Điện Biên: 63 ziv chuôz zis jok Pa Xa Xá tsuv tâu txar qơư nhoz sêi đrơưv tiv ar poz

Jok Pa Xa Xá muôx 63 ziv chuôz zis  đros xar muôx 280 lênhx nênhs tsênhv uô nênhx nhoz, 100% zos tsôngv box mênhx cxưx Khơ Mú. Jok nhoz ciês hâur tơư trôngz poz jêz siêz, ntâu shông pox nhuôs tsuv njiz trâus ar, poz jêz poz ntos lok hâur jok. Ciês 2 shôg tror lok no tưz muôx 3 jiês poz jêz  ntos, đros chor poz jêz lox hnhar muôx yênhx châuv tấn. Zơưv Quàng Văn Sơn, lênhx nênhs nhoz hâur jok puz pâuz:

“Ciês hnuz co mak ntux lok nas tas iz hnuz hmo, poz jêz ntos sâuv trôngz lok thâuv tưs cux tsik pâuz, tsuôk hnor đros iz tês xưz pêz đhiê muk txos chêk tưz pov poz jêz nhoz iz saz tsêr lơưv. Nhiv no mak pêz lok six cxơưx thâuv tưs muôx ntux nas lok mak pêz pưz tsik tsâus jos hlo, tsuôk nyêi tsav vax tsêr trâus hiêv thiêz cuôr yôngz tas hur si. Kror phiv liv nhiv no zos muôx nhos 80% mak xưz, muôx qơư mak iz thiêr thiêz chor poz jêz siz yôngx chuôs tsi, tsik muôx hnuz tưs tsik cxơưx hlo”.

Hâur chêix ntus nas shông no, đhâu qênhz yuôx thax tsav, chính quyền tiv phaz thiêz têx cơ quan txơưx jênhv tưz thôngx ziv uô tsưr ziv khơưz, uô plas, puôz ar poz jêz yênhx iz kror njưs thêir ntêr muôx yênhx puô thiêr saz pêv trôngz, đros tsưr ziv zos thêir poz jêz ntos lok hâur jok. Taz sik, đhâu têx coz nas chuô lox hâur ntu đhâu, kror qơư njưr thêir co tưz xưz iz kror đar muôx iz đok ntâu, txix co muôx yưv iz kror sưz poz ntêr yênhx puô thiêr pêv trôngz, zuôr muôx yưv lok six ntâu phiv liv trâu pêx xênhv jêx jok. Ntâu ar poz jêz zuôr poz lok trâu jêx jok thâuv tưs cux tsik pâuz. Zơưv Quàng Văn Biên, Phưv chủ tịch Ủy ban xar Pa Thơm, huyện Điện Biên, tỉnh Điện Biên puz pâuz:

“Pêz tưz cơưv thiêz sêiz lax hâux lưv, hêik trâu Ủy ban huyện. Huyện cux tưz tso cán bộ muk qênhz yuôx ciês thiêz tsưr ziv uô ntêx zos tsuv zuôr tax thêir vor kror njưs thêir ar poz jêz ntos co. Taz sik thax tsav no mak cux zuôr zôngx ziv muôx yưv poz jêz ntos siêz viv li ntu zuôr txos pêx xênhv jok Pa Xa Xá lok six khov vav txos Đảng, têz qơưk tsov cưv txos txar muk nhoz trâu iz kror qơư yiêz chiê pêx xênhv truôx siêz uô nox đuô”.

Trung tá Nguyễn Đình Lập, Đội trưởng đội muk uô hâux lưv ntơưv têx xar, Đônx pênhz phax Pa Thơm-phưv bí thư Đảng ủy xar Pa thơm puz pâuz: hâur ntu tok cxuô cấp chính quyền muôx tsưr ziv txar qơư nhoz trâu chor chuôz zis hâur jok Pa Xa Xá, uô ntêx, Đônx pênhz phax Pa Thơm cux tưz hêik trâu tas nro chor cán bộ, chiến sĩ hâur taz viv, bax chiê paz trâu pêx xênhv zos muôx yưv têx phiv liv:

“Đônx pênhz phax cux tưz hêik trâu Đảng ủy, chính quyền tiv phaz chox kriê lưx lươngv dân quân thiêz têx lưx lươngv cik txos cxiv tsa tsưr ziv chơưv paz thâuv muôx yưv phiv liv. Zos tiêk tsik muôx tênhv mak pêz cux muôx hêik pâuz thiêz muôx tsưr ziv txar pêx xênhv muk đhâu têx qơư phiv liv, têx jâuv mak txar lok trâu ntơưv đônx txơưv tiêk zos hmo ntux. Hok sâuv đêx lok pêz cux muôx fuôx gox hur si chiê chơưv paz thâuv muôx yưv phiv liv”.

Zơưv Ngô Xuân Chinh, Phưv chủ tịch Ủy ban huyện Điện Biên puz pâuz: huyện li tsưr ziv txar jok muk nhoz trâu kror qơư yiêz thiêz cux tưz tâu pêx xênhv thôngx ziv. Taz sik hâux lưv nriêr qơư nhoz yiêz nhiv no tsênhv yuôr ntâu kror. Đros co, nhiêx txiêx chiê txar qơư nhoz trâu tas nro jok nhiv no cux tas ntâu, viv njuôk xav uô ntêx tưz tas muôx 20 tiv đêiv. Zơưv Ngô Xuân Chinh hêik:

“Đhâu yax kriê mak pox nhuôs cux tưz thôngx ziv txar qơư nhoz trâu jok, taz sik qơư lok nhoz nhiv no tsênhv phiv liv, qir tiv zos qơư huyện xêir mak ho nhoz kuôk đêz qơư nhoz kuz. Tiv tsik tâu thôngx ziv, pêx xênhv tsik tâu txâuk siêz viv li nhiv o pêz cux tsik tâu pâuz hêik li chak trâu têx cấp chính quyền chiê sêiz shuôk bax nhiêx txiêx. Thiêz đros huyện li nhiêx txiêx chiê txar qơư nhoz trâu tas nro jok mak nhiv no cux tsik txâuk. Lok six khov txos tỉnh thiêz têx bôv nganhx trung ương paz nhiêx txiêx chiê txar qơư nhoz trâu jok Pa Xa Xá cov nzor thiêz taz por tâu ngaz tuk trâu pêx xênhv thiêz cxuô zav”.

Shông 2018, tỉnh Điện Biên tưz hêik pâuz têx thax tsav zuôr zôngx ziv njiz trâu phiv liv lok ar poz siêz. Hâur co, huyện Điện Biên tâu xav jênhv zos thax tsav tsik so muôx yưv ar poz jêz poz, iz cxiê xar tâ hêik pâuz zuôr njiz trâus phiv liv siêz thiêz nhoz tsik tâu tsuv txar muk trâu têx qơư nhoz yiêz. Viv li, đros qênhx shênhx qiv hơưv ziv hnuz ziv txơưr txar phiv liv, pêx xênhv jok Pa Xa Xá vav tiêk cxuô cấp chính quyền nzor kho đuô thiêz txar qơư nhoz trâu lơưr, chiê txo grêk tsơưs tiv zix têx trâus hiêv thiêz phiv liv zuôr muôx yưv./.

                                (Vũ Lợi-Lik Thox cxêik nhênhv)

PHÊNHV ĐAS JOS

Grê 6: Xưv bluô têx lênhx uô cxâuv chei têz qơưk lok ngaz tuk zav nox.

1.Tsưr tsix, xiz nênhs uô lax luôv zuôr muôs zav nox uô cxâuv chei têz qơưk lok ngaz tuk zav nox mak tsuv pâux nzir thiêz khưx phưx têx tsi jông trơưk chei têz qơưk cui tinhv.

2.Lênhx nênhs liv zôngv vax huôv uô cxâuv chei no li cui tinhv lok sik têx cui tinhv hâur txơưr đuô hâur chei têz qơưk lok ngaz tuk zav nox mak cux seiz têx uô cxâuv co li chas mak trâus tik cêr cxâuv lok sik yơưz vơưz txơưx jênhv uô cxâuv, zos uô tsi jông mak tsuv pâux nzir trơưk li chei têz qơưk cui tinhv.

3.Bluô nhiêx đros thiêz têx uô cxâuv hành chính cui tinhv grêix iz grê no tâu uô lơưr chei têz qơưk cui tinhv lok xưv bluô uô cxâuv hành chính; lênhx trâus bluô ntâu yax trơưk chei têz qơưk cui tinhv lok xưv bluô uô cxâuv hành chính mak cux tsênhv kis đuô 7 jiês grê zav nox uô cxâuv, phênhv bluô tâu uô lơưr tsi đhâu 7 jiês grê zav nox uô cxâuv; têx nhiêx sâu tâu tiv uô cxâuv mak pok trâus sâu tsês trơưk chei têz qơưk cui tinhv.

4.Chính phủ cui tinhv tsênhz mênhx lok sâuv têx uô cxâuv, phênhv xưv bluô têx cêr cxâuv hâur ngaz tuk zav nox cui tinhv ntơưv grê no.

Grê 28: Six hơưv, hnuz hnôngs taz por ngaz tuk zav nox đros thiêz qơư tsiv uô, zuôr muôs têx zav nox.

1.Qơư uô jâuz uô mor nox tsuv taz por, têx jâuz nhôngk tsi uô kiêk nênhs vuôz tsuôz, uô hiêv  li chas txos têx jâuz mor tưz uô tâu siêr.

2.Muôx txâuk đêx hur phưx vưv luôs hâux  lưv uô jâuz uô mor nox, zuôr muôs têx jâuz mor co.

3.Muôx chuôz zênhx sâu, khơưk por tsês têx vuôz tsuôz, kiêk nênhs taz por vêv xênhz.

4.Muôx qơư trâu têx đêx kiêk nênhs ntưk ntơưv thax tsav qơư zuôr muôs têx jâuz mor nox, qơư uô jâuz uô mor nox tsuv hur si, lax nziês.

5.Qơư nox mor tsuv lax, pov cêr, hur si, muôx tsưr ziv chiê tir thêir têx zôngr, caz uz no uô tsi hur jâuz mor....

6.Muôx chuôz zênhx, qơư por hưv têx zav nox, tsêr tơưv trôngx, qơư nzuôr têk thiêz sâu têx vuôz tsuôz, kiêk nênhs hâur niêx hnuz cov hur si, đu lus.

7.Lênhx nênhs sơưr thơưx taz viv muôx qơư nox mor tập thể, muôx txơưx jênhv taz por ngaz tuk zav nox.

Grê 29: Cui tinhv taz por ngaz tuk zav nox đros thiêz qơư tsiv uô, zuôr muôs têx zav nox.

1.Muôx chuôz zênhx, têik nhiêk trâu nhiêk têx zav nox nhôngk thiêz têx jâuz mor siêr.

2.Têx chuôz zênhx uô jâuz mor nox tsuv tâu taz por ngaz tuk vêv xênhz.

3.Têx tưx têis nox mor tsuv tâu nzuôr hur si, kruôr krơưr chiê.

  4.Uô trơưk cui tinhv lok đas jos, lênhx nênhs buôk ti tsiv uô, zuôr muôs zav nox li tsưr ziv thiêz uô jâuz uô mor nox.

Grê 30: Cui tinhv taz por ngaz tuk zav nox hâur tsiv uô thiêz por hưv têx zav nox.

1.Sir zôngv zav nox, têx jâuz uz no tsuv pâuz tsênhz qơư thiêz taz por ngaz tuk....

2.Zav nox tsuv tâu uô taz por hur si thiêz ngaz tuk.

3.Zav nox uô muôs tsuv muôz chiê hâur têx tuv tsov iêr lok sik têx qơư trâu huv vêv xênhz, cov tsi cxoz pâus, nas tsi ntuz, yar tsi jiêz, tsi cuz thiêz tsi muôx zôngr, caz uz no tsơưk, uô tsi hur; tâu muôz tso sâuv têx trôngx muôs lok sik têx qơư siêz đuô hâur pêv têz li tsi kiêk nênhs, vuôz tsuôz./. 

(Tuyết Lan-Riê Lâux cxeik, nhênhv)