Sơn La chuôz tsar têx tsưr ziv chiê por vêv tênhx qơư hâur ntu tsiv uô cà phê

          Tsênhv zos cheix sâu, tsiv uô cà phê, taz sik nhoz buôk niêv cêr 6, ntu txix thành phố Sơn La muk txos huyện Thuận Châu, tỉnh Sơn La têx hnuz no tsi pov muôx qênhx shênhx têx ziv chuôz zis tsôngv box chiv chir tsiv uô cà phê li ntu đrav ntêx thiêz; hlôngr co zos têx ziv chuôz zis chos cà phê tưz muôs ciês cà phê nhôngs trâu têx qơư sâu zuôr, doanh nghiệp sâu zuôr chêx chôngk chiê por vêv tênhx qơư.

          Chuôz zis tix lâuk Quàng Văn Tính nhoz jos Phiêng Tam, xã Chiềng Đen, thành phố Sơn La zos iz hâur têx qơư sâu zuôr cà phê nhôngs sâuv thax tsav. Muôx mênhv chêx đar 4 cxênhz yiv ndis ntâu, iz hnuz tix lâuk Tính sâu zuôr, tsiv uô muôx nhos 30 ntâu tênhr txir cà phê, taz sik chuôz zis li qơư tsiv uô cà phê cux tâu ntâus grê tsi tâu tuôv zênhv tâu têx ploz tsênhr lok tênhx qơư. Viv li, uô cam kết đros UB thành phố Sơn La, chiv cà phê shông no, tix lâuk chuôz zis tsi tsiv uô ntơưv chuôz zis li tsêr xươngv thiêz mak chox tas nro chor cà phê tưz sâu zuôr tâu muk qơư tsiv uô ntơưv TP Sơn La, kuôk tsêr nhoz zuôr xar 20 cei cêr chiê uô, đhâu co thiêx chox lok jiêz, kra kruôr chiê taz por vêv xênhz tênhx qơư, tiv zix zos por vêv hâur đêx thành phố Sơn La:

          “Saz thành phố heik tiêk hâur đêx trâus kiês nênhs mak chuôz zis cux uô jông, hlôngr cà phê muk qơư txơưr chiê tsiv uô, hâur six hơưv uô têx ziv chuôz zis tưz khưx phưx thiêz uô jông lơưr thành phố li heik kriê chiê por vêv tênhx qơư”.

          Zos iz hâur 4 qơư tsiv uô cà phê lox, tâu UB tỉnh Sơn La thôngz đhâu pov cov ntâus grê lok tênhx qơư, Công ty TNHH tsiv uô thiêz muôv muôs Cát Quế nhoz jos Đông Hưng, xã Muổi Nọi, huyện Thuận Châu tưz yưv pênhr cxiv tsa cxix luôk yưr lir đêx kiês nênhs cxôngx huôx tôngv tsiv uô cà phê tsiv grê zuôr xar 10 tỷ đeiv...

          Tix lâuk Phạm Thắng, Giám đốc Công ty TNHH tsiv uô thiêz muôv muôs Cát Quế puz pâuz, chiê por vêv tênhx qơư, hâur đêx, đrâuv cxix luôk yưr lir đêx kiês nênhs, Công ty tsênhv nhênhz chơưv, tsiv uô qir vi sinh cxôngx plâuz cà phê thiêz đêx kiês nênhs txix cà phê. Têx zav no thâuv ntêx tâu seiz zos tsi zôngv txos tsuv por tsês, taz sik nhiv no tâu vâuv uô qir vi sinh phưx vưv tsêz chos kôngz nuv tsơưr lươngv siêz.

          “Nhiv no pêz tuôv zênhv cxix cxuô Sở tài nguyên thiêz tênhx qơư li têx theox chênhv tso tơưv. Nhiv no qir vi sinh cux zos iz phênhv sâu chiê pêz tror yưv pênhr hâur hâux lưv tsiv uô, đêx cà phê pêz cux tsiv uô yênhx qir vi sinh chiê muôs trâu pox nhuôs, muôx iz phênhv sâu chiê paz txưv tsiv uô”.

          Tas nro tỉnh Sơn La nhiv no muôx 30 cxênhz hecta ntâu cà phê, chor cà phê nhôngs shông no njuôs xav tax 400 cxênhz tênhr; hâur co, 99% cà phê nhôngs zuôr tâu tsiv uô yênhx cà phê phưx vưv muôv muôs hâur têz qơưk thiêz saz đrâuv têz qơưk.

          Chiê taz por hâux lưv sâu zuôr cà phê trâu tsôngv box, cux xưk li chuv tôngv phax tar têx hâux lưv uô kiês nênhs tênhx qơư thâuv tsiv uô cà phê, ntu đhâu, têx huyện, thành phố hâur tỉnh Sơn La tưz yênhx lix têx Đoanx liên nganhx muk qênhz yuôx, seiz car têx qơư tsiv uô kôngz nuv; cir ntơưr đros têx qơư no chiê por vêv tênhx qơư, hâur đêx; truôx siêz yưr lir txos qơư têx lênhx nênhs uô cxâuv, thôngx cxix muôx tsưr ziv paz pox nhuôs sâu đêx, muôv muôs trâu têx qơư tsiv uô lox muôx cxix luôk yưr lir tsơưr uô kiês nênhs. Tix lâuk Lò Văn Thương, Chủ tịch Hội nôngx mênhx xã Muổi Nọi, huyện Thuận Châu puz pâuz:

          “Cxôngx shông 2018 tror lok no,  têr plâuz cà phê nhoz têx ziv chuôz zis tsi muôx lơưv, viv lơưr heik kriê lok por vêv tênhx qơư mak têx chuôz zis chiv chir uô hâur tsêr zuôr tsi taz por por vêv tâu tênhx qơư; tiv 2 zos têr plâuz cà phê tsi chêx chôngk mak cux tsi taz por tsơưr lươngv cà phê”.

          Đros hâux lưv krêz uô uô cê ntâu tsưr ziv, tỉnh Sơn La shir jos tsi chiê tror muôx yưv qênhx shênhx tênhx qơư trâus kiês nênhs txix hâux lưv tsiv uô cà phê, uô zênhr shar txos tsôngv box li luz nênhx, tiv zix zos hâur đêx xênhz huôx nhoz TP Sơn La thiêz huyện Mai Sơn têx shông nhiv kruôr đhâu./.

(Trấn Long- Txâur Vax cxeik nhênhv)

Tsênhz tiês lok têx côngz trênhx, tsêr cơưv ntơưr nhoz thax tsav tox siêz tsôngv box heir nênhs tsơưs

    Tsêr cơưv phưv thôngz mênhx cxưx niêv txir zus mor lok zos phổ thông dân tộc niêv txir zus cxênhx iz Nậm Búng, xã Nậm Búng, huyện Văn Chấn zos tsêr cơưv nhiv kruôr yênhx lix thâuv hli 4/2021. Co cux zos chor nhuôs heir nênhs tsơưs hâur thax tsav li qơư xênhz huôx thiêz cơưv ntơưr. Tsêr cơưv yiêz, cxiv uô jông, hur si têx trôngx tos jâuv cơưv ntơưr lok cux tâu zuôr yiêz, co tsi tiêk zos têx lênhx cưk kriê thiêz shux xênhz hâur tsêr cơưv cêr shir phaz, mak zos hur si têx nhuôs li niêv txir cêr jông siêz, shir phaz. Nhiv no lơưr muôx têx tso siêz tso chor tuz nhuôs tuôx muk cơưv ntơưr, viv têx nhuôs tsi trâul nhoz cơưv hâur têx qơư đaz tuôs, tsi trâul no, trâul yar cuz, nas ntuz thâuv cheix ntux no, ntux nas li nhoz cơưv hâur kror qơư kuz thâuv ntêx.

          Trơưk li cưk kriê Nguyễn Văn Du, Phưv thơưx seiz car tsêr cơưv, nhiv no tsôngv box heir nênhs tsơưs têx tuz nhuôs nhoz jê iz ndis, tsêr cơưv yiêz no jông trâu chor nhuôs shux xênhz nhoz cơưv ntơưr, xênhz huôx. Taz sik iz chas têx zôngx ziv, cux tsênhv muôx têx phiv liv trâu chor cưk kriê thiêz shux xênhz hâur tsêr cơưv Nậm Búng thiêz.

“Đêx xênhz huôx mak têx nhuôs shux xênhz cux tsênhv zôngv khov trâu tsôngv box, ntơưr cơưv 100% chor nhuôv tsuv zuôr hur si, taz sik tsôngv box tox siêz txov nhêv lơưr cux zuôr tsi tâuk têx ntơưr trâu mê nhuôv cơưv. Tsêr cơưv cux heik shux xênhz niêv txir, txơưv zuôr tsi tâuk tas têx ntơưr cơưv lok zuôr cov tâu fâu toán thiêz tiếng việt, yuôr đuô li mak lav cơưv trơưk cưk kriê têx ntơưr, viv chuôs li sơưr đơưk zuôr tsi tâu chor ntơưr cơưv co. 60% lênhx nhuôv zuôr tsi tâuk cxix cxuô têx ntơưr uz no cơưv”.

    Zơưv Nguyễn Văn Tiến, Chủ tịch xã Tiên Nguyên, iz xã tox siêz hâur huyện Quang Bình, tỉnh Hà Giang heik pâuz: Taz por qơư nox nhoz xênhz huôx trâu cưk kriê ntơưr thiêz shux xênhz nhoz têx tsêr cơưv hâur thax tsav xã, mak phênhv ntâu cux tâu trơưk li tsưr ziv xar, taz sik tsênhz tiês têx côngz trênhx cux tsênhv muôx tsi tâu tâu txâuk, lar heik zos qar tsêr cơưv thiêz qơư xênhz huôx côngv thôngx. Xar cxiv kho cux iz zav liv cxiv uô nzir taz sik tsi muôx nhiêx txiêx, hu zâuv tsôngv pêx xênhv sơưr đơưk sik đros paz lok cux lax, viv pêx xênhv puôr lênhx zos heir nênhs tsơưs luz nênhx txov nhêv, paz tsi tâu. Chênhr zos li heik co, lok six zuôr trâul txos cxuô cấp, cxuô ngênhx sik đros paz max chiê uô li chas cov taz por luôs hâux lưv kriê thiêz cơưv ntơưr nhoz thax tsav tox siêz tsênhv yuôr ntâu txov nhêv.“Tsi tâu muôx txâuk qơư cơưv, qơư uô hâux lưv lok cux tsi tâu muôx. 2, 3 shông uô ntêx xã cux hu zâuv shux xênhz li niêv txir, canr bôv….sik đros paz, taz sik cux tsuôk zos vor kuôr hlâu, cxiv uô tsi tâu tâu trơưk li têz qơưk tsaz yênhx, tsưr ziv. Cux tsuv taz por khor truôx lơưv, lar heik zos têx qơư nhoz cơưv ntơưr tsuv khor truôx jông, taz sik tsi yuô tâu jông xưz, muôx tsi tâu txâuk qơư cơưv ntơưr, tsuv kêr tax chor cưk kriê qơư uô hâux lưv chiê kriê ntơưr trâu shux xênhz, lok six grêiv hênhr”.

    Muôx tsi txâuk ntơưr cơưv, qơư nhoz cơưv ntơưr, uô hâux lưv, co zos têx mak chor tsêr cơưv nhoz tox siêz đêz đrôngs, tsôngv box heir nênhs tsơưs cux tsênhv njiz trâul. Taz sik đros thiêz Têz qơưk cêr moz siêz txos txix têx tsênhv chei jông đros trâu XH têx cêr paz max, tsi ntêr no luôs hâux lưv co muôx têx zuôr tâu cxiv uô cov muôx cxix cxuô qơư nhoz cơưv ntơưr, qơư uô hâux lưv trâu chor cưk kriê ntơưr thiêz têx tuz nhuôs shux xênhz. Chiê cov têx nhuôv shux xênhz, shux xênhz li niêv txir tso siêz chiê têx tuz nhuôs tuôx cơưv, taz por luôs hâux lưv kriê txux chi Đảng, pêz têz qơưk lol six moz siêz txos ntơư./.

                            (VOV4-Riê Lâux cxeik, nhênhv)