Jax sâu thưr 2.14.11.2016:

SƠN LA: SIK CÔNGV TÊS CXIV TSA NÔNGX CXÊNHZ YIÊZ

          Txox cêr nhoz jos Nà Nó, xã Sốp Cộp, huyện Sốp Cộp ntêr zuôr xar 1 ceik cêr, nhiv kruôr uô tâu tiêr thiêz chox lol trâu tsôngv box mul lol zôngx ziv. Iz chas tâu tỉnh paz txưv xi măng, tsôngv box hâur jos tưz gôngr côngv hnuz côngz cxiv tsa đros tas nro nhiêx txiêx zos zuôr xar 600 tsov đeiv. Zơưv Tòng Văn Thiến, nhoz jos Nà Nó, xã Sốp Cộp puz pâuz:

          “ Khov iz phênhv zos muôx công nhân viên chức nhoz huyện paz txưv uô txox cêr no chiê pêz tsôngv box zôngx ziv mul lol đuô”.

          Cxôngx phênhv “ Cuiv paz txưv phuôv tsar cơ sở cxuô zav nhoz nôngx cxênhz”, huyện Sốp Cộp tưz paz txưv cxiv tsa 8 tsêr vênhx huôv trâu 8 jos, đros tas nro pênhr paz txưv zos 1,6 tỷ đeiv. Đros co, tsôngv box têx jêx jos tưz gôngr hnuz côngz chiê khơưz, cxiv plas tas nro tsiv grê 300 tsov đeiv. Txos nhiv no, tsêr vênhx huôv jos Pe, xã Sốp Cộp tưz uô tiêr thiêz chox lol sir zôngv, yuôr tsêr vênhx huôv 7 jos tsênhv tâu krêz uô. Tix lâuk Lào Văn Khiên, tsar jos Huổi Pe, xã Sốp Cộp heik:

          “ Tâu huyện paz txưv cxiv tsêr vênhx huôv jêx jos, cxôngx nhiv no tsôngv box 2 jos tưz muôx tsêr vênhx huôv đar chiê tsôngv box xênhz huôx, uô phêv”

          Txơưv zos tỉnh pluôs, taz sik phênhv ntâu têx côngz tsinhx zuôr trâus phưx vưv côngv thôngx li liv zix nhoz nôngx cxênhz tỉnh Sơn La puôr lênhx tâu tsôngv box chiv chir gôngr côngv đas jos uô. Pos nhuôs têx tiv phaz truôx siêz gôngr têx ziv chênhv jông thâuv cxiv tsa tsưr ziv yưv pênhr phuôv tsar; sik côngv đas jos uô têx côngz tsinhx... Tiv zix, tưz muôx ntâu ziv chuôz zis chiv chir gôngr ar uô xênhz yar, ar nhoz...chiê cxiv tsa nôngx cxênhz yiêz.

          Tiv zix zos xã Chiềng Khương huyện Sông Mã, tsuôk hâur 4 shôngk đhâu, tsôngv box tưz gôngr 5 tỷ đeiv ntâu, 20 cxênhz ntâu côngz lox tôngv, gôngr côngv 12 cxênhz yiv ndis ar thiêz 2 cxênhz 400 yiv đruôz môngr suôz jêz... chiê krêz uô cêr zaoz thôngz, tsêr vênhx huôv... Lok sik li zơưv Lò Văn Chum li chuôz zis nhoz jos Dăm xã Chiềng Mai, huyện Mai Sơn tưz gôngr 360 yiv ndis ar liêx thiêz têz chiê uô cêr mul lol hâur jos; zơưv Tòng Văn Ngon nhoz xã Mường Giàng, huyện Quỳnh NHai cux gôngr 300 yiv ndis ar chiê civ tsa nôngx cxênhz yiêz. Khov co, txos nhiv no Sơn  La tưz tax fênhx pheiz 7,3 ploz tsênhr iz xã, muôx zuôr xar 70 xã tax cxôngx 8 ploz tsênhr ndê mul. Zơưv Nguyễn Anh Hữu, phưv chánh văn phòng Ban điều phối tsaz yênhx cxiv tsa nôngx cxênhz yiêz tỉnh Sơn La puz pâuz:

          “ Chiê huiz tôngv tâu pênhr jos hâur cxiv tsa nôngx cxênhz yiêz, HĐ tỉnh tưz tso tơưv nghị quyết 115 cui tênhv phênhv paz txưv cxôngx nhiêx txiêx têz qơưk tsês cxiv tsa nôngx cxênhz yiêz. Hâur co, cui tênhv phênhv huiz tôngv tsav cxôngx 30 txos 100% trâu têx njuôs xav cxiv tsa nôngx cxênhz yiêz”.

          Kaz shôngk shông no, tỉnh Sơn La zuôr muôx cxaz 5 xã tax tâu nôngx cxênhz yiêz, chuôz ndê têx xã tax tâu nôngx cxênhz yiêz hâur tas nro tỉnh txos 8 xã, chêx cuk co zos khov muôx côngv thôngx thiêz tsôngv box tiv phaz li cêr sik côngv tês hâur cxiv tsa nôngx cxênhz yiêz nhoz tỉnh tox siêz Sơn La./.

                                           (Hồng Việt- Txâur Vax cxeik nhênhv)

Phênhv thưr 2 hnuz 14/11/2016

Đêx anr hlôngr yiêz phôngx cxưx

      Thâuv muôx lênhx nênhs pur 120 shông tâu tas siv nênhx, tsôngv box Hmôngz nhoz tox siêz Văn Chấn cux tsênhv muôx iz cxiê phôngx cxưx tsik huv đros luz nênhx vênhx huôv xưk li: Tsik muôz lênhx nênhs tuôs ntơư tso trâu hâur xaz, têx phôngx cxưx uô đaz uô kruô truz ntêr txix 3 txos 4 hnuz…Taz sik têx phôngx cxưx co tưz tâu tso tsês sêiz txix thâuv chor xã sâuv thax tsav huyện Văn Chấn sir jos uô đêx anr “Hêik tsôngv box hmôngz uô lơưr luz nênhx vav mênhx hâur nox yôngz cok, uô đaz uô kruô”. Pos Bla Xênhv Muôk, 80 shông, iz lênhx nênhs muôx suôz bê nhoz jok Pang Cáng, xã Suối Giàng, huyện Văn Chấn puz pâuz:

 “Thâuv ntêx uô đaz uô kruô phiv liv hênhr, nhiv no hlôngr yiêz ntâu, cux shir phaz viv tsik tsuv cxơưx li thâuv ntêx lơưv”.

Hâur tsôngv box Hmôngz li yôngz cok thâuv ntêx no cux muôx ntâu chêi. Hâur iz jiês nox yongz cok truz ntêr txix 2-3 hnuz, tuô lok six ntâu kêiz buô…Đhâu thâuv uô Đêx anr, têx phongx cxưx tsik huv đros hâur nox yôngz cok tưz tâu tso tsês, yôngz cok tâu uô vav mênhx thiêz tsuôk nox hâur iz hnuz. Zơưv Đằng Xênhv Zax, Bí thư xã Suối Giàng, huyện Văn Chấn puz pâuz: Chiê hlôngr yiêz tsôngv box Hmôngz li tsưr ziv xar hâur nox yôngz cok, uô đaz uô kruô, xar tưz sir jos uô khov lơưr pêx xênhv li thôngx ziv siêz:

 “Pêz tưz cơưv đros tsưr chor chuôz xênhv, chor nênhs muôx suôz bê. Đhâu thâuv cơưv thôngx ziv têx tsênhv njiêz lơưv thiêx kriz uô phêiz côngz trâu cán bộ Đảng ủy thiêz UBND xar muk trâu chor jêx jok chiê kriz uô, côngv đros chor nênhs muôx suôz bê hâur côngv thôngx. Txos nhiv no mak pêz pov pêx xênhv thôngx ziv thiêz uô trơưk Đêx anr cux xưk li xrr li têx cuiz tênhv”.

Ntơưv xar Suối Bu, iz xã tox siêz txơưr đuô nhoz huyện Văn Chấn, nox yôngz cok, uô đaz uô kruô lơưr luz nênhx vênhx huôv cux tâu hâu nov ntơưv qơư sir jos kriz uô. Zơưv Tùng Xênhv Vax, Bí thư Đảng ủy, Chủ tịch Hội đôngx xar zos nênhs uô uô ntêx txix xiês hâur zuk chuôz zis, chiê pêx xênhv tiv phaz uô trơưk.

 “Thâuv cơưv chor lâul jok, chor chuôz xênhv mak muôx iz cxiê cav uô iz cxiê ho tsik cav. Taz sik đhâu thâuv kruôz kriê, hêik pâuz mak tas nro pêx xênhv puôr lênhx uô trơưk. Hâur ntu zuôr txos mak tror sir jos uô, hâur uô đaz uô kruô mak tsês tsik ntâu đuô oz hnuz, tiv zix zos tsik tuô ntâu tsiêx; hâur yôngz cơk mak hêik chor hluôk siz zuôr thâuv txâuk hnuz nhôngs, thâuv nox yôngz lok cux nox hẩu riz hnuz thiêz tsik nox ntâu”.

     Zơưv Trịnh Khắc Nghĩa, tsar phongx vênhx huôv-thôngz mông huyện Văn Chấn puz pâuz: chiê uô muôx chêx cur Đêx anr “Hêik tsôngv box mênhx cxưx Hmôngz uô lơưr luz nênhx vav mênhx hâur uô đaz uô kruô, nox yôngz cok” hâur 3 shông đhâu, lênhx tov huyện tưz phêiz côngz jênhv vưv trâu yênhx lênhx nênhs Ban chox kriê sik côngv đros bí thư Đảng ủy chor xã sir jos uô côngz xưv thôngz mông, yax kriê txos chor jêx jok thiêz yênhx ziv chuôz zis. Sik côngv đros uô hâux lưv yax kriê txix oz zav luk (luk tsoz tsiz thiêz luk Hmôngz) sâuv cxiv luôs Đaix nta suôz tiv phaz. Đhâu co, 100% tsôngv box Hmôngz tâu yax kriê thiêz cir jênhv uô lơưr đêx anr li têx tsênhv njiêz. Zơưv Nghĩa puz pâuz nzir:

 “Pêz hêik trâu UBND huyện tror kriz uô đêx anr “Hêik tsôngv box Hmôngz uô lơưr luz nênhx vav mênhx hâur uô đaz uô kruô, nox yôngz cok”. Thôngx cxix hêik pâuz kho đuô têx chêi hâur jêx jok huv đros nhiv no, đhau co tưz paz txo grê têx phôngx cxưx pôngz kaz, gra siêz luz nênhx trâu pêx xênhv”.

    Txơưx xar tơưv thiêz uô jông Đảng têx chỉ thị, nghị quyết hâur luz nênhx, chor tiv phaz tox siêz Yên Bái tsênhv hlôngr yiêz huôv tsar uô hâur yênhx hnuz. Kror shir phaz tiv zix zos iz tsaz yênhx thâuv kriz uô tưz uô huv đros tsênhv tsênhz nhoz tiv phaz, jênhv tâu tsôngv box cxuô mênhx cxưx sâuv thax tsav li thôngx ziv đros uô hâur thax tsav./.

                           (Đinh Tuấn-Lik Thox cxêik nhênhv)