Điện Biên: Têx cêr cxơưx lok qênhx shênhx xênhz zus nhuôv hâur tsêr nhoz Pa Pốm

Nhiv kruôr muôx 19 shông, taz sik lênhx nxeik Shôngx Xênhv Vưx, nhoz jok Pa Pốm, xã Thanh Minh, TP Điện Biên Phủ, tỉnh Điện Biên tưz muôx txos 3 tuk nhuôv. 3 jâuk xênhz zus nhuôv zos 3 jâuk chiêx thiêz tuôs siz bâus jok, taz sik jâuv tưs Shôngx cux xênhz zus mê nhuôv hâur tsêr xưz, tsi muk tsêr kho moz.

Shôngx heik pâuz, zuk zuôr txir thâuv 14 shông, taz sik tiv chuôz zis txov nhêv, viv li thâuv chêr xênhz tuz lok cux niêx hnuz mul lok uô liêx têz, tsi yuô tâu nhoz so. Chênhr viv li, thâuv txos cheix lok nhoz mak cur xênhz zus mê nhuôv tâu lok six sei. Muôx kênh jiês tsênhv xênhz zus mê nhuôv pêv têx têz thiêz, tsâuk ntux tsi pov pox niêv lok tsêr, tuk txir tuôx nriêr thiêx pâuz tiêk, pox niêv tưz xênhz zus mê nhuôv pêv têz thiêz chox 2 niêv tuz lok tsêr.

Heil lok têx cêr xênhz zus mê nhuôv hâur tsêr, Shôngx heik li no: Viv muk qơư y tế xã lok sik tsêr kho moz mak tsi muôx nhiêx, iz chas ntơư chor nênhs hâur tsêr tsênhv tâu muk đros tu thiêz, tsi muôx lênhx tưs jor tsêr, uô liêx têz. Chênhr li heik co, txơưv tuk txir thiêz chuôz zis lok cux tsi xar chiê cur muk tsêr kho moz:

 “Niêv pos thiêz tuk txir tiêk tsi chox muk, zus hâur tsêr xưz. Nhoz hâur tsêr mak zus tâu mê nhuôv tas, chêr nquôr ntâu, trox nyar tas lok six ntâu cơưk. Thâuv xênhz zus mê nhuôv lok tsênhv uô nhuôv pôngz, pos tsuv paz khơưk mê nhuôv trâu zuk”.

Têx lênhx chiv chir xênhz zus mê nhuôv hâur tsêr xưk li Shôngx Xênhv Vưx nhoz jok Pa Pốm tsi tiêk tsơưs lênhx. Trơưk li qơư y tế xã Thanh Minh thôngz sâu, zuôr xar 2 shông đhâu, jok Pa Pốm muôx txos 14 lênhx pox niêv xênhz zus mê nhuôv hâur tsêr, tsav 73%; ciês shông 2018 no zos 4 lênhx. Chor xênhz zus mê nhuôv hâur tsêr puôr lênhx zos viv têx lênhx nênhs hâur tsêr li: Niêv zus, niêv pos lok sik tul txir paz xưz. Lar heik muôx kênh lênhx nưk tưz chiv chir xênhz zus nưk iz lênhs pêv têx liêx têz xưk li Shôngx Xênhv Vưx.

Hmôngr jông tsi muôx lênhx tưs trâul tuôs, taz sik têx tsi jông đhâu xênhz zus mê nhuôv tas li: Nquôr chêr ntâu, moz vôngk, tuk nhuôv hâuk tâu têx đêx kiêk nênhs, đax tơưr grêix.....mak tsi zos tsơưs. Iz zav li Bia Xênhv Zax, 22 shông, xênhz zus tuk nhuôv tiv 3 tsi hnor moz plaz li chas hlo, iz pliês tưz xênhz zus tâu mê nhuôv lơưv. Taz sik đhâu xênhz zus nhuôv tas tâu iz ciêz, chêr nquôr ntâu, moz plaz hênhr, chor nênhs hâur tsêr thiêx chox tuôx trâu Tsênhv qơư Y tế TP Điện Biên Phủ chiê seiz njuôk shuôs moz. Tuôx txos no, cưk yuôx qênhz njuôk shuôs, lơưr tiêk Bia chêr nquôr hênhr, tas trox nyar ntâu uô trâu tuk nênhs tsi tâuk thiêz moz txox hlaz tơưk hâur niêv luz tsêr tuz, zos tsi chox zênhx max tuôx qơư y tế mak zuôr lok six riêz nênhs:

“Tuk nhuôv tiv 3 no moz sei, zus tâu sei viv li chox tsi zênhx muk tsêr kho moz thiêz cux chiê nưk zus nưk hâur tsêr. Hâur jok mal cux muôx ntâu lênhx lơưr chiv chir zus hâur tsêr”.

Bác sỹ Nguyễn Thị Thủy, Phưv Giám đốc Tsênhv qơư Y tế TP Điện Biên Phủ, tỉnh Điện Biên heik pâuz: Pa Pốm zos jok 100% tsôngv box Hmôngz nhoz uô nênhx, tsi yuô tâu muôx txux chi tsưr ziv jênhv pâuz, lar heik zos tsênhv six xar trơưk li têx cêr nênhx đrav ntêx. Pox niêv Hmôngz lơưr txax muôs thâuv lưv tuk txơưr đuô pov, lok sik cor txos zuk chêr grêix, viv li txơưv tưz tâu canr bôv y tế muk yax kriê, vênhv tôngv ntâu jiês, taz sik chuôs li lơưr cux tsi mnôngs. Tsuôk zos thâuv tưz muôx têx lơưr uô tsi tâu tiês lơưv, thiêx chox tuôx têx qơư y tế. Iz chas ntơư, cux zos tsôngv box luz nênhx txov nhêv, lơưr tsi xar tuôx tsêr kho moz viv nyei tsi muôx nhiêx thiêz tsi muôx nênhs muk đros nhoz, tu tuk nênhs moz:

“Phênhv ntâu nhoz no zos tsôngv box heir nênhs tsơưs Hmôngz thiêz Khơ Mú mak khênhr xênhz zus mê nhuôv hâur tsêr đuô hur si. Têx qir tiv phênhv ntâu zos lơưr txux chi kis, luz nênhx txov nhêv. Lok sâuv têx li heik no, pêz tsênhv uô hâux lưv yax kriê tsi so chiê uô li chas txơưv xênhz zus hâur tsêr, taz sik cux por hưv tâu jông trâu tuk niêv thiêz lênhx nhuôs, lar heik zos têx tsi jông đhâu xênhz zus nhuôv tas”.

Cux trơưk li bác sỹ Thủy, uô ntêx, ngênhx zuôr cxơưz tiês uô jông hâux lưv seiz car xênhz zus nhuôs, qênhz shuôs txix têx ntu thâuv tsi tâu tâu xênhz zus thiêz zênhx max tso canr bôv y tế muk paz têx chuôz zis thâuv zuôr trâul txos. Lok sâuv tov kaz no, zuôr tror sir jos yax kriê, uô ntâu faz tsưr ziv uô cê thiêz zov chênhr muôx côngv thôngx sđ sik côngv têk paz, uô hlôngr yiêz tsôngv box nhoz no txux chi tsưr ziv jênhv pâuz thiêz cêr cor cav uô nênhx pôngz kaz, chiê txo grêk tsơưs têx lênhx pox niêv xênhz zus nhuôv hâur tsêr, txar jav têx tsi jông muôx têx yưv siv./.

(Vũ Lợi-Riê Lâux xceik, nhênhv)

Zênhx hangx paz gra pênhr tuôx txos ciês tsôngv box nôngx mênhx Sơn La txeik

Zơưv Hà Văn Sơn, mênhx cxưx Thái nhoz jos Lù, xã Chiềng Lương, huyện Mai Sơn, tỉnh Sơn La đros cán bộ zênhx hangx kôngz nuv chiê txeik pênhr thôngz đhâu yêz ô tô zênhx hangx ntơưv tsênhv qơư xã pov lok six jông siêz. Têx jiês đrav ntêx, thâuv xar uô hâux lưv đros zênhx hangx, zơưv Sơn tsuv tas iz têis cik muk cxôngx ntơưv tsêr trâu qơư kir txêik pênhr nhiêx ntơưv huyện, nhiv no tsuôk pôngz nhos 1 six hơưv.

          “ Cur pov nhiv no muôx tuêv uô hâux lưv tuôx txos ntơưv xã chiê tsôngv box uô hâux lưv mak jông đuô. Cur txeik 50 tsov đeiv pênhr chiê tsiv uô xênhz yar, tu zus, zuôr nhux zuôr tưv”.

          Tuôr têx ntâuz ntơưr muôx lênhx coaz đros chor nhiêx txiêx nhiv kruôr txeik tâu, niêv lâuk Lường Thị Long, mênhx cxưx Thái nhoz jos Mớn, xã Chiềng Lương heik: Kuôk no 2,3 hnuz, cur tưz tâu cán bộ jos thôngz pov Zênhx hangx kôngz nuv Agribank nhoz Mai Sơn li qơư uô xưv zuôr tsưr tsix lok hnuz no. Thâuv ntêx, iz jiês xar txeik pênhr zênhx hangx, cur tul txir tsuv chêix yêz meir mul trâu zênhx hangx huyện.

          “ Cur tuôx no txeik pênhr zênhx hangx zos 200 tsov đeiv chiê muôv muôs. Hnuz no cur tuôx txeik pênhr mak ntâuz ntơưr tưz uô tâu tiêr uô ntêx lơưv”.

          Zơưv Phạm Quang Tùng, Giám đốc Zênhx hangx kôngz nuv thiêz huôv tsar nôngx cxênhz nhoz huyện Mai Sơn puz pâuz: Yêz ô tô no muôx qơư tso nhiêx txiêx đros têx phaz pênhv kỹ thuật taz por, muôx chuôz zênhx por vêv, cxix luôk mạng, cxix luôk cungz tênhv, chuôz zênhx seiz car...taz por cxuô huôx tôngv uô ntâuz ntơưr txeik pênhr tâu uô ciês sâuv yêz. Zôngv yêz uô qơư uô hâux lưv txeik pênhr ntơưv xã Chiềng Lương kuôk tsênhv qơư huyện Mai Sơn 20 cei cêr ntâu, phưx vưv tsôngv box 2 xã Chiềng Lương thiêz Phiêng Pằn. Nhiv no muôx zuôr xar 800 lênhx tsôngv box sâuv thax tsav tsênhv txeik pênhr ntơưv taz viv, đros chor nhiêx txiêx puz txeik zos 60 tỷ đeiv. Lơưr njuôs xav, qơư uô hâux lưv no zuôr cxênhx txuôk tâu trâu tsôngv box ntơưv no 2,5 tỷ đeiv iz shông txiêx trox yêz thiêz côngz lox tôngv:

          “ Nhiv no đros thiêz chi nhánh Mai Sơn pêz muôx 6 qơư zôngv yêz uô têx ntâuz ntơưr hâux lưv txeik pênhr, hâur co nhoz xã Chiềng Lương huôx tôngv hnuz 13 yênhx hli. Zos têx hnuz jor trơưk đros hnuz so mak uô hâux lưv trâu hnuz tov kaz. Sâuv chênhz zênhv uô tsênhv tsênhz mak pêz tror cê cơưv shâuv zuôr chênhz zênhv uô li chas cov huôx tôngv phưx vưv pox nhuôs jông tiv zix”.

          Nhiv no Agribank nhoz tỉnh Sơn La muôx chor nhiêx txiêx puz txeik zos 14 cxênhz tỷ đeiv, đros 46 cxênhz lênhx nênhs txeik, hâur co puz txeik uô kôngz nuv nôngx cxênhz tsav 90% gôngr phênhv jông trâu tỉnh li huôv tsar. Agribank nhoz huyện Mai Sơn zos taz viv tiv 2 lơưr kaz huyện Mộc Châu tâu xeir uô luôs hâux lưv sir zôngv yêz ô tô uô qơư puz txeik pênhr. Zơưv Phạm Văn Bằng, phưv giám đốc Zênhx hangx kôngz nuv thiêz huôv tsar nôngx cxênhz nhoz tỉnh Sơn La puz pâuz:

          “ Pêz tror krêz uô txos têx huyện Sông Mã, Thuận Châu chiê paz pox nhuôs nôngx mênhx tiv zix zos nhoz tox siêz zôngx ziv đuô thâuv uô hâux lưv txeik pênhr, thêv nhiêx txiêx thiêz têx xiv huv jix vuv li xa nhiêx txiêx”.

          Li thâuv ntêx, chiê mul cxôngx têx jêx jos tox siêz txos Zênhx hangx mak pôngz tas yênhx hnuz. Thâuv txos cheix lok nas xar txeik pênhr cux mul tsi tâu txos zênhx hangx chiê kir txeik, nhiv no mak tsôngv box tsi tsuv pôngz ntâu six hơưv mul lok lơưv thiêz viv qơư uô hâux lưv puz txeik pênhr cxôngx zôngv yêz ô tô tưz tuôx txos ciês ntơưv têx jêx jos. Cxôngx co gôngr phênhv cxuôv yeiz thiv pluôs truôx vênhs trâu tsôngv box tox siêz nhov tỉnh tox siêz Sơn La./.

( Thanh Thủy- Txâur Vax cxeik nhênhv)