Sik côngv siêz mênhx cxưx, tsưx phưv truôx thax tsav ntus đriv

Hâur ntâu shông đhâu lok no, đros pox nhuôs jok Sơn Bình, xar Ma Ly Pho, huyện Phong Thổ, tỉnh Lai Châu, lâul jok Tẩn Dâu Vần chênhr zos qơư txuôk đros cán bộ, chiến sĩ Zênhx Pênhz phax Trôngx đriv Ma Lù Thàng chiê têx tsênhv njiêz yax kriê tâu hêik kriê ntâu txos trâu pox nhuôs sơưr đơưk hâur jok.

Zơưv Vần cux xưk li ntâu lênhx lâul jok, nênhs muôx côngz bê nhoz chor jêx jok, xar Ma Ly Pho tsik so uô ntêx hlo hâur luôs hâux lưv uô ntơưv xar, paz bôv đôiv Pênhz phax sưv jê đros pêx xênhv. Txix têx hâux lưv uô tsênhv tsênhz, truôx jông txix yax kriê, paz trâu pêx xênhv huôv tsar kinh têr, chor tuz lênhv pênhz phax tưz jux juk paz trâu pêx xênhv jênhv pâuz thiêz muôx nzir txux chi đros uô jông têx cêr chêi, cxiv tsa cêr thôngx côngv siêz truôx jông hâur côngv thôngx. Lâul jok Tẩn Dâu Vần hêik:

“Pênhz phax Ma Lù Thàng, lơưr nhoz ntơưv trôngx đriv tưz tuôx paz trâu pox nhuôs pêv no chiê chos tsơưz, oz zos tsuv sir jos chos ntông cao su. Chênhr zos uô tâu li hêik ntơư, nhiv no pêx xênhv tưz muôx luz nênhx truôx tuk jux juk”.

Hâur têx hnuz xuz thơưx kriz uô “4 đros” pêx xênhv, chor tuz lênhv pênhz phax cux njiz ntâu kror phiv liv tiv tsik siz pâuz luk hêik, vênhx huôv. Tiv zix zos pêx xênhv nhoz thax tsav ntus đriv muôx txux chi jênhv pâuz tsik siz luôs thiêz tsênhv yuôr ntâu kror phiv liv viv li hâux lưv yax kriê cux uô tsik yuô tâu jông. Chiê pox nhuôs sơưr đơưk njênhs, bôv đôiv Pênhz phax Trôngx đriv Ma Lù Thàng tưz hêik trâu chính quyền ntơưv qơư cxiv uô chor tsưr ziv tu zus, chos kôngz lôngk lơưr saz hax huv thiêz kriê trâu chor ziv chuôz zis tsôngv box mênhx cxưx cơưv shâuv thiêz uô trơưk. Đại úy Hoàng Viết Sỹ, Phưv Zênhx Tsar zênhx Pênhz phax Trôngx đriv Ma Lù Thàng, lênhx nênhs ntâu shông nhoz trơưr uô “4 đros” ntơưv têx jêx jok hêik pâuz:

“Thâuv cxiv tsa thôngx niêv côngv siêz cxuô mênhx cxưx viv tsưr ziv por vêv ngaz tuk ntus đriv tsuv sir jos txoz cxơưx trâu luz nênhx cux xưk li cxuô zav paz trâu tsôngv box. Uô lơưr Bôv chỉ huy Bôv đôiv Pênhz phax tỉnh, taz viv tưz cxiv tsa ntâu tsưr ziv paz trâu pêx xênhv huôv tsar kinh têr, hâur co tsưr ziv chos tsơưz tsênhv paz muôx tâu têx tsiv gri jông trâu pox nhuôs sơưr đơưk”.

Tix lâus Hoàng Quang Cò nhoz jok Sơn Bình, xar Ma Ly Pho li ziv chuôz zis zênhx zos chuôz zis pluôs. Txơưv tiêk chuôz zis muôx ntâu ar uô nox, taz sik tiv tsik muôx txux chi, tsưr ziv uô nox, kỹ thuật lok chos kôngz lôngk, viv li yênhx shông sir jos khưr uô liêx têz lok cux tsik txâuk nox. Khov muôx vax txir tsơưz bôv đôiv pênhz phax paz chos txix shông 2014, txos nhiv no tix lâus Hoàng Quang Cò ziv chuôz zis tưz tsik zos hla đhâu cêr pluôs, mak tsênhv zos chuôz zis bluô nux hâur jok:

“Tas nro pêx xênhv nhoz xar Ma Ly Pho no lok six txov nhêv. Thâuv ntêx mak tsuôk chos poz cưk xưz, chos poz cưk zos chuôz zis tưs chos ntâu mak thiêx sâu tâu 30-40 triệu đêiv iz shông. Txos thâuv chos tsơưz mak tâu Trung Quốc sâu zuôr viv li tsiv gri kinh têr lok six siêz”.

Tưz tsik zos paz trâu pêx xênhv huôv tsar kinh têr, txo grêk cêr yêiz pluôs truôx đrênhk, cán bộ, chiến sĩ Zênhx Pênhz phax trôngx đriv Ma Lù Thàng tsênhv sir jos đros cấp ủy, chính quyền ntơưv thax tsav qơư yax kriê hêik pêx xênhv tuôr truôx jông mênhx cxưx têx vênhx huôv cxôngx nzor. Đại úy Phạm Tuân, Chính trị viên phưv Zênhx Pênhz phax trôngx đriv Ma Lù Thàng, bôv đôiv Pênhz phax Lai Châu puz pâuz:

“Pêz yax kriê trâu pêx xênhv muôx siêz nhiêv tez qơưk, tso siêz lok mênhx cxưx, sir jos đros por vêv tsưr qênhx thax tsav paz muôx thôngx ziv sik côngv siêz jông hâur pêx xênhv. Tiv oz pêz sik đros yax kriê chiê pêx xênhv phuôx huiz tâu cêr sik côngv siêz sik paz huôv tsar uô nox. Tiv pêz zos yax kriê phuôx huiz lâul jok, tsar jok, nênhs muôx suôz bê li pưk txux chiê paz muôx tâu cêr sik côngv jông thiêz phuôx huiz đas jos hâur côngv thôngx”.

Ntơưv thax tsav ntus đriv Ma Ly Pho, huyện Phong Thổ, tỉnh Lai Châu, đros muôx chor tuz lênhv pênhz phax têx sir jos thiêz chor lâul jok, nênhs muôx suôz bê li cxuô luôs hâux lưv uô, tsôngv box cxuô mênhx cxưx tưz sir jos hâur huôv tsar kinh têr-xar hôiv thiêz sik côngv têk đros lưx lươngv pênhz phax cxiv tsa cêr sik côngv siêz đros por vêv truôx tuk thax tsav ntus đriv têz qơưk./.

(Khắc Kiên-Lik Thox cxêik nhênhv)

Tsêr sor siêz trâu tuz lênhv thiêz tsôngv box pluôs nhoz ntus đriv Sơn La

Hâur luz tsêr cxiv uô khor truôx đar muôx nhos 75 xưv phaz tâu uô tiêr lok hli 10 nhiv kruôr đhâu, trung úy Nguyễn Danh Hào, canr bôv Ban chỉ huy quân sự huyện Sốp Cộp, tỉnh Sơn La shir phaz heik pâuz tiêk, thâuv ntêx, tix lâus chuôz zis hur si muôx 5 lênhx uô nênhx nhoz uô cê hâur luz tsêr ntông lav uô nhoz tax txix shông 2008. Iz shông, hnuz nhôngs đhâu jux juk, luz tsêr co tưz ziv hnuz ziv trâul puôk tsuôx, tsi jông nhoz, viv luz nênhx txov nhêv, mê nhuôv lok tsênhv zâu, tsi so trâul muôx moz gênhs, tsuv muk seiz njuôk shuôs kho moz ntâu jiês, viv li chuôz zis  uô tsi tâu tsêr truôx jông chox lok nhoz. Tâu Bộ chỉ huy quân sự tỉnh Sơn La moz siêz txos, kaz hli 10 shông no, Trung úy Hào chuôz zis tưz tâu choz zok luz tsêr yiêz, cxiv uô khor truôx thiêz đar pho, xav hur si têx nhiêx txiêx cxiv uô tas nhos 110 tsov đeiv:

“Chuôz zis cux tso siêz uô hâux lưv đuô thiêz lok six shir phaz, jông siêz thâuv tâu choz  tsêr nhoz; txix nhiv no muk muôx qơư nhoz so, tso siêz uô hâux lưv hâur thax tsav ntus đriv txov nhêv lơưv; cur 2 niêv txir jông siêz thiêz shir phaz viv tâu têx fôngx zưs thiêz cưr tix đros uô hâux lưv uô cê paz cxiv uô tsêr puz trâu chuôz zis nhoz”.

Zos iz hâur têx chuôz zis pluôs, txov nhêv lok tsêr nhoz tâu Bộ chỉ huy quân sự tỉnh Sơn La choz luz tsêr niêv côngv siêz, tix lâus Mòng Văn Tương nhoz jok Cang Cói, xã Mường Lạn, huyện Sốp Cộp heik: Thâuv ntêx cur chuôz zis uô nênhx nhoz hâur luz tsêr kâus kiz jik, ntux no mak yâu chuô, lok nas xâu nas njuôs njêz, uô nênhx nhoz txov nhêv njuôr. Nhiv no tâu Bộ chỉ huy quân sự tỉnh Sơn La choz luz tsêr  niêv côngv siêz, chuôz zis lok six shir phaz, txix nhiv no muk chuôz zis zuôr tso siêz huôv tsar uô nox uô hâuk, sir jos hla đhâu yeiz pluôs:

“Cur lok six jông siêz, tâu Đảng, têz qơưk moz siêz paz cxiv uô luz tsêr khor truôx li no trâu chuôz zis nhoz. Đhâu thâuv muôx tsêr nhoz, qơư so truôx tuk, chuôz zis cux zuôr sir jos huôv tsar uô nox chiê hla đhâu chuôz zis pluôs”.

Ciês hâur shông no, Bộ chỉ huy quân sự tỉnh Sơn La tưz hux jos đros têx taz viv siêz jông choz zuôr xar 10 luz tsêr niêv côngv siêz trâu têx tuz lênhv muôx luz nênhx txov nhêv thiêz nênhs pluôs tsi muôx vax tsêr nhoz truôx. Đại tá Hà Văn Dưng, Phưv Chính ủy quân sự tỉnh Sơn La heik pâuz:

“Hâur six hơưv zuôr txos, Bộ Chỉ huy quân sự tỉnh xav tinhv cxiv uô tsưr ziv, lar heik zos kriê cxaz têx tsưr ziv yuôr trâul trâu chor taz viv ntơưv qơư thiêz hux jos truôx đros têx ban, ngênhx hâur tỉnh, tiv zix zos chor cơ quan li: Sở Lox tôngv xaz pênhz thiêz XH, đros fuô uô jông tsênhv njiêz no; đros cxuô cấp cxuô ngênhx uô jông têx hâux lưv li heik sâuv hâur chor tuz lênhv”.

Hâux lưv cxiv uô tsêr niêv côngv siêz trâu têx tuz lênhv muôx luz nênhx txov nhêv thiêz nênhs pluôs hâur thax tsav ntus đriv tỉnh Sơn La, zos luôs hâux lưv uô muôx liv tsênhv tsênhz, heik lol canr bôv, chiến sỹ hâur lưv lươngv li têx siêz jông, cêr paz max txos têx tuz lênhv txov nhêv chuôz zis, nênhs pluôs tsik muôx tsêr truôx nhoz. Txix Bộ chỉ huy quân sự tỉnh Sơn La têx luôs hâux lưv uô muôx liv ntơư, tưz paz tâu trâu têx tuz lênhv li heik sâuv truôx siêz uô hâux lưv têz qơưs thiêz paz trâu chor nênhs pluôs tso siêz huôv tsar cêr uô nox./.

(Trấn Long-Riê Lâux cxeik, nhênhv)