Pêx xênhv Sơn La shir phaz sâu đê txir lưv tsiz lok zos txir nhãn muôs

trâu EU

Tix lâus Vì Văn Tuấn ziv chuôz zis nhoz jok Nà Pàn, xar Nà Nghịu, huyện Sông Mã, tỉnh Sơn La oz pêz hnuz no tsênhv taz tov shir phaz lul sâu đê têx txir lưv tsiz. Tix lâus Tuấn puz pâuz: Shông no tix lâus chuôz zis 200 tsoz txir lưv tsiz zâu sâu tâu muôx 10 tấn ntâu, txir lox, siêr siz luôs, sâu tâu ntâu đuô shông uô ntêx.

Oz pêz shông no, chor nênhs uô lax luôv tuôx ti gâuk ntơưv vax sâu zuôr đros gri truôx tuk txix 15-23 cxênhz đêiv iz cir viv li chuôz zis cux tso siêz, tror kriz đar thax tsav chos txir lưv tsiz zâu:

“Txir lưv tsiz zâu shông no tâu muôs tơưv trâu saz đrâuv têz qơưk mak chuôz zis shir pha hênhr. Pir li têx tsoz chos txơưr mak txir lưv tsiz zâu jông đuô thiêz gri muôs truôx tuk, chuôz zis cux lok six tso siêz trâu chor txir lưv tsiz no, zuôr sir jos huôv tsar cov ntâu đuô”.

Txir lưv tsiz Sông Mã, chor txir lox, tơưr nhiêk, tsư kaz thiêz kaz jiz, đros muôs ciês txir mak txir lưv tsiz zâu Sông Mã tsênhv tâu têr uô hax huv long nhãn, tâu chôngz nênhs nhiêv zuôr, cê paz muôx tâu hâux lưv uô, phênhv sâu trâu pêx xênhv, cê paz gra siêz đuô tsiv gri hax huv trâu chor txir lưv tsiz Sông Mã.

Tix lâus Nguyễn Quang Huy, thành viên hợp tác xã Hoa Mười, jok Huổi Bó, xar Chiềng Khoong, huyện Sông Mã hêik:

“Qơư muôs mak tsênhv sir jos cov muôs tâu muk trâu ntâuz luz têz qơư đuô chiê paz muôx tâu têx qơư muôs truôx trâu pox nhuôs, txir lưv tsiz zâu uô tâu zos yênhx têx hax huv jông thiêz muôx tâu tsiv gri siêz đuô”.

Zos iz hâur têx thax tsav qơư chos txir lưv tsiz zâu ntâu tiv zix tas nro têz qơưk, huyện Sông Mã nhiv no muôx 7.300 ntâu héc ta chos txir lưv tsiz, njuôk xav sâu tâu muôx 70.000 ntâu tấn iz shông, tsêx trung phênhv ntâu ntơưv têx xar li: Chiềng Khương, Chiềng Cang, Mường Hung, Chiềng Khoong, Nà Nghịu, Yên Hưng, Chiềng Sơ, Mường Lầm.

Zơưv Nguyễn Văn Phương, Phưv Chủ tịch UBND huyện Sông Mã, tỉnh Sơn La puz pâuz: txơưv tiêk caz moz covid-19 hâur têz qơưk thiêz sâuv ntiêx têz tsênhv txơưr txar phiv liv, taz sik chor txir lưv tsiz zâu Sông Mã cux tâu muôs muk trâu têx têz qơưk Úc, Mỹ, Trung Quốc thiêz zuôr txos no zuôr tâu muôs muk trâu EU thiêz têz qơưk Anh. Hâux lưv no tưz paz khav tênhv tâu tsơưr lươngv trâu chor txir lưv tsiz zâu Sông Mã:

“Hâux lưv muôs tâu chor txir lưv tsiz Sông Mã muk trâu EU thiêz têz qơưk Anh paz thơưz đuô thiêz hâux lưv huôv tsar chor ntông nox txir sâuv têx ar têz tox nxaz, tiv zix zos sir jos uô đuô sir zôngv khoa học kỹ thuật trâu uô nox chiê paz muôx tâu tsơưr lươngv, têx hax huv jông đuô chiê tax tâu têx tsưr ziv muôs tơưv saz đrâuv têz qơưk hâur ntu zuôr txos”.

Tâu uô lơưr tsưr ziv VietGAP, GloabalGAP, huyện Sông Mã tsênhv khav tênhv jux juk tâu côngz bê txir lưv tsiz Sông Mã sâuv ciêz đrôngs hâur têz qơưk thiêz ntiêx têz, paz muôx nzir phênhv sâu trâu pêx xênhv./.

(Trấn Long-Lik Thox cxêik nhênhv)