Lênhx niêv pos thâuv ntêx đros tir ntâus tros châuz chiv chir jông siêz uô hâux lưv tsoz phưz têx liệt sỹ li qơư nza

          Quảng trị têx hnuz hâur hli 7, muôx yar ntux cuz sor. Cxôngx thâuv tas cik sơưr nzor, pos Nguyễn Thị Diên tưz tuôx ntơưv qơư nza, hlôngr đêx, hlơưr shaz, kho đuô têx liệt sỹ li qơư nza hâur xã. 2,3 châuv shông đhâu, txơưv luz qơư nza no tưz muôx iz lênhx nênhs seiz jor tâu thêv nhiêx côngz hur si, taz sik pos Diên li hâux lưv uô cux chuôs li iz lênhx nênhs seiz car tsoz phưz qơư nza. Pos Diên ndo njôngr yênhx luz nza, bê 232 lênhx liệt sỹ nza nhoz ntơưv no:

          “Hmo ntux pư cur xar, têx đồng đội khưr muk đhâu trôngz đhâu jôngr, nox so pêv har jông, muôx têx thâuv trâus yeiz tsi muôx tul tsi nox, muôx têx jiês 2,3 hnuz thiêx li muôx mor nox. Tâu tas siv nênhx, yuôr zuk tsênhv nhoz uô nênhx mak lok six hluz lơưr. Hnuz tưs cux muk tsoz phưz, hlơưr shaz trâu têx fôngx zưs. Hnuz xiêz 1, hnuz 15 yênhx hli cur puôr lênhx hlơưr shaz trâu lơưr, ndo txos lơưr li têx côngz lox”.

          Pos Nguyễn Thị Diên thâuv ntêx cux sơưr cêr muk tir ntâus tros châuz nhoz xã Cam Thủy, huyện Cam Lộ, tỉnh Quảng Trị, thâuv co pos zos  y tá thiêz cxaz chuôz krêz cêr trâu bộ đội tơưv txênhz. Ntâu jiês cxoz lok tâu tas siv nênhx viv trux trâus tros châuz li bôngk. Pos li têx fôngx zưs puôr lênhx tâu tas siv nênhx viv têz qơưk, pos môngr jông tsênhv tâu nhoz uô nênhx đhâu cxiv tsav txênhz tir ntâus tros, taz sik cux trâus tsơưr tưx đas. Têz qơưk tiêx tul, pos nhoz iz lênhs. Pos Diên tưz muôx 75 shông ntâu, iz luz kror muôk cux tsi yuô pov cêr lơưv, nhoz iz lênhs hâur luz tsêr jông siêz tâu têz qơưk paz txưv, tsi muôx đas jos uô lox tôngv. 2,3 châuv shông đhâu, pos nhoz iz lênhx thiêz tsoz phưz qơư nza trâu têx liệt sỹ. Iz jiês jiês muôx zav pax tưs jông pos cux gra lok chos ntơưv qơư nza. Nhiv no, tas nro qơư nza xã Cam Thủy muôx lok six ntâu tsoz chos jông mak tsi muôx qơư nza tưs nhoz Quảng Trị muôx. Zơưv Lê Văn Tiềm, coar lik qơư nza xã Cam Thủy heik, txơưv tsi tâu chinhr quyênx pheiz côngz, thêv nhiêx txiêx tsoz phưz taz sik 2,3 châuv shông đhâu, pos Diên uô hâux lưv no jông li iz lênhx nênhs coar lik qơư nza:

          “Pos Diên tsi zos nênhs coar lik qơư nza taz sik pos lok six jông siêz. Pos nhoz iz lênhs viv li cux qiv siêz, khênhr tuôx qơư nza chiê tsoz phưz qơư nza no. Pov muôx tsoz pax tưs jông cux chox lok chos ntơưv no. Cux zov txưv zênhv uô, cur xar mak co zos cxôngx pos li siêz jông”

          Cxôngx ntâu shông no, Quảng Trị hlôngr njêx muôk tas nro tsôngv box têz qơưk tsoz phưz 72 qơư nza đros 60 cxênhz luz nza liệt sỹ. Qơư nza tưs cux hur đu tâu tsoz phưz jông. Têx liệt sỹ li lênhx nênhs cxênhz jê, fôngx zưs thâuv tuôx seiz nza cux pov jông siêz. Zơưv Nguyễn Mạnh Hùng, iz lênhx bộ đội lâuk nhoz Hà Nội heik:

          “Pêz tuôx seiz qơư nza, txos qơư nza tưs cux njiê pov pêz têx đồng đội, tsuôk li tâu pov ciês lơưr. Têx qơư nza puôr lênhx tâu tsoz phưz jông, hur đu njuôz jông thiêz puôr lênhx muôx lênhx nênhs jor jông”

          Lok seiz qơư nza liệt sỹ tỉnh Quảng Trị trơưk six hơưv chiv nhênhv hnuz saz pênhz thix xênhz pov qơư nza tưs cux hur đu. Chênhr zos muôx têx lênhx nênhs jông li pos Nguyễn Thị Diên nhoz xã Cam Thủy, huyện Cam Lộ chiv chir jông siêz uô hâux lưv tsoz phưz qơư nza, uô têx qơư nza liệt sỹ thâuv tưs cux pov sor si, hur đu li ntơư./.

(VOV Tây Bắc)

Tuôx trâu Sơn La chiê nox siv njuôs kaz jiz

Njuôs kaz jiz, tsôngv px hâur thax tsav tỉnh Sơn La thiêz iz cxiê tỉnh txơưr đuô, txơưv lênhx tưs cux pâuz. Zav njuôs hêik ntơư zôngx ziv chos, taz sik zos chos trâu thax tsav qơư ar nông mak shôngz njuôs huôv lox jông đuô thiêz chox lok uô nox cux kaz jiz đuô. Zav njuôs co muôz chox lok têr đêiv flâuz muôz hâu cov siêr chiê njư cuô txoz txux lov nox cux tâu hur tiz si; taz sik tsuv hau hlôngr oz pêz tov đêx, chor njuôs co thiêx tsik hoz lok sik muôz chox lok uô shơư grêix, txux lov nox cux tâu; tsênhz mênhx, zuk nhiêv nox li chas uô li ntơư. Pos Tòng Thị Vinh nhoz xã Hua La, đrôngl Sơn La hêik pâuz:

          Băng: “Njuôs kaz jiz mak uô tâu ntâu zav nox kaz; zos hâu mak tsuv hâu cov tas luz hâur pâuk njuôs co; thâuv tưs siêr li têr đêiv flâuz njuôs thiêz muôz chox lok njư txux lov cuô txoz huv đros mak nox cux xik siêz cơưs thiêz. Zav njuôs kaz jiz no muôz chox lok tsâu uô njuôs txoz nox hâur yênhx shông cux tâu”

          Zav njuôs kaz jiz hêik ntơư, hâur luz chêix njuôs tuôx zos txix hli 4 txos hli 11; taz sik zos tuôx njuôs ntâu đuô zos txix hli 7 txos hli 9. Chiê cov tsoz shôngz co tuôx ntâu njuôs thiêz tsoz shôngz co tsik tsưk sêi mak tsuv khơưz, txiêr chor njuôs shôngz tuôx hâur đruôz đraz hâur pâuk shôngz, tsuv tsês chor njuôs shôngz tuôx saz đrâuv ntus hâur pâuk shôngz, tsoz shôngz co thiêx huôv vav sei. Chênhr zos li hêik ntơư, nhiv no zav njuôs kaz jiz tưz muôx muôs ntâu trâu ciêz đrôngl, tsôngv px cux muôx phênhv sâu tâu nhiêx txiêx txix luôs hâux lưv chos njuôs kaz jiz muôs. Pos Lò Thị Phóng, nhoz phươngx Chiềng Cơi, đrôngl Sơn La, zos iz lênhx muôs njuôs hêik pâuz:

          Băng: “Hâur iz hnuz mak cur muôs tas 50 chov txos 100 njuôs, thơưx fâuv  njuôs cur muôs iz chiêz 40-50 cxênhz. Hâur luz chêix njuôs tuôx ntâu mak muôs iz ciêz 20-25 cxênhz. Thiêz thâuv zuôr ntơư, tsuv xêir chox njuôs nhiv kruôr tuôx yưv ntơưv bông ar chox lok uô nox thiêx kaz”

          Chênhr zos li hêik ntơư, iz cxiê tsêr uô cxuô zav, jâuz mor nox hâur thax tsav Sơn La, thâuv tưs tưz muôx zav jâuz grêix uô shơư njuôs chiê tsôngv kruô tuôx ndis ntux sêiz shuôk têz qơưs đhâu muk lok tâu nox siv. Pos Phạm Hồng Phương, iz lênhx kruô nhoz Hà Nội tuôx hêik pâuz:

          Băng: “Cur tuôx trâu Sơn La ntâu jiês, cur nhiêv nox zav njuôs kaz jiz ntơư, viv zav njuôs co nox kaz thiêz hâur iz jiês tuôx đhâu muk lok, thâuvc tưs cur cux zuôr chox muk puz trau têx cxênhz jê nox siv”.

          Chênhr zos li hêik ntơư, zos tsôngv kruô muôx six hơưv hnuz nhôngs tuôx trâu faz Bắc Sơn La, iz chas muk ndis ntux sêiz shuôk têz qơưs, tsôngv kruô cux zuôr tâu nox siv zav njuos kaz jiz hêik co./.

                                                       (Tsu cxêik nhênhv-Tòng Anh)