Thành phố Yên Bái phuôx huiz chor tsưr tsix, đoanx thêv li pưk txux hâur phax tar moz Covid-19

Nhiv kruôr đhâu ntơưv phố Đào Tấn, phường Nguyễn Thái Học, thành phố Yên Bái muôx oz ziv chuôz zis tsuv uô lơưr cêv kuôk y têr ntơưv tsêr viv nhoz jê, njiz tâu chor nênhs njiz tâu chor nênhs trâus cik caz moz. Viv muk tsik tâu trâu ciêz chiê zuôr jâuz nox đros cxuô zav txơưr, Chi hôiv pox niêv tôv dân phố tưz tso nênhs muk paz zuôr. Pos Hoàng Thị Ngọc Hồi, Chi hôiv trưởng Chi hôiv pox niêv tôv dân phố số 2 puz pâuz: “Hâur tôv no cux muôx chuôz zis tsuv cêv kuôk, cxuô lênhx nênhs tsuv nhoz jông hâur tsêr, pêz tưz paz trâu chor chuôz zis no zuôr zav nox, kôngz krâur”.

  Thâuv chor nênhs nhoz jê, njiz tâu chor nênhs njiz tâu nênhs trâus cik caz moz tsuv uô lơưr cêv kuôk ntơưv tsêr nhoz thành phố Yên Bái chuôz ndê, ntâu jêx jok sâuv thax tsav tưz tso nênhs sik côngv đros chor lưx lươngv muôx vax huôv thành phố, xar, phường sêiz kaz hâux lưv cêv kuôk ntơưv tsêr.

  Chor tôv dân phố, jêx jok tưz uô têx qơư sêiz jor ntơưv têx chuôz zis tsuv cêv kuôk chiê cê sêiz shuôk, cê paz trâu chor ziv chuôz zis no. Zơưv Đình Văn An, Bí thư Chi bộ tôv dân phố số 4, phường Nguyễn Thái Học hêik: “Pêz sêiz car thiêz chox kriê chor chuôz zis tsuv cêv kuôk uô jông têx tsưr ziv cêv kuôk ntơưv tsêr, zos tsik khênhr tơưv đrâuv jôngr thiêz cux tsik khênhr lênhx tưs lok hâur tsêr. Chor chuôz zis co cux lok six tso siêz thiêz đros côngv thôngx uô jông côngz xưv phax, tar caz moz Covid-19 hâur têx hnuz đhâu”.

Pos Tạ Ngọc Hoa, Bí thư Đảng ủy, Chủ tịch UBND phường Nguyễn Thái Học, thành phố Yên Bái puz pâuz: Phường tưz kriz uô têx qơư qênhz yuôx, sêiz kaz caz moz đros chor nênhs uô hâux lưv zos dân quân, công an thiêz lưx lươngv tôv dân phố: “Phường kriz uô 36 qơư sêiz jor chiê sêiz shuôk chor ziv chuôz zis, thôngx cxix tsik so hêik trâu pêx xênhv pâuz tsuv uô truôx jông têx cui tênhv lok cêv kuôk y têr ntơưv tsêr đhâu zalo phường. Pêz cux xav jênhv no zos tsưr ziv uô muk ntêr viv li tưz pheiz côngz hâux lưv tsênhz mênhx lơưr six hơưv cov uô tâu truôx jông”.

Đrâuv chor nênhs tsuv tâu cêv kuôk tsêx trung, sâuv thax tsav  thành phố Yên Bái muôx zuôr xar 8.000 lênhx nênhs zos chor nênhs nhoz jê, njiz tâu chor nênhs njiz tâu chor nênhs trâus moz thiêz chor nênhs tsuv tâu cêv kuôk, sêiz shuôk ntơưv vax tsêr.

Zơưv Đỗ Đức Minh, Bí thư Thành ủy Yên Bái, tỉnh Yên Bái puz pâuz: chiê uô jông côngz xưv phax tar caz moz, thành phố tưz huiz tôngv tas nro cxiv luôs chính trị sik đros uô: “Pêz kriz uô cxuô nro têx tsưr ziv phax, tar caz moz, hâur co moz siêz txos phuôx huiz chor cán bộ ntơưv thax tsav qơư, Bí thư chi bộ, Tôv trưởng dân phố, tsar jok, chor Chi hội li pưk txux hâur hâux lưv nriêr pâuz, sêiz shuôk chor nênhs tsuv cêv kuôk y têr, sêiz shuôk đas jos ntơưv tsêr. Ntu zuôr txos, đros moz Covid-19 tsênhv txơưr txar phiv liv, pêz zuôr tror yax kriê, hêik sơưr đơưk sir jos uô hâux lưv đuô chiê paz phax tar tâu truôx jông caz moz”./.

                                                                             (Tuấn Xuân-Lik Thox cxêik nhênhv)

Kriê tsưr ziv tu zus têx nhuôv keiz nhiv kruôr đâus thiêz zus tu li chas cov têx nhuôv keiz hloz lox jông

Tsôngv box….! Zus, tu têx nhuôv keiz nhiv kruôr đâus zos iz hâur têx zov chênhr đuô hur si hâur tu zus keiz, muôx têx uô ruôr hiêv txos 80% hâur luz six hơưv tu zus tâu thiêz tsi tâu trơưk tsưr ziv xar. Taz sik, ntâu lênhx px cux six tso siêz, tsi seiz hloz txos ntu no, uô tsi trơưk li heik kriê, uô trâu tu tsi yuô tâu têx keiz trơưk têk. Vav chiê siêz đhâu jax sâu đrav kaz zuôr paz tsôngv box sđ pâuz nzir lok têx tsưr ziv tu zus têx nhuôv keiz nhiv kruôr đâus cov hloz lox jông.

Qơư zus tu têx nhuôv keiz:

Uô ntêx thâuv zuôr gra têx nhuôv keiz nhiv kruôr đâus lok zus, tsôngv box sđ tsuv xeir uô qơư zus li chas cov huv đros, tsi nhoz jê thax tsav qơư zus têx keiz lox thiêx tsi trâul cik tâu moz txix chor keiz lox trâu nhuôv keiz mê. Qơư zus tsuv vor hur si, taz por kruôr krơưr, nas tsi yiê ntuz, tsi yâu chuô thiêz xor thêir jông chiê tsi trâul nak, mir tov.

Tsôngv box sđ tsuv qêz suô, nzuôr hur si qơư tu zus thiêz tsuôs yuôx tuô lov caz moz trâu. Đhâu ntơư, sđ muôz têx xuô blêx lok puô iz cxênhx trâu hâur kaz cov mê njik tuôz tsơưr, li muôz têx têik đêx, têik krâur lok tso trâu nhuôv keiz nox krâur, hâuk đêx. Đhâu thâuv tưz bax uô tâu qơư tu zus li heik sâuv, tsôngv box sđ li muôz chor nhuôv keiz lok tso trâu kror qơư co.

Tơưk tênhz trâu têx nhuôv keiz ntê thiêz six hơưv tso tênhz pov cêr:

Têx nhuôv keiz zos tâu pox puôs đâus thiêz tu trơưk li têx lâuk iz txưv tu zus keiz chox mê nhuôv mak pox keiz zuôr puôs têx nhuôv keiz cov sor thiêz chox trâuz zok caz trâu têx nhuôv nox chiê sưv jux juk trâu tênhx qơư. Chênhr zos li heik ntơư, qơư tu zus têx nhuôv keiz mok tsi muôx niêv chox tsuv tâu tơưk tênhz cov sor sơưr huv đros trâu, chor nhuôv keiz thiêx hloz jông lox.

Tênhz mak sđ zôngv chor kê tênhz khênhx chiê tơưk trâu nhuôv keiz ntê, viv chor kê tênhz no zôngx ziv tơưk thiêz jông trâu chor nhuôv keiz đas jos.

Six hơưv tso tênhz tơưk pov cêr  trâu keiz cux zos têx lok six zov chênhr trâu nhuôv keiz thiêz. Tơưk tênhz pov cêr zuôr paz jông trâu têx nhuôv keiz nox tâuk krâur, cxiz keiz hloz lox jông. Tsôngv box sđ muôx têx zôngv têx kê tênhz tơưk sor trâu keiz, cê zôngv chiê trâu keiz ntê, cê tơưk pov cêr, sđ muôz kê tênhz đei cov siêz muôx nhos 2,5 thiêr cov pov cêr huv đros. 

Krâur trâu keiz nox:

Đros thiêz chor nhuôv keiz đhâu thâuv nhiv kruôr đâus tâu iz hnuz, sđ tsi thav muôz krâur trâu nox viv hâur luz đros chêr tsênhv muôx têx tsơưr pưr, tsuôk muôz nzir đêx đo shơư mê njik têx suz thax, yuôx  trâu hâuk xưz.

Đhâu hnuz xuz thơưx, sđ tsuv muôz trâu nhuôv keiz nox chiê cov luz chêr muôx txâuk tsơưr pưr thiêz tsi trâul tuôs. Sđ tsuv mul zok nriêr zuôr têx krâur ntơưv têx qơư muôs lok sik tsiv uô krâur trâu keiz ok nox lok puz. Iz hnuz sđ muôz trâu nox txix 5-6 jiês chiê têx nhuôv keiz nox sưv jux juk thiêz nox tâuk ntâu jux juk tuôx.

Đhâu ciêz xuz thơưx, chor nhuôv keiz muôx têx nox tâuk mê njik têx đrox njuôz, viv li sđ muk lêis, đê têx đrox njuôz iz kro mê njik lol tsuôr cov mok đo shơư krâur trâu nox thiêz thâuv co sđ txo grêk tsơưs pluôk nox trâu keiz, iz hnuz puz 3-4 jiês xưz. 

Phax phôngz moz trâu keiz:

Têx nhuôv keiz tsi yuô tâu muôx đas jos, zôngx ziv trâul muôx moz thâuv qơư tu zus nông lok sik cuz sor hênhr. Iz chas luôs hâux lưv tsuôs yuôx tuô lov caz moz trâu qơư tu zus iz zav li heik tas sâuv, hâur 3 hnuz xuz thơưx gra keiz lok zus, sđ tsuv muôz yuôx phax phôngz moz trâu keiz nox shơư trâu iz cxiê zav yuôx paz đas jos uz no chiê phax phôngz iz cxiê zav moz zôngx ziv siz cik tâu li: Moz ơưk, moz E-coli….

Txos thâuv keiz muôx 7 hnuz, tsôngv box muôz chor yuôx moz kruô tâuv thiêz yuôx Lasota trâu keiz hâuk. Txos thâuv muôx 14 hnuz, sđ muôx têx muôz chor yuôx phax phôngz moz đo shơư têx krâur trâu keiz nox. Txos thâuv muôx 24 hnuz, tsôngv box sđ tror muôz zav yuôx nhiv kruôr heik tas Lasota ntơư trâu keiz hâuk chiê têx nhuôv keiz muôx jos, hloz lox jông. 

     Tsôngv box….! Phênhv “Nôngx mênhx zuôr tsuv pâuz” hnuz no tsuôk muôx li no xưz. Phênhv no zos Đeix TNVN nhoz faz Tây Bắc uô đros trâu Tsênhv qơư cxiz kôngz têz qơưk paz max./.

(Vừ Chu BT-Riê Lâux cxeik, nhênhv)