Công an Yên Bái sir jos muk trâu têx huyện, xã, jêx jok chiê pâuz tsênhz đuô lok tsôngv box luz nênhx nox nhoz, tsưr ziv siêz xar

2 tuk mê nhuôv Hoàng Văn Hiếu 12 shông thiêz Hoàng Thị Thảo 10 shông nhoz jok Khe lợi, xã Viễn Sơn nhiv kruôr tâu yêik mul nhoz trâu luz tsêr yiêz tsiv grê nhos 70 tsov đeiv. No tsênhv tsênhv zos qơư sor siêz thiêz jông trâu têx nhuôs zâu njuôs nok, tsi muôx niêv tsi muôx txir, ntêr lok no uô nênhx nhoz khov trâu tsôngv cưr tix nênhx tsa sđ hâur jêx jok têx cêr siz chos paz hluz thiêz lênhx txir hloz hâur tsêr luz nênhx cux lok six txov nhêv ntơư choz kriê cêr uô nênhx, paz đros tu.

Thâuv ntêx, lok hâur xã, jêx jok paz ntơưv qơư lês uô têx hâux lưv, pâuz tâu têx nhuôv zâu luz nênhx txov nhêv, Công an tỉnh Yên Bái li tổ côngz xưv lok uô hâux lưv ntơưv qơư nhoz xã Viễn Sơn tưz vênhv tôngv tsôngv box sđ, têx nênhs siêz jông, chor tsưr tsix uô têx nuv jông siêz siz chos paz nhiêx txiêx, chuôz zênhx, hnuz côngz lox tôngv; têx chiến sỹ cux paz zuk iz phênhv nhiêx hli chiê cxiv uô luz tsêr niêv côngv siêz heik sâuv. Pos Hoàng Thị Phát, 2 tuk nhuôv Hiếu thiêz Thảo gơư tuk fâux shir phaz heik:

“Công an thiêz cxuô ban ngênhx tưz siz chos paz max trâu cur têx nhuôv njuôs, cxiv uô luz tsêr chiê trâu têx nhuôv muôx qơư nhoz. Cur tsi pov kaz heik li chas, tsuôk pâuz uô tsâus ntâu txos têx txir hloz niêv hloz, chor txir nzơưv công an xưz”.

Cux muôx luz nênhx lok six txov nhêv, tsi muôx vax tsêr nhoz, zơưv Bàn Tài Hín nhoz jok Tháp Cái 2, xã Viễn Sơn chuôz zis tsuv uô nênhx nhoz trâu iz luz tsêr fênhz suôz cxiv uô tax nhoz ntơưv ntar trôngz. Đhâu qênhz shuôs thax tsav, Tổ côngz xưv Công an Yên Bái tưz pâuz tâu zơưv Hín luz nênhx txov nhêv thiêz vênhv tôngv têx nênhs siêz jông, têx tsưr tsix uô têx nuv jông siêz hâur thiêz đrâuv luôs 2 chas thax tsav cxiv uô iz luz tsêr puz trâu zơưv chuôz zis nhoz. Zơưv Hín shir phaz heik:

“Zuk chuôz zis lok six txov nhêv, uô tưz tsi txâuk nox viv li tưz tsi xar tiêk, zuôr muôx hnuz tâu nhoz hâur iz luz tsêr lox thiêz cxiv uô jông li no. Uô tsâuk ntâu txos têx txir nzơưv Công an, chor nênhs siêz jông”.

Viễn Sơn zos xã tox siêz txov nhêv hâur huyện Văn Yên, muôx zuôr xar 890 chuôz zis, xar muôx 4 cxênhz lênhx nênhs, phênhv ntâu zos tsôngv box Cho, luz nênhx tsênhv lok six txov nhêv, qênhx shênhx txiv ngaz tsênhv muôx ntâu phiv liv.

Lok paz ntơưv qơư lês uô têx hâux lưv uz no, iz chas đros trâu moz siêz paz tsôngv box hâur thax tsav huôv tsar uô nox uô hnar thiêz xênhz huôx paz têx chuôz zis txov nhêv, Tổ côngz xưv Công an tỉnh Yên Bái tưz zênhx max fuô uô têx tsưr ziv, hâux lưv, pâuz tâu qênhx shênhx nox nhoz ntơưv qơư, têx cuz nxor, txix ntơư phuôx tôngv đêz đar phôngz yaox tas nro tsôngv box sđ sik đros tsưx phưv truôx têz qơưk. Txix phôngz yaox no, tsuôk đhâu 4 hlik ntâu lok paz ntơưv qơư lês uô têx hâux lưv, txix têx mông tsôngv box sđ heik pâuz, Tổ côngz xưv Công an tỉnh Yên Bái hux jos đros lưv lươngv công an hâur thax tsav qơư sơưr tơưv txênhz, uô tsênhz mênhx 11 txuz, 14 lênhx nênhs cik txos uô tsi truôx tuk thax tsav qơư nhoz, vênhv tôngv  tsôngv box sđ chiv chir gra têx triêv fov riêz nênhs... tuôx choz trâu lưv lươngv muôx vax huôv tuôr thiêz khơưk chiê. Zơưv Doãn Hải Sơn, Phưv Chủ tịch Ủy ban xã Viễn Sơn, huyện Văn Yên heik:

“Đhâu 4 hlik tổ côngz xưv lok paz ntơưv qơư lês uô têx hâux lưv uz no mak ntơưv xã Viễn Sơn tưz truôx tuk. Ban Giám đốc Công an tỉnh tsưr ziv, siêz xar, têx Tổ côngz xưv heik co tsi so moz siêz lês uô jông đuô thiêz têx nuv heik sâuv, tsưr tsix têx jiês phuôx tôngv têx phôngz yaox ntâu đuô thiêz chiê paz ntơưv qơư, lar heik zos têx xã txov nhêv, uô jông hâux lưv taz por txiv ngaz truôx tuk, paz huôv tsar kinh tế, XH...”.

  Nhiv no, iz chas xã Viễn Sơn, Công an tỉnh Yên Bái tsênhv chuôz tsar tso  yênhx châuv tổ côngz xưv muk trâu têx thax tsav qơư hâur tỉnh. Cê uô têx hâux lưv tâu zok muôz, têx chiê sỹ lok paz ntơưv qơư lês uô têx hâux lưv uz no cê buôk ti moz siêz, paz max tsôngv box têx thax tsav txov nhêv. Txix têx sir jos lês uô cxuô luôs hâux lưv, têx tổ côngz xưv tưz yênhx têx đuôz jông heik lok lênhx chiến sỹ công an uô trâu tsôngv box sđ njênhs thiêz ndo njôngr hâur đruôz siêz tsi plox./.

(Đinh Tuấn-Riê Lâux cxeik, nhênhv)

PHÊNHV VIV MÊ NHUÔS ZÂU

Tsưr ziv phax tar pôngz đês trâu mê nhuôs zâu ( 2 suôz)

Chiê phax tar pôngz đês trâu mê nhuôs zâu hâur cheix ntux sor, cxuô lênhx uô niêv uô txir, cưk kriê tsuv muôx têx tsưr ziv:

          1. Tsuv taz por đas jos trâu zuk mê nhuôs seiz pok taz por cxaz chuôz huôx tôngv uô luôv đêx? Ntâu lênhx uô niêv uô txir tsi pâuz tiêk, tsi zos tul mê nhuôs tưs cux zuôr shâuv uô luôv đêx tâu. Pir li têx mê nhuôs trâus moz lok cêr uô pa; moz sâuv tơưr greix...tsi cxoz cor đêx viv ziv trâus moz hnhar đuô, uô trâu muôx yưv têx txiêz nanv thâuv luôv đêx. Chiê taz por đas jos trâu me enhuôs thâuv mul luôv đêx niêv thiêz txir tsuv tsov cưv tso mê nhuôs mul seiz njuôs moz chiê cuiz tênhv seiz pok puz mê nhuôs mul luôv đêx.

          2. Đrâuv co, chiê phax tar pôngz đês trâu mê nhuôs, hâux lưv xuz thơưx thiêz coaz tsôngv tiv zix zos kriê mê nhuôs luôv đêx. Têx lênhx niêv lênhx txir tsuv bax cxix cxuô têx pênhr xưv taz por thâuv tso mê nhuôs mul luôv đêx...Taz sik, nhiv no hâux lưv kriê mê nhuôs luôv đêx tsuôk zos chiv chir krêz, tsi muôx txâuk pas luôv đêx, tsi muôx tsưr ziv kriê cov huv đros. Viv li, iz tsưr ziv zos têx tsêr cơưv cux zuôr krêz lớp shâuv luôv đêx trâu shux xênhz ciês hâur tsêr cơưv xưk li iz tsaz yênhx kriê ntơưr.

          3. Tsuv heik kriê trâu mê nhuôs têx qơư riêz nênhs zôngx ziv trâus pôngz đês li têx tul đêx, pas đêx toz...

          4. Đros thiêz têx pas luôv đêx, tsuv tsov cưv kriê mê nhuôs luôv ntơưv têx qơư muôx lênhx nênhs thiêz chuôz zênhx chơưv paz, uô trơưk têx cui tênhv ntơưv qơư luôv đêx. Thâuv mê nhuôs luôv đêx tsuv seiz car njôngr. Tsuv taz por thâuv tưs mê nhuôs cux hnar yo phao chơưv paz...

          5. Thâuv mul đa đêx ntơưv niêv đêx hiêr lok sik têx tul đêx, lênhx nênhs txơưv pâuz luôv đêx lok sik tsi pâuz cux tsuv luôv jê ntơưv ntus đêx, tiv zix zos ntus niêv đêx hiêr. Ntâu lênhx khênhr pư sâuv luz phao thâuv đa đêx ntơưv niêv đêx hiêr, li ntơưv cux lok six riêz nênhs viv zôngx ziv trâus niêv đêx hiêr ntas mul đêz ntus đêx...

          6. Nhoz tsêr muôx mê nhuôs zâu mak jông tiv zix têx huz đêx, thôngz đêx tsuv vor cov jông, tsi chiê mê nhuôs krêz tâu.

          7. Uô jông têx cui tênhv lok taz por thâuv cxaz chuôz têx yêz gox đêx xưk li hnhar yo phao.

          8. Muôx cêr chei huv đros: tsuv heik tsênhz mênhx lênhx nênhs tưs muôx txơưx jênhv thâuv muôx txiêz nanv muôx yưv, cxôngx co yưr lir lơưr cui tênhv huv đros.

          9. Thâuv pov lênhx nênhs pôngz đêx, tsuv hu lox cov cxuô lênhx nênhs tuôx chơưv paz. Thôngx cxix, tsuv ciêr chênhr nriêr chuôz zênhx chiê paz chơưv lênhx nênhs pôngz đêx. Li ntơưv, hâux lưv chơưv paz zuôr muôx chêx cuk đuô. Tsi đhiê mul hâur đêx chiê chơưv lênhx nênhs pôngz đêx zos zuk tsi txơưx luôv đêx thiêz tsi pâuz chơưv paz viv uô li mak zuk cux zuôr trâus pôngz đês.

          10. Thâuv chơưv tâu lênhx nênhs trâus pôngz đêx, ciêr chênhr seiz lênhx nênhs co pok uô tâus pa, seiz pok muôx tul tsi đeis hâur kror ndâux, kror njưs, tso lênhx nênhs co pư keix iz saz chiê đêx ntưs lol zôngx ziv uô tâus pa. Zos lênhx nênhs trâus pôngz đêx tsi uô pa thiêz tsuv ciêr chênhr tso lênhx nênhs co pư nzênhr tiêx, grus iz pa ntêr thiêz zôngv kror ndâux yuôz pa trâu hâur lênhx nênhs co kror ndâux chiê lênhx nênhs co uô pa. uô tsi so li ntơưv 2,3 jiês. Đhâu co zôngv 2 cxeik tês niês hâur siêz tsi so 30 jiês. Cê yuôz pa cê niês hâur siêz txos thâuv lênhx cưk yuôx y tế tuôx lok sik chox lênhx nênhs co mul chơưv kho trâu  tsêr kho moz./.

(Thanh Thủy- Txâur Vax cxeik nhênhv)