Điện Biên: Tsôngv box thax tsav Mường Thanh uô jông luôs hâux lưv tir thêir no njiv trâu tsiêx cxu

          8 six ntâu tas cik sơưr nzor, jos ntus đriv ntơưv têx xã Thanh Chăn, Thanh Luông, Thanh Hưng, Noong Luống, Pa Thơm huyện Điện Biên (tỉnh Điện Biên) ntux tsênhv lok six no thiêz pok huôz. Tsi pov lênhx nênhs mul uô kôngz lôngk, sâuv têx cêr mul lol hâur xã, jêx jos cux tsi pov ntâu lênhx nênhs mul lol đhâu. Iz hâur têx hâux lưv tâu pox nhuôs tsov cưv nhiv no zos por vêv tsi chiê tsiêx cxu trâus no. Pos Lò Thị Hặc, nhoz tuêv 6, xã Thanh Chăn, huyện Điện Biên, tỉnh Điện Biên puz pâuz, thâuv tâu mông qiv hơưv zuôr no njiv, chuôz zis tưz chuv tôngv zôngv ntâuz tax xor their guôx tu zus, tsâur tơưs trâu 3 tul nhux ntê. Đrâuv co tsênhv chuôz tsar puz tsiêx cxu hâuk cuô njêr, nox cxaz krâur chiê chuôz cxaz đas jos trâu nhux hâur têx hnuz ntux no njiv.

          “Cheix ntux no no cur tso nhux mul seiz lol mak txơưv puz hâuk iz fiêz cuô njêr, puz nox krâur thiêz. Hâur guôx mak muôz hnhaz blês hlơưr cov sor, tsâus ntux thiêz sơưr nzor hnuz tưs cux tsuv uô li ntơưv”.

          Thanh Chăn, Thanh Luông, Thanh Hưng, Noong Luống, Pa Thơm (huyện Điện Biên) zos thax tsav nhoz jê trôngz, jê ntus đriv têz qơưk Lào viv li jêx tưv khênhr kis đuô pir đros têx xã txơưr hâur thax tsav. Têx hnuz ntux no njiv, tsôngv box tsi tso nhux mul nox jâuz thiêz mak cơư hâur guôx, khi hâur qar puôv, têx qơư kruôr krơưr, tsi trâus chuô njơưx, muôx yar ntux chiê nhux sor đuô. Thôngx cxix, puz tsiêx cxu nox hâuk cxix cxuô, trơưk six hơưv. Zơưv Lò Văn Hom, nhoz jos Pha Đin, xã Thanh Chăn, huyện Điện Biên, tỉnh Điện Biên puz pâuz:

          “Chuôz zis muôx 2 tul tưv, fênhx yax mak cur thiêz tsôngv box hâur jos khênhr tso nhux mul tov liêx nos jâuz, tsi tsuv tsoz phưz, hleik jâuz lol trâu nhux nox hâur guôx. Taz sik qiv hơưv no li no mak tsuv cơư hâur guôx, puz nox hnhaz blês thiêz têx zav nox txơưr chiê taz por đas jos trâu nhux tưv. Thâuv yar ntux thiêz tsi lol nas mak thiêx li tso nhux”.

          Zơưv Nguyễn Văn Vĩnh, Chủ tịch UB xã Thanh Chăn, huyện Điện Biên puz pâuz: Uô ntêx thâuv ntux no njiv li têx hnuz đhâu, chinhr quyênx xã puôr lênhx thôngz pov txos yênhx jêx jos, heik tsôngv box chuôz tsar têx tsưr ziv tir tar ntux no trâu tsiêx cxu. Viv li txơưv qiv hơưv muôx ntâu txơưr txar, taz sik txos nhiv no sâuv thax tsav tsi pov muôx qênhx shênhx tsiêx cxu trâus tuôs no:

          “Xã cux heik têx chuôz zis tu zus, thâuv ntux no tsuv cơư nhux hâur guôx, zôngv ntâuz tax their cov jông. Hâur têx hnuz ntux no njiv mak tsuv trâur tơưs chiê ntê trâu nhux, puz nox cxaz krâur thiêz hnhaz blês. Tsuv puz nhux hâuk đêx sor hâur têx hnuz ntux no njiv, li ntơưv thiêx li txu grês tâu qênhx shênhx nhux trâus tuôs no”.

          Lơưr Đeix njuôs pov qiv hơưv tỉnh Điện Biên li njuôs pov, hâur têx hnuz zuôr txos, ntux zuôr tror no njiv. Ntơưv têx thax tsav tox siêz, jêx tưv zuôr grês kis. Viv li nganhx kôngz nuv tỉnh Điện Biên cux tưz heik têx tiv phaz yax six seiz njôngr qênhx shênhx qiv hơưv chiê pov txos tsôngv box, taz por đas jos tir tar ntux no trâu tsiêx cxu, sir jos chiê tiv phaz li zuôr xar 5 tsov tul tsiêx cxu tsi muôx tul tsiêx cxu tưs trâus tuôs no hâur shông 2019./.

(Vũ Lợi- Txâur Vax cxeik nhênhv)