Sơn La: Sâu yênhx puôk tsov đeiv cxôngx txeik pênhr paz txưv

nôngx mênhx

          Niêv lâuk Cầm Thị Siu chuôz zis nhoz jos Liềng, xã Mường Bằng, huyện Mai Sơn (Sơn La) hâur shôngk shông no tâu Hội nôngx mênhx xã Mường Bằng puz txeik 50 tsov đeiv cxôngx Cuiv paz txưv nôngx mênhx. Ciês thâuv txêik tâu chor nhiêx txiêx no lok, niêv lâuk chuôz zis tưz zôngv tas nro chor nhiêx txiêx co chiê zuôr 4 tul nhux đas lok tu zus. Chiê tu zuscov tâu trơưk tsưr ziv siêz xar, chuôz zis tsênhv kho đuô guôx cơư cov jông đuô thiêz huv vêv xênhz.

          Txos nhiv no, 4 tul nhux tưz sha cxaz 4 tul mê nhuôs nhux. Niêv lâuk chuôz zis shir phaz thiêz tror yưv pênhr uô chôngx keiz chiê tu zus cxaz 400 tul keiz. Niêv lâuk Siu shir phaz lul puz pâuz: Xav tas nro 2 trâur nuv kinh têr no, niêv lâuk chuôz zis zuôr sâu liv tâu yênhx puôk tsov đeiv hâur shông no:

          “Chuôz zis lok six shir phaz viv muôx Cuiv Hội nôngx mênhx tưz txeik, paz cur chuôz zis muôx pênhr uô nox uô hâuk, hla đhâu cêr pluôs”.

          Chuôz zis zơưv Cà Văn Quang, nhoz jos Liềng, xã Mường Bằng, huyện Mai Sơn thâuv ntêx zos zuôr xar 10 tul nhux đas. Tiv luz nênhx txov nhêv, viv li chuôz zis tưz muôs zuôr tas chor nhux hâur guôx. Hâur shôngk shông no, tâu tror txeik pênhr cxôngx Cuiv paz txưv nôngx mênhx thiêz tâu cán bộ heik kriê tsưr ziv tu zus, zơưv chuôz zis tưz yưv pênhr zuôr nhux tror lok tu zus.

          Uô trâur nuv tu zus sik côngv, zơưv chuôz zis tưz kho đuô guôx cơư, zos cxaz yik, keiz; txos nhiv no hâur guôx muôx 7 tul nhux, 9 tul yik thiêz zuôr xar 100 tul keiz. Zơưv Cà Văn Quang pheiz kênh:

          “Zos tâu têz qơưk thiêz têx hội tsov cưv đuô thiêz, tâu txeik pênhr mak cur zuôr tror yưv pênhr uô nox uô hâuk lơưr saz têx cấp hội heik kriê. Cur zuôr sir jos uô li chas chiê muôx pênhr cux xưk li uô lơưr tsưr tsix hội tưz chox kriê chiê cur chuôz zis muôx pênhr uô nox uô hâuk”.

          Txos nhiv no, têx cấp Hội nôngx mênhx tỉnh Sơn La tưz muôz pênhr zos 46 tỷ đeiv paz txưv zuôr xar 1 cxênhz 400 ziv chuôz zis nôngx mênhx txeik huôv tsar kinh têr. Têx ziv chuôz zis tâu paz txưv txeik pênhr tưz yênhx trus hlôngr yiêz kinh têr, tsoz chos, tsiêx tu zus yênhx têx trâur nuv kinh têr tax chêx cuk siêz li: Trâur nuv chos txir lưv tsiz hlôngr trâu chos kôngz lôngk, tu zus nhux cơư hâur guôx, reik đros chos đrox nhoz têx xã Xuân Nha (Huyện Vân Hồ), Chiềng Pha (huyện THuận Châu)...

          Zơưv Bạc Cầm Khuyên, Phưv chủ tịch Hội nôngx mênhx tỉnh Sơn La puz pâuz: Hâux lưv krêz uô têx trâur nuv zôngv công nghệ yiêz tưz thiêz tsênhv yênhx trus uô tâu têx xiv huv hax huv lox, muôx tsơưr lươngv siêz, gôngr phênhv muôz hâux lưv uô ngaz tul, chuôz cxaz phênhv sâu trâu hội viên tax cxôngx 90 txos 150 tsov đeiv iz shôngk.

          “Chiê chuôz tsar muôx pênhr gôngr lok hâur Cuiv mak pêz tror yax mông thiêz muôx têx tsưr ziv ntâuz ntơưr vênhv tôngv txos têx tsưr tsix, lênhx nênhs jông siêz; hâur cxix luôk Hội mak yax six muôx ntâuz ntơưr chox kriê, yax mông txos têx cấp Hội thiêz hội viên nôngx mênhx, iz shông cux têx gôngr côngv cxaz trâu Cuiv huôx tôngv”.

          Cuiv paz txưv nôngx mênhx li huôx tôngv tưz thiêz tsênhv paz ntâu ziv chuôz zis nhoz Sơn La hla đhâu cêr pluôs, sir jos uô bluô nux. Lơưr zos têx lênhx nênhs coaz tsôngv, gôngr phênhv cxơưz tiês huôv tsar KTXH trâu cxuô luz jêx jos hâur thax tsav./.

(Trấn Long- Txâur Vax cxeik nhênhv)

Hlôngr yiêz hâur tơư trôngz Langbiang

Sêi đrơưv txiêr têx trêr pax buôs chiê xa lok trâu têx qơư zuôr nhoz thành phố Hồ Chí Minh muôs, zơưv Kra Jan Blim nhoz Bon Đơng 1, thị trấn Lạc Dương, huyện Lạc Dương puz pâuz, txix mê nhuôs cêr cơưv ntơưr, nhiêx txiêx xênhz huôx yênhx hnuz hâur chuôz zis txos uô vax tsêr lox jông li nhiv no puôr lênhx khov tas hur si trâu vax pax no. Uô ntêx, tas nro thax tsav chos pax no zos chiê chos blêx iz chiv, pênhv sâu tsik truôx viv li cêr pluôs tsik so đros đrêiv. Txix thâuv hlôngr chiê chos pax hâur tsêr thêir vor, kinh têr chuôz zis muôx đuô, đros phênhv sâu tâu muôx 300 triệu đêiv iz shông.

“Thâuv ntêx chos blêx mak cux tsuôk txâuk nox, đhâu co chos cà phê gri grêk cux tsik txâuk, hlôngr chos jâuz cux tsik tâu. Tov kaz no txêik nhiêx têz qơưk chiê chos pax mak chuôz zis truôx đuô, luz nênhx tâu gra siêz đuô”.

Cux iz zav li, txix thâuv hlôngr chiê chos ndêz, iz hli, niêv tix Cil K’Pam (nhoz jok Đa Ra Hoa, xar Đa Nhim) ziv chuôz zis cux sâu tâu ,ok muôx 10 triệu đêiv ntâu. Niêv tix K’Pam puz pâuz, txix iz luz tsêr chor ndêz xuz thơưx txos nhiv no chuôz zis tưz uô cxaz nzir 3 luz tsêr chos ndêz taz sik cux tsik txâuk muôs:

“Txix thâuv uô tsêr chos ndêz txos nhiv no mak chuôz zis hlôngr yiêz ntâu. Pir li muk uô côngz nhân, uô cà phê mak chos ndêz tsik yuô khưr đuô, phênhv sâu siêz đuô. Txix co chuôz zis cux truôx tuk đuô, hâux lưv mak siz hlôngr uô thiêz muôx uô tsik so”.

Txix iz tiv phaz đros tsoz chos chênhr zos blêx thiêz cè phê. Txos nhiv no tas nro huyện tox siêz Lạc Dương muôx zuôr xar 780 ha kôngz nuv công nghệ siêz, phênhv sâu tâu muôx 225 triệu đêiv iz ha. Hâur co, chos jâuz hâur tsêr tsov iêr mak tâu txix 500 txos 800 triệu đêiv iz ha iz shông. Chos pax tâu muôx 800 txos 1 tiv đêiv. Têx qơư chos pax ly mak tâu muôx 2 tiv đêiv iz shông.

Nhiv kruôr no Thủ tướng Chính phủ tưz tso tơưv uô qơư công nghiệp sir sôngv công nghệ siêz ntơưv xar Đạ Sar, đros thax tsav muôx 220 ha ntâu, paz tsar tov trâu huyện Lạc Dương kriz uô têx tsênhv chêi paz nhiêx txiêx, tsik zuôr nhiêx ntiêr ar chiê cxơưz cxiz doanh nghiệp yưv pênhr uô xênhz yar kôngz nuv hur ntơưv tiv phaz.

Zơưv Lê Quang Minh, Phưv chủ tịch UBND huyện Lạc Dương puz pâuz, hâur huôv tsar cxuô, tsôngv box mênhx cxưx tsơưs nênhs hâur huyện cux muôx ntâu hlôngr yiêz lok uô xênhz yar, tso tsês tâu tsưr ziv uô kuz, sưv đros chor tsoz chos công nghiệp, jâuz, pax, yuôx njuôz. Hâur tas nro huyện, chuôz zis pluôs zos tsôngv box mênhx cxưx tsơưs nênhs tsuôk yuôr 46 ziv chuôz zis. Lơưr zơưv Lê Quang Minh, huyện tsênhv sir jos choz zok khoa học kỹ thuật hâur kôngz nuv chiê paz pox nhuôs phuôx huiz têx kror liv chiê gra siêz luz nênhx:

“No zos thax tsav muôx qiv hơưv huv đros trâu uô xênhz yar, kôngz nuv công nghệ siêz. Đros cà phê zos tsoz chos chênhr, taz sik huyện cux zuôr njuôk xav tsưr ziv tsênhv tsênhz chiê paz trâu pox nhuôs hlôngr yiêz đuô tsoz chos lơưr saz kôngz nuv côngz nghệ siêz đros tsưr ziv zos gra siêz phênhv sâu truôx lok kinh têr”

Đros kror liv lok đêx ar, du lịch vênhx huôv, nhiv no ho phuôx huiz khoa học công nghệ, huyện Lạc Dương tsênhv muôx tsar tov zôngx ziv chiê tror chuôz ndê nzur muk. Txo grêk tsơưs yêiz pluôs nhoz no tưz tsik zos kror lax uô lơưv. Pox nhuôs cxuô mênhx cxưx nhoz no tsênhv muôx ntâu tsar tov chiê uô bluô nux./.

(TTTN-Lik Thox cxêik nhênhv)