Jax sâu thưr 2 hnuz 23/5/2016

Chos cxaz chiv sâuv liêx ntêir Mù Cang Chải

Zơưv Khang Suôr Hơưx, nhoz jok Háng Tàu Dê, xã Chế Cu Nha, huyện Mù Cang Chải muôx 1000 yiv ndis ntâu liêx ntêir. Thâuv ntêx no, tiv tsuôk chos iz chiv, zơưv chuôz zis tsik so trâus njiz cêr yêiz. Chiê muôx cov txâuk cxur trâu mê nhuôs nox haur têx tsêr cơưv ntơưr, zơưv oz niêv txir tsuv uô ntâu zav hâux lưv nriêr nhiêx, têx thâuv oz niev txir cux tsênhv zông yêiz thiêz. Txix thâuv tâu hêik kriê uô cxaz chiv sâuv liêx ntêir, zơưv chuôz zis li 1000 yiv ndis liêx  tưz tâu chos oz chiv. Đros co zos yưv pênhr nzir lok qir zuôv, yuôx por vêv đrox tsuôs, viv li zơưv chuôz zis tưz hla đhâu yêiz pluôs, jux juk muôx blêx chiê muôs, cxaz nzir phênhv sâu trâu chuôz zis. Zơưv Khang Suôr Hơưx shir phaz hêik:

 “Thâuv ntêx no mak liêx tsuôk tâu chos iz chiv xưz, nox tsik tâu ntêr mak cxur tưz tas, yêiz plaz hênhr. Nhiv no chos oz chiv mak muôx txâuk nox lơưv”.

Chế Cu Nha zos iz hâur 3 luz xã muôx chor liêx ntêir jông gâux tiv zix huyện Mù Cang Chải. iz huôv xã muôx zuôr xar 540 ziv chuôz zis, 2.300 ntâu lênhx nênhs, tas nro zos tsôngv box Hmôngz. Tiv sưv đros tsuôk chos iz chiv blêx iz shông, viv li txơưv tiêk muôx zuôr xar 200 hec ta liêx ntêir, taz sik chor chuôz zis yêiz pluôs, muôx tsiki txâuk nox thâuv chêix kôngz lôngk tsik tâu siêr kuôk no 3-4 shông cux tsênhv yuôr siêz đuô 75%. Txix shông 2010, xã piz muôx chor liêx chos tâu oz chiv xuz thơưx ciês, txos nhiv no muôx 80% ntâu chos tâu oz chiv, đuô li tsênhv yuôr iz cxiê thax tsav chos jâuz tâuv cxuô zav. Khov co, pêx xênhv li phênhv sâu chuôz ndê yênhx shông, pox nhuôs luz nênhx tâu hlôngr yiêz ntâu, chor chuôz zis pluôs tsuôk yuôr kik đuô 60%, tsik yuôr chuôz zis tưz tsik so yêiz plaz. Zơưv Hơưx A Nhà, phưv chủ tịch UBND xã ntâuk gri:

 “Thâuv ntêx mak pox nhuôs nhoz no tsik so yêiz plaz chôngz. Taz sik kriz uô chos oz chiv thiêz tiv zix zos chor blêx txuôv mak nhiv no chor ziv yêiz pluôs cux tâu txo grêk thiêz cxur nox cux muôx đuô thâuv ntêx lok six ntâu”.

Chiê pox nhuôs tsôngv box Hmôngz tox siêz hlôngr yiêz đuô jênhv pâuz, hlôngr txix chos iz chiv xưk chos oz chiv li nhiv no, cấp ủy, chính quyền thiêz uô ntêx hlo zos nganhx kôngz nuv huyện Mù Cang Chải tưz kriz uô uô cê ntâu tsưr ziv. Huyện tưz hêik, kruôz kriê chor ziv chuôz zis cán bộ, Đảng viên uô uô ntêx, thâuv pov muôx chêx cur mak chor chuôz zis no tưz hêik cưr tix nênhx tsa, jêx jok uô trơưk thiêz tsik so tâu cán bộ kôngz nuv huyện keuôz kriê, qênhz yuôx…Huyện Mù Cang Chải, tỉnh Yên Bái nhiv no muôx 4.300 ntâu hec ta liêx ntêir, nhoz sâuv thax tsav 14 xã, 1 thị trấn. hâur chor jênhv vưv huôv tsar kinh tế xã hội tso tơưv hâur yênhx shông, huyện xav jênhv chos cxaz chiv sâuv liêx ntêir zos iz hâur chor jênhv vưv xuz thơưx. Đhâu xar muôx 5 shông uô, txos nhiv no iz huôv huyện muôx 1.300 ntâu sâuv 1.800 hec ta liêx chos tâu oz chiv blêx; tsênhv yuôr 2000 ntâu hec ta tiv tsik huv đros chos blêx, tưz hlôngr trâu chos cxuô zav tsoz chos li poz cưk, kok zax zưv, blêx mos, kriêr thiêz tưz paz muôx chêx cur jông. Zơưv Lê Trọng Khang, phưv chủ tịch UBND huyện Mù Cang Chải, tỉnh Yên Bái puz pâuz:

 “Zuôr txos no mak tsuôk chos txos 1.800 hec ta xưz, huyện li tsưr ziv zos tsik thav chos tas nro oz chiv blêx, mak zuôr xêir tsov iz cxiê zav tsoz chos huv đros, muôx chêx cur kinh tế chox lok chos. Đhâu chos siv zuôr tso tơưv tsưr ziv tsênhv tsênhz lơưr huv đros yênhx tsoz chos chiê uô xênhz yar chênhr”.

Liêx ntêir tưz tsik zos paz muôx tsar tov huô tsar du lịch, piêr pâuz đuôz shav lok huyện Mù Cang Chải, mak pêx xênhv tox siêz nhoz tưz tsênhv tưz thiêz iz thênhv jux juk hla đhâu cêr pluôs, hlôngr yiêz luz nênhx khov tsưr ziv uô huv đros zos chos cxaz chiv./.

                                                (Trịnh Xuân-Lik Thox cxêik nhênhv)

Phênhv thưr 2, hnuz 23/5/2016:

Lào Cai sir jos fuô  uô trươk Nghị quyết đros trươr hâur luz nênhx

Thâuv heik lok kinh tế jôngr nuv nhoz Lào Cai tsuv heik txos huyện Bảo Yên, viv thax tsav qơư no tưz yênhx qơư chi cax thiêz uô ntêx nyuôs trâu luôs hâux lưv chos tâu ntâu jôngr ntông zos đrêiv tsưr ziv tso tươv. Thâuv nhoz ntâu suôv qơư, tsôngv box tsênhv njiz trâus ntâu phiv liv viv phênhv sâu tâu txix têx jôngr ntông tsi truôx tuk, mak Bảo Yên ho yênhx thax tsav qơư uô ntêx nyuôs thiêz uô tâu jông têx trâur nuv sik hux jos nhoz doanh nghiệp thiêz tsôngv box lok sâuv chos jôngr.

Hâux lưv krêz đar liêx têz sik côngv chos jôngr ntông tâu Đảng bộ huyện Bảo Yên cxơưz tiês uô jông thiêz nthuôr uô đar. Nhiv no tưz muôx 500 ntâu ziv chuôz zis đros uô luôs hâux lưv no, chos tâu 600 ntâu ha. Têx lar heik hâur sik côngv chos jôngr no zos qênhz shuôs tâu têx zuz ntông thiêz qơư sâu zuôr truôx. Đôngx chir Dương Đức Huy, Bí thư Huyện ủy Bảo Yên heik:

“ Pêz tsênhv njuôk hov muôx 25 cxênhz ha trâu tsêr meir MDF muôx têx zuz ntông thiêz têx ntông lox, iz chas ntơư fuô kriê chos 20 cxênhz ha ntông đâux txis txix nhiv no txos 2020 chiê cxiv uô têx tsêr meir tsiv uô trox ntông đâux txis, nhiv no tưz muôx lơưv taz sik krêz uô đar mê njik. Pêz hu zâuv viện khoa học kôngz nuv VN đros uô hur si, uô 200 ha zuz, chos siv têx ntông muôx tsơưr lươngv siêz chiê tsôngv box tâu buôk ti txos têx zuz ntông chos no”.

Đôngx chir Mai Đình Định, Bí thư Thành ủy Lào Cai, tỉnh Lào Cai heik, chiê Nghị quyết đại hội Đảng cxuô cấp sei uô tâu trơưk hâur luz nênhx, Ban Thường vụ Thành ủy tưz yênhx lix têx đoanx qênhz yuôx, seiz kaz hâux lưv yax kriê, fuô uô Nghị quyết nhoz têx chi bộ, đảng bộ ntơưv qơư. Thôngz đhâu ntơư, tưz zênhx max heik thiêz kriê têx chi bộ uô jông luôs hâux lưv yax kriê thiêz uô lơưr nghị quyết txix ciês têx hnuz xuz thơưx hâur six cxiv. BCH Đảng bộ TP cux tưz cxiv tsa 5 tsaz yênhx, hâux lưv zov chênhr uô hâur tas nro khóa, muôx 22 đêx anr uô lơưr Nghị quyết Đại hội Đảng bộ TP jiês tiv 22, reik đros uô truôx 4 tsaz yênhx, 19 đêx anr uô lơưr Nghị quyết Đại hội Đảng bộ tỉnh Lào Cai jiês tiv 15. Đôngx chir Mai Đình Định heik:

“Pêz chox kriê cxuô cấp ủy Đảng, hâu nov têx xã, phường cxiv tsa têx tsaz yênhx, tsưr ziv, hâux lưv seiz kaz uô lơưr Nghị quyết Đại hội cxuô cấp thiêz tso tơưv tâu têx tsưr ziv , hâux lưv uô hâur tas nro khóa. Pêz heik cov tsưr tsix qênhz shuôs đuô hur  si têx chei, cui tinhv chiê cxiv  kho, cxaz nzir cov uô tâu huv đros hâur ntu hlôngr yiêz nhiv no”.

Đros huyện Sa Pa, chiê Nghị quyết uô tâu lơưr hâur luz nênhx, huyện tưz cxiv tsa tsaz yênhx, têx nuv uô lơưr Nghị quyết cov fiv đros qênhx shênhx, tsưr ziv huôv tsar ntơưv qơư. Hâux lưv zov chênhr mak Sa Pa zuôr uô hâur huôv tsar kinh tế zos ju lix thiêz tsiv uô kôngz nuv công nghệ-co cux chênhr zos têx muôx jông ntơưv qơư. Đôngx chir Hứa Tân Hưng, Phưv Bí thư huyện ủy Sa Pa heik:

“ Uô ntêx zos pêz uô lơưr jông Nghị quyết Đại hội Đảng bộ tỉnh, Đảng bộ huyện, hâur ntơư muôx cxiv tsa Sa Pa yênhx qơư ju lix têz qơưs thiêz cxiv tsa Sa Pa  yênhx ciêz đrôngs jông hov 3. Chiê uô tâu li ntơư, tỉnh choz trâu  sở vênhx huôv thể thao thiêz ju lix uô tsưr đêx anr no mak pêz zuôr uô lơưr tsưr ziv heik co chiê fuô uô têx nuv. Uô ntêx pêz tsuv seiz car ju lix, lar heik zos vav mênhx ju lix thiêz muôx tsưr ziv seiz car cxiv uô taz por lơưr chei, cui tinhv cxuô”.

Đros tsưr ziv muôz Nghị quyết uô lơưr hâur luz nênhx, reik đros têx muôx ntơưv qơư, cxuô thax tsav hâur tỉnh Lào Cai tưz cxiv tsa tsaz yênhx, hâux lưv uô thiêz fuô kriê uô lơưr tsênhv tsênhz. Đhâu ntơư, uô ndar txos têx cấp, ngênhx, canr bôv đảng viên thiêz tsôngv box sđ sir jos uô tas zuk txux chi, tsưr ziv, pênhr xưv chiê jux juk uô tâu jông trơưk Nghị quyết Đại hội Đảng cxuô cấp tsưr ziv tso tơưv./.

( Thanh thủy-Riê Lâux cxeik, nhênhv)