Sơn La: Têx qox đei tưz puôk tsuôx tas

Tuk qox đei jok Nà Ngà, xã Chiềng Hặc, huyện Yên Châu, tỉnh Sơn La tâu cxiv uô kuôk no 20 shông. Tuk qox đei co lok six zov chênhr trâu zuôr xar 200 chuôz zis  tsôngv box hâur 2 jok Huổi Nga thiêz Nà Ngà. Tiv tâus mul lok ntâu shông, têx đruôz puô qox tưz lưx tsi jông thiêz lor tas.

Iz shông 2 jiês, tsôngv box tưz sik đros txiêr têx shôngz ntông, sik côngv đas jos chiê cxiv kho. Niêx shông muôx ntux yar ntux nas tsi so viv li tuk qox heik co ziv hnuz ziv trâus puôk tsuôx nzir, ntâu ntu tưz lor tas tsi jông tâus mul lok. Tsôngv box lok six cxơưx thâuv muk đhâu tuk qox đei Nà Ngà, lar heik zos thâuv ntux nas lox, đêx huôv hloz ntơư. Thiêz tưz muôx têx lênhx pox niêv, nhuôv zâu trâus pôngz trâu hâur đêx, hmôngr jông tâu chơưv paz zênhx max lok xưz. Tix lâus Hà Văn Thắng, nhoz jok Huổi Ngà heik: "Tuk qox no nhiv nor tưz puôk tsuôx, tsi jông tas, tsôngv box cux siz chos nzir, kho trâu. Pêz cux vav thiêz xar njôngr cov muôx iz tuk qox yiêz khor kho trâu sơưr đơưk tâus mul lok đhâu".

Iz chas tuk qox đei Nà Ngà, ciês sâuv tuk đêx Sập hâur thax tsav huyện Yên Châu, nhiv no muôx zuôr xar 10 tuk qox đei zos muôz shôngz cxiv uô tưz trâus puôk tsuôx, tsi jông tas tsuv nzor tâu cxiv kho, uô đuô. Qox đei jok Khá, xã Sặp Vạt ntêr muôx 50 thiêr, đar 1,5 thiêr, siêz 7 thiêr ntâu pir li hâur blêiv đêx. Niêx hnuz, zuôr xar 100 chuôz zis tsôngv box hâur jok thiêz têx jok nhoz jê iz ndis ntơư tsi so tâus mul lok đhâu. Viv tưz sir zôngv, tâus muk lok tâu ntêr shông, tsuôk iz lok sik 2 lênhs muk sâuv qox xưz, tuk qox cux cho chuôs tsi, tsik jông muk. Têx hluô đei, hluô khi....têx tưz xêz, tsi khor tas, lav muôz khi trâu têx xor hlâu đei chiê tuôr qox, muôx têx trâus tu, plav uô trâu qox vâu lor. Hok sâuv qox mak lav muôz têx txiês, shôngz lok fuô uô đruôz puô siz nzir, par trâu lav tâus mul lok, tưz tsi taz por. Niêv lâuk Hà Thị Điêu nhoz jok Khá heik:"Têx hnuz ntux na, đêx hloz, pêz cux muk đhâu tuk qox no xưz, zênhx pâuz tiêk qox ti khor taz ik cux tuv muk. Cux muôx kênh jiês, têx nhuôv trâus pôngz qox, hmôngr jông tsi uô chas. Tsôngv box nhoz no vav xar njôngr cov têz qơưk paz uô iz tuk qox yiêz chiê sơưr đơưk zôngx ziv tâus mul lok".

Trơưk li zơưv Nguyễn Tuấn Anh, Phưv Chủ tịch UBND xã Chiềng Hặc, huyện Yên Châu: Ntâu đoanx hâur têx cơ quan muôx vax huôv tưz muk qênhz yuôx shuôs têx qox đei hâur xã, taz sik tiv tsi muôx pênhr txâuk viv li têx qox đei puôk tsuôx, tsi jông tas cux tsi tâu cxiv kho, uô đuô. Nhiv no phênhv ntâu zos tsôngv box sơưr đơưk chiv chir cxiv kho txix muôz têx tư txiês, đruôz têx lok nzir kho iz kro mê njik trâu têx ntu tsi jông muk xưz, tưz tsi khor, tsi truôx. Hâur têx hnuz ntux nas lox, hâu nov xã yax kriê trâu tsôngv box sơưr đơưk cov tsơưs mul lok đhâu sâuv têx qox đei thâuv đêx huôv hloz:"Ủy ban xã cux tưz fuô kriê trâu têx jêx jok, heik tsôngv px sơưr đơưk txiêr shôngz ntông lok kho trâu chiê taz por tsôngv box tâus mul lok đhâu. Cheix ntux nas cux tsi so heik trâu 17 jok hâur thax tsav nhoz jê ntus đêx Sập, cov heik tsôngv box sơưr đơưk tiz jông seiz shuôs, chênhr phax, txar jav têx tsi jông lok lênhx nênhs thiêz chuôz zênhx chuôz tas".

Cxuô tuk qox đei tsênhv txuôk, tuôv trâu tsôngv box  sơưr đơưk hla đhâu mul lok txix thax tsav tox siêz đêz đrôngs trâu têx thax tsav, suôv qơư huôv tsar đuô hâur tỉnh Sơn La. Chiê têx luôs hâux lưv heik no uô tâu zôngx ziv trơưk tsưr ziv, siêz xar, luôs hâux lưv cxiv uô yiêz, kho đuô têx qox trâus puôk tsuôx cux lok six zov chênhr thiêz zuôr trâus txos, tsuv muôx tas nro cxuô cấp hâu nov thiêz tsôngv px sơưr đơưk cêr moz siêz, sik đros paz max txos thiêx uô tâu./. 

                                 (Thanh Thủy-Riê Lâux cxeik, nhênhv)

Tsik muôx qơư txưr hâur qênhz yuôx, kỷ luật Đảng

87 tsưr tsix đảng thiêz 6000 ntâu lênhx đảng viên trâus sêiz shuôk kỷ luật, hâur co muôx chor cán bộ nhoz Bộ chính trị, Ban bí thư sêiz car tiv muôx ntâu kror uô tsik jông, phamv cxâuv hâur lênhx tov, chox kriê, sêiz car thiêz sir zôngv nhiêx txiêx, yưv pênhr huôv tsar uô pôngz plox, pôngz pênhr ntâu, uô zuôv hâur côngz xưv cán bộ, côngz xưv sik tưr khơưk kruôk thiêz uô zuôv Ban cán sự Đảng li chêi uô hâux lưv, tsik huv đros. Co zos têx kror cxâuv muôx yưv hâur ntu ntêr, ntâu six cxiv, muôx têx kror cxâuv lok six zov chênhr, uô phiv liv lox txos kinh tế, xã hội thiêz tênhv qơư. Hâux lưv kỷ luật chor đảng viên, tsưr tsix đảng uô cxâuv tâu pêx xêhv thôngx ziv, paz. Kror co puz pov, Ủy ban qênhz yuôx Trung ương tưz xưv lik zos lênhx nênhs, huv kror cxâuv, taz por ndax ndênhk, tsênhz mênhx, ndar six hơưv . Lơưr phưv giáo sự, tiến sỹ Bùi Đình Phong, giảng viên tsêr cơưv học viện chính trị têz qơưk hồ Chí Minh: Têx txuz hâux lưv nhiv kruôr đhâu puz pov kỷ luật hâur Đảng tâu uô tsênhz mênhx thiêz ndax ndênhk, sir jos: “Pêz cxiv tsa têx kror jông, taz sik zos pov têx lênhx nênhs tưs uô zuôv têx co mak tsuv tso so ciês. Lơưr cur mak li co, nhoz kror tưs têx jâuv thâuv chox tuôx Trung ương mak pov tsik tâu, taz sik thâuv nhoz hâur luuwv ho nriêr pov mak tsuv tso so ciês. Uô tâu li co mak cur xar zuôr tâu pêx xênhv njênhs njôngr”.

Xưv lik truôx chor cán bộ uô cxâuv tưz khav tênhv iz tsênhv tsênhz, tsik muôx qơư txưr hâur qênhz yuôx, kỷ luật Đảng, xav tas nro chor cán bộ tưz so lâul lok sik tsênhv uô côngz xưv. Thôngx cxix, nhiv kruôr đhâu, têx kết luận cux xưk li cuêz tênhv xưv lik đảng viên uô cxâuv puôr lênhx tâu hêik pâuz tsênhz sâuv pov chir paz trâu pêx xênhv pâuz tâu txos Đảng li têx sir jos xưv lik chor cán bộ, đảng viên uô cxâuv. Zơưv Nguyễn Viết Chức, Ủy viên đoàn chủ tịch ủy ban trung ương mặt trấn têz qơưk Việt Nam hêik:“Đảng zos hlôngr njêx muôs trâu tas nro pêx xênhv, zos tiêk tsik hêik tsênhz mênhx trâu pêx xênhv pâuz tsuôk xưv lik cov tas xưz mak puôk zuôr jông? Lơưr cur mak no zos kror yiế, huv đros. Ziv muôx ntâu kror hêik pâuz tsênhz mênhx mak ziv jông. Viv pêz đảng uô zos pêx xênhv li kror liv, li mak tsik muôx đaz tsi zuôr jêik pêx xênhv? Hêik pâuz tsênhz li co mak thiêz kho đuô tâu, hok tsik hêik mak zos siz jêik lơưv, li co zuôr uô trâu chor cán bộ hax zav uô zuôv ntâu đuô”.

Lơưr Ủy ban qênhz yuôx Trung ương li hêik pâuz, 6 luz hli đhâu, chor jiês qênhz yuôx chuôz ndê pir li tsêz no, tiv zix zos qêhz yuôx thâuv pov muôx têx uô zuôv. Tsênhv tsênhz, Ủy ban qênhz yuôx têx cấp tưz qênhz yuôx thâuv muôx uô cxâuv đros 855 tsưr tsix đảng thiêz 3.500 ntâu đảng viên. Ban bí thư kỷ luật 2 tsưr tsix đảng thiêz 6 đảng viên zos trung ương sêiz car, Ban chấp hành Trung ương  kỷ luật Đảng li 1 lênhx cán bộ thênhv siêz. Chênhz zênhv muôx tâu đhâu chor jiês qênhz yuôx zos sir zôngv jông thiêz cxuô tiv zix têx xor mông li: Pov chir, têx sik thav hâur xã hội, đhâu pêx xênhv hêik pâuz, nriêr pâuz qênhx shênhx nhoz chor thax tsav. Đhâu thâuv muôx xor mông mak cơ quan qênhz yuôx Đảng pâuz, ndar six hơưv đros uô cov ndax ndênhk, tsênhz mênhx qênhz yuôx pov têx uô cxâuv, xưv lik ciês. Xav jênhv nênhs chiê qênhz yuôx tsuv zos. Tsênhv njiêz qênhz yuôx tsuv zos thiêz six hơưv qênhz yuôx cux tsuv huv đros.

Hâux lưv sêiz shuôk kỷ kuật iz cxiê lênhx tov trung ương thiêz tiv phaz têx uô cxâuv ntu jê lok no puz pov, , côngz xưv kho đuô Đảng lơưr Nghị quyết Trung ương 4, khóa 12 lok six hênhr, hêik tơưv tâu tiêk txơưv lênhx tưs, uô kror hâux lưv tưs, nhoz trâu thênhv tưs zos tiêk uô cxâuv Đảng, li têx cuiz tênhv, têz qơưk têx cêr chêi, uô phiv liv txos têz qơưk thiêz pêx xênhv li kror liv mak puôr lênhx zuôr trâus xưv lik truôx jông./.

                                                                         (TTT-Lik Thox cxêik nhênhv)