Côngv têk đros lưx lươngv pênhz phax por vêv truôx jông ntus đriv

Ntu đhâu, pêx xênhv xar A Ngo, huyện Đakrông, tỉnh Quảng Trị tưz sir jos cxaz chuôz phongz yaox Tas nro pêx xênhv por vêv tsưr qênhx ngaz tuk ntus đriv, paz đros lưx lươngv Pênhz phax nhoz sâuv thax tsav por vêv ngaz tuk ntus đriv, ndêx chiv ntus đriv, hâur co tsưr ziv Tôv chiv chir sêiz car thax tsav ntus đriv ndêx chiv ntus đriv tưz tâu uô truôx jông.

Shông 2016, thâuv muôx cêr chêi yênhx lix Tôv chiv chir por vêv ntus đriv ndêx chiv ntus đriv, zơưv  Kol Thên, nhoz jok La Lay, xar A Ngo tưz đros cxaz chuôz uô hâux lưv no. Zơưv tsênhv hêik pox nhuôs hâur jok đros Bôv đôiv Pênhz phax uô chiê por vêv ntus đriv ndêx chiv ntus đriv:

“Bôv đôiv Pênhz phax đros Chính quyền ntơưv qơư hêik sơưr đơưk đros uô por vêv ntus đriv ndêx chiv ntus đriv. Cur lok six tso siêz viv zuk muôx txơưx jênhv…”

Uô lơưr phongz yaox tas nro pêx xênhv cxaz chuôz por vêv tsưr qênhx têz qơưk, ngaz tuk ntus đriv têz qơưk, txos nhiv no tưz muôx 46 ziv chuôz zis thiêz 103 lênhx nênhs cxaz chuôz chiv chir sêiz car 15,38 cêik cêr ntus đriv thiêz 5 tuk ndêx chiv ntus đriv. Chor tôv chiv chir sêiz jor tưz sir jos cxaz chuôz đros Bôv đôiv Pênhz phax tsưr tsix qênhz yuôx, luôx cov hur đu têx ntus đriv, iz ndis têx ndêx chiv ntus đriv. Đhâu chor jiês xênhz huôx qênhz yuôx, co zos jiês chiê sơưr đơưk sik njiz, sik thav lok qênhx shênhx ngaz tuk sâuv thax tsav uô nênhx nhoz đros bôv đôiv Pênhz phax, cux xưk li hêik pâuz têx phiv liv muôx yưv sâuv thax tsav ntus đriv chiê muôx tâu tsưr ziv tir tar cov ndar six hơưv. Thiếu tá Võ Xuân Lâm, Chính trị viên Zênhx Pênhz phax trôngx đriv ntiêx têz La Lay, Bôv đôiv Pênhz phax Quảng Trị puz pâuz:

“Hâur ntu zuôr txos tror uô lơưr Thủ tướng Chính phủ li Chỉ thị 01 lok tso tơưv phongz yaox Tas nro pêx xênhv cxaz chuôz por vêv ntus đriv, ndêx chiv ntus đriv hâur qênhx shênhx yiêz, taz viv đros thax tsav qơư tror phuôx huiz thiêz uô đêz đar tôv chiv chir sêiz car sâuv thax tsav…”.

Lâul jok muôx côngz bê A Lăng Nhức, mênhx cxưx Giẻ Triêng, nhoz xar Chơ Chun, huyện Nam Giang, tỉnh Quảng Nam, zênhx zos iz lênhx tuz lênhv, viv li zơưv pâuz tâu tsênhz txos chor tuz lênhv Pênhz phax li têx hâux lưv. Zơưv xar tiêk: hâux lưv cxaz chuôz por vêv ntus đriv, ndêx chiv ntus đriv cux chênhr zos por vêv trâu pêx xênhv hâur zuk jêx jok luz nênhx.

Cux xưk li cxiê jâuk, ntơưv jiês cơưv xênhz huôx tôv chiv chir sêiz car ntus đriv, ndêx chiv ntus đriv A So, xar Chơ Chun jiês no, lâul jok A Lăng Nhức hêik pâuz tsưr ziv lok por vêv ntus đriv ndêx chiv ntus đriv trâu lênhx tov xar thiêz chiến sĩ Pênhz phax pâuz. Hâux lưv sêiz jor, qênhz yuôx tâu zơưv phêiz côngz cxix cxuô, tsênhz mênhx trâu yênhx lênhx nênhs hâur tôv.

“Thâuv ntêx no muk lok đêz mak cux phiv liv, sơưr đơưk muk paz trâu chor chiến sĩ pênhz phax, tas nro saz Lào thiêz chiê por vêv tsưr qênhx ntus đriv oz tos…”.

Thượng tá Quách Thiện Dư, Chính trị viên Zênhx Pênhz phax Ia Dê, Bôv đôiv Pênhz phax tỉnh Quảng Nam hêik, lâul jok A Lăng Nhức tsik so đros đrêiv pox nhuôs hâur jêx jok thiêz chor chiến sĩ pênhz phax:

“Hâur têx shông đhâu, tsưr qênhx ntus đriv tâu tuôr truôx, ngaz tuk chính trị, xar  hôiv sâuv thax tsav truôx tuk, iz chas pêz phuôx huiz chor taz viv li txơưx jênhv, iz chas khov trâu cấp ủy, chính quyền ntơưv qơư, tiv zix zos chor nênhs muôx suôz bê, tsar jok sâuv thax tsav. Iz zav li zơưv A Lăng Nhức”.

Tưz tsik zos iz hâur chor nênhs muôx suôz bê muôx ntâu gôngr côngv trâu côngz xưv por vêv tsưr qênhx, ngaz tuk ntus đriv têz qơưk, lâul jok A Lăng Nhức tsênhv tsik so uô ntêx hlo hâur huôv tsar kinh têr, uô bluô nux trâu chuôz zis. Thôngx cxix sir jos yax kriê, hêik pêx xênhv sik côngv siêz, sir jos khưr uô nox, txo grêk cêr yêiz pluôs, zơưv tưz paz trâu ntâu ziv chuôz zis nhoz ntơưv thax tsav qơư hla đhâu cêr pluôs. Zơưv Kor Dương, Bí thư Đảng ủy, Chủ tịch Hôiv đôngx xar Chơ Chun puz pâuz:

“Lâul jok A Lăng Nhức zos iz hâur chor nênhs uô ntêx hlo lok txơưx uô kinh têr, uô nox, tu zus tsiêx cxu li nhux tưv, nênhl…cxuô lênhx nênhs  puôr lênhx lok six njênhs thiêz uô trơưk”.

Đros suôz bê thiêz zuk têx hâux lưv uô tâu tsênhv tsênhz, lâul jok A Lăng Nhức zos qơư txuôk hâur cxiv tsa ntus đriv hux fênhx, thôngx ziv. Shông 2018, zơưv zos iz hâur 4 lênhx nênhs tâu tỉnh Quảng Nam xêir tsov muk dự Jiês cơưv hênhr kruôk nênhs muôx suôz bê uô tâu hâux lưv jông hâur phongz yaox tas nro pêx xênhv cxaz chuôz por vêv tsưr qênhx têz qơưk, ngaz tuk ntus đriv têz qơưk thax tsav ntus đriv Việt Nam-Lào ntu 2009-2018./.

(VOV4-Lik thox cxêik nhênhv)