuk hnuz nhôngs siêz, têx tơưr grêix zôngx ziv trâus kruôr, trâus khâuz, têx jiês cux tsênhv uô trâu lênhx nênhs co têx tơưr grêix trâus to lok nyar.

Đros ntơư, hâur luz chêix muôx ntux no njiv, zôngx ziv uô trâu chor lâuk trâus moz poz kix cxa, moz iz chê, moz sâur nyar plơưr, sâur nyar ndê siêz. Chênhr zos li hêik co, chiê chor lâuk hnuz nhôngs siêz muôx cov txâuk đas jos tsưx phưv luz chêr hâur chêix ntux no, tsuv uô trơưk têx faz tsưr ziv li đrav kaz:

Hâur têx hnuz muôx ntux no njiv, chor lâuk hnuz nhôngs siêz, tsuv tsưx phưv zuk luz chêr cov sor, txơưv nhoz hâur tsêr lok sik muk ndis uô si đrâuv jôngr; zos muk ndis uô si đrâuv jôngr, tsuv muôz fuôv câur thêir kror ndâux, kror njưs thiêx tsik trâus moz hnôngk, tsik trâus moz txos cêr uô pa.

Tsêr nhoz tsuv sor so, tsik yâu chuô đhâu têx kror trêi lok hâur tsêr. Thâuv têis cik sơưr nzor lok si zar tsâuk ntux, muk đhiê ndis uô si, tsuv đhiê cov huv đros luz chêr thiêx tsik uô trâu chor nênhs lâuk trâus moz sâur nyar plơưr.

Lar hêik zos, chor lâuk hnuz nhôngs siêz tsuv nox cov txâuk Cxuô zav jâuz mor, grêix, txir ntông cxuô zav, luz chêr thiêx muôx txâuk đas jos tir thêir ntux no njiv, tir thêir tâu moz gênhk. Taz sik tsuv nox cov  huv đros luz chêr thiêx tsik uô ruôr hiêv txos chor lâuk li đas jos.

Ntơư zos têx faz tsưr ziv jông paz trâu chor lâuk hnuz nhôngs siêz tir thêir moz gênhk hâur chêix ntux no njiv./.

               Tsu cxêik nhênhv-BSK Bình Định