Đắk Lắk: Siêz vav njôngr muôx suôz đruôk đror nxê ntưk nhoz jok M’Duk

Thâuv suôz đruôk shôngz (ching kram) nror, chor thành viên hluôk hâur đội ntâuk đruôk hluôk jok M’Duk li cêr cxơưx hâur jiês xuz thơưx piz ntâuk đruôk tưz trâus plox tas. Txơưv tsênhv zâu taz sik chor nhuôs li jã ntâuk đruôk tâu chor nghệ nhân ntâuk gri siêz lok kỹ thuật ntâuk đruôk, tsưr ziv ntâuk, tsik sưz chor nghệ nhân tưz muôx chênhz zênhv thiêz kỹ thuật ntâu đruôk ntêr shông. Jiês ntâuk no tưz tax tâu giải pêz hâur jiês thik cấp cụm thiêz tâu xêir tsov chiê dự thik jiês chung kết ntơưv hnuz hôiv vênhx huôv thể thao cxuô mênhx cxưx thành phố Buôn Ma Thuột trâu hnuz 10/3 nhiv kruôr đhâu. Y Wăn Ê’Ban, iz lênhx thành viên hâur đội puz pâuz, tâu thik tưr đros chor nghệ hân muôx ntâu chênhz zênhv nhoz chor jêx jok txơưr đuô, chor nhuôs li siêz nhiêv ntâuk đruôk xưk li tâu gra siêz đuô oz jiês.

“Cur cux xưk li cxuô lênhx txơưr đuô cux yuôr ntâu kror pâuz tsik tâu viv tsênhv zâu thiêz zos jiês xuz thơưx ciês hlôngr njêx muôs trâu zuk jêx jok tuôx thik tưr. Cux shir phaz thâuv hla đhâu chor đội txơưr đuô chiê tâu tuôx thik tưr jiês no. Cur vav tiêk ntu tov ntêx no mak zuôr huôv tsar tâu chiê tuôr chiê nênhx Ê đê li têx vênhx huôv txix thâuv ntêx lok thiêz tsik uô trâu nênhs Ê đê li vênhx huôv trâus pôngz plox”.

Tâu yênhx lix kuôk no xar muôx 3 shông, đội ntâuk đruôk hluôk jok M’Duk nhiv no muôx 12 lênhx hluôk nênhs txix 9 txos 17 shông cxaz chuôz cơưv shâuv thiêz ntâuk hâur cxuô tênhk hôiv. Yênhx ciêz, chor nênhs hâur đôiv tsês muôx 2 txos 3 hmo chiê sik đros cơưv shâuv chor jax ntâuk cov jông.

Y Liăng Niê Kđăm, lênhx nênhs hnuz nhôngs tsơưs tiv zix hâur đội hêik, cur tâu pâuz txos ntâuk đruôk txix thâuv cơưv lớp 1. Nhiv no mak cur tưz ntâuk tâu cxuô kror hur si.

“Uô ntêx thâuv zuôr cơưv ntâuk đruôk mak cur tưz cơưv trax lơưv viv li mnôngs tâu suôz. Xuz thơưx mak cur tsik tâu nhoz hâur đội taz sik lok six nhiêv viv li niêv tưz thor chiê cur nhoz hâur đội. Txix thâuv nhoz hâur đội mak cur tưz pâuz ntâuk tas cxuô suôz lơưv”.

Nghệ nhân Y Hiu Niê Kđăm, lênhx nênhs kriê lớp ntâuk đruôk hluôk jok M’Duk hêik, zơưv lok six shir phaz thâuv pov chor nênhs zuk kriê ziv hnuz ziv txơưx ntâuk đruôk thiêz nhiêv zuk mênhx cxưx chor zav đruôk no. Đros zơưv mak suôz đruôk lok six muôx gri, viv li xar kriê ntâu đuô trâu cxênhx nênhs tov kaz no pâuz.

Hâur 10 ntâu shông đhâu, tưz muôx yênhx chơưv đội ntâuk đruôk hluôk nênhs Ê đê nhoz chor jêx jok tâu zơưv kruôz kriê, zuôr ntâuk tâu cxuô jax thiêz cxaz chuôz ntâuk nhoz ntâu qơư hâur thiêz đrâuv tỉnh. Tiv zix, nhoz jok M’Duk, txix shông 2004 txos nhiv no, ntâu đội ntâuk đruôk hluôk tưz tax tâu chêx cur siêz hâur chor jiês sik tưr cxuô cấp, kror co xưk li paz nzir trâu zơưv muôx siêz sir jos tuôr chiê têx suôz đruôk Tây Nguyên.

“Xuz thơưx mak ntâu cxênhx hluôk pov tâu tiêk no cux zos zuk mênhx cxưx kror vênhx huôv jông thiêz tiv zix shông no mak muôx chôngz lênhx uô niêv txir chox zuk têx mê nhuôs tuôx cơưv viv li thiêx muôx chôngz nênhs cơưv li no. Viv xar kriê tâu iz đội ntâuk đruôk hluôk muôx 7 lênhx nênhs mak cux tas 3, 4 shông lơưv thiêz muk zok nriêr nêhs cux lok six lax”.

Nhoz jok M’Duk nhiv no, siêz nhiêv ntâuk đruôk thiêz kruôz kriê ntâuk đruôk tưz muôx nhoz ntâu cxênhx nênhs. Tưz tsik zos chor hluôk nênhs thiêx nhiêv cơưv shâuv thiêz ntâuk đruôk mak tas nro chor nhuôs niêv txir cũ xlok six tsov cưv txos, paz trâu chor nhuôs thâuv chor nhuôs cxaz chuôz sik tưr. Tix lâus Y Ninh Ê’Ban, muôx mê nhuôs cxaz chuôz đội ntâuk đruôk puz pâuz, thâuv tưs mê nhuôs tâu muk ntâuk đruôk mak tix lâus tsês six hơưv chiê muk sêiz shuôk, kror co paz uô trâu mê nhuôs sir jos đuô hâur tuôr chiê têx tsiv gri cxôngx nzor co.

“Pêz zos chor uô niêvtxir, pêz lok six shir phaz thâuv tứ tâu iz lênhx nênhs li tix lâus Y Hiu kruôz kriê trâu mê nhuôs ntâuk đruôk, nriêr pâuz tênhx vênhx huôv, cux zos chiê ndo txos cxênhx nênhs uô ntêx. Nhiv no pêz zos niêv txir mak cux lok six shir phaz thâuv tâu tuôx sêiz shuôk chor nhuôs ntâuk đruôk”.

Txix siêz nhiêv thiêz sir jos cơưv shâuv, lớp ntâuk đruôk hluôk nhoz jok M’Duk tsênhv sir jos paz tuôr chiê cxênhx nênhs uô ntêx têx tsiv gri vênhx huôv jông đhâu yênhxx jax ntâuk đruôk mak chor nhuôs ctâu cơưv. Chor nhuôs zuôr zos cxênhx nênhs paz uô trâu suôz đruôk Ê đê tror tâu đror nxê ntưk ntơưv thax tsav Tây Nguyên no./.

(TTTN-Lik Thox cxêik nhênhv)