Hang Kia, Pà Cò huyện Mai Châu sir jos tir tar

zax zênhz hâur côngz thôngx

Tror ndo txos ntu đrav ntêx no muôx zênhk zax zênhz, zơưv Xanh Xênhv Zax nhoz jok Pà Cò 1, xar Pà Cò huyện Mai Châu tror thav txos hâur 4 shông (txix shông 2008-2011), zax zênhz tưz tsik zos uô trâu kinh têr chuôz zis njiz phiv liv mak zơưv Xanh cux cxơưx tsik tâu trâu chuôz zis. Shông 2011 đhâu thâuv chiv tâu zênhk zax zênhz thiêz tsik chiê zuk tror muôx zênhk. Zơưv Xanh tưz đros pêx xênhv hâur jok yax kriê hêik chor nênhs nhoz tiv phaz tir tar zax zênhz hâur côngv thôngx. Zơưv Xanh Xênhv Zax, jok Pà Cò 1, xar Pà Cò, huyện Mai Châu, tỉnh Hòa Bình hêik:“Fôngx zưs zâuv muk uô si ntâu viv li tưz muôx zênhk, tov kaz no chính quyền xar yax kriê ntâu trâu pêx xênhv pâuz, cur muk chiv tâu zênhk zax zênhz lok nhiv no sir jos tror uô đuô luz nênhx”.

Cux xưk li zơưv Xanh Xênhv Zax, kror liv txix zax zênhz tưz uô trâu iz cxiê lênhx nênhs hâur jok luz nênhx tsik truôx tuk, taz sik no cux tsik tâu zos kror tsênhz ciês. Têx jâuv muôx yưv li co cux zos tiv lơưr txux chi kik, tsưr ziv lok uô nox tsênhv pôngz kaz yêiz pluôs tsik so. Sir jos hâur luz nênhx, đhâu thâuv chiv tâu zênhk zax zênhz zơưv Xanh tưz đros chuôz zis sir jos huôv tsar kinh têr, hlôngr yiêz tsoz chos tsiêx tu zus. Nhiv kruôr no zơưv Xanh chuôz zis tsênhv cxaz chuôz trâu tsưr ziv uô du lịch Homestay. Zơưv Sía Xênhv Shôngx-Phưv chủ tịch UBND xar Pà Cò, huyện Mai Châu, tỉnh Hòa Bình puz pâuz:“Uô lơưr huyện li chox kriê xar cux tsik so sêiz kaz jông cxuô lênhx nênhs đhâu thâuv chiv zênhk zax zênhz tas tror lok đros côngv thôngx mak uô đaz tsi, muk kror tưs, puôk tror muôx zênhk zax zênhz”.

Nhiv no, oz xar Hang Kia, Pà Cò huyện Mai Châu, tỉnh Hòa Bình muôx 20 ntâu lênhx nênhs muôx zênhk zax zênhz tsênhv tâu chính quyền tiv phaz chox muk chiv zênhk zax zênhz. Thôngx cxix tưz hêik tas nro cxiv luôs chính trị sir jos đros tsav txênhz tir tar chor nênhs phamv cxâuv zax zênhz sâuv thax tsav 2 xar. Hâur co muôx tsưr tsix yax kriê, zoz zux, hêik kriê têz qơưs têx chêi trâu pêx xênhv pâuz. Uô truôx jông tsưr ziv 5 chuôz xênhv chiv chir sêiz car. Phuôx huiz nênhs muôx suôz bê li pưk txux chiê yax kriê trâu pêx xênhv uô truôx jông lơưr cêr chêi têz qơưk. Côngz xưv paz trâu 2 xar huôv tsar uô xênhz yar, tsoz phưz trâu chuôz zis muôx luz nênhx txov nhêv, tuôr chiê vênhx huôv mênhx cxưx tâu sir jos kriz uô. Tiv zix zos khưx phưx, tror uô jông iz cxiê ntênhk hôiv, phongx cxưx cxôngx nzor trâu tsôngv box mênhx cxưx Hmôngz 2 xar Hang Kia, Pà Cò. No cux zos tsưr ziv chiê tiv phaz no kriz uô kror liv lok du lịch. Zơưv Phạm Văn Hoàn, Phưv chủ tịch UBND huyện Mai Châu, tỉnh Hòa Bình puz pâuz:“Đros oz luz xar no mak nhiv no cux muôx iz cxiê ziv chuôz zis uô dịch vụ Homestay zaz zâuv chôngz lênhx kruô hâur thiêz đrâuv têz qơưk tuôx ndis shuôk uô si nhoz so. Ntu zuôr txos huyện Mai Châu xav jênhv tror yưv pênhr uô cxuô zav chiê 2 xar huôv tsar kinh têr xar hôiv”.

Thax tsav Hang Kia, Pà Cò huyện Mai Châu, tỉnh Hòa Bình txơưv tiêk tsênhv yuôr ntâu txov nhêv. Taz sik, cux tsênhv yuôr nhoz co chor nênhs sir jos paz trâu jêx jok tâu truôx tuk, paz uô trâu thax tsav qơư no jông jav, truôx tuk đuô. Đros thiêz chính quyền tiv phaz tưz thiêz tsênhv kriz uô ntâu hâux lưv tsênhv tsênhz chiê uô truôx, gra siêz chêx cur uô hâux lưv trâu cxiv luôs chính trị 2 xar, huiz tôngv cxuô pênhr jos chiê cxiv uô cxuô zav, huôv tsar uô kôngz lônghk, tuôr truôx jông têx vênhx huôv mênhx cxưx chiê huôv tsar du lịch, paz muôx hâux lưv uô truôx thiêz muôx phênhv sâu tâu nhiêx txiêx trâu pêx xênhv./.

(VOV1-Lik Thox cxêik nhênhv)