Điện Biên: Uô tul tsi chiê tsoz kok blôngx njê huôv tsar ngaz tul mak tsi uô zênhr shar txos tênhx qơư nhoz uô nênhx

          Shông no, tas nro tsoz chos kok blôngx njê ntơưv têx xã: Nà Nhạn, Nà Tấu huyện Điện Biên, tỉnh Điện Biên zos zuôr xar 550 hecta; njuôs xav yar lengx muôx nhos 60 tênhr sâuv iz hecta. Txơưv tâu chiv cheix, taz sik tsôngv box chos kok blôngx njê nhoz têx xã no tsênhv njiz ntâu phêv liv, thâuv grê kok blôngx njê nhôngs txu grês ntâu. Niêv lâuk Lường Thị Quyết, tsôngv box nhoz jos Lán Yên, xã Nà Tấu, huyện Điện Biên puz pâuz, niêv lâuk chuôz zis muôx 1 hecta chos kok blôngx njê, njuôs xav chiv no sâu tâu cxôngx 9 txos 10 tênhr. Taz sik, kok blôngx njê tsênhv trâus pôngz grê:

          “Shông no tâu chiv cheix, taz sik muôs tsi tâu grê. Tsêz no tâu 2 cxênhz txos 3 cxênhz đeiv iz cir, taz sik shông no txu grês iz đraz. Cux xar njôngr têx qơư sâu zuôr chuôz ndê grê, muôx ntâu qơư sâu zuôr, taz sik grê sâu zuôr mak tsi xưk iz zav, tsi pâuz muôs trâu qơư tưs”.

          Sâu zuôr grê fênhx zis, viv li têx qơư sâu zuôr, tsiv uô kok blôngx njê sâuv thax tsav huyện sik đros tsiv uô. Lơưr Phóng viên VOV li seiz pov, ntâu tsưr qơư tsiv uô tsi uô trơưk chêi cui tênhv, tso têx cuô đêx kiês nênhs ntưk ciês muk trâu hâur têx đêx sâuv thax tsav, uô zênhr shar zov chênhr txos tsôngv box li tênhx qơư nhoz uô nênhx. Li tsôngv box nhoz jos Nà Nọi 1, xã Nà Nhạn, txơưv nhoz kuôk qơư tsiv uô kok blôngx njê muôx nhos 10 cei cêr, taz sik cux trâus zênhr shar lox tiv đêx kiês nênhs cxôngx tsiv uô kok blôngx njê. Tul đêx Nậm Rốm thâuv ntêx đêx lok six nyiêz jông, nhiv no đêx tưz trâus vuôz tsuôz kiêk nênhs, tsư nxiêz...Ntâu lênhx tsôngv box puz pâuz, đêx trâus kiês nênhs uô shuôz njês trâus tuôs lok six ntâu. Đêx cux zôngv tsi tâu chiê nzuôr chêr, nxuô khâuz ndơưk, tsêz chos li thâuv ntêx. Muôx ntâu lênhx tsôngv box thâuv zôngv chor đêx no tas tsênhv trâus khâuk iz chêr....Tix lâuk Lường Văn Ngoan, tsôngv box nhoz jos Nà Nọi 1, xã Nà Nhạn, huyện Điện Biên, tỉnh Điện Biên heik:

          “ Thâuv ntêx tul đêx no lok six nyiêz, muôx ntâu njês. Taz sik nhiv no tsiv uô kok blôngx njê ntâu tul đêx no đêx đuz txis thiêz lok six tsư nxiêz, njês tuôs tas, tsôngv box lok six phêv liv viv tênhx qơư trâus kiês nênhs. Têx hnuz yar ntux, chuô lox mak lok six tsư lưx. Tsi muôx lênhx tưs car nzuôr tês, tơư sâuv tul đêx viv lok six kiês nênhs. Tsiv uô xênhz yar mak tsi car zôngv đêx chiê zưs...”

          Zơưv Quàng Văn Oan, tsôngv box jos Nà nọi 2, xã Nà Nhạn, huyện Điện Biên puz pâuz: Đêx trâus vuôz tsuôz kiês nênhs txix hli 11, viv no zos cheix sâu thiêz tsiv uô kok blôngx njê:

          “ Ntơưv no muôx 3 txos 4 qơư trâus kiês nênhs. Chuô yuôz têx pa vuôz tsuôz kiêk nênhs cux uô zênhr shar txos jêx jos. Tsư lưx, tsư nxiêz”.

          Lơưr thôngz sâu, sâuv ntu cêr 279 nhoz 2 xã Nà Nhạn, Nà Tấu muôx 13 qơư sâu zuôr thiêz tsiv uô kok blôngx njê. Tas nro puôr lênhx nhoz jê tul đêx Nậm Rốm. Hâur ntu đhâu, têx qơư no li huôx tôngv tsiv uô, tso đêx kiês nênhs tưz uô zênhr shar txos tênhx qơư. Taz sik, hâux lưv tso tsês têx qơư no, hau nov ntơưv qơư tsi tâu xav txos; zos tsi puz tsiv uô mak tsôngv box ntơưv qơư cux tsi muôx hâux lưv uô, tsi muôx phênhv sâu, kok blôngx njê tsi pâuz muôs trâu lênhx tưs. Zơưv Quàng Văn Sơn, Chủ tịch UB xã Nà Nhạn, huyện Điện Biên, tỉnh Điện Biên puz pâuz:

          “ Hâux lưv tsiv uô kok blôngx njê uô kiês nênhs tênhx qơư. Ntơưv thax tsav buôk qơư tsiv uô mak đêx trâus vuôz tsuôz kiêk nênhs, tsư nxiêz. Taz sik, tsuv chos tsoz chos tul tsi cov huv đros tsôngv box nhoz thax tsav hêik sâu li luz nênhx hâur niêx hnuz. Uô ntêx pêz zuôr yax six mul qênhz yuôx heik têx tsưr qơư tsiv uô uô jông trơưk têx ntâuz ntơưr tưz tso tơưv, tsi tso đêx trâus vuôz tsuôz kiês nênhs lol tênhx qơư, taz por tênhx qơư hur đu”.

          “Tsi uô vuôz tsuôz kiêk nênhs tênhx qơư chiê huôv tsar kinh têr” co zos Đảng thiêz pêz têz qơưk li luôs hâux lưv uô

nhiv no. Taz sik, uô li chas chiê muôz siêz tsôngv box luz nênhx, ngaz tul huôv tsar kinh têr tiv phaz cxôngx tsoz kok blôngx njê mak tsi uô zênhr shar txos tênhx qơư? Chiê car chêx tâu vênhv thix no lok six zuôr trâus muôx nganhx muôx txơưx jênhv thiêz chinhr quyênx têx tiv phaz nhoz tỉnh Điện Biên sik đros uô./.

                                                                                                             ( Hữu Lợi- Txâur Vax cxeik nhênhv)

Cơưv shâuv trơưl Lâuk Hôx, siêz nthuôr đar đuô

Hùng li xor tôngx muôz tsês ntơưv khoa chơưv kho têx lênhx nênhs moz hnhar, tsêr kho moz đa khoa tỉnh Sơn La, thâuv tưs zos muôx têx lênhx nênhs moz hnhar, chuôz zis txov nhêv, zuôr trâus txos cêr paz mak tsêr kho moz ho hu xor tôngx ciês trâu Hùng chiê tix lâus đros paz. Txơưv đruôz hnuz lok sik hmo ntux, seiz pov luôs hu xor tôngx thor txos cêr paz mak Hùng txơưv sơưr hlo muk:

“Thâuv xuz thơưx muk uô têx nuv no mak chuôz zis cux tsi pâuz  tsênhz, muôx kênh jiês niêv thiêz txir lơưr cox tsênhv muôx ntâu hâux lưv txơưr đuô zuôr uô. Taz sik thâuv zuk uô lơuv, niêv thiêz txir pov jông, zuk uô trơưk chei, cui tinhv, tâu sđ njênhs njôngr thiêz siz chos paz. Muôx kênh lênhx lơưr tsênhv tuôx ciês ntơưv tsêr muôz 150 cxênhz, muôx têx lênhx mak lơưr gra tsôngk trik yo tuôx paz, thâuv ntơư niêv txir pov zuk uô zos chei, tâu sđ paz viv li niêv txir cux cov zuk tror sir jos uô”.

Zos lênhx cưk kriê ntơưr, niêx hnuz muk uô hâux lưv kriê txux chi, uô têx nuv txơưr đuô hâur tsêr cơưv, taz sik Hùng cux sir jos pheiz kênh, tsês six hơưv, hnuz nhôngs uô luôs hâux lưv no. Lar heik zos hâur ntu nhiv kruô đhâu tsik ntêr lok no, Hùng thiêz têx lênhx đros Hùng uô hâux lưv co chuôs li iz luz hlik tsi muôx hnuz tưs tâu so, ntơư zos thâuv poz jêz tos pêv trôngz lok trâus tix lâus Nguyễn Tiến Hồng nhoz jok 12, phường Quyết Thắng, TP Sơn La chuôz zis, uô tsêr trâus vâu, trâus tix lâus Hồng pox niêv 2 cxeik têk tơư tơưs, đav tas thiêz tuk  nhuôv tuz muôx 3 shông trâus poz jêz tos lok tsông, tsuv txiêr 2 za co tơư por tsês. Chênhr zos njiz têx cêr txov li hêik ntơư, tso mông hu lơưk sik đros chơưv paz nyar thiêz paz nhiêx txiêx trâu nênhs moz tưz tâu Hùng fuô yưv trâu sâuv facebook, sđ pâuz txos. Đhâu hlo co, yênhx puô, yênhx cxênhz lênhx tưz sik đros pheiz kênh thiêz muôx ntâu lênhx tuôx ciês ntơưv tsêr kho moz chiê paz nyar trâu 2 niêv tuz

“Cur pov muôx lok six ntâu lênhx nênhs siêz jông, sik đros pheiz kênh têx cêr txov thiêz pôngz siêz. Thâuv zuk cxiv tsa tâu cêr thôngx siêz, luôs sđ njênhs njôngr zuk thiêz têx luôs hâux lưv zuk uô co tâu sđ njênhs, sđ pâuz tsênhz mak thâuv ntơư zuk hu txos, heik txos zênhx muôx ntâu lênhx chôngz tuk luôs jông siêz hlo đros paz zuk xưz. Xưk li đhâu lênhx nhuôv Hồng Phúc trâus moz nhiv kruôr heik sâuv, cur ziv pov tâu têx jông thiêz muôx liv mak sđ siz chos gôngr paz. Tưz zênhx max paz tix lâus Hồng pox niêv thiêz mê nhuôv hla đhâu phiv livv. Viv li cur pov, têx lênhx nênhs siêz jông , tsôngv cưr tix nênhx tsa sđ têx cêr siz hluz siz paz ntơư ziv muôx ntâu thiêz thôngx siêz đuô thâuv lơưr tưz muôx cêr vav chiê siêz, siz njênhs njôngr”.

Xênhz zus thiêz hloz lox nhoz thax tsav qơư pluôs Chiềng Pấc, huyện Thuận Châu, tỉnh Sơn La, Hùng pâuz tâu tsênhz têx chuôz zis tsôngv box heir nênhs tsơưs li têx cêr txov thiêz phiv liv thâuv hmôngr tsi jông njiz trâus muôx moz gênhs. Shông 2002, thhâuv tsênhv zos shux xênhz cơưv ntơưr shông tiv iz hâur tsêr cơưv Cao đẳng Sơn La, Hùng tưz sir jos đros uô têx hâux lưv jông siêz hâur tsêr cơưv, phuôx tôngv sđ siz chos paz tsôngk trik yo, pav, vix tsav gra muk paz tsôngv box nhoz têx jêx jok đêz đrôngs li: Huy Tân, Mường Do ntơưv Phù Yên, Mường Giôn, huyện Quỳnh Nhai. Txix shông 2004, đhâu thâuv cơưv tiêr ntơưr, Hùng tâu muk kriê ntơưr trâu iz cxiê tsêr cơưv hâur tỉnh, thâuv pov chor nhuôs shux xênhz nhoz no muôx tsi txâuk cxuô tsar zav, Hùng tưz sir jos mul zok nriêr, hu zâuv sđ siz chos paz trik yo, ntơưr cơưv, ntơưr sâu chiê pheiz trâu chor nhuôs muôx luz nênhx txov nhêv. Txos shông 2015, thâuv têz qơưk huôv tsar, lar heik zos facebook, Hùng tưz qir txuôk thiêz uô fôngx zưs đros têx lênhx nênhs siêz jông đhâu mạng xã hội facebook. Xav txos iz jiês no, Hùng tưz paz thiêz txuôk đros tâu trâu sđ paz yênhx châuv lênhx nênhs muôx luz nênhx txov nhêv, paz lơưr hla đhâu têx phiv liv. Yênh puô tsov đeiv thâuv sđ siz chos paz tâu, Hùng tưz thôngz sâu tsênhz mênhx iz tuk jux juk, têx nhiêx paz thiêz xa muk txos ciês trâu lênhx zuôr trâus tâu paz ntơư. Hok tul nhuôv Hồng Phúc trâus poz jêz  tos lok trâus, tsuv txiêr 2 cxeik tơư por tsês nhoz TP Sơn La, Hùng tsi tiêk uô fôngx zưs đros têx lênhx nênhs siêz jông hâur thax tsav TP Sơn La, hu zâuv lơưr sik đros paz mak tsênhv đros têx lênhx nênhs siêz jông hâur hur si têz qơưk uô fôngx zưs, hu zâuv đros paz trâu thiêz. Nhiv no tix lâus Hồng chuôz zis tưz truôx tuk, pox niêv thiêz mê nhuôv tưz jông  moz, tơưv tsêr kho moz, chor nhiêx sđ siz chos paz tâu txix têx lênhx nênhs siêz jông hâur hur si têz qơưk tưz paz tix lâus Hồng 2 niêv txir hla đhâu phiv liv:

“Zuk uô hâux lưv jông siêz, zos zuk uô tâu zos thiêz trơưk chei mak lok six jông, zos tsi trơưk chei mak tsi jông hlo. Chênhr viv li, thâuv lênhk txeik tâu sđ têx nhiêx txiêx siz chos paz tuôx têx lênhx nênhs muôx luz nênhx txov nhêv mak tsuv heik tsênhz mênhx trâu sđ đros pâuz, muôx kênh lênhx lơưr sâu tsi tsênhz mênhx, tsi sâu bê mak zuk tsuv sâu lơưr têx mông, xor tôngx.... tsês. Nênhs siêz jông lơưr muôz trâu zuk paz đros xa trâu têx lênhx nênhs txov nhêv mak zuk tsi heik tsênhz, tsi tâu sđ njênhs, tsuv uô li chas chiê cov sđ njênhs zuk tiês tiês, lơưr thiêx xar xa thiêz muôz têx huv tuôx paz”.

Heik lok cxiv vênhv tôngv “Cơưv shâuv thiêz uô trơưk zơưv Hloz Hôx cêr nênhx jông”, Hùng heik: “Cơưv shâuv trơưk Lâuk Hôx zuk siêz nthuôr đar đuô, sir jos uô nênhx jông, moz siêz txos sđ đuô. Cur vav thiêz chiê siêz tiêk, cxiv vênhv tôngv muôx liv jông no zuôr ziv hnuz ziv uô trâu chôngz lênhx ntâu tuk pâuz txos, lar heik zos têx lênhx canr bôv, đảng viên....”./.