Jax 3: Tsuv nzor đơưk tu têx phiv liv, cov muôx liv

trâu lênhx nênhs muôz ar chos ntông cao su

Trơưk li Ủy ban huyện Điện Biên, têx zôngx ziv sêiz pov tâu nhoz no zos ntơưv têx thax tsav chos ntông cao su tưz hlôngr yiêz, tsôngv box luz nênhx xênhz huôx nox nhoz jux juk truôx tuk tsâu sor. Huyện tsưr ziv zos chêx tsôngk yax kriê trâu tsôngv box đros por hưv jông têx ar têz chos ntông cao su muôx nhiv no, krêz sâu têx cuô mik ntông cao su thâuv txos cheix sâu chiê uô qơư phênhz pheiz têx muôx liv trâu tsôngv box. Zơưv Ngô Xuân Chính, Phưv Chủ tịch Ủy ban huyện Điện Biên heik:

“Chiê muôx liv lok kinh tế trâu tsôngv box muôz ar têz chos ntông cao su mak pêz tưz heik Sở nhiêx txiêx heik trâu Ủy ban tỉnh Điện Biên cov uô hâux lưv, thôngx ziv đros tập đoanx cao su chiê uô tsênhz mênhx lok sâuv iz cxiê hâux lưv li: Grê muôs têx cuô mik cao su cux li siz pheiz kênh têx cao su nhôngk liv uô cao su kruôr chiê  uô qơư tuôr xav nhiêx txiêx pheiz trâu têx lênhx tsôngv box thâuv lơưr đros muôz ar chos ntông cao su”.

Trơưk li ngênhx kôngz nuv tỉnh Điện Biên, yuôr iz cxiê phiv liv hâur seiz car têx têz ntông cao su zos lok sâuv thax tsav, suôv qơư. Hâux lưv krêz sâu têx cuô mik cao su mak uô ntâu jiês, chênhr viv li, seiz kaz têx cuô mik ntông cao su tsênhv njiz ntâu phiv liv, ntâu lênhx tsôngv box cux cxơưx thâuv pâuz zuk têx liêx têz muôz chos ntông cao shor zuôr sâu tâu pêk tsơưs. Viv li, xuz thơưx, tỉnh zuôr heik cxuô thax tsav qơư sik đros seiz kaz têx cuô mik ntông cao su krêz sâu tâu. Zơưv Trần Văn Thượng, Phưv Giám đốc Sở Kôngz nuv thiêz huôv tsar tox siêz tỉnh Điện Biên heik pâuz:

“Ntông cao su mak muôx lok six ntâu zav ntông, viv li hâux lưv seiz kaz li heik sâuv cux tsênhv njiz iz cxiê phiv liv cik txos tso sâu têx cuô mik cao su thiêz tsơưr lươngv. Viv nưk cik txos têx cuô mik mal zuôr cik txos hâux lưv uô, zuôr muôs. Tỉnh thiêz tập đoanx zuôr tsuv muôx jiês uô hâux lưv chiê thôngx ziv iz cxiê phiv liv hâur tsưr tsix uô chiê ntâuk grê lok huôv tsar cux li krêz đar thax tsav qơư”.

Txơưv tiêk tsênhv yuôr ntâu phiv liv, taz sik seiz pov ntông cao su ntơưv Điện Biên tưz gra lok têx muôx liv jông. Kror lar heik nhiv no zos nzor cxơưz sei luôs hâux lưv qênhz shuôs tus grê zuôr muôs cuô mik cao su, siz pheiz liv trâu tsôngv box muôz ar chos ntông cao su, uô tsênhz mênhx chei seiz kaz tsơưr lươngv têx cuô mik cao su tso tâu chiê tsôngv box muôz ar chos ntông cao su tsi trâus xiêk. Txix ntơư, tsôngv box sđ tso siêz huôv tsar chos thiêz tu têx ntông cao su./.

(Vũ Lợi-Riê Lâux cxeik, nhênhv)

200 ntâu lênhx mê nhuôs trâus sêv khiz lok

luz chêr nhoz Sơn La tâu fêik moz

Tsaz yênhx fêik moz jông siêz trâu mê nhuôs trâus sêv khiz lok luz chêr tỉnh Sơn La tâu tsưr tsix shông no zos shông tiv 8, trâu 1 cxênhz ntâu lênhx mê nhuôs hâur thax tsav tỉnh trâus sêv khiz luz chêr. Cxaz chuôz tsaz yênhx, tas nro têx mê nhuôs cxôngx 0 txos 16 shông trâus sêv khiz lok luz chêr zuôr tâu fuô moz tsi pôngz nhiêx txiêx thiêz paz txưv nhiêx txiêx nox, so, muk lok. Niêv lâuk Tòng Thị Thanh Quỳnh, zos tul nhuôs Hà Bảo Trâm 8 shông nhoz jos Puôi 2, xã Huy Tân, huyện Phù Yên trâus sêv khiz poz kêx cxa tơư li niêv heik:

          “Thâuv ntêx cur mê nhuôs trâus sêv khiz li no mak muk tsi tâus cêr, muk cơưv ntơưr mak tsi jông li têx fôngx zưs txơưr, cur mê nhuôs cux xar tâu đhiê uô si, tâu đhiê pax vuôs li têx fôngx zưs, taz sik tơư trâus li ntơưv mak uô tsi tâu, cur lok six hluz cur tul mê nhuôs. Cur xar njôngr cur tul mê nhuôs zuôr muk tâus cêr fênhx yax li têx mê nhuôs txơưr, tâu li ntơư mak cur jông siêz hênhr”.

          Tsaz yênhx fuô moz jông siêz trâu mê nhuôs trâus sêv khiz lok luz chêr tỉnh Sơn La shông no njuôs xav zuôr fuô moz trâu 216 lênhx mê nhuôs, phênhv ntâu zos mê nhuôs têx ziv chuôz zis pluôk, chuôz zis nhoz tox siêz đêz đrôngs. Thạc sỹ, bác sỹ Đỗ Xuân Thụ, Giám đốc Tsêr kho moz đa khoa tỉnh Sơn La puz pâuz: Têx lênhx mê nhuôs trâus moz hnhar mak pêz xa muk Hà Nội chiê fuô, tsaz yênhx zuôr paz tas nro nhiêx txiêx cxuô zav:

          “Tsaz yênhx xar njôngr kho tâu jông moz trâu têx mê nhuôs môngr tsi jông trâus sêv khiz lok luz chêr. Đhâu têx jiês sik côngv li no pêz cux tâu pâuz txos, cơưv shâuv chênhz zênhv fuô moz cxôngx têx lênhx nênhs fuô moz nhoz Trung ương, đhâu co muôz siêz yênhx tưv trâu nênhs fuô moz nhoz tiv phaz”

          Zơưv Đồng Văn An, giám đốc Tsênhv qơư 2, paz txưv mê nhuôs trâus sêv khiz lok luz chêr, Hội chơưv paz mê nhuôs trâus sêv khiz lok luz chêr Việt Nam puz pâuz:

          “Đrâuv co zos têx mê nhuôs fuô moz tsi tâu mak tsênhv qơư 2 zuôr paz txưv lok têx chuôz zênhx paz li yêz ntos, tơư chuôr... đhâu co pêz xar njôngr tov kaz no tsêr kho moz đa khoa tỉnh Sơn La cux zuôr uô tâu têx hâux lưv li tsênhv qơư 2 uô tâu, thiêz hâux lưv tsênhv qơư 2 sik côngv đros tsêr kho moz đa khoa tỉnh Sơn La zos txos shông 2022, xar njôngr tas nro têx vênhv thix zuôr tâu choz trâu tsêr kho moz”.

          Chox lok iz luz nênhx yiêz, iz cêr shir phaz trâu têx mê nhuôs trâus sêv khiz luz chêr, co zos têx tsiv gri jông hâur tsaz yênhx tưz uô tâu hâur ntâu shông đhâu./.

(Trấn Long- Txâur Vax cxeik nhênhv)