Gra cêr tsâu sor trâu jêx jok

“Tsôngv px xar cov tror tâu txeik pênhr huôv tsar kinh tế chuôz zis li: Tu zus nhux tưv, yis, keiz buô”. No zos Dường Phúc Thím, nhoz Đồng Văn, Bình Liêu li têx lul heik.

Trơưk li zơưv Giáp Văn Ngôn nhoz xã Vô Ngại, Bình Liêu njuôk xav:

“Zos muôx têx doanh nghiệp tuôx huôv tsar uô, cux zuôr muôx hâux lưv trâu tsôngv px ntơưv qơư uô, px zuôr sưv jux juk đros trâu têx hâux lưv uô trơưk tsưr ziv yiêz”.

“Đros trâu têx xiv huv OCOP zos têz qơưk tror paz tsôngv  box lok sâuv huôv tsar uô truôx tuk chiê muôs tâu trâu hâur têz qơưk thiêz trâu luôs 2 chas thax tsav, têz qơưk đrâuv”. Lơưr zơưv Xàm Chi Nàm nhoz Ba Chẽ xar li heik tas co.

Pos Đinh Thị Vỹ, Phưv Chủ tịch Ủy ban huyện Ba Chẽ heik pâuz nzir:

“Hâur ntu zuôr txos, pêz xar cov muôx nzir têx tsaz yênhx, tsênhv chei paz thax tsav tsôngv box heir nênhs tsơưs. Tiv 2 zos nhênhz chơưv chiê muôx tsưr ziv, tsênhv chei jông paz thax tsav txov nhêv, têx chuôz zis pluôs zos lơưr tưz muôx txâuk cxuô zav uô nox uô hâuk, pêz tsuv txo grêk tsơưs jux juk paz li heik sâuv, hlôngr trâu co zos paz trâu chor thax tsav pluôs, txov nhêv chiê huôv tsar tas nro thax tsav qơư ntơư”.

Tsênhz tiês, tsaz yênhx 135 thiêz tỉnh Quảng Ninh đêx anr 196 qơư tsov txos puôr lênhx zos yưv pênhr trâu têx côngz trênhx, chiê tsôngv px muôx txux chi jênhv pâuz, px muôx tsưr ziv huôv tsar uô nox, tu zus tsiêx cxu, uô kôngz fiv đros thax tsav qơư nhoz chiê muôx nzir cxaz phênhv sâu tâu. Têz qơưk tsuôk zos paz mê njik lol pênhr nhiêx, tsưr ziv huôv tsar đros sâu zuôr têx xiv huv uô tâu.

Txơưv li ntơư, taz sik xav kror đruôz đraz phênhv sâu tâu tsơưs, tsôngv px luz nênhx phênhv ntâu cux zos zuk uô trâu zuk zôngv, zuk uô trâu zuk nox, têx kôngz uô tâu muôs tsi tâu trâu hâur ciêz đrôngs; viv li chor chuôz zis pluôs nhoz têx xã, jok nhiv kruôr hla đhâu chuôz zis pluôs, txov nhêv ntơư cux tsênhv yuôr ntâu. No cux zos qir tiv tror muôx têx chuôz zis pluôs ntơưv têx thax tsav txov nhêv, muôx tsôngv box heir nênhs tsơưs uô nênhx nhoz, xưk li zơưv Hoàng Văn Tằng, Chủ tịch Ủy ban xã Đồng Tâm, huyện Bình Liêu heik:

“Hâur pêz thax tsav qơư, ntux txơưr txar phiv liv, tsôngv px phênhv ntâu zos huôv tsar uô kôngz jôngr nuv, cxuô zav hâux lưv uz no txơưr muôx lok six tsơưs. Pêz chox kriê px huôv tsar uô liêx têz, chos têx tsoz chos li: Kok kriêr lok zos kok blôngx njê, heik px muôz têx zuz nôngz kôngz jông, fiv đros lok tsêz chos thiêz uô lơưr têx tsưr ziv yiêz chiê sâu tâu nju, muôz hâux lưv uô thiêz phênhv sâu trâu px. Taz sik, đros thiêz huôv tsar uô nox li heik sâuv mak tsênhv cik txos thiêz reik đros 3 tsaz yênhx: Doanh nghiệp, khoa học kỹ thuật-px-sâu zuôr xiv huv. Tsôngv px uô tâu jông lơưv, taz sik tsi muôx tưs sâu zuôr.... Nhoz Đồng Tâm uô lok six ntâu zav taz sik hâux lưv sâu zuôr têx huv mak uô tsi tâu tâu jông, tu zus tsiêx cxu lok cux li co”.

           Zơưv Võ Văn Bẩy, Chánh Văn phongx seiz car tsaz yênhx 135, Ủy ban Mênhx cxưx heik, tỉnh Quảng Ninh têx đêx anr, tsênhv chei huôv tsar thax tsav tsôngv box heir nênhs tsơưs hâur ntu zuôr txos, tsuv uô lơưr jông Côx hôiv li Nghị quyết 120 shông 2020 lok cir ntơưr tso tơưv tsưr ziv yưv pênhr trâu têz qơưk tsaz yênhx qơư tsov txos huôv tsar kinh tế-XH thax tsav tsôngv box heir nênhs tsơưs thiêz tox siêz ntu 2021-2030 thiêz tror muôx têx tsưr ziv uô jông, fiv đos trâu ntơưv qơư:

“Zuôr txos no, Chính phủ zuôr hlôngr têx tsưr ziv, chei yiêz lok yeiz pluôs, chor jok, xã hâur tỉnh Quảng Ninh zuôr uô hlôngr trơưk li ntơư. Hâur six hơưv zuôr txos, hâux lưv uô lơưr iz cxiê đêx anr yiêz trâu ntu, đhâu 2020 zuôr phiv liv đuô. Chênhr viv li, têx côngz trênhx, hâux lưv lox, pêz tưz uô lơưv, têx chuôz zis pluôs, jok txov nhêv zuôr lax hla đhâu yeiz pluôs sei. Hâur uô lơưr đêx anr zuôr txos, tsuv muôx tsưr ziv uô txơưr, tsênhv njiêz txơưr. Vav chiê siêz tiêk, hâur six hơưv zuôr txos, px nhoz tox siêz đêz đrôngs, thax tsav ntus đriv, muôx chôngz tsôngv box heir nênhs tsơưs nhoz hâur Quảng Ninh luz nênhx zuôr jông xưk iz zav li px cxuô thax tsav txơưr hâur tỉnh luz nênhx nox nhoz. Đros thiêz tỉnh Quảng Ninh li têx sir jos hâur ntu đhâu thiêz six hơưv zuôr txos, cur njênhs tiêk, tỉnh Quảng Ninh zuôr uô tâu”.

Quảng Ninh nưk muôx nưk iz đêx anr chiê paz trâu 22 xã, 11 luz jok hla đhâu têx cêr txov thiêz phiv liv tso pov, hâu nov cxuô cấp li sir jos hâur cxơưz paz cxuô thax tsav qơư cov sik đros huôv tsar, paz thax tsav tsôngv box heir nênhs tsơưs tâu buôk ti txos têz qơưk têx tsênhv chei paz lok zoz zux, y tế, vênhx huôv, XH./.

(VOV4-Riê Lâux cxeik, nhênhv)

Lênhx pox niêv trung tá truôx siêz uô hâux lưv phax tar zax zênhz

Huyện Mộc Châu-Vân Hồ, tỉnh Sơn La zos trung tá Đào Thị Hải Yến qơư uô hâux lưv thiêz zos iz thax tsav muôx ntâu cuz nxor lok zax zênhz. Nênhs phamv cxâuv zax zênhz zos têx lênhx nênhs fêv car tir tar uô têx tsik jông txos trâu lưx lươngv muôx txơưx jênhv, thax tsav ar nxaz, tox siêz lax mul lok, njiz ntâu phêv liv đros thiêz têx lênhx txir nênhx, taz sik đros trâu cêr moz siêz hâux lưv uô, xar gôngr côngv trâu têz qơưk, niêv lâuk Yến thâuv tưs cux truôx siêz chox luz nênhx ngaz tul trâu tsôngv box jêx jos:

          “Pêz pov lok six moz siêz pir li iz chuôz zis muôx txos 3 tul mê nhuôs muôx zênhs zax zênhz, tsuôk yuôr 2 niêv txir lâuk; cux muôx têx ziv 2 niêv txir mul chiv zênhs zênhz lok sik trâus cơư tux, tsuôk yuôr chor mê nhuôs nhoz tsêr. Pêz xar njôngr uô li chas chiê cê uô jông zuk côngz xưv tơưv txênhz phax tar, cê yax mông zaoz zux txu grês cxaz nênhs phamv cxâuv lok zax zênhz”.

Tiv zix zos shông 2018, thâuv niêv lâuk Yến uô Phưv tuêv tsar Tuêv qênhz yuôx, tưz cxaz chuôz ruôr yênhx côngz chuyên án 718T “Tơưv txênhz ruôr yênhx côngz nênhs thâux gra, muôv muôs tsi trơưk chei zax zênhz cxôngx xã Mường Sang, huyện Mộc Châu, tỉnh Sơn La muk têx tỉnh qơư kis chiê muôs”. No zos chuyên án zax zênhz lox, muôx lênhx coaz txos têx nênhs phamv cxâuv riêz nênhs, muôx ntâu tsưr ziv uô, tsi nyei tuôs, bax ntâu chuôz zênhx, vưv qiv yiêz chiê tir tar lưx lươngv muôx txơưx jênhv. Đhâu chuyên án tưz ntês tâu zuôr xar 10 lênhx nênhs, sâu tâu 20 ntâu đeiv zênhz đơưz, 10 cxênhz ntâu njiêr zax zênhz shơư yuôx thiêz ntâu chuôz zênhx txơưr muôx lênhx coaz.

Trung tá Đào Thị Hải Yến pheiz kênh,côngz xưv sâuv mặt trận tir tar nênhs phamv cxâuv zax zênhz, cux xưk li ntâu lênhx pox niêv chiến sĩ txơưr, tsuv uô jông zuk li hâux lưv, đros têx jiês muk uô côngz xưv ntêr hnuz, tuiv flu đros têx phêv liv, têx jiês ndeiv zuk tul txir, mê nhuôs mak lok six ndo....

“Hâur côngz xưv mak heik cxuô zos pox niêv li pêz muôx têx jiês tsoz phưz tsi tâu trâu mê nhuôs, cux lik six hluz chor mê nhuôs. Taz sik chuôz zis cux pheiz kênh, viv li mê nhuôs cux pâuz tâu niêv txir li hâux lưv uô, chiv chir uô têx hâux lưv mak mê nhuôs uô tâu, paz zuk lok six ntâu hâur uô côngz xưv”.

Nhiv no trung tá Đào Thị Hải Yến zos Tuêv tsar Tuêv coar lik hành chính lok trật tự xã hội thiêz zos Phưv chủ tịch Hội pox niêv Công an huyện Mộc Châu. Niêv lâuk thâuv tưs cux heik trâu cấp ủy, lênhs tov taz viv, chuyên môn lok uô hâux lưv fênhx zav cxênhx txir nênhx pox niêv, sir jos vênhv tôngv cán bộ hội viên cxaz chuôz têx huôx tôngv Hội, tsi so cơưv shâuv, muôz siêz yênhx tưv nghiệp vụ, pheiz kênh chênhz zênhv lok côngz xưv chuyên môn cux xưk li yênhx tiv tsoz phưz chuôz zis, cxiv tsa luz nênhx shir phaz; hlôngr yiêz luz nênhx chinhz yênhx, tâu pox niêv Hội viên njênhs njôngr. Trung tá Đinh Thị Thêu, Chủ tịch Hội pox niêv, Công an huyện Mộc Châu puz pâuz:

“Hâur côngz xưv chuyên môn cux xưk li côngz xưv Hội đồng chí Đào Thị Hải Yến thâuv tưs cux uô ntêx nyuôk uô tiêr jông jênhv vưv tâu choz; hâur pox niêv li huôx tôngv thiêz têx yênhx tix hâur phongz yaox, pir li shâuv thiv thao têx shôngk jê ntơưv no tax yênhx tix siêz, hâur co muôx đ/c Hải Yến li gôngr côngv lox”.

Hâur 20 shông ntâu uô hâux lưv, Trung tá Đào Thị Hải Yến tưz tâu thủ tướng chính phuv muôz ntơưr kruôk. Đros niêv lâuk, phênhv huv lox tiv zix zos tâu tsôngv box hâur thax tsav niêv lâuk uô hâux lưv, muôx cuz nxor lok zax zênhz njênhs njôngr paz max, gôngr phênhv tuôr truôx txiv ngaz jêx jos, chiê tsôngv box muôx tâu luz nênhx tsâu sor, ngaz tul./.

(Trấn Long- Txâur Vax cxeik nhênhv)