Pox niêv thax tsav tox siêz Yên Bái sir jos hla đhâu cêr pluôs

Seiz njiê luz tsêr tsar lơưx cxiv uô tâu jông, muôx cxix cxuô zav chuôz zênhx phưx vưv xênhz huôx, iz chas luz tsêr co zos qơư muôs têx xiv huv phưx vưv tsôngv box sđ hâur jok, tsi muôx tưs zuôr xar tiêk, niêv lâuk Hoàng Thị Xiễn nhoz jok Tôn Cạy, xã Lâm Thượng, huyện Lục Yên chuôz zis đrav ntêx zos iz chuôs zis pluôs. Niêv lâuk Xiễn heik pâuz: Thâuv ntêx viv pluôk nox, đeiv hnar, niêv lâuk 2 niêv txir tưz tsuv muk uô jos trâu cxiê qơư, taz sik luz nênhx cux txov nhêv li ntơư. Xar muk xar lok niêv lâuk 2 niêv txir quyết tinhv huôv tsar uô nox txix ciês ntơưv zuk qơư nhoz. Niêv lâuk 2 niêv txir kêr txeik tsêr nhiêx tsênhv chei XH huyện Lục Yên 30 tsov đeiv chiê krêz uô qơư muôs huv thiêz uô têx jâuz siêr phưx vưv tsôngv box  hâur jok. Txix ntơư, niêv lâuk chuôz zis tưz muôx phênhv sâu tâu truôx, 80 tsov đeiv ntâu iz shông:

“Đrav ntêx tsi muôx pênhr huôv tsar uô nox, cur chuôz zis lok six txov nhêv, txix thâuv tâu txeik pênhr nhiêx têz qơưk, luz nênhx tưz nhoz khênhr đuô. Nhiv no cur tsênhv xav tiêk, zuôr kêr txeik nzir nhiêx chiê krêz đar qơư muôs têx qir zuôv, krâur tu zus tsiêx cxu”.

Niêv lâuk Nông Thị Giới, nhoz jok Tông Pình chuôz zis, đrav ntêx zos iz hâur têx chuôz zis txov nhêv yax hâur jok. Đhâu thâuv tâu Hội pox niêv vir ndâuk xã paz kêr txeik 30 tsov đeiv txix tsêr nhiêx tsênhv chei XH, niêv lâuk tưz muôz chor nhiêx txeik co lok zuôr zuz shôngz chos thiêz tsiv uô njuôs, zav njuôs shôngz ntơưv qơư mak tâu ciêz đrôngs hâur thiêz đrâuv luôs 2 chas tỉnh nhiêv zuôr txos ntâu.

Thâuv tas chiv njuôs shôngz co, niêv lâuk ho muôz têx nhiêx txix muôs tâu njuôs ntơư muôx 60 tsov đeiv iz chiv chiê zuôr nhux tưv, buô lok zus thiêz khơưz pak đêx tso njêl-Zav nôngz njêl jông hâur huyện Lục Yên, tỉnh Yên Bái. Chênhr viv li, chuôz zis thâuv tưs cux muôx nhiêx, tsi yuô txov thiêz txoz cxơưx tâu trâu 2 lênhx nhuôs tsênhv taz tov muk cơưv Đại học:

“Txix thâuv tâu buôk ti têx pênhr nhiêx txeik, mak chuôz zis tưz muôx pênhr chiê huôv tsar uô nox, tsi yuô trâus txov li đrav ntêx. Zuk pâuz tsưr ziv uô nox, tưz hla đhâu yeiz pluôs”.

Hâur shông no, tỉnh Yên Bái muôx 15 cxênhz ntâu lênhx pox niêv vir ndâuk tâu cơưv cxaz nzir têx txux chi tsưr ziv huôv tsar uô nox li: Tu zus tsiêx cxu, tsêz chos kôngz; 30 cxênhz ntâu lênhx tâu kêr txeik pênhr tsênhv chei XH chiê huôv tsar uô kinh tế. Txix ntơư, tưz muôx zuôr xar iz cxênhz lênhx pox niêv vir ndâuk hla đhâu yeiz pluôs, chor pox niêv sir jos hla đhâu cêr txov chiê uô bluô nux ndê txos yênhx puô chuôz zis.

Ciês ntơưv xã tox siêz Lâm Thượng, huyện Lục Yên nhiv no xar muôx 200 lênhx pox niêv vir ndâuk tâu kêr txeik pênhr chiê huôv tsar uô nox. Viv tâu cơuv cxaz nzir têx txux chi tsưr ziv lok sâuv tu zus tsiêx cxu, tsêz chos kôngz thiêz heik kriê sir zôngv têx pênhr txeik trơưk tsưr ziv, viv li têx pox niêv vir ndâuk sđ hâux lưv huôv tsar uô nox uô tâu trơưk tsưr ziv, siêz xar, ntâu chuôz zis tưz hla đhâu yeiz pluôs, sir jos uô bluô nux. Pos Nông Thị Xuyên, Phưv Chủ tịch Hội pox niêv xã Lâm Thượng, huyện Lục Yên, tỉnh Yên Bái heik:

“Têx pox niêv vir ndâuk cux pâuz lok sâuv têx tsưr ziv uô kôngz, tu zus tsiêx cxu viv li sir zôngv têx pênhr txeik tâu trơưk tsưr ziv. Têx pox niêv vir ndâuk  muôx txux chi tsưr ziv uô nox, muôx phênhv sâu tâu mak lơưr cux muôx six hơưv txoz cxơưx tâu trâu zuk, trâu têx tuz nhuôs ntâu đuô”.

Hla đhâu têx phiv liv thiêz cêr txov, pox niêv cxuô heir thax tsav tox siêz Yên Bái tsênhv sir jos hla đhâu yeiz pluôs, uô bluô nux, paz cxiv tsa têz qơưk ziv hnuz ziv huôv tsar jông./. 

                          (Trịnh Xuân-Riê Lâux cxeik, nhênhv)

Zênhx hangx kôngz nuv Sơn La đros đrêiv pêx xênhv thax tsav đêx ngaz cuôr

Đhâu jiês đêx ngaz cuôr lịch sử thâuv hâur hlik hli 10, zơưv Phùng Minh Đức ziv chuôz zis 1.000 ntâu yiv ndis liêx nhoz jok Sọc, xã Mường Bang, huyện Phù Yên nhiv no tsuôk zos ar, poz jêz, chiê tror khưx phưx tâu mak tsuv tas ntâu shông. Chiê hlôngr yiêz đuô tsưr ziv uô xênhz yar, zơưv Đức chuôz zis tưz txêik zênhx hangx kôngz nuv 70 triệu đêiv chiê huôv tsar tu zus tsiêx cxu. Zơưv Phùng Minh Đức puz pâuz:

“Nhiv no liêx jông li no tas lơưv mak tsik pâuz shor tas pêk tsơưs shông thiêx khux phưx tâu, xar txêik pênhr chos jâuz tâux thiêz zuôr tsiêx cxu lok zus, thax tsav tox trôngz no mak tsuôk zos zus tsiêx cxu xưz, zos khov trâu chor liêx no mak tsik pâuz shor pêk tsơưs shông thiêx zuôr khưx phưx tâu”.

Pâuz tâu txos pox nhuôs têx phiv liv, zênhx hangx kôngz nuv thiêz huôv tsar jêx jok huyện Phù Yên tưz muôz muôx 1,4 tiv đêiv ntâu trâu pêx xênhv xã Mường Bang txêik thôngz đhâu tsưr tsix hội nôngx mênhx đros ntâuz ntơưr txêik zôngx ziv uô thiêz sêi, nhiêx liv zos 0,83% iz hli, six hơưv txêik zos 6 shông. Uô ntêx co, Agribank Chi nhánh Phù Yên cux tưz muôz trâu 14 hội viên gâux muôv vir ndâuk xã Đá Đr txêik, đros chor nhiêx xar muôx 1 tiv đêiv thôngz đhâu hội gâux muôv vir ndâuk xã. Niêv tix Đinh Thị Bình, jok Vàng B, xã Đá Đỏ, huyện Phù Yên puz pâuz:

“Đêx ngaz cuôr nhiv kruôr đhâu, cur chuôz zis trâus hiêv ntâu lok liêx têz, tsiêx cxu, cxiê shông cur chuôz zis sâu tâu 18, 19 tấn poz cưk, shông no tsuôk tâu muôx 10 tấn. Uô tsâus zênhx hangx kôngz nuv tưz muôz pênhr trâu pêz txêik đros nhiêx liv kik, six hơưv txêik ntêr đuô chiê pêz khưx phưx uô xênhz yar”.

Lơưr Agribank tỉnh Sơn La li thôngz sau, jiês đêx ngaz cuôr nhiv kruôr đhâu tưz uô phiv liv txos 500 lênhx nênhs txêik nhiêx hâur chi nhánh. Hâur co muôx 3 ziv chuôz zis nhoz huyện Phù Yên trâus hiêv muôx 1 tiv đêiv ntâu. Đhau ciês trâus ntux nas đêx ngaz cuôr ruôr hiêv, chi nhánh tưz tsưr tsix chor đoanx muk sêiz nus, paz trâu chor chuôz zis trâus hiêv; hêik chor taz viv sik côngv đros chính quyền tiv phaz piz qênhz shuôk nux gri, truz ntêr six hơưv txêik, thiêz txo grêk tsơưs nhiêx liv trâu chor chuôz zis txêik trâus hiêv; uô iz dự án txêik nhiêx yiêz, paz nzor đuô trâu pox nhuôs khưx phưx uô xênhz yar. Zơưv Nguyễn Văn Hoa, Giám đốc chi nhánh zênhx hangx kôngz nuv thiêz huôv tsar jêx jok tỉnh Sơn La puz pâuz:

“Chi nhánh tưz tso đoanx hluôk nênhs muk sêiz nus chor chuôz zis trâus hiêv, phêiz kênh cêr pôngz siêz đros lơưr. Hok chor chuôz zis tsik trâus hiev ntâu mak pêz zuôr muôx tsưr ziv truz ntêr six hơưv txêik, txo grêk nhiêx liv hâur ntu khưx phưx uô xênhz yar”.

Tror phuôx hiz pưk txux zos paz trâu pêx xênhv, Chi nhánh zênhx hangx kôngz nuv thiêz huôv tsar jêx jok tỉnh Sơn La tsênhv sir jos đros pêx xênhv qơư trâus đêx ngaz cuôr nzor truôx tuk luz nênhx thiêz uô xênhz yar./.

(Hồng Việt-Lik Thox cxêik nhênhv)