Sir jos lês uô truôx jông hâux lưv seiz jor têx ndâux cêr muk lol nhoz thax tsav ntus đriv

Nhoz kuôk đêz TP Sơn La 160 cêik, qơư seizcar, tsưx phưv đriv têz thiêz phax tar moz gênhk Nà Khi, Zênhx Pênhz phax Mường Lạn nhoz hâur thax tsav tâu seiz zos “qơư cuz nxor”. Tox trôngz hâur pêk nxaz, phiv liv muk lol, têx lênhx nênhs xar muk lol đhâu đriv têz tsi trơưk chei, zuôr muôs zax zênhz zôngx ziv gra tâu caz moz uz no lok siz cik hâur thax tsav qơư. Chênhr viv li, chor canr bôv, chiến sĩ hâur qơư seiz car, tsưx phưv đriv têz co tưz tso lênhx nênhs nhoz trơưr ntơưv qơư hâur niêx hnuz hmo thiêz muk qênhz shuôs tsi so têx đriv têz. Thiếu tá Điêu Chính Tuyên, thơưx seiz car kror qơư no heik pâuz: “Zênhx uô iz qơư seiz jor ndâux cêr Nà Khi ntơưv no chiê qênhz yuôx têx lênhx pêx xênhv muk lol đhâu. Hux jos đros chor lưv lươngv qênhz yuôx, por hưv têx ndêx cxok kuôk cêv đriv têz, qênhz pov têx lênhx nênhs muk lol đhâu  ntus đriv tsi trơưk chei nhoz jê đriv têz buôk Lol Tsuôk”.

Ntơưv thax tsav tox siêz ntus đriv, txov nhêv thiêz phiv liv lok ntâu tsar ntâu zav, taz sik chor tuz lênhv nhoz no thâuv tưs tưz sik thôngx siêz jông, sir jos uô tiêr cxuô luôs hâux lưv zok muôz. Chiến sĩ Zis Xênhv Shôngx, uô hâux lưv ntơưv qơư seiz car, tsưx phưv đriv têz thiêz phax tar moz gênhk Nà Khi heik: “Cêr muk qênhz yuôx shuôs đriv têz mak lok six phiv liv muk lol, nhiv no ntux no lơưv, muk hmo ntux uô hâux lưv qênhz shuôs đriv têz lok six txov nhêv cơưk. Pêz tưz sir jos khưx phưx, hla đhâu têx phiv liv co”.

Đros chor canr bôv, tuz lênhv pênhz phax nhoz, uô hâux lưv uô cê zos 3 lênhx tuz lênhv tâu Bộ Chỉ huy quân sự tỉnh Sơn La tso tuôx paz lês uô luôs hâux lưv seiz jor ndâux cêr, phax tir thêir moz. Tuz lênhv Vì Văn Danh, Tiểu đoàn Bộ binh 1, Trung đoàn 754 (Bộ Chỉ huy Quân sự tỉnh Sơn La) txơưv nhiv kruôr tuôx, taz sik tưz uô sưv lok six sei têx hâux lưv yiêz nhoz thax tsav ntus đriv: “Cur tuôx no, six hơưv nhiv kruôr đhâu, pêz muk qênhz yuôx, qênhz shuôs têx ndêx cxok kuôk cêv đriv têz, cêr mê lus muk lol đhâu ntus đriv. Cur thiêz chor tuz lênhv vav chiê siêz, zuôr muôx têx paz tâu zuk iz phênhv côngz đas jos đros phax tir thêir moz Covid-19, tsưx phưx truôx thax tsav đriv têz”.

Cêr truôx tuk nhoz 54 cêik cêr đriv têz, 21 tus ndêx cxok kuôk cêv ntus đriv, iz tus ndêx cxok chiv đriv têz zos Zênhx Pênhz phax Mường Lạn seiz car zos têx mak chor canr bôv, tuz lênhv hâur taz viv sir jos thiêz uô tâu jông. Trung tá Nguyễn Tiến Hiếu, Thơưx seiz car Zênhx pênhz phax Mường Lạn heik pâuz, xav tinhv hâux lưv phax tar moz Covid-19 zos hâux lưv tsuv uô hâur iz ntuk ntêr, cấp ủy, têx thơưx hâur taz viv tưz sir jos chox car, kriê thiêz uô jông luôs hâux lưv seiz jor ndâux cêr nhoz têx qơư taz viv seiz car, chiê tsưx phưv tsuôx thax tsav ntus đriv thiêz phax tir thêir tâu jông moz gênhk: “Đros thiêz têx qơư seiz jor ndâux cêr, đhâu 2 shông ntâu fuô uô têx luôs hâux lưv zok muôz, muôx lok six ntâu phiv liv thiêz cêr txov nhêv, taz sik đros trâu chor tuz lênhv têx sir jos, sik thôngx siêz, sik paz, pêz tưz xav tinhv tâu tsưr ziv, txơưx jênhv hâur lês uô têx hâux lưv co. Taz viv cux tsi so moz siêz txos taz por, cxiv kho, uô jông hâux lưv seiz jor ndâux cêr, gra siêz luz nênhx nox nhoz, cêr xênhz huôx trâu chor canr bôv, tuz lênhv nhoz no”./.

(Lê Hạnh VOVTB-Riê Lâux cxeik, nhênhv)

“Tsaz yênhx shir phaz” paz txo grêk cêr pluôs truôx đrênhk nhoz thax tsav tox siêz Lào Cai

Zos ziv chuôz zis txov nhêv nhoz xar Quan Hồ Thẩn, huyện Si Ma Cai, tỉnh Lào Cai, zơưv Lìu Seo Áo ziv chuôz zis tâu Tsaz yênhx shir phaz paz iz tuk tưv. Khov co, zơưv Áo thiêz pox niêv mê nhuôv tưz sir jos uô tâu nox, jux juk hla đhâu cêr pluôs. Zơưv Áo hêik:

“Tsaz yênhx paz trâu chuôz zis iz tuk tưv, tưz sha tâu nzir oz tuk lơưv, iz tuk muôs tâu 40 triệu đêiv, iz tuk muôs tâu 25 triệu đêiv. Chuôz zis tưz tu zus tuk mâuv tưv lok six jông. Vav tiêk ntu zuôr txos chuôz zis zuôr tror tâu paz nzir thiêz”.

Đrâuv paz nôngz tsiêx tu zus, Tsaz yênhx tsênhv paz xi măng trâu pox nhuôs Si Ma Cai uô cêr bê tông tâu xar muôx 40 cêik cêr hâur jêx jok, txix co paz trâu muk lok, thâux xa hax huv zôngx ziv đuô. Cưk kriê ntơưr Ngải Seo Lao nhoz tsêr cơưv Chu Liền Chải, xar Quan Hồ Thẩn, huyện Si Ma Cai hêik:

“Chor cêr tâu uô jông đuô mak chor shux xênhz tuôx cơưv ntơưr cux chôngz đuô, tsơưr lươngv chor shux xênhz cux siêz đuô thiêz tuôx cơưv ntơưr cxix cxuô đuô”.

Iz chas co, Tsaz yênhx li têx hâux lưv uô mak zos ntâu kror li y têr, zoz zux, sêiz car công, khoa học kỹ thuật…cux paz trâu chor cán bộ thiêz pêx xênhv ntơưv thax tsav qơư hlôngr yiêz đuô siêz xar, nriêr pâuz tâu têx tsưr ziv yiêz jông đuô. Zơưv Hoàng Văn Dương, Chủ tịch Ủy ban huyện Si Ma Cai puz pâuz:

“Dự án Tsaz yênhx shir phaz KOICA tưz paz tâu lok six jông, paz trâu huôv tsar kinh têr, cxiv tsa cêr cxuô zav hâur jêx jok thiêz paz huôv tsar uô nox sâuv thax tsav chor xar nhoz Lào Cai”.

Đrâuv Si Ma Cai, thị xar Sa Pa thiêz Lào Cai 2 luz huyện txơưr zos Bắc Hà, Mường Khương cux zos têx thax tsav qơư  tâu Tsaz yênhx shir phaz paz. Tas nro chor nhiêx paz zos 600 tiv đêiv ntâu, tsêx trung yưv pênhr trâu 300 cêik cêr muk lok, đros têx phênhv paz trâu huôv tsar côngv thôngx, gra siêz đas jos, txux chi, paz kỹ thuật…Tsaz yênhx tưz paz trâu pox nhuôs luz nênhx, paz trâu hâux lưv cxiv tsa jêx jok yiêz tâu uô truôx jông nhoz thax tsav tox siêz. No cux zos kror hêik tơưv tâu cêr sik côngv jông nhoz Việt Nam thiêz Hàn Quốc./.

(An Kiên-Lik Thox cxêik nhênhv)