Hluôr tơưl cuz thiêz cêr cxơưx nhoz tox siêz Yên Bái

Cxơưx hlo tsav hluôr tơưl cuz tsêr hâur têx hnuz yar ntux cuz sor zos ntâu ziv chuôz zis nhoz huyện Lục Yên hêik taz, tỉnh Yên Bái hêik cxuô li cêr cxơưx. Xav txix hâur chêix ntux sor shông no, ntơưv tiv phaz tưz muôx yưv 11 txuz uô hluôr tơưl cuz, uô 8 luz tsêr trâus cuz hnhiêz tas hur si, hâur co muôx oz luz tsêr tsar lơưx trâus cuz hniêz, grê nhiêx nto tỷ đêiv.

Đros qênhx shênhx co, pox nhuôs sơưr đơưk tưz siz hêik đros phax tar hluôr tơưk li: tsik so muôx nênhs lâul nhoz tsêr, thâuv uô jâuz mor nox tas, tsuv muôx đêx tuô hur tiz si têz têx chuz tơưl thiêz tsik chiê mê nhuôv cor tênhz cxuôv hluôr tơưl …Taz sik, no cux tsuôk zos iz kror xưz, zos tiêk muôx yưv hluôr tơưl cuz mak cux zuôr lok six phiv liv, viv nhoz tox siêz, têx qơư nhoz đêz muôx tsik txâuk cxuô zav chiê tuô hluôr tơưl cuz sêi. Zơưv Bàn Hữu Quý, nhoz xã Tân Phượng, huyện Lục Yên, tỉnh Yên Bái hêik:

“Ntu đhâu pov cuz tsêr ntâu mak pêz cux cxơưx hênhr. Pêz cux tsuôk pâuz siz hêik đros phar tar xưz tsik pâuz uô li chak nzir, viv pêz chor tsêr tâu uô txix ntông thiêz vor blôngx cọ”

Hâur cxuô txuz uô hluôr tơưl cuz tsêr nhoz jêx jok, qơư pêx xênhv nhoz mak chuôs li chơưv paz tsik tâu, tiv pov pâuz pôngz lis, tsik muôx chuôz zênhx cxuô zav chiê tuô hluôr tơưl thiêz tsưr tsêr tsik nhoz tsêr. Qir tiv cuz zos tsik uô jông sêiz shuôk têx chuz tơưl thâuv uô jâuz mor nox tas, muôx chuô njơưx têx ndêis thiêx txêik cuz vax tsêr. Viv li, côngz xưv phax tar tơưs cuz hâur têx hnuz yar ntux cuz sor, kruôr gis tsik so tâu chính quyền tiv phaz sir jos uô, hêik trâu pêx xênhv pâuz. Zơưv Lê Trung Kiên, Chủ tich UBND xã Minh Quân, huyện Trấn Yên hêik:

“Ủy ban xã hêik pâuz tsik so sâuv loa yax mông thiêz hâur chor jiês cơưv chiê hêik trâu pêx xênhv pâuz thâuv tưs tsik nhoz tsêr lơưv mak muôz têx chuz tơưl thiêz tênhv tuô hur si. Tsik chiê thâuv tsik muôx nênhs nhoz tsêr tênhv siz txêik cuz thiêz hluôr tơưl hâur kror chuz cuz txêik trâu cxuô kror hâur tsêr”.

Jênhv pâuz cuz tơưs tsênhv zuôr phiv liv hâur ntu yar ntux cuz sor, lưx lươngv Cảnh sát phax tuô hluôr tơưk Công an tỉnh Yên Bái chuôz cxaz qênhz yuôx, xưv lik cov ngaz tuk tơưs cuz ntơưv têx qơư zôngx ziv njiz phiv liv siêz li: Chor qơư công nghiệp, ciêz, qơư pêx xênhv nhoz…Đros co zos yax kriê, hêik pâuz gra siêz pêx xênhv li jênhv pâuz lok phax cuz tuô cuz. Đại tá Tạ Khắc Hồng, trưởng phòng cảnh sát phax cuz, tuô cuz-chơưv paz Công an tỉnh Yên Bái puz pâuz:

“Tiv iz zos kriz uô côngz xưv phax cuz tuô cuz nhoz cxuô cấp, nganhx; thiêz gra siêz jênhv pâuz phax cuz tuô cuz trâu cxuô lênhx pêx xênhv. Oz zos cxiv tsa nênhs txâuk đas jos uô jênhv vưv, côngz xưv chiê uô chak cov gra siêz tâu chêx cur hâur côngz xưv phax cuz tuô cuz. Tsưr tsix cơưv shâuv phax cuz tuô cuz ntơưv tiv phaz chiê thâuv tưs muôs yưv hluôr tơưl cuz mak tuô tâu hluôr tơưl ciêz, txo grêk tsơưs tiv zix têx trâus hiêv tiv hluôr tơưl cuz”.

Hâur ntu zôngx ziv muôx yưv hluôr tơưl cuz hâur têx hnuz yar ntux cuz sor kruôr gis, qiv hơưv phiv liv, chính quyền thiêz pêx xênhv Yên Bái tsênhv taz tov sir jos uô cxuô luôs hâux lưv tir thêir chiê txo grêk tsơưs tiv zix têx trâus hiêv tiv cuz tơưl uô muôx yưv./.

(Đinh Tuấn-Lik Thox cxêik nhênhv)

Têx tuz nxeik nhuôs zâu iz siêz muk lơưr Đảng

Têx tuz nxêik nhuôs zâu HCM (hu trơưk lo luk ndax zos: Đội), zos iz tsưr tsix tuz nxêik nhuôs zâu uô hâux lưv ntơưv VN, zos Chủ tịch HCM thiêz Đảng Cộng sản Việt Nam xar tơưv thiêz tsa tâu hnuz 15/5/1941, nhoz trâu ntơưv jok Nà Mạ, xã Trường Hà, huyện Hà Quảng, tỉnh Cao Bằng thiêz tâu Đoanx hluôk nênhs cộng sản HCM seiz car.

76 shông đhâu, Đội têx cêr lịch sử thiêz tsưr ziv tir ntâuk trok châuz ziv hnuz ziv uô tâu truôx jông. Têx lịch sử ntơư, cêr chax chês co muôx đreiv hâur têx tuz nxêik nhuôs zâu Việt Nam li phôngz yaox thiêz zos iz phênhv thâuv tưs tưz zuôr tsuv muôx hâur lịch sử Đảng, lịch sử mênhx cxưx thiêz lịch sử Đoanx hluôk nênhs cộng sản HCM.

Hâur 2 tsav tir ntâu trok lox, ntâu lênhx tuz nxêik hluôk, nhuôs zâu Việt Nam nhoz 2 faz Nam, Bắc tưz paz iz phênhv tưs zuk txux chi tsưr ziv, đas jos đros tir ntâuk trok châuz, têx lênhx zênhz shôngx nhuôs zâu sir tas ntâu đas jos, tsưr ziv, trox nyar viv luz têz luz qơư, cxiv tsa jêx jok truôx tuk li: Vưx A Zênhz, Trần Văn Thọ, Nguyễn Bá Ngọc, Kơpa Kơlơng, Trần Văn Uẩn....

Ndê trâu ntu têz qơưs hlôngr yiêz-ntu huôv tsar ntâu lok sâuv khoa học công nghệ thiêz sir jos trâu luôs hâux lưv sik côngv đros luôs 2 chas sâuv ntiêx têz, têx tuz nxêik nhuôs zâu heik sâuv tưz muôx ntâu hlôngr yiêz đros thiêz yênhx châuv tsov lênhx tuz nxêik nhuôs zâu; yênhx châuv cxênhz lênhx seiz car têx tuz nhuôs heik ntơư hâur têx tsêr cơưv ntơưr, canr bôv car seiz chor nhuôs zâu nhoz têx thax tsav muôx tsôngv box; yênhx cxênhz lênhx canr bôv sêiz car uô đreiv luôs hâux lưv heik co thiêz têx lênhx đros uô muôx txâuk đas jos, txux chi lês uô hâux lưv hâur cxuô thax tsav qơư nhoz, têx qơư trâu chor tuz nxêik nhuôs zâu xênhz huôx, uô si, tsênhv niêx hnuz sir jos txoz cxơưx, tsoz phưz trâu têx nhuôs zâu hâur têz qơưk cêr huôv tsar.

Chox Đảng tsưr ziv, Nghị quyết uô lơưr hâur luz nênhx tsênhv tsênhz, hâux lưv tsưx phưv, txoz cxơưx thiêz choz kriê têx tuz nxêik nhuôs zâu cêr uô nênhx tâu cxơưz tiês uô tâu truôx jông. Têx luôs hâux lưv seiz car, choz kriê chor nhuôs heik sâuv hâur têx tsêr cơưv iz thênhv jux juk cxiv kho tâu truôx jông, têx hâux lưv uô kriê nhuôs li heik no ntơưv têx thax tsav tsôngv box nhoz, tsuv tâu cxơưz tiês thiêz nthuôr uô đêz đar, hâux lưv kriê cxaz txux chi tsưr ziv yuôr trâus trâu têx lênhx hloz mê njik zuôr tiêr gâux tiêr đrâul chiê nhoz đoanx viên muôx ntâu hlôngr yiêz thiêz uô tâu jông..... Ntâu phôngz yaox, hâux lưv uô yiêz zos têx nhuôs zâu li luôs hâux lưv tưz uô tâu trơưk tsưr ziv, siêz xar chiê sik đros cxiv tsa thiêz tsưx phưv têz qơưk. Cxiv vênhv tôngv "Têx tuz nxêik nhuôs zâu Việt Nam sik tưr uô jông 5 luôs hâux lưv trơưk Lâuk Hôx hêik kriê" tror khav tinhv têx tuz nxêik heik sâuv cêr ndo txiêx njis txos zơưv Hloz Hôx, tas nro iz tsôngv lax pêx xênhv sơưr đơưk hâur têz qơưk lênhx txir, lênhx zơưs siêz jông, txơưx njê; muôz jông qơư trâu têx nhuôs cêr cơưv txux chi, cơưv shâuv cêr uô nênhx, paz têx nhuôs uô nênhx tsiv txiêx, muôx liv trâu xã hội. Têx tuz nxêik nhuôs zâu Việt Nam nhiv no iz siêz muk lơưr Đảng: "Viv têz qơưk XHCN, viv zơưv Hloz Hôx tsưr ziv, siêz xar; thiêz zav tưs tưz sir jos uô cov tâu, zav hâux lưv tưs tưz uô cov tiêr"./.

(TTT-Riê Lâux cxeik, nhênhv)