Nênhs Poz Ziz têx tsêr tsar lơưx iz hnuz trâus pôngz plox jux juk

Pos Lù Thị Hương nhoz jok Bó, shông no tưz muôx 70 ntâu shông. Txơưv tiêk pos têx tuz nhuôs tưz cxiv uô tsêr tâu 2, 3 shông lok, taz sik viv pos cux tsênhv uô nênhx nhoz hâur luz tsêr tsar lơưx kuz, đaz tuôs, viv pos tưz nhoz sưv hâur têx tsêr tsar lơưx lơưv, nhiv no lok nhoz têx tsêr cxiv uô suôz jêz, xi măng mak pos nhoz tsi sưv. Đros trâu têx li heik co, tsênhv yuôr ntâu cêr cor cav xênhz huôx txơưr đuô li: Muôx kror chuz hâur tsêr, zôngx ziv mul lok uô jâuz mor nox, muôx tsuôr nzêix trâu têx uz no.... Iz chas kror chuz, hâur tsêr tsar lơưx zov chênhr zos qar tsêr txi côngv pox côngz zơưv côngz, pos zơưs tâu tas siv nênhx. Qar tsêr txi têx lâuk ntơư thâuv tưs cux zos qar cơưk ciês hâur luz tsêr tsar lơưx co, nhoz iz saz lênhx tsưr tsêr qơư pư. Qar tsêr cơưk co tsênhv chiê đei têx tơưz hiêz trâu têx nhuôs zâu pư, phiêr mê nhuôv pư tsâul jos, thâuv xênhz zus tâu lok đros thiêz tsưr ziv, siêz xar heik trâu chor lâuk, pox côngz zơưv côngz pâuz tiêk, chuôz zis muôx nzir lênhx nênhs yiêz. Hâur luz tsêr tsar lơưx khênhr muôx têx ndêx câuv thiêz ndêx trur, lơưr khênhr cor cav muôz têx hnênhr, flâuz vuôz ciz đei trâu sâuv têx ndêx trur, kror muôs tsêr chiê thêir đaz. Pos Lù Thị Hương heik pâuz:

“Nhoz tsêr tsar lơưx lax jông nhoz đuô, cur chor nhuôs cux xar cov cur lok đros lơưr nhoz. Taz sik nhoz cav tsêr tsar lơưx, muôx kror chuz, sưv nox nhoz mul lok, xênhz huôx sâuv tsêr tsar lơưx lơưv. Têz qơưk nhiv no hlôngr yiêz, lênhx tưs muôx mê njik cux cxiv uô, puôz têx tsêr ar nhoz tas, tsuôk yuôr 2, 3 luz tsêr tsar lơưx xưz, têx tsêr tsar lơưx txix cxênhx lâuk đrav ntêx uz lok”.

Zơưv Lường Văn Đích chuôz zis, nhoz đros uô cê hâur jok Bó cux tưz ruôr luz tsêr tsar lơưx kuz chiê cxiv uô đuô iz luz tsêr yiêz puôz suôz jêz, xi măng. Trơưk li zơưv Đích: cxiv uô tsêr li no khor truôx đuô pir li tsêr tsar lơưx, têx suôz jêz, xi măng muôx muôs hâur ciêz đrôngs, hok tsêr tsar lơưx mak nhoz tsi tâu ntêr, uô tâu iz ntuk tưz puôk tsuôx, tsi jông nhoz, têx shôngz ntông lok lax zok nriêr tâu. Txơưv tiêk nhoz hâur luz tsêr cxiv uô suôz jêz, xi măng khor truôx, taz sik zơưv Đích cux ndo txos tsêr tsar lơưx, viv tsi tiêk lax nziêk jông nhoz, mak chuôz zis cêr cor cav xênhz huôx niêx hnuz puôr lênhx zos hâur luz tsêr tsar lơưx. Nhiv no lok nhoz luz tsêr no, cxuô zav hâux lưv, cêr xênhz huôx, vênhx huôv....hâur chuôz zis puôr lênhx tsuv kho đuô, uô li chas cov huv đros:

“Tsêr tsar lơưx tưz uô tâu ntêr lơưv, kuz thiêz tsi khor tas, tsuv uô đuô yiêz. Taz sik hâur têx xuz jôngr, xuz tsuôs mak tsi muôx shôngz ntông lox jông uô, tsuv uô tsêr cxiv puôz suôz jêz, xi măng nhoz xưz. Cux qiv thiêz tsi yuô jông siêz, viv thâuv ntêx lok chor lâuk iz txưv nhoz cav tsêr tsar lơưx. Nhiv no hâur pêz jok tsêr tsar lơưx yuôr lok six tsơưs, tuôr tsês tsi tâu chor lâuk têx txux chi cêr nênhx vênhx huôv. Zos muôx ntông mak xar uô tsêr tsar lơưx nhoz, tsêr tsar lơưx lax jông nhoz đuô, no cux zos ntâu lênhx nênhs siêz xar njôngr”.

Jok Bó muôx 300 chuôz zis, taz sik nhiv no tsuôk yuôr 2, 3 luz tsêr tsar lơưx xưz. Hlôngr trâu co zos ziv hnuz ziv muôx ntâu têx tsêr cxiv uô puôz suôz jêz, xi măng. Muôx kênh jok tsuôk yuôr iz luz tsêr tsar lơưx zos tsêr vênhx huôv xênhz huôx hâur jok xưz. No cux zos iz kro muôx nhoz tsi tsơưs têx jêx jok nênhs Poz Ziz ntơưv thị trấn têx huyện, lok sik đrôngs Sơn La nhiv no.

Zơưv Cà Văn Chung, lênhx nênhs pâuz thôngz lok nênhs Poz Ziz nhoz đrôngs Sơn La têx cêr nênhx vênhx huôv heik pâuz, tsêr tsar lơưx ziv hnuz ziv trâus pôngz plox jux juk, co cux zos iz kro hâur ntu têz qơưk huôv tsar nhiv no. Thâuv tsi muôx têx tsêr tsar lơưx mak tsôngv box cxuô cêr xênhz huôx, nox nhoz mul lok cux tsuv hlôngr yiêz, uô li chas cov huv đros:

“Nhiv no, tsêr tsar lơưx tsênhv iz hnuz trâus pôngz plox jux juk, viv tsi muôx têx shôngz ntông lox jông uô, tsêr tsar lơưx uô tâu khor truôx tsi yuô tâu ntêr, viv tsôngv box cxiv uô tsêr puôz suôz jêz, xi măng. Têx tsêr tsar lơưx tsi muôx tas, mak cêr nênhx xênhz huôx cux zuôr trâus pôngz jux juk li: Tos tsar lơưx saz đrâuv jôngr zos chiê trâu têx tuz nxeik hluôk tuôx uô si siz chuôs njiz, chiê trâu chor txir nênhx hiêz tơưz, hiêz lêr....zuôr tsi muôx. Tiv 2, qar tsêr, câuv tsêr txi têx lâuk tâu tas siv nênhx zuôr tsi muôx. Uô tsêr puôz suôz jêz, xi măng tsôngv box cux cxiv uô fiv đros, taz sik tsi jông xưk iz zav li tsêr tsar lơưx. Têx lênhx nênhs xar nhênhz chơưv, nriêr pâuz lok tsêr tsar lơưx vênhx huôv Poz Ziz cux tsi muôx đaz tsi lol heik, lol nhênhz chơưv”.

 Tsôngv box Poz Ziz tsêr tsar lơưx muôx ntâu kror jông zos li heik sâuv. Uô li chas chiê por hưv, tuôr tsês heir nênhs Poz Ziz têx tsêr tsar lơưx tsi chiê pôngz plox? Têx luk nus no muôx têx tsês trâu cxuô cấp hâu nov ntơưv qơư thiêz têx chuôz zis nênhs Poz Ziz nhoz thax tsav qơư co./.

(Lường Hạnh-Riê Lâux cxeik, nhênhv)