Cêr côngv siêz jông tuz lênhv đros pêx xênhv nhoz Huổi Chan 2, Điện Biên

Huổi Chăn 2 zos iz hâur xar Mường Pồn, huyện Điện Biên, tỉnh Điện Biên li chor jêx jok txov nhêv. Ntâu shông lok no, txox cêr ntêr muôx 5 cêik cêr txix txox cêr 12 muk trâu tsênhv qơư jêx jok muôx têx ntu ndê tox, oz saz ntus cêr har jôngr ntông tsâuk nti, px muk lok six phiv liv, cưk kriê ntơưr thiêz shux xênhz hâur jok muk lok, tiv zix zos txos chêix ntux nas. Taz sik, tsuôk xar muôx iz ciêz ntâu tâu 50 lênhx cám bộ, tuz lênhv Trung đoàn 82 li têx paz lok đas jos, txox cêr no tưz tâu luôx đu lul, kho đuô, muk lok tâu zôngx ziv đuô.

Đros ntơư, pêx xênhv têx tsêr đaz tuôs hâur jok cux tâu chor cán bộ, tuz lênhv Trung đoàn paz kho đuô. Luz tsêr cơưv Huổi Chan 2, zos tsêr cơưv cxênhx iz số 2 Mường Pồn sêiz car tưz puôk tsuôx jux juk, cux tâu chor tuz lênhv sir jos kho đuô paz trâu shux xênhz muôx qơư truôx cơưv ntơưr. Cưk kriê ntơưr Vì Thị Yên, tsêr cơưv Huổi Chan 2 shir phaz hêik:

“Hnuz no tâu chor tuz lênhv Trung đoàn 82 tuôx paz cưk kriê thiêz shux xênhz tsêr cơưv ntơưr kho đuô cêr muk lok, vax tsêr cxuô zav mak pêz cux lok six shir phaz. Khov co mak chor nhuôs muôx tâu qơư cơưv ntơưr jông đuô, chor cưk kriê ntơưr cux muk lok tâu zôngx ziv đuô”.

Jok Huổi Chan 2 nhiv no muôx 60 ziv chuôz zis, 350 lênhx nênhs;  puôr lênhx zos tsôngv box Hmôngz. Pêx xênhv li phênhv sâu zos txix uô liêx têz, chos kôngz lôngk, pox nhuôs luz nênhx tsênhv yuôr ntâu kror txov nhêv, iz đraz ntâu chor ziv chuôz zis pluôs.

Tsưr jok Huổi Chan 2 Ziêk Xênhv Tsaz puz pâuz: ntu đhâu, pox nhuôs haur jok lok six shir phaz thâuv tsik so tâu Đảng, têz qơưk paz lok cxuô zav. Tiv zix, têx hnuz kaz shông no, pos nhuôs lok six shir phaz thâuv tâu Trung đoàn 82 tuôx đros paz kho đuô têx cêr muk lok, vax tsêr, yax kriê chêi têz qơưs, yax kriê tsưr ziv uô kôngz lôngk trâu pêx xênhv. Đhâu co, paz phênhv trâu pêx xênhv truôx tuk luz nênhx, truôx siêz huôv tsar cêr uô nox trâu thax tsav qơư nhoz, muôx cêr sik côngv siêz đros tuz lênhv:

“Tuz lênhv tuôx paz pox nhuôs kho đuô cêr muk lok thiêz uô plas tsêr đros ntâu zav hâux lưv txơưr đuô mak pêz lok six uô tsâus chor bôv đôiv ntâu hênhr. Đhâu co pêz cux njiê pov tâu Đảng, têz qơưk têx tsov cưv txos paz trâu pos nhuôs, quân thiêz pêx xênhv cêr sik côngv siêz mak lok six truôx jông”.

Đại úy Chu Huy Tập, Đại đội trưởng Đại đội 11, Tiểu đoàn 6, Trung đoàn 82 puz pâuz: têx hâux lưv paz trâu jok Huổi Chan 2 nhoz hâur Trung đoàn li tsaz yênhx “paz uô đros côngz xưvyax kriê” li têx hâux lưv uô. Hâur 2 shông tror lok no, iz shông 2 jiês trâu hli 7 thiêz hli 12, taz viv sir jos paz trâu têx xã txov nhêv chiê paz trâu pêx xênhv. Hâur kaz shôngk shông no, taz viv tưz tso 100 lênhx cán bộ, tuz lênhv muk paz pêx xênhv oz luz jok Huổi Chan2 (xar Mường Pồn) thiêz nậm Ty (xar Hua Thanh), huyện Điện Biên.

“Hâur 1 hli no mak đros pêz taz viv tâu chox kriê sik côngv đros huyện Điện Biên, xar Mường Pồn paz pox nhuôs kho đuô cêr txix cêr lox muk hâur jok ntêr muôx 5 cêik cêr, kho đuô iz cxiê vax tsêr paz trâu pox nhuôs, hêik kriê pox nhuôs tsưr ziv huôv tsar kinh têr cux li tsưr ziv phax tar caz moz phax tar ntux no trâu tsiêx cxu. Đros taz viv mak cux xar uô truôx đuô sik côngv siêz nhoz quân thiêz pêx xênhv cê zos chiê yax kriê trâu pox nhuôs pâuz lok Đảng, têz qơưk têx cêr chêi chiê thiêz njênhs njôngr trâu Đảng”.

Chor tuz lênhv hluôk nhoz Trung đoãn 82 (Quân khu 2) li têx hâux lưv uô tsênhv tsênhz tưz paz uô muôx cêr njênhs njôngr sik côngv siêz jông trâu pêx xênhv jok Huổi Chan 2, muôx cêr sik côngv siêz đuô đros tuz lênhv thiêz pêx xênhv ntơưv têx jêx jok tox siêz, ntus đriv. Thôngx cxix, hêik tơưv tâu tsênhz mênhx lok lênhx tuz lênhv lâul Hôx li têx cêr uô nênhx hâur ntu nênhx nhiv no./.

(Vũ Lợi-Lik Thox cxêik nhênhv)

Sơn La: Lênhx đội trưởng Quàng Văn Xương txơưx huôv tsar uô nox

Tix lâus Quàng Văn xương tâu Đảng ủy, hâu nov xã Chiềng Đen njênhs njôngr, choz uô lênhx đội trưởng jok Chiềng Xét, xã Chiềng Đen, TP Sơn la txix shông 2012. Hâur 6 shông đhâu, tix lâus thâuv tưs tưz đros hux jos, uô jông hâux lưv qênhz yuôx, seiz jor, taz por jêx jok truôx tuk; cux li sir jos yax kriê uô lơưr têx tsưr ziv por hưv jôngr, li: Luôx cêr kuôk cêv hluôr tơưk tsi chiê cuz jôngr; hlơưr têz trơưk six hơưv, cui tinhv..... Tix lâus Quàng Văn Xương heik:

“Zos iz lênhx đội trưởng, cur thâuv tưs tưz uô tiêr jông têx luôs hâux lưv hâu nov xã zok muôz. Iz chas têx hâux lưv hâur jok tsuv lês uô, cur tsênhv heik kriê tsưr ziv, cơưv shâuv chiê têx uô jênh quân huôv tsar uô nox, vênhx huôv XH chiê cxiv tsa jêx jok yiêz”.

Iz chas zos lênhx đội trưởng uô ntêx nyuôs, moz siêz trâu cxuô luôs hâux lưv, tix lâus Xương tsênhv zos tsov iêr chi cax hâur huôv tsar kinh tế ntơưv qơư. Thâuv tưz uô tiêr têx luôs hâux lưv xã thiêz jok choz zok, tix lâus cux tsênhv huôk njôngr six hơưv, hnuz nhôngs zok nriêr tsưr ziv uô nox yiêz chiê uô lơưr hâur chuôz zis 3 ha ar têz chos ntông nox txir sâuv ar têz nxaz. Txix uô lơưr têx tsưr ziv yiêz thiêz tsi so siz heik kriê tsưr ziv uô nox hâur tu zus tsiêx cxu, tsêz chos kôngz đros têx chuôz zis uô kôngz hâur thax tsav, tix lâus chuôz zis 3 ha ntâu ar têz chos cà phê  shơưk têx txir bơ, txir khơưz sâu đê tâu nju thiêz shông no cux sâu tâu ntâu đuô shông uô ntêx, njuôk xav iz shông sâu liv tâu muôx 300 tsov đeiv ntâu. Tix lâus Quàng Văn Xương heik pâuz:

“Thâuv xuz thơưx uô đội trưởng mak njiz ntâu phiv liv cơưs, jux juk tov kaz zuk tưz muôx têx tsưr ziv uô têx hâux lưv hâur jok thiêz chuôz zis chiê huôv tsar kinh tế XH. Iz zav li shông tov kaz muôx phênhv sâu tâu ntâu đuô shông uô ntêx mak zuk cux tsuv zuôv qir tâu huv đros, cxuô tsoz chos thiêx tơưs pax trơưk li zuk tsưr ziv, siêz xar”.

Thâu tưs tưz sir jos uô tiêr cxuô luôs hâux lưv zok muôz, txơưv nhoz thax tsav qơư tưs, uô zav hâux lưv tưs, đội trưởng Quàng Văn Xương tưz uô tâu lơưr zơưv Hloz Hôx têx cêr nênhx jông, tsiv nhos zos cxênhx hluôk uô tâu trơưk chor lâuk đrav ntêx cêr uô nênhx hâur cxiv tsa thiêz tsưx phưv têz qơưk./.

                                  (Trấn Long-Riê Lâux cxeik, nhênhv)