Têx txux chi vênhx huôv, tsôngk tril yo jông hâur hnuz Hôiv vênhx huôv thêv thao cxuô heir nênhs faz Bắc

Iz hâur têx tsênhv njiêz uô hâur hnuz hôiv vênhx huôv, thêv thao thiêz ju lix cxuô heir nênhs thax tsav Tây Bắc jiês tiv 14 tsuv heik txos zos nthuôr uô cxuô heir nênhs Tây Bắc têx txux chi cêr lov jêv. Đhâu têx jax txux chi nthuôr uô lov jêv đros trâu têx suôz trax, suôz kênhx, suôz đruôl tôngx nxêz tôngx....đros trâu 400 ntâu lênhx tuz nxêik hluôk txơưx hu gâux, heik cưr cxiêx, yuôz trax, yuôz kênhx, đhiê pax vuôs nhoz têx đoanx uô lov jêv hâur têx tỉnh Hòa Bình, Phú Thọ, Yên Bái, Điện Biên, Lai Châu thiêz Sơn La tưz nthuôr uô têx txux chi cêr lov jêv, hnar cxuô heir nênhs têx tsôngk tril yo thâuv nzor, cxiv uô têx cêr nênhx phôngz cxưx jông......trâu sđ sei, uô Hnuz hội muôx ntâu cêr lov jêv thiêz yênhx côngz. Tix lâus Hà Duy Sơn, nhoz TP Sơn La heik: “Iz kro lok six jông mak cur pov muôx liv ntơưv tsaz yênhx no, zos phênhv sik tưr thik cxiv uô cxuô heir nênhs têx txux chi vênhx huôv jông thâuv nzor, co zos phênhv thik lol six jông, paz trâu pêz chor hluôk pâuz txos têx txux chi, cêr nênhx vênhx huôv jông  đrav ntêx ”.

Đros trâu cêr lov jêv hâur hnuz hôiv, tsênhv zos zuôr xar 250 lênhx nênhs nhoz chor tỉnh Hòa Bình, Phú Thọ, Điện Biên, Lai Châu, Yên Bái, Lào Cai thiêz Sơn La têx sir jos siz tưr thik têx txux chi li: Sik lâuz pak, sik truz hluô, lêiv poz, ntâuk tux luz, tuô hnênhr, sik tưr đhiê. Chor nênhs cxaz chuôz tưz sik thôngx siêz sir jos tưr thik tas zuk txux chi tsưr ziv uô trâu muôx suôz luôs, cêr lov jêv ntưk, hu zâuv tâu chôngz lênhx ntâu tuk px tuôx seiz thiêz cxơưz paz đas jos. Quàng Thu Trang nhoz tỉnh Điện Biên shir phaz heik: “Cur pov lok six lov jêv thiêz shir phaz trâu Hnuz hội thêv thao cxuô heir nênhs nhoz Sơn La. Cur zos iz lênhx nênhs tâu đros sđ sik tưr, mak cur zuôr sir tas zuk tsưr ziv, đas jos chiê tưr thik cov tâu zênhx. Nhoz no tsôngv px cux tuôx lok six chôngz thiêz lov jêv chiê cxơưz paz trâu pêz muôx nzir đas jos tưr thik tâu jông”.

Iz cxênhz ntâu lênhx nênhs đros nthuôr uô cêr lov jêv hâur hnuz hôiv, tâu kriz uô hâur 3 hnuz, txix hnuz 18/8-20/8, uô ntâu zav txux chi, cêr lov jêv jông li: Sik tưr thik cxuô heir nênhs têx txux chi uô si lov jêv; piêr kriê têx xiv huv vênhx huôv, ju lix, cxuô thax tsav qơư têx zav nox kaz thâuv nzor; nthuôr uô cêr lov jêv thiêz sik tưr hnar cxuô heir nênhs Tây Bắc têx tsôngk tril yo, cxiv uô têx cêr nênhx phôngz cxưx, vênhx huôv nhoz cxuô thax tsav qơư....

Đhâu 13 jiês sik hlôngr tsưr tsix uô nhoz têx tỉnh Tây Bắc, Hnuz hôiv vênhx huôv, thêv thao thiêz ju lix cxuô heir nênhs thax tsav Tây Bắc tưz tsênhv tsênhv yênhx iz txux chi vênhx huôv thâuv tưs tưz zuôr tsuv muôx, paz por hưv, tuôr tsês thiêz huôv tsar côngv thôngx cxuô heir nênhs thax tsav Tây Bắc têx txux chi vênhx huôv jông tsi chiê pôngz plox. Têx txux chi uô hâur hnuz hôiv zos six hơưv chiê trâu cxuô heir nênhs tâu siz chuôs njiz, sik cơưv shâuv têx tsưr ziv, muôx cêr sik thôngx siêz jông. Zơưv Đặng Văn Hùng, Giám đốc Sở Vênhx huôv, thêv thao thiêz ju lix tỉnh Sơn La heik pâuz: “Hnuz hôiv vênhx huôv, thêv thao thiêz ju lix cux muôx ntâu kror jông. Cxuô heir nênhs thax tsav Tây Bắc mak iz heir nênhs nhiêk muôx nhiêk iz txux chi vênhx huôv jông txơưr tsi siz thôngx, đhâu Hnuz hôiv no cux chênhr zos nthuôr uô tâu lok cxuô heir nênhs thax tsav Tây Bắc têx txux chi vênhx huôv jông, têx txux chi vênhx huôv tâu nthuôr uô siz tưr thiêz chuôs njiz chiê trâu cxuô heir nênhs tâu siz njiz thiêz siz cơưv shâuv têx txux chi cêr nênhx vênhx huôv jông, cov pêz uô tâu jông đuô luôs hâux lưv por hưv, tuôr tsês chiê têx txux chi, cêr nênhx vênhx huôv jông tsik chiê pôngz plox”./.

(Trấn Long-Riê Lâux cxeik, nhênhv)

Tir thêir tsik chiê uô ruôr hiêv txos têz qơưs têx blêx liêx tơư ntêir jông jav ntơưv Sa Pa

          Tả Văn thiêz Lao Chải zos oz xã muôx blêx liêx tơư ntêir jông jav nhoz huyện Sa Pa thiêz ntơư cux zos thax tsav qơư cxiv uô ntâu côngz trênhx tsik trơưk chêi, uô ruôr hiêv tsik jông txos têz qơưs têx blêx liêx tơư ntêir jông jav. Qir tiv zos muôx ntâu chuôz zis phêiz chuôz tsik muôx ar uô tsêr nhoz thiêx cxiv uô tsêr nhoz trâu hâur têx blêx liêx tơư ntêir. Zơưv triệu Văn Phà nhoz xã Tả Văn hêik: “Hâur ntu uô ntêx tsuôk muôx iz ziv chuôz zis, taz sik nhiv no têx tuz nxêik lox hloz, muôx chuôz zis thiêx phêiz chuôz uô tsêr nhoz trâu hâur têx ar liêx tơư ntêir thiêz pêz cux tok njôngr têz qơưs tsuv zok nriêr iz kror qơư chiê px cxiv uô tsêr cov muôx qơư nhoz truôx”

          Trơưk li huyện thôngz sâu, tưz muôx 190 chuôz zis nhoz 3 xã zos: Tả Văn, Hầu Thào, Lao Chải, cxiv uô tsêr nhoz trâu têz qơưs têx ar liêx tơư ntêir jông jav hâur thax tsav Sa Pa. Iz hâur têx tsêr tok kruô uô tsik trơưk chêi hâur thax tsav ar liêx tơư ntêir zos huôv tsar uô du lix. Zơưv Lý Văn Hiển, chủ tịch uỷ ban xã tả Văn hêik pâuz tiêk, iz chas cxiv uô tsêr trâu chor chuôz zis phêiz chuôz mak cux tsênhv yuôr oz qir tiv txơưr thiêz. “Qir tiv zos cxiv uô tâu iz luz tsêr chiê ntiêr nhoz iz txos oz luz hli, muôx phênhv sâu tâu nhiêx txiêx bâuv li iz shông khưr uô liêx têz. Kror tiv pêz zos hâu nov ntơưv qơư luôs hâux lưv sêiz car tsik truôx thiêx muôx yưv têx li hêik ntơư”.

          Chênhr zos li hêik co, hâu nov huyện Sa pa tưz muôx ntơưr choz zok ar cxiv uô tsêr nhoz trâu cxuô xã chiê ruôr têx tsêr cxiv uô tsik trơưk chêi hâur thax tsav têz qơưs têx ar liêx tơư ntêir jông jav cov huv đros px thiêz zos đrêiv chêi têz qơưs têx chêi tso tơưv. Zơưv Lê Tân Phong, chủ tịch uỷ ban huyện Sa Pa  hêik pâuz: “Pêz zuôr sir jos ruôr cov tâu 50 côngz trênhx cxiv uô tsik trơưk chêi hâur shông no; đuô li cxuô chuôz zis txơưr mak pêz zuôr sêiz car cov tâu truôx, huv đros chêi têz qơưs, huv đros thax tsav qơư ar liêx tơư ntêir cov ziv hnuz ziv muôx liv trâu px hâur thax tsav”

          Xav txos trâu nhiv no, huyện Sa Pa tưz ruôr tâu 15 côngz trênhx, uô ntâuz ntơưr xưv bluô 175 jiês thiêz hêik iz cxiê cán bộ xã tsuv uô cov tâu truôx luôs hâux lưv sêiz car têz qơưs thax tsav ar liêx tơư  ntêir jông jav hâur thax tsav huyện Sa Pa./.

                                                (Tsu cxêik nhênhv-Thanh thuỷ,VOV TB)