Tsôngv px ntus đriv Lai Châu muôx luz nênhx tsâu sor khov têx jôngr ntông

Cux xưk iz zav li ntâu lênhx px txơưr đuô hâur jok Ma Ký, xã Mù Cả, huyện Mường Tè, tas cik sơưr nzor zơưv Lỳ Lòng Cà sơưr uô yêik nox, bax têx chuôz zênhx, triêv txuôk chiê đros iz cxiê lênhx px hâur jok muk ndis shuôs têx jôngr ntông. No zos chor nênhs uô hâux lưv seiz jor har jôngr hâur jok li hâux lưv uô niêx hnuz, chiê phax tar tsi chiê hluôr tơưk cuz jôngr thiêz ntor luôx jôngr ntông.

Zơưv Lỳ Lòng Cà heik: Thâuv ntêx tsôngv box luz nênhx lok six txov nhêv, viv ar liêx têz tsơưs. Tsôngv box sđ phênhv sâu tâu chênhr tsuôk zos txix têx li: Muk pêv har jôngr txiêr tơưk, uô liêx têz xưz. Tsi muôx phênhv sâu, tsôngv box cux khênhr trâul têx nênhs fêv ntiêr muk hâur xuz jôngr ntor cơư têx ntông muôs trâu lơưr. Txix hnuz tâu têz qơưk paz max nhiêx sêiz jor har jôngr, tsôngv box lok six shir phaz thiêz chuôz zis tưs cux muôx nênhs đros tsưx phưv, seiz jor têx jôngr ntông hâur jok:

“Muk qênhz shuôs têx jôngr ntông, hâur luz six hơưv muk ndis shuôs har jôngr cur cux xav têx qơư. Đhâu thâuv lok txos tsêr cur tror yax kriê trâu tsôngv niêv txir lax px sđ thiêz chor nênhs hâur tsêr sik đros tsưx phưv truôx têx jôngr ntông. Zos muôx lênhx nênhs tưs muk hâur xuz jôngr thiêz ntor luôx uô ruôr hiêv txos, pêz zuôr sik đros por hưv, heik trâu têx hloz thênhv siêz, hâu nov ntơưv qơư chiê đros tu thiêz châuv ntiêz muk đhâu thax tsav jôngr ntông”.

Thôngz sâu hâur shông 2020, tsôngv px jok Ma Ký, xã Mù Cả tưz lênhk txêik tâu 5 tyv đeiv ntâu nhiêx sêiz jor har jôngr. Chor nhiêx no, xav kror đruôz đraz iz chuôz zis cux tâu zuôr xar 60 tsov đeiv. Txix têx nhiêx txiêx tâu paz, jux juk hâur jok tưz muôx ntâu trâur nuv huôv tsar tu zus tsiêx cxu, gra lok phênhv sâu tâu siêz trâu tsôngv px.

Iz chas ntơư, tsôngv box cux muôz mê njik têx nhiêx txiêx tâu têz qơưk paz ntơư zuôr nzir iz kro mê njik têx chuôz zênhx, chiê phưx vưv tâu jông đuô hâux lưv por hưv jôngr. Zơưv Pờ O Hừ, Tsar jok Ma Ký, xã Mù Cả, huyện Mường Tè heik pâuz:

“Niêx shông tsôngv box tâu têz qơưk paz têx nhiêx seiz jor har jôngr, jok cux yax kriê trâu tsôngv px cov sir zôngv chor nhiêx co tâu trơưk li tsưr ziv. Px nhiv no cux uô jông trơưk thiêz luz nênhx iz hnuz tâu gra siêz jux juk thâuv zôngv chor nhiêx no zuôr meir phưx vưv uô liêx têz, zuôr blêx, zuôr cxur nox, têx zav zuôr trâul txos hâur chuôz zis. Lok sâuv têx chuôz zênhx phưx vưv por hưv jôngr li: Hlâu, tênhz zak tơưk pov cêr....., jok tưz zôngv tâu jông thiêz uô tâu trơưk li hêik kriê”.

Xã Mù Cả muôx 8 jok, 600 ntâu chuôz zis, zuôr xar 2.600 lênhx nênhs, phênhv ntâu zos tsôngv box Hà Nhì uô nênhx nhoz. Đros trâu zuôr xar 30 cxênhz ha har jôngr, iz shôngk, tsôngv px hâur xã tâu lênhk txeik xar muôx 35 tyv đeiv nhiêx har jôngr.

Zơưv Pờ Khừ Xá, Chủ tịch Ủy ban xã Mù Cả heik pâuz, 2 shông tror lok no, txix têx nhiêx har jôngr truôx tuk li heik sâuv, tsôngv px hâur xã tưz yưv pênhr huôv tsar uô nox uô hnar, viv li chor chuôz zis pluôs tưz txo grêk txix 60% ntâu yuôr 40% ntâu. Lar heik zos tsi pov muôx lênhx nênhs tưs ntor luôx uô ruôr hiêv têx jôngr ntông li thâuv ntêx, tsôngv px cux tsơưs muk lol hâur têx xuz jôngr khơưk tơưk, txiêr tơưk lơưv. Chênhr viv li, têx jôngr ntông hâur xã ziv hnuz ziv muôx ntâu, chor shôngz ntông njuôz vor tox trôngz câuv har muôx 65% ntâu:

“Têx shông nhiv kruôr đhâu, têz qơưk chei paz nhiêx sêiz jor  har jôngr tưz cxơưz têx chuôz zis px luz nênhx huôv tsar, tsâu sor. Đhâu thâuv px lênhk txeik têx nhiêx har jôngr, px cux tror huôv tsar uô nox uô hnar, lar heik zos huôv tsar tu zus tsiêx cxu, uô kôngz....chiê gra siêz tsôngv px luz nênhx nox nhoz”.

Muôx luz nênhx truôx tuk, hla đhâu tâu yeiz pluôs txix têx jôngr ntông, tsôngv box cxuô heir nênhs xã Mù Cả heik taz, huyện Mường Tè heik cxuô, ziv muôx nzir cêr shir phaz, njênhs njôngr trâu Đảng, têz qơưk têx tsưr ziv, chei chox kriê, sik thôngx siêz chiê cxiv tsa jêx jok, qơư nhoz cov ziv hnuz ziv muôx luz nênhx tsâu sor, truôx jông./.

(Khắc Kiên-Riê Lâux cxeik, nhênhv)