Zơưv Xor Tsơưz muôx phênhv sâu tâu txix tu zus mur muôs jiz

Chor shông xuz thơưx thâuv nhiv kruôr txar lok nhoz ntơưv Bôm Lầu, Zơưv Xor Tsơưz Xênhv Thox chuôz zis cux xưk li ntâu ziv chuôz zis txơưr đuô hâur jok, tsuôk pâuz tok trâu chor blêx, poz cưk thiêz kok ntông viv li phênhv sâu tâu tsik ntâu. Đhâu iz jiês tror lok xar Longx Hex, huyện Thuận Châu, tỉnh Sơn La, zơưv pov pox nhuôs nhoz no zis tưs cux muôx oz pêz xuz mur zus iz ndis vax tsêr chiê zuôr jiz, zơưv tưz nriêr pâuz đhâu têx ntâuz ntơưr thiêz uô zus siv oz pêz xuz mur hâur zuk chuôz zis luz vax txir ntông. Taz sik, xuz thơưx zus mak cux njiz ntâu phiv liv.

Tsik pôngz siêz, zơưv muk ndis shuôk, cơưv shâuv tsưr ziv zus nhoz ntâu qơư zus mur hâur huyện thiêz tỉnh, tiv zix zos ntơưv qơư tu zus mur nhoz phường Chiềng Sinh, thành phố Sơn La. Đros cxaz chuôz cơưv shâuv têx tsưr ziv, kỹ thuật tu zus mur. Khov co, zơưv tưz muôx tâu chênhz zênhv tu zus, phêiz chor paz mur chiê muôx tâu ntâu xuz đuô. Shông 2010, zơưv yưv pênhr uô  tâu 40 xuz mur thiêz txos shông 2014 yưv pênhr kriz đar qơư zus ndê muôs 100 ntâu xuz. Cê zus cê cơưv shâuv nzir, iz shông zơưv sâu oz jiês jiz, iz jiês sâu tâu 10-15 cir jiz mur, muôs 100 ntâu xcênhz đêiv iz cir. Iz shông zơưv chhuôz zis sâu tâu 100 triệu đêiv ntâu. Lơưr zơưv Xor Tsơưz, chiê zus tâu mur jông mak tsuv muôx tsưr ziv tu zus cov jông thiêz huv đros:

Tưz tsik zos uô bluô nux trâu zuk chuôz zis, txix chênhz zênhv zuk muôx tâu, zơưv tưz phêiz kênhz, paz trâu 8 ziv chuôz zis hâur jok đros zus, tas nro chor xuz mur hâur jok tưz ndê muôx 300 ntâu xuz. Zơưv Lường Văn Tỉnh, Chủ tịch UBNd xar Chiềng Ly, huyện Thuận Châu, tỉnh Sơn La puz pâuz: Chor jiz mur no mak tâu nênhs zuôr lok six nhiêv, tiv jông xưk li têx jiz mur hâur har jôngr thiêz kror jêz. Chor nênhs zuôr tuôx ti gâuk qơư chiê zuôr đros gri siêz đuô têx zav jiz mur nhês txơưr. Zuôr txos no, xar zuôr kriz đar đuô tsưr ziv zus mur no trâu chor chuôz zis thiêz chor jêx jok muôx thax tsav qơư xưk li ntơưv jok Bôm Lầu zus, paz trâu pox nhuôs muôx nzir phênhv sâu.“Zuôr txos no xar zuôr hêik chiê paz trâu chor ziv chuôz zis txêik nzir pênhr nhiêx chiê kriz zus nzir chor xuz mur cov muôx nzir phênhv sâu. Cux zuôr hêik trâu hôiv tu zus mur tỉnh Sơn La đros paz nzir lok têx tsưr ziv tu zus, kỹ thuật zus thiêz sâu zuôr têx jiz mur cxuô zav trâu pox nhuôs cov sơưr đơưk tso siêz đuô”./.

(Lik Thox cxiv sâu thiêz cxêik nhênhv)