Sơn La phax tar poz jêz ntos hâur chêix ntux nas chuô

Tix lâus Nguyễn Hồng Phương nhoz tôv 12, phường Quyết Thắng, thành phố Sơn La, tỉnh Sơn La cux tsênhv ndo njôngr txos têx hnuz kaz hli 7/2017, đhâu jiês ntux lok nas ntêr hnuz, tas nro yênhx puô yiv thôngx ar poz jêz nhoz saz kâuv tsêr qơư pêx xênhv nhoz poz lok, hâur co, muôx iz luz poz jêz lox tưz ntos lok trâus iz ziv chuôz zis luz tsêr, uô trâu oz niêv tuz trâus saz hnhar tsuv chox muk chơưv paz ntơưv tsêr kho moz. Tas nro vax tsêr, cxuô zav trâus puôk tsuôx tas hur si. Tix lâus Phương puz pâuz: “Cur đros sơưr đơưk sir jos thiêx têx ar poz jêz chiê chox tau tuk fâux co tơưv lok mak hnor nưk hêik tiêk cov paz nưk tuk mê nhuôv thiêz. Thâuv no xuôk tênhz tsov mak cur thiêz njiê pov tâu tuk mê nhuôv co, cur sêiz đrơưv thoz huk ar poz jêz cxuô zav chiê paz tuk mê nhuôv co, thâuv puôs tuk mê nhuôv co lok mak pov tưz trâus tu iz cxêik tơư lơưv, li chêk cur chox ciês mê nhuôv tơưv đrâuv jôngr hêik nênhs thâux chox muk chơưv pa, sơưr đơưk mav li chơưv paz tuk mê nhuôs co niêv tov kaz”.

Lơưr thôngz sâu, txix shông 2016 txos nhiv no, sâuv tas nro thax tsav thành phố Sơn La tưz muôx yưv 5 txuz poz jêz ntos txix pêv trôngz lok loz six phiv liv, riêz nênhs, uô iz lênhx nênhs tuôs, 2 lênhx nênhs trâus saz; 5 luz tsêr trâus puôk tsuôx, hâur co muôx 2 luz tsêr trâus poz vâu puôk tsuôx tas hur si; đros co zos ntâu ntu côngz trinhx zoz thôngz thiêz ntâu thax tsav tsoz chos trâus ruôr hiêv. Qir tiv muôx yưv chor txuz poz jêz ntos zos tiv thax tsav thành phố Sơn La muôx ntâu trôngz siêz, nxaz tox đrox têx ar, poz jêz co ntêr shông tsik khov. Txix têx phiv liv tiv ntux têz, lênhx nênhs ruôr hiêv txos, ar poz, poz jêz ntos zuôr zôngx ziv muôx yưv tas nro hâur 4 chêix, taz sik chêix ntux nas mak phiv liv đuô hur si. Tix lâus Hà Duy Thành nhoz jok Nong Ảng, xar Chiềng Ngần, thành phố Sơn La puz pâuz:“Chiê phax tar ar poz, poz jêz ntos hâur chêix ntux nas shông no, cur chuôz zis đros pox nhuôs hâur jêx jok thiêz chinhr quyền ntơưv qơư tưz muk sêiz shuôk iz cxiê kror qơư zôngx ziv muôx yưv ar poz, poz jêz ntos chiê muôx tsưr ziv phax, tar uô ntêx; li khơưz kror trâu ntơưv kaz têx poz jêz lox, muôz shôngz ntông cxok thêir chor poz jêz co cov tsik ntos lok hâur têx qơư pêx xênhv nhoz, hok têx luz poz jêz zâu zuôr njêis yêv tâu mak pêz tưz yêv muk trâu têx qơư ngaz tuk”.

Zơưv Nguyễn Thế Phương, Phưv Chủ tịch UBND thành phố Sơn La puz pâuz: đros tsưr ziv paz muôx tâu luz nênhx ngaz tuk trâu pêx xênhv, yênhx shông, UBND thành phố tưz chox kriê Ban sêiz car phax tar ntux têz ruôr hiêv thiêz zok nriêr chơưv paz têx xar, phường kriz uô tsưr ziv phax tar ntux têz ruôr hiêv, hâur co, tsêx trung hâux lưv phax tar muôx poz jêz ntos sâuv thax tsav:“Thành phố muôx nhiêx txiêx paz trâu têx thax tsav qơư zuôr zôngx ziv njiz trâus muôx ar poz, poz jêz ntos chiê ntiêr taz viv hêik pâuz, qênhz yuôx njêis yev chor poz jêz co muk, taz por tsik chiê tror muôx yưv qênhx shênhx poz jêz ntos sâuv thax tsav”.

Hâur chêix ntux nas chuô shông no, thành phố Sơn La tưz xưv lik truôx jông têx qơư zôngx ziv muôx yưv ar poz, poz jêz ntos; thôngx cxix, tsưr tsix txar qơư nhoz sêi trâu 4 ziv chuôz zis nhoz hâur têx qơư phiv liv zôngx ziv njiz trâus ar poz, poz jêz ntos muk trâu têx qơư nhoz ngaz tuk đuô./.

Trấn Long-Lik Thox cxêik nhênhv

Tsôngv px Lai Châu muôx luz nênhx tsâu sor khov têx jôngr ntông

Xưk li cxiê jiês, đhâu nox pluôk yêik tas, tix lâuss Chồ A Sử , nhoz jok Cang há, xã Tung Qua Lìn, huyện Phong Thổ (tỉnh Lai Châu) ho đros chor nênhs hâur jok gra têx triêv, txuôk muk qênhz yuôx shuôs têx jôngr ntông. Co zos hâux lưv uô hâur niêx hnuz, tưz tâu chor nênhs por hưv jôngr hâur jok uô đreiv txix ntâu shông lok no, chiê zênhx max qênhz pov, phax tir thêir têx txuz ntor luôx, uô ruôr hiêv jôngr. Tix lâus Chồ A Sử heik: Thâuv ntêx viv luz nênhx txov nhêv, tsôngv box hâur jok khênhr muk hâur jôngr chiê ntor cơư têx ntông thiêz txiêr tơưk muôs. Nhiv no muôx chor nhiêx har jôngr lơưv, tsôngv box tsi ntor luôx, uô ruôr hiêv jôngr li  thâuv ntêx, mak sđ siz chos tsưx phưv truôx têx jôngr ntông, chênhr zos li co têx har jôngr zos jok car seiz ziv hnuz ziv lox njuôz jông, sđ luz nênhx tưz nhoz khênhr đuô:“Txeik gra tâu têx nhiêx har jôngr lok, tsôngv box zôngv zuôr têx zuz ntông chos chiê uô jôngr, cov iz hnuz muôx ntâu jux juk têx jôngr ntông njuôz vor tox trôngz câuv har”.

Tung Qua Lìn zos xã ntus đriv txov nhêv hâur huyện Phong Thổ thiêz zos qơư 400 ntâu chuôz zis tsôngv box Hmôngz, Hà Nhì uô nênhx nhoz. Nhiv no tas nro xã muôx 2 cxênhz ntâu ha ar har jôngr, hâur co jôngr phax phưv tsav 30% ntâu. Têx shông đhâu, niêx shông tsôngv box puôr lênhx tâu têz qơưk muôz txix 2,2 txos 2,5 tsov đeiv nhiêx har jôngr. Zơưv Vàng A Quẩy, Chủ tịch Ủy ban xã Tung Qua Lìn, huyện Phong Thổ heik pâuz:“Xã cux muôx tsưr ziv chox kriê trâu px chiê px cxiv tsa têx cui tinhv hâur jok. Chor nhiêx har jôngr mak sđ tsuv zôngv trơưk tsưr ziv. Niêx shông tsuv tsưx phưv truôx jông têx jôngr ntông hâur zuk jok”.

Tỉnh Lai Châu nhiv no muôx 429 cxênhz ha ntâu har jôngr tâu têz qơưk muôz nhiêx por hưv, seiz car jôngr. Shông 2020, tỉnh cuiv nhiêx por hưv thiêz huôv tsar jôngr tâu choz zuôr xar 500 tyv đeiv chiê muôz trâu lênhx nênhs seiz car, tsưx phưv têx jôngr ntông. Txos nhiv no, chor nhiêx heik co tưz phênhv ntâu muôz tas trâu tsôngv px hâur thax tsav qơư. Zơưv Nguyễn Trọng Lịch, Phưv Giám đốc Sở Kôngz nuv thiêz huôv tsar tox siêz tỉnh Lai Châu heik pâuz, phênhv sâu tâu txix seiz car thiêz tsưx phưv jôngr tưz paz tsôngv box muôx nzir nhiêx txiêx chiê tror huôv tsar uô nox uô hnar, txix ntơư muôx luz nênhx truôx tuk đuô:“Nhiv no xav tas hur si tỉnh tưz muôz tâu 439 tyv đeiv, hur si têx nhiêx txeik uô ntêx thiêz nhiêx thêv. Lok sâuv muôz têx nhiêx har jôngr ntơư, mak pêz cux tưz buôk ti heik trâu cxuô taz viv pâuz lok chor nhiêx co. Thiêz cux heik cov lơưr muôx tsưr ziv hux jos uô luôs hâux lưv muôz têx nhiêx har jôngr ntơư li chas cov huv đros trâu px, têx lênhx seiz car, tsưx phưv jôngr. Tsi chiê px tsuv muk lol ntâu jiês, muôz jông six hơưv trâu px thâuv txeik, gra têx nhiêx har jôngr”.

Muôx phênhv sâu tâu txix jôngr, tsôngv box ziv seiz car, tsưx phưv jông đuô têx jôngr ntông hâur jok, hâur xã, txix co, têx har jôngr hâur thax tsav qơư ziv hnuz ziv muôx ntâu, lox jông njuôz xiêz. Tsưx phưv tâu jôngr ntông zos por hưv tâu têx hâur đêx, tsôngv px luz nênhx khov li co cux zuôr truôx tuk, vav mênhx, lar heik zos txo grêk tsơưs tâu tox xưz poz, đêx nas cuôr yôngz thâuv txos cheix ntux nas chuô./.

                                                                TTTB-Riê Lâux cxeik, nhênhv