Jax sâu 3: Viv li chak txuz muôl muôs lênhx nênhs nhoz

Sìn Hồ cux tsênhv tsik tâu uô tsênhz mênhx?

Tẩn A Thiên

Ciês thâuv pos Lai B đros chor nênhs uô cxâuv jênhv tiêk đas Hin chox muk trâu saz Trung Quốc shông 2008, pos Tẩn Mý Nái zos Hin niêv tưz muôx ntơưr xa trâu cơ quan txơưx jênhv taz sik kror hâux lưv no cux tsik tâu cêir chêx:

“Chuô zis tưz uô ntơưr xa trâu ntâu qơư. Cur chuôz zis cux tsik ndo tiêk xa pêk tsơưs ntơưr pênhr lơưv, taz sik puôr lênhx tsik hnor têz hlo. Txos hnuz 15/08/2008 cur chuôz zis thiêx txêik tâu cơ quan Công an huyện Sìn Hồ luk têz tiêk: txuz hâux lưv no muôx yưv sâuv thax tsav đar cik txos huyện, tỉnh viv li hla đhâu cơ quan Công an huyện Sìn Hồ qênhx lơưv, viv li cơ quan Công an huyện Sìn Hồ tưz choz zok tas nro ntâuz ntơưr trâu phòng CSĐTTP-TNXH Công an tỉnh qênhz yuôx lơưr qênhx. Đhâu co pêz uô ntâuz ntơưr xa trâu thênhv siêz đuô taz sik ntâu shông no cux tsik tâu cêir chêx”.

Hêik lok qir tiv txuz hâux lưv tsik tâu cêir chêx, đại úy Đào Công Hùng, phưv trưởng Công an huyện Sìn Hồ puz pâuz: đhâu thâuv txêik tâu ntơưr cơ quan qênhz yuôx công an huyện Sìn Hồ tưz piz qênhz yuôx, muôx sik thav côngv đros phongx uô hâux lưv no cấp tỉnh, taz sik xưv lik tsik tâu iz lênhx nênhs tưs trơưk chêi têz qơưk hlo lok kror cxâuv muôs lênhx nênhs, cux tsuôk zos tâu uô qênhz yuôx xav jênhv txuz hâux lưv no xưz. Phiv liv hâur ntu qênhz yuôx chor txuz muôl muôs lênhx nênhs, tiv iz zos hâur ntu qênhz yuôx mak chuôz zis muôx nênhs trâus nziêk đas thiêz chor nênhs nziêk đas chiv cir sik sêiz lax thiêz đhâu co tos trâus hiêv tsik hêik pâuz, tsik côngv chiê qênhz yuôx. Tiv oz zos: têx kror pâuz tâu tsuôk zos txix tos trâus nziêk đas hêik pâuz xưz. Thiêz hâux lưv qênhz yuôx nhoz saz Trung Quốc mak cơ quan qênhz yuôx Công an huyện cux xưk li Công an tỉnh lax qênhz yuôx xav jênhv tsênhz mênhx tâu têx muôx li hêik co.

“Kror hâux lưv no mak cơ quan Công an tưz txêik tâu ntơưr pênhr txix shông 2008. Đhâu thâuv txêik tâu ntơưr mak cơ quan cux tưz qênhz yuôx xav jênhv txuz hâux lưv no. Txix shông 2008 tưz zênhx uô nênhx nhoz saz Trung Quốc viv li mak cux lav xav jênhv tâu. Txos shông 2019 tưz tror lok Việt Nam tưz muôx ntơưr hêik pâuz, chuôz zis cux tưz tror muôx nzir ntơưr xa trâu cơ quan qênhz yuôx. Cơ quan qênhz yuôx công an huyện tưz txêik jênhv thiêz tưz piz uô ntâuz ntơưr qênhz yuôx xav jênhv txuz hâux lưv chiê xưv lik trơưk cêr chêi têz qơưk li cui tênhv, txos six hơưv no pêz tsênhv nriêr pâuz nzir chiê muôz nênhs uô cxâuv tik cêr cxâuv trơưk chêi têz qơư”.

Txos nhiv no, đrâuv nênhs trâus nziêk đas zos Chẻo Mý Hin, tưz muôx nzir Chẻo Xoang Mẩy thiêz nênhs hâur chuôz zis Chẻo Mý Hoán muôx ntơưr pênhr pos Lai B, đros chor nênhs nziêk đas muôs pox niêv trâu saz đrâuv têz qơưk. Nênhs sâu xor xưv nhoz Đaix TNVN iz suôv faz Bắc cux tưz njiz thiêz thav pêv đros chor nênhs co zos pos Chẻo Mý Diển, nênhs nhoz jok Săng Tăng Ngai thiêz pos Chẻo Mý Dao nhoz jok Phăng Xô Lin 1, xar Phăng Xô Lin thâuv co uô bí thư chi bôv jêx jok. Ciês chor nênhs nziêk đas zos pos Lai B thiêz tuk tuz Tân A Thiên cux tưz lênhk zuk kror cxâuv thâuv thav pêv đros nênhs sâu xor xưv:

“Cur lênhk cxâuv tiêk tưz hêik cov tuk nhuôs tuz zos Tẩn A Thiên chox Mý Hin muk. Đhâu thâuv Mý Hin muk lơưv mak Mý Hin niêv txir tuôx tsêr hêik tiêk pêz hnuz tov kaz tsuv chox tâu Mý Hin tror lok. Thâuv co cur tsik têz thiêz khiêr muk gâuv trâu xar Huổi Luông viv nyêi tsav Mý Nái oz niêv txir ntâuk”.

“Thâuv co zos muôx nhos 11 six iz tas hmo 1/2/2008 cur muk uô si lok txos mak cur niêv cov cur chox Mý Hin muk trâu Lai Châu. Thâuv muk txos co mak cur tưz tso Hin nhoz ntơưv ciêz jê qơư tsar yêz kuz thiêz đhâu co cur tror lok Sìn Hồ thâuv muôx 3 six sơưr nzor hnuz tov kaz”.

Nhiv no, pos Lai B tuk nhuôs nxêik zos Tẩn Pà Mấy thâuv pâuz tiêk chor chuôz zis muôk nênhs trâus đas uô ntơưr pênhr mak cux tsênhv six hu tênhv txix Trung Quốc lok hêv:

“Thâuv ntêx cur tưz hêik cov cox hêik cox niêv tiêk tsiz cxoz pênhr lơưv cur mav li gra 20-30 triệu đêiv lok trâu cox. Zos tiêk tsik uô ntơưr pênhr mak cur tưz muôz nhiêx lơưv, taz sik cox vax tsêr tsik mnôngs. Zos nhiv no tsik tror truz têx ntơưr pênhr lok mak cur zuôr xa nhiêx lok trâu cur niêv chiê uô cov cox chuôz zis tơưv tsik tâu đrâuv jôngr hlo. Cur chuôz zis zuôr ntiêr nênhs tuô cox tsêr nênhs cov tuôs tas”.

Chor nênhs trâus nziêk đas thiêz chuôz zis têx luk pênhr, chor nênhs pov pâuz, thiêz tưz muôx ciês chor nênhs fêv nziêk đas co li luk hêik lênhk zuk têx kror uô cxâuv, li co puôk zos cux tưz txâuk chiê cêir chêx txuz hâux lưv? Lo luk nus no thor chiê trâu cơ quan txơưx jênhv nhoz huyện Sìn Hồ, tỉnh Lai Châu têz. Pêx xênhv hêik cxuô, chor nênhs trâus nziêk đas thiêz chuôz zis đuô thâuv tưs hur si tsuôk xar cov pháp luật tâu uô jông, ndax ndênhk chiê chor nênhs uô cxâuv trâus xưv bluô, tik cêr cxâuv huv đros trâu têx kror uô cxâuv co. Nhoz iz huyện tox siêz muôx chôngz tsôngv box mênhx cxưx, nênhs fêv nziêk đas muôl muôs pox niêv, nhuôs zâu muôx ntâu phiv liv xưk li Sìn Hồ mak hax zav tsuv uô truôx chiê zoz zux, thiêz hêv sơưr đơưk./.

(Chẻo Thu-Lik Thox cxêik nhênhv)

Lênhx nênhs cxuz cêr yeiz pluôs nhoz Sơn Tống A.

Jok Sơn Tống A nhoz hâur xã thax tsav tox siêz ntus đriv Na Tông, huyện Điện Biên, tỉnh Điện Biên. Ntơưv no 100% tsôngv box zos heir nênhs Hmôngz uô nênhx nhoz, 64 chuôz zis, 371 lênhx nênhs. Hâur têx shông đhâu, đảng viên chi bộ jok thâuv tưs tưz xav tinhv tsênhz pưs txux, lênhx nênhs uô ntêx nyuôs hâur cxuz cêr yeiz pluôs, chox kinh tế jok Sơn Tống A huôv tsar.

  Pêz muk shuôs tix lâus Jôngr Vax Xênhv Zax, Bí thư chi bộ jok Sơn Tống A chuôz zis thâuv tix lâus tsênhv nhiv kruôr muk shuôs chuôz zis têx nhux tov vax jâuz lok, tix lâus shir phaz heik pâuz: “Chi bộ Sơn Tống A muôx 5 lênhx đảng viên, 5 shông ntâu uô bí thư, cur pâuz tâu tiêk, xar cov tsôngv px mnôngs thiêz njênhs trơưk, mak zuk tsuv uô ntêx nyuôs, heik tâu, uô tâu, uô ntêx hlo hâur huôv tsar kinh tế chuôz zis li: Huôv tsar tu zus tsiêx cxu, tsêz chos kôngz. Uô li chas chiê tsôngv cưr tix nênhx tsa sđ hâur zuk jok hla đhâu cêr pluôs, muôx luz nênhx jông đuô zos zuk tsưr ziv, siêz xar njôngr”. Chiê uô trâu sđ pov tsênhz lok têx luk tix lâus heik co, tix lâus chuôz zis tsênhv tu zus 13 tuk niêv nhux đros trâu paz buô, keiz yênhx puô tuk. Tix lâus tưz uô lơưr têx tsưr ziv yiêz hâur tu zus, qơư tu zus tsiêx cxu hur si, xor thêir, phax tar no thiêz yeiz trâu tsiêx cxu.... viv li txos iz jiês no tix lâus chuôz zis têx tsiêx cxu hloz vav lok six jông, gra lok phênhv sâu tâu truôx tuk. Tsi tiêk zos tix lâus Jôngr Vax Xênhv Zax xưz, mak têx lênhx đảng viên hâur chi bộ puôr lênhx zos têx lênhx uô ntêx nyuôs hâur huôv tsar kinh tế ziv chuôz zis. Iz zav li chuôz zis đảng viên Por Xênhv Vưx, Chay Xênhv Zax cux zos lênhx uô ntêx nyuôs hâur huôv tsar uô nox uô hnar, paz cxơưz phôngz yaox huôv tsar uô nox, tu zus tsiêx cxu, nthuôr uô đar hâur jok trâu tsôngv cưr tix nênhx tsa sđ cơưv shâuv, uô trơưk. Chênhr viv li, têx chuôz zis pluôs hâur jok tưz jux juk txo grêk tsơưs đhâu têx shông, nhiv no tsuôk yuôr 17 hâur 64 chuôz zis, tưz paz tuôr truôx jêx jok thax tsav tox siêz ntus đriv nox nhoz njiês to.

Đros trâu hâux lưv yax kriê, vênhv tôngv tsôngv lax px cxơưz tiês huôv tsar kinh tế, cxiv tsa luz nênhx vênhx huôv, têx lênhx đảng viên Chi bộ Sơn tống A uô jông hâux lưv kriê cxaz têx txux chi, tsưr ziv yuôr trâus trâu têx lênhx uô tâu hâux lưv jông chiê heik kriê, tso nhoz hâur đảng. Shông 2018, chi bộ tưz paz 3 lênhx nênhs uô tâu hâux lưv jông chiê kriê cxaz têx txux chi, tsưr ziv, tso nhoz hâur đảng.

Têx luôs hâux lưv Chi bộ jok Sơn Tống A uô tâu zos uô trơưk zơưv Hloz Hôx têx luk choz kriê: “Iz lênhx uô nênhx tsiv txiêx tsênhv jông đuô iz puôk jax luk piêr kriê”. Six hơưv zuôr txos, Chi bộ jok Sơn Tống A tror sir jos gra siêz chi bộ txux chi chox car, tsưr ziv sik tưr đros luôs huôv tsar uô nox, sir jos uô jông lênhx đảng viên li hâux lưv, uô ntêx nyuôs hâur cxuô cêr nuv, sir jos yax kriê, vênhv tôngv tsôngv px uô lơưr Đảng, têz qơưk têx tsưr ziv, tsênhv chei thiêz cxơưz tiês huôv tsar kinh tế, cxuz cêr yeiz pluôs, cxiv tsa jêx jok yiêz, paz uô  tâu jông têx tsưr ziv, hâux lưv mak Nghị quyết Đảng bộ xã Na Tông, six cxiv 2015-2020 tưz tso tơưv.

Tsôngv ....! Phênhv “Nôngx mênhx zuôr tsuv pâuz” ciêz no tsuôk muôx li no xưz. Phênhv no zos Đeix TNVN nhoz iz suôv thax tsav Tây Bắc đros Tsênhv qơư cxiz kôngz têz qơưk uô./.

(KT-Riê Lâux cxeik, nhênhv)