Jax thưr 7, hnuz 22/4/2017

Tsôngv box Hmôngz tsưr ziv uô shaz

=======

      PV: Êk, niêv hloz nêx nhoz hâur tsêr lok?

      Niêv hloz Xor: Êk ưz nhoz hâur tsêr hok, muôx đaz tsi hok?

     PV: Cur lav tuôx ntơưv no xưz hok. Êk uô li niêv hloz chor cox tsênhv taz tov uô ntơưv cox zos cox uô pêz chor shaz Hmôngz lok zos cox uô đaz tsi nar?

     Niêv Hloz Xor: Ô! Cur nhoz hâur tsêr cur taz tov uô pêz chor shaz Hmôngz, êk pêz zôngv zôngv uô nênhz zêis ntơư lok max.

     PV: Ov, uô li ntơư lok, uô li niêv hloz xar uô tâu pêz chor shaz Hmôngz co, êk xuz thơưx pêz zuôr bax đaz tsi no zov?.

     Niêv hloz Xor: Xuz thơưx têk pêz tsi bax đaz tsi ntâu, taz sik pêz mul lơưk têx tơưr ntông tsư tsư kaz ntơưv têx cưx ha thiêz chor blôngx ntông shaz blâuv tov têx têz lok jiêz cov gis gis, mav nhiêk tuôr nhiêk, tuôr tâu mok mok, pêz ho muôz vaz yâuk yâu mok mok nhiêk nhoz nhiêk iz luz vaz têk pêz muôz lok uô shaz, pêz mav muôz blơưv têk zos shaz lơưv.

     PV: Uô li lok, xar uô tâu iz cho shaz li co, êk chor car nir pêz muôz shôngz fuô uô lok zos ntông uô nir zov?

    Niêv hloz Xor: Chor car têk pêz muôz shôngz lok uô xưz, pêz txiêr chor car shaz ntơư zos pêz muk đrav cưx ha txiêr têx tsoz shôngz jông jông gâux, nưk tsi lor njik ciês, nhiv kruôr muôx iz shôngk shôngz xưz, pêz txiêr tâu lok pêz mav  muôz txiêr iz zak zak, zar njik muôz zêis, chiv jông tsês, hliêr zar hâuk pâuk, muôz hâur pâuk tso trâu hâuz pâuk, njik tso trâu njik, mav muôz lok uô car shaz, zar njik hlơưr trâu zar njik, zar hâur pâuk blơưv tsês uô car shaz nưk thiêx cuz.

     PV: Zos li bax tâu tsês hur si têx li cox niêv hloz heik co tas, zuk ho uô li chas thiêx zuôr uô tâu iz cho shaz lok zôngv no, thor cox uô niêv hloz heik mê njik kriê trâu sơưr đơưk pâuz zov?

     Niêv hloz Xor: Xuz thơưx pêz zuôr xar blơưv cov tâu zos iz tuk shaz chêk pêz muôz têx luz tos trax lox ntênhr, ntêr đuô chor car shaz, cov chor car shaz lur jos, pêz trâu iz trax đêx pur pur hâur, pêz muôz chor car shaz trâuk trâu hâur luz tos trax, nqok chor đêx cov tuk car shaz ntuz ntuz xưz, pêz li gra lok trâu chor hmôngr shaz blâuv, muôz mfông cov tas hur si trâu zar car shaz ntuz pêz nhiv kruôr muôz trâuk đêx ntơư, li muôz blơưv trâu sâuv luz trôngx, blơưv tâu pêz mav muôz muk trâuk đêx, nqok chor đêx hur si li muôz tso trâu luz vaz chor hmôngr shaz cxuô, muôz chor hmôngr txuô mfông trâu, mav gra tror lok blơưv, pêz blơưv tis blơưv tis cov chor shaz siz lo khor khor, li muôz tror muk trâuk đêx li kuz pêz  nhiv kruôr heik tas no, uô li ntơư nhos 4, 5 jâuk, luôs têx lâuk hu tiêk 4, 5 sir no cov tuk shaz lox siz luôs, jông hlơưr mav muôz muk jiêz lok sik kra cov  kruôr tsês zôngv chiê hlơưr uô nênhz uô zêis xưz.

     PV: Zos li iz sir li cox niêv hloz heik co êk pêz zuôr blơưv pêk tsơưs tuk li thiêx hu tiêk iz sir no?

     Niêv hloz Xor: Iz jâuk blơưv têk pêz blơưv muôx nhos 30, 40 tuk. Thiêz pêz blơưv 2 jâuk têk tâu iz poz shaz lox lơưv.

      PV: Uô li thâuv pêz blơưv, pêz blơưv trâu zar njik, lok zos zar pâuk?

     Niêv Hloz Xor: Êk pêz uô li no têk pêz tsês zar hâur pâuk tuôr ntơưv cxeik têk thiêz blơưv pêv zar  njik tuôx thiêz thâuv hlơưr, muôz zar hâur pâuk cxok trâu sâuv thax, hlơưr zar njik tuôx thiêx cuz jông. Thiêz pêz uô chor shaz li no chêk zuôr zos pêz tsi cxoz khênhr hmôngz hla thiêz thâuv muk txiêr tâu zar shôngz lok cux tsi cxoz chiê keiz hla ciês hlo.

Zos pêz uô keiz lok sik hmôngz hla đhâu lơưv mak zênhx hlơưr tsi cuz li, giv luz jos blơưv tas, muôz por tsês, mav tror blơưv đuô.

     PV: Ov, li ntơư, uô li uô cox niêv hloz tsâus ntâu tưz tsês six hơưv, hnuz nhôngs đros pêz thav lok sâuv tsưr ziv uô pêz Hmôngz têx shaz thiêz hok.

Tsôngv box….! Hâur phênhv “ nriêr pâuz lok pêz Hmôngz têx txux chi cêr nênhx vênhx huôv hnuz no, tsuôk xâuk li no xưz, mav tror siz njiz đuô trâu têx tsaz yênhx tov kaz./.

(Lầu Chia-Riê Lâux cxeik, nhênhv)