Tsôngv box Ma Sang cxơưx tox poz

Jos Ma Sang, xã Nậm Pì muôx 78 ziv chuôz zis, pheiz yênhx 3 thax tsav qơư, hâur co thax tsav tsênhv qơư muôx 60 ntâu ziv chuôz zis, zuôr xar 300 lênhx nênhs tsôngv box Hmôngz nhoz uô nênhx. Cxôngx shông 2018, nhoz thax tsav pov muôx 2 caz plêz lox lok six riêz nênhs. Iz caz kuôk iz caz muôx nhos 100 yiv ntâu thiêz ntêr yênhx châuv yiv tơưs iz buôk ndis thax tsav tsôngv box nhoz uô nênhx. Lơưr tsôngv box jos Ma Sang puz pâuz, têx caz plêz đar yênhx yiv, toz thiêz iz jiês jiês ntux lok nas cux uô ar poz 2,3 yiv. Têx caz plêz no tưz uô tsôngv box li tsêr nhoz, tsêr cơưv thiêz jos li tsêr vênhx huôv trâus keix, puôk tsuôx, uô pox nhuôs lok six cxơưx. Zơưv Zax A Chiếu, tsưr tsêr trâus ruôr hiêv lok tsêr nhoz tiv caz plêz sâuv trôngz puz pâuz: Pox nhuôs hâur jos lok six cxơưx thâuv ntux lok nas. Ntu no ntâu chuôz zis tsi car nhoz hâur jos thiêz tsuv khiêr muk nhoz pêv tsêr têz. Zos iz hâur 2 caz plêz co poz lok mak cux vôngz tas tsêr nhoz, chuôz zênhx chuôz tas thiêz pox nhuôs:

          “Toz mak nyei zuôr toz muôx nhos 2 yiv ntâu, cur txiêr iz tul pak ntêr 1,5 yiv njuôs cux tsi pov txos hâur kaz. Zos đruôz hnuz mê nhuôs uô si pôngz lok hâur no mak lok six riêz nênhs, viv li cur heik tuz nhuôs khơưk poz jêz thiêz nquôr xi măng trâu hâur co, thâuv ntux lok nas lox caz plêz ziv toz thiêz shông tưs cux tơưs ziv lox đuô. Viv li chuôz zis tsuv tsi so luôv xi măng, shông tưs cux luôv”.

          2 shôngk no, chiê taz por, thâuv đhâu cheix ntux nas têx chuôz zis hâur jos tsuv muk khơưk poz jêz tov têx tul đêx lok lâuz trâu hâur caz plêz co, zôngv xi măng luôv cov truôx; tsêr trâus keix iz saz mak sik đros paz max zôngv poz jêz tror cxiv đuô ndêx. Taz sik, kho tâu hâur shông no, cheix ntux nas shông tov kaz tror trâus puôk tsuôx. Têx caz plêz ziv đar, zos tsi vôngz mê nhuôs uô si môngr tsi jông pôngz trâu hâur co mak lok six riêz nênhs, viv li pox nhuôs tsi tso siêz uô lox tôngv, tsêz chos kôngz lôngk. Tsar jos Ma Sang Lầu A Chứ puz pâuz:

          “Hâur 2,3 shôngk muôx caz plêz no mak six fênhx tơưs lox jux jus. Caz plêz hâur iz shôngk no cxôngx hâur hlik hli 7 tơưs toz 1,5 txos 2 yiv, tsôngv box lok six cxơưx. Zos six fênhx chiê li no mak tsi pâuz zuôr jông li chas. Pêz xar njôngr têz qơưk txar qơư nhoz yiêz chiê taz por trâu pox nhuôs, tsi tsuv cxơưx thâuv txos cheix ntux nas thiêz”.

          Tsi taz zênhr shar txos tsôngv box li tsêr nhoz, 2 shôngk tov ntêx tox poz ntơưv jos Ma Sang tưz uô puôk tsuôx iz qar cơưv tưz tâu cxiv uô truôx. Chiê taz por, chiz coaz muôx txơưx jênhv tiv phaz cux tưz tuôx ntơưv jos, zôngv meir txiêr bê tông thiêz zôngv xor hlâu xor taz đrâuv cov taz por. Taz sik, qênhx shênhx ar jov thiêz poz tror muôx yưv thâuv txos cheix ntux lok nas, shông tov kaz toz đuô shông tov ntêx. Zơưv Vũ Văn Thân, Chủ tịch UB xã Nậm Pì, huyện Nậm Nhùn puz pâuz: Chiz coaz muôx txơưx jênhv tỉnh, huyện cux tưz tuôx qênhz yuôx thiêz tsôngv box cux tưz xeir tâu qơư nhoz yiêz. Taz sik tsi tâu luôv tâu qar tiêx viv li pox nhuôs tsi tâu tâu txar muk nhoz. Uô ntêx cheix ntux nas shông no, 13 ziv chuôz zis muôx caz plêz tơưs muk đhâu tsêr nhoz cux tưz thix ziv txar qơư nhoz uô ntêx. Chính quyênx xã khiêz phêv jêx jos, thôngx ziv tsưr ziv têx hnuz ntux lok nas zuôr heik tsôngv box muk đros têx chuôz zis txơưr nhoz chiê taz por thiêz tos huyện pheiz qơư nhoz chiê txar muk:

          “Ma Sang muôx caz plêz njuôs xav zuôr muôx tox poz tưz pov lok six tsênhz mênhx. Xã tưz đros têx chiz coaz muôx txơưx jênhv huyện thiêz thix ziv huyện tsưr tsix qênhz yuôx, ntâus grê. Txos nhiv no xã tưz muôx ntâuz ntơưr pov cov đros huyện thiêz tâu huyện thiêz tỉnh thôngx ziv txar qơư nhoz. Taz sik nhiv no tsi tâu muôx pênhr jos chiê paz tsôngv box txar qơư nhoz yiêz, cxiv tsa qơư nhoz yiêz, cơ sở cxuô zav ntơưv qơư nhoz yiêz”.

          3 shôngk đhâu, xã Nậm Pì, huyện Nậm Nhùn, tỉnh Lai Châu cux tưz txar 200 ntâu ziv chuôz zis nhoz thax tsav qơư txov nhêv, njuôs xav muôx tox poz siêz muk nhoz qơư taz por. Hâur co, cheix ntux nas shông 2018 xã tưz txar tas nro jos Pá Sập muk qơư nhoz yiêz. Đrâuv têx chuôz zis nhoz jos Ma Sang, jos Pá Đởn cux tsênhv zuôr trâus tâu txar qơư nhoz viv nhoz hâur thax tsav qơư njuôs xav muôx tox poz, cê zos jos txov nhêv. Taz sik, xã, huyện tsênhv yuôr ntâu phêv liv lok nhiêx txiêx, viv li lok six zuôr trâus tỉnh thiêz Trung ương li paz txưv, chiê pox nhuôs nzor tâu txar muk nhoz qơu taz por thâuv txos cheix ntux nas./.

                                                  (K.Kiên-Txâur Vax cxeik nhênhv)