Muôz chiêz mur chox lok cok sâu trâu sâuv đêiv tiêz trâuk gax, cxaz nzir jông jav trâu tsôngv pox niêv vir ndâuk Cho nhoz Sơn La

          Chiê uô cov tâu iz đêiv tiêz txêix pax jông jav, tsôngv pox niêv vir ndâuk hêir nênhs Cho, tsuv muk zok nriêr zuôr têx ntâuz đơưz muôs hâur ciêz đrôngl chox lok têik thiêz luôv cov chi, mav muôz chiêz mur chox lok sâu cok trâu sâuv đêiv ntâuz co, đhâu ntơư mav ho muôz chox lok trâuk gax. Trơưk li pos Triệu Thị Mụi, nhoz xã Vân Hồ, huyện Vân Hồ, tỉnh Sơn La hêik pâuz tiêk: Txơưv uô tâu đêiv tiêz jông thiêz tsik jông, tsuv khov trâu hâur oz jiês uô, muôz chiêz mur sâu cok trâu đêiv ntâuz co, cov chor chiêz mur ntơư thơưv trâu saz hâur thiêz muôz đêiv ntâuz tiêz co chox lok trâuk gax. Pos Mụi shir phaz lul hêik:“Chiê uô cov tâu iz đêiv tiêz txêix pax jông jav li hêir nênhs Cho têx tsôngk tiêz đrav ntêx, đêiv ntâuz ntơư tsuv muôz têik cov đrux huv đros, thâuv muôz chiêz mur chox lok sâu cok trâu thiêx uô tâu jông gâux, txêix pax jông jav”

           Têx chuôz zênhx muôz chiêz mur chox lok sâu cok trâu đêiv ntâuz zuôr xơưk tiêz, zos muôz iz đêiv shôngz chox lok joz cov oz tos hâu njê, mav muôz iz đêiv kuôr hlâu chox lok par trâu ntơưv oz tos hâu đêiv shôngz joz co thiêz uô ntêx thâuv sâu cok ntơư, tsuv muôz tos hâu ntơưv đêiv shôngz co trâuk trâu hâur chor chiêz mur mav chox lok sâu cok trâu đêiv ntâuz ntơư uô cov txêix pax jông jav. Pos Đặng Thị Xuân, nhoz jos Suối Sìn, xã Vân Hồ, huyện Vân Hồ, tỉnh Sơn La, zos iz tus muôz chiê mur chox lok sâu cok, xơưk hêir nênhs Cho têx tsôngk tiêz tâu 40 ntâu shông đhâu cux thav pâuz tiêk: Chiê xơưk uô cov tâu tiêr hêir nênhs Cho iz đêiv tiêz txêix pax jông jav, tsuv uô hâur oz luz hli. Iz chas muôz chiêz mur chox lok sâu cok trâu đêiv tiêz, đhâu ntơư mav ho muôz đêiv tiêz co chox lok trâuk gax thiêz hâu. Lar hêik zos thâuv muôz đêiv tiêz co chox lok tsâu gax tas, ho muôz chox muk jiêz yar ntux cov kruôr. Thâuv tsâu gax thiêz muôz chox lok hâu tsuv hâu thiêz tsâu gax 6-7 jiês, tsuv uô tas ntâu six hơưv hnuz nhôngs thiêx uô tâu iz đêiv tiêz txêix pax jông jav chox lok hnar: “Thâuv muôz đêiv ntâuz tiêz co sâu cok chiêz mur tas, tsuv muôz chox muk hâu cov chor plơưk chiêz mur co nti, tsênhz mênhx tsuv hâu ntâu jiês mav muôz chox lok trâuk gax thiêz chor gax ntơư tsuv chos uô ntêx iz shông, thâuv tsâu gax tsuv tsâu nhos iz luz hli”

           Xav hur si thâuv sâu cok têx pax trâu đêiv ntâuz tiêz tax txos trâu thâuv hâu, trâuk gax thiêz tsâu gax, tsuv tas oz luz hli thiêx uô tiêr. Chênhr zos li hêik ntơư, hêir nênhs cho luôs hâux lưv muôz chiêz mur sâu cok thiêz trâuk gax, tsâu gax thiêx uô tas ntâu six hơưv, hnuz nhôngs. Txơưv li ntơư, taz sik txos trâu nhiv no, hêir nênhs Cho tsôngv pox niêv vir ndâuk  nhoz cxuô luz jêx jos cux tsênhv huôv tsar, khơưk tsês tâu zuk hêir nênhs luôs hâux lưv muôz chiêz mur sâu cok têx tsôngk tiêz muôx đros đrêiv hâur luz nênhx tsik chiê pôngz plox. Pos Triệu thị Mụi, nhoz xã Vân Hồ, huyện Vân Hồ, tỉnh Sơn La hêik pâuz nzir:“Đhâu ntâu tiêv txos trâu nhiv no, pêz tsôngv pox niêv vir ndâuk hêir nênhs Cho cux tsênhv tuôr tau truôx zuk hêir nênhs têx tsôngk tiêz đrav ntêx tsik chiê pôngz plox cov têx tuz nxêik tov kaz pâuz txos. Lar hêik zos, tsôngv pox niêv vir ndâuk hêir nênhs Cho, tsuv pâuz muôz chiêz mur chox lok sâu cok trâu têx ntâuz xơưk tiêz”.

          Hâur têx hnuz chêix ntux yiêz, zos sđ muk txos hêir nênhs Cho nhoz Sơn La cxuô luz jêx jos; lar hêik zos hâur thax tsav huyện Vân Hồ thiêz huyện Mộc Châu, thâuv tưs cux pov tsôngv pox niêv vir ndâuk hêir nênhs Cho hnar têx tsôngk tiêz txêix pax jông jav đros đrêiv luz nênhx hâur niêx hnuz./.

(Tsu cxêik nhênhv-Thiều Nghiệp, VOV Tây Bắc)

         Du lix Bác Hà hlôngr yiêz uô hâur ntu muôx caz moz gênhk

          Ma Thị Dí chuôz zis nhoz xã Bản Phố, huyện Bác Hà, tỉnh Laox cai têx tsêr tok kruô, đhâu ntâu luz hli lok no tưz tsik muôx kruô tuôx so ndis uô si, sêiz shuôk têz qơưs, viv caz moz Covid-19 huôv xênhz uô phiv liv. Txơưv li ntơư, taz sik tso tsik tâu tsês têx tsưr ziv siêz xar njôngr huôv tsar uô bluô nux  trâu thax tsav qơư nhoz thiêz hâur têx hnuz no niêv lâuk Dí tsênhv niêx hnuz muk ndêz, kho đuô tsêr tok kruô thiêz chos cxuô zav tsoz chos hâur iz ndis tsêr tok kruô đros trâu tu zus buô muôs cov muôx phênhv sâu tâu cxaz nzir nhiêx txiêx trau chuôz zis:“Iz chas tu zus buô, chos cxuô zav tsoz chos ntông nox txir thiêz hâur têx hnuz zuôr txos no, cur tsênhv zuôr chos cxuô zav jâuz li: Jâuz njuôz, jâuz krưr chiê muôs trâu tuz luôv ciêz đrôngl”

          Đros trâu têx phiv liv hêik ntơư, zơưv Ngô Trung Huấn, zos iz lênhx muôx tsêr tok kruô nhoz Na Hối-Bác Hà cux hlôngr chos cxuô zav pax Lan txix ciês thâuv muôx caz moz Covid-19 huôv xênhz. Xav txos trâu nhiv no, zơưv Huấn tưz chos tâu 30 ntâu zav pax lan thiêz tsênhv taz tov kriz đar qơư chos chiê muôs trâu tuz luôv ciêz đrôngl.  Zơưv Huấn shir phaz lul hêik:“Cur muôz pênhr nhiêx zuôr cxuô zav pax lan thiêz uô qơư chos pax Lan chiê huôv tsar uô du lix. Thâuv muôx kruô tuôx ndis shuôk têz qơưs thiêz muôx cxuô zav pax trâu tsôngv kruô sêiz, ndis shuôk uô si; cê muôx pax muôs trâu tuz luôv ciêz đrôngl”.

          Vùng Cao Bác Hà zos thax tsav qơư muôx chuô lax nziês hâur niêx shông, zôngx ziv huôv tsar du lix trâu tsôngv kruô tuôx ndis uô si, sêiz shuôk têz qơưs; nhiv xav hur si huyện tưz muôx txos 80 ntâu luz tsêr tok kruô. Iz chas chor chuôz zis huôv tsar uô du lix, sir tas đas jos tsưr muk đhâu têx phiv liv, hâu nov huyện cux đros zok nriêr cxuô faz tsưr ziv uô uô huv đros, muôx liv trâu sđ. Zơưv Bùi Văn Vinh, tsar phôngx vênhx huôv huyện Bác Hà shir phaz hêik pâuz: “Pêz cux tso tơưv ntâu faz tsưr ziv huôv tsar uô, hâur ntơư đros tsênhv qơư huôv tsar uô nox, paz trâu 5 xã, iz xã 250 triệu đêiv; phênhv ntâu zos muôz trâu tsôngv pox niêv vir ndâuk kir txêik cxiv uô tsêr tok kruô. Taz sik hâur ntu no tsênhv huôv tsar uô tsik tâu truôx. Li ntơư, pêz tsênhv zuôr hlôngr huôv tsar uô đuô zav li: tu zus, chos cxuô zav tsoz chos; thâuv tưs tsik muôx caz moz Covid-19 huôv xênhz, pêz mav tror lok huôv tsar cxiv uô têx tsêr tok kruô”

          Trơưk li thôngz sâu, hâur têx luz hli đhâu lok no, tsôngv kruô tuôx ndis uô si, sêiz shuôk têz qơưs trâu huyện Bác Hà tsênhv tsơưs, hâur iz luz hli tsik tâu muôx txos iz cxênhz lênhx kruô; tsuôk zos bâuv li iz hnuz kruô tuôx ndis uô si pir li shông 2019. Taz sik, cxuô chuôz zis thiêz hâu nov ntơưv qơư tưz siz chos côngv tsưr ziv đas jos huôv tsar uô du lix huv đros hâur ntu no, tok txos thâuv tsik muôx caz moz huôv xênhz, tror huôv tsar du lix, tok tsôngv kruô tuôx ndis uô si, sêiz shuôk têz qơưs./.

                                                         Tsu cxêik nhênhv-An Kiên Tây Bắc