Trạm y tế xã, txu grês xa chor nênhs pluôs moz muk trâu tsêr kho moz lox tỉnh Lai Châu

          Đhâu zuôr xar iz hnuz pov moz plaz, tix lâuk Cu Xênhv Zax nhoz jos Tu San, xã Tà Mung, huyện Than Uyên, tỉnh Lai Châu tâu chuôz zis chox muk qơư y tế xã chiê seiz njuôs shuôk. Ntơưv no tix lâuk tâu cán bộ y tế seiz njuôs plaz thiêz heik tiêk zos moz plaz cêv. Đhâu 2 hnuz kho moz ntơưv qơư y tế xã, nênhs moz tưz jông jux jus.

          Tix lâuk Cu Xênhv Zax heik: Thâuv ntêx chuôz zis muôx nênhs moz gênhs puôr lênhx tsuv chox muk tsênhv qơư y tế huyện thiêx seiz njuôs tâu moz. Cêr lax muk lok, tsuv pôngz iz chuôv thiêx txos qơư thiêz thâuv muk kho moz ntơưv co mak cux pôngz ntâu nhiêx txiêx đuô, chuôz zis mak txov nhêv phênhv sâu puôr lênhx zos khov txos hâux lưv uô kôngz. Nhiv no qơư y tế xã tâu cxiv tsa jông đuô, muôx têx zav meir seiz njuôs moz yiêz tâu têz qơưk paz, viv li pox nhuôs tsi tsuv muk huyện seiz njuôs thiêz kho moz li ntu đrav ntêx lơưv thiêz:

          “Thâuv ntêx têx zav meir seiz njuôs moz tsi muôx cxuô cur muk seiz njuôs moz mak tsuv muk txos huyện thiêx li seiz njuôs tâu. Nhiv no muôx meir lơưv mak lok six jông trâu tsôngv box. Têx cưk yuôx nhoz no cux siêz jông, thâuv tuôx seiz njuôs thiêz kho moz cux muôx bác sĩ chiê heik kriê thiêz muôz yuôx cux taz por”.

          Thâuv ntêx tsôngv box têx mênhx cxưx tox siêz khênhr muôx siêz xar thâuv lênhx nênhs trâus moz hnhar thiêx li muk seiz njuôs thiêz kho moz ntơưv tsêr kho moz huyện, yuôr moz fênhx yax mak nhoz tsêr zôngv yuôx njuôz. Tiv zix, đros têx pox niêv, hâux lưv tsoz phưz đas jos xênhz zus nhuôs mak khênhr tsi tâu tsov cưv txos, phênhv ntâu zos chiv chir xênhz zus nhuôs hâur tsêr. Taz sik, khov tâu yưv pênhr cxix cxuô đuô lok chuôz zênhx chuôz tas thiêz uô jông côngz xưv yax mông, nhiv no pox niêv tưz muk qơư y tế seiz njuôs lơưr six hơưv thiêz xênhz zus nhuôs cux muk qơư y tế. Y sĩ Lò Thị E, cán bộ y tế xã Tà Mung pheiz kênh:

          “Seiz njuôs shuôk mê nhuôs hâur plaz thâuv ntêx tsôngv box nhoz no khênhr txax muôs tsi car muk seiz njuôs. Taz sik cxôngx thâuv muôx luz meir siêu âm chiê seiz njuôs mak cux muôx chôngz lênhx pox niêv sâuv thax tsav tuôx seiz njuôs ntơưv qơư y tế”.

          Huyện Than Uyên, tỉnh Lai Châu nhiv no muôx 12 qơư y tế xã, thị trấn, hâur co muôx 2/3 chor qơư y tế nhoz thax tsav tox siêz txov nhêv. Zos thâuv ntêx têx qơư y tế phênhv ntâu uô côngz xưv y tế dưv phax thiêz cungz yuôx trâu tsôngv box thâuv muôx zoz qơưx mak nhiv no khov tâu yưv pênhr ntâu đuô lok cơ sở cxuô zav, chuôz zênhx chuôz tas thiêz lênhx nênhs, viv li côngz xưv phax tar moz thiêz seiz njuôs, kho moz trâu tsôngv box nhoz ntơưv qơư tâu muôz siêz tsênhz mênhx.

          Zơưv Vũ Văn Quang, Giám đốc Tsênhv qơư y tế huyện Than Uyên, tỉnh Lai Châu puz pâuz: 2,3 shông tror lok no têx qơư y tế tưz tâu tsov cưv yưv pênhr viv li tsôngv box njênhs njôngr tuôx seiz njuôs moz chôngz đuô. Hâux lưv no txu grês qênhx shênhx nênhs moz tsuv muk đêz chiê tâu seiz njuôs thiêz kho moz. Nhiv no tsuôk nênhs trâus moz hnhar, ntơưv qơư kho tsi tâu mak thiêx xa muk tsêr kho moz lox đuô. Taz sik, chiê têx qơư y tế tsênhz tsênhz phuôx huiz tâu chêx cuk zos qơư xuz thơưx tsoz phưz tsôngv box li đas jos, tsuv muôx tas nro cxix luôk chính trị li tsov cưv yưv pênhr ntâu đuô thiêz:

          “Lok six xar njôngr tỉnh muôx cơ chế xeir zuôr têx bác sĩ lok uô côngz xưv ntơưv xã. Tiv 2 zos chor y tế jêx jos mak xar njôngr tỉnh muôx chính sách jông đuô, chiê uô li chas tuôr truôx tâu chos y tế jêx jos nhiv no. Tiv 3 zos đros têx phêv liv lok cxiv tsa ploz tsênhr y tế xã tsuv huiz tôngv tas nro chính trị sik đros hlôngr yiêz têx ploz tsênhr”.

Đros hâux lưv têx qơư y tế tsênhv phuôx huiz chêx cuk hâur seiz njuôs thiêz kho moz qir thơưx trâu tsôngv box, huyện Than Uyên, tỉnh Lai Châu tsênhv krêz uô ntâu tsưr ziv, đros qơư tsov txos zos sir jos chox têx qơư y tế tax ploz tsênhr, yênhx qơư tsôngv box njênhs njôngr nhoz tiv phaz. Hâur co huyện tsov cưv lok chor nhân viên tsuv muôx txâuk lênhx nênhs, muôx txâuk pênhr xưv txux chi huv đros trâu xã, tuôv zênhv zoz qơưx thiêz uô tsưr têx công nghệ seiz njuôs thiêz kho moz yiêz./.

(TTTB-Txâur Vax cxeik nhênhv)

Phax, tar caz moz hâur chêix yar ntux cuz sor trâu tsiêx tu zus

Chêix yar ntux cuz sor, zôngx ziv trâu ntâu zav caz moz huôv xênhz, siz cik moz li moz ơưk, kruôr tơư nhoz têx kêiz ol; thox plaz, tơưv ndâux hlê trâu, moz ơưk buô; đôngs nyar nhoz têx nhux, tưv…

Chiê por vêv ngaz tuk trâu chor tsiêx tu zus, nganhx kôngz nuv tsênhv tsêx trung sir jos uô hâux lưv yax kriê pêx xênhv kriz uô têx tsưr ziv phax, tar yar ntux cuz sor.

Lơưr co, tsuv uô têx tsêr guôx cov siêz nkra đris, lax nziês, huv đros trâu yênhx zav tsiêx tu zus; muôz đrox, blôngx ntông vor nzir saz sâur lok sik chos têx zav hmaz chiê ndê trâu sâuv trur tsêr guôx cov tsik trâus yar ntux cuz jiêz ntâu, tsuôs pa đêx hâur tsêr guôx lok sik bax mêir nzuôx chuô cov txâuk uô lax trâu chor tsiêx cxu, tsik uô trâu chor tsêr guôx nông hênhr; thoz huk cov hur đu têx cưx tso đêx thiêz xưv lik têx vuôz tsuôz, kiêk nênhs.

Chor chuôz zis tu zus tsuv muôz cxix cxuô zav nox thiêz đêx hâuk cov txâuk trâu chor tsiêx cxu. Têx hnuz yar ntux cur sor hênhr mak tsik tso yar têx nhux, tưv txix thâuv 10 six zuôr tar su txos trâu 4 six zar zuôr tsâuk ntux viv zuôr uô trâu chor nhux, tưv trâus tuôs tiv yar ntux cuz sor.

Chuôz cxaz uô vêv xênhz têx tsêr guôx, chuôz zênhx tu zus, tsik so tsuôs yuôx tuô lov caz moz chiê phax tar têx zav caz moz muôx yưv hâur chêix ntux sor.

Bax têx zav nox cov huv đros, muôx cxix cxuô tsơưr pưr, têx zav nox paz trâu chor tsiêx cxu muôx jos.

Đuô li, hâux lưv sir zôngv têx zav uô lax tsuv tâu sêiz shuôk jông, zos muôx yưv têx phiv liv li puôk tsuôx, tsik muôx tênhv... chiê muôx tsưr ziv xưv lik cov sêi.

Đros co tsuv cxax cxix cxuô yuôx vắc xin phax, tar caz moz trâu chor tsiêx cxu.

Chiê uô tâu jông thiêz huôv tsar jông tu zus hâur chêix ntux sor cuz, nênhs tu zus tsuv moz siêz txos, por vêv jông chor tsiêx cxu. Tsik tso yar thâuv yar ntux cuz sor, jêx tưv siêz. Đrâuv hâux lưv uô lax trâu têx tsêr guôx, tsuv bax txâuk đêx hâuk hur thiêz têx zav nox zôngx ziv nox, muôx nzir têx zav tsơưr paz trâu tsiêx cxu muôs jos jông./.

(Báo NN-Lik Thox cxêik nhênhv)