Thừa Thiên Huế: Phuôx huiz lâul jok, tsar jok li pưk txux hâur côngz xưv bâux xêir

Txos cêr Hồ Chí Minh muk đhâu xar Trung Sơn, huyện A Lưới, tỉnh Thừa Thiên Huế têx hnuz no muôx lok six ntâu têx ntâuz ntơưr yax kriê lok hnuz bâux xêir.

Xar Trung Sơn nhoz trâu thax tsav ntus đriv, 98% dân số zos tsôngv box mênhx cxưx Pa Cô. Hâur pox nhuôs chor jiês cơưv ntơưv tsêr vênhx huôv jok A Niêng Lê Triêng 1, lâul jok Hồ Văn Hạnh txix zuk kror côngz bê tưz hêik pâuz txos têx tsênhv njiêz zov chênhr hâur jiês bâux xêir têiv plor Côx hôiv khóa 15 thiêz Hôiv đôngx cxuô cấp, chiê pêx xênhv pâuz tâu txos hnuz bâux xêir li kror zov chênhr thiêz tsiv gri. Lâul jok Hồ Văn Hạnh, xar Trung Sơn, huyện A Lưới, Thừa Thiên  Huế puz pâuz:

“Pêz tsuv hêik tas nro cxuô lênhx nênhs txưv hnuz nhôngs uô kror hâux lưv bâux xêir, cov txưv 100%. Pox nhuôs sơưr đơưk tsuv cxaz chuôz, tsik muôz ntơưr trâu luôs lưv tuk paz tso, sơưr đơưk tsuv muk tso ciês ntơưr chiê uô zuk kror vax huôv cử tri chiê xêir tsov tâu chor têiv plor moz siêz, sir jos uô hâux lưv paz trâu pêx xênhv”.

Đros têx tsưr ziv chiê yax kriê, chor xar nhoz huyện A Lưới moz siêz txos phuôx huiz chor lâul jok, tsar jok li pưk txux. Chênhr chor nênhs no tưz sir jos yax kriê chiê paz trâu pox nhuôs pâuz tâu tsênhz txos cử tri li vax huôv thiêz jênhv vưv hâur hnuz bâux xêir. Côngz xưv thôngz mông yax kriê, hêik pox nhuôs muk bâux xêir, taz por ngaz tuk tưz tâu cxuô thax tsav qơư kriz uô jông. Lơưr zơưv Lê Văn Nghiếu, Chủ tịch UBND xar Trung Sơn, côngz xưv lo bê ntơưr cử tri tưz tâu uô tiêr txix nzor lok:

“Txos nhiv no tưz lo bê ntơưr chor cử tri sâuv thax tsav qơư, ntơưv têx tổ. Pox nhuôs cux lok six shir phaz, sêiz no zos iz hnuz hôiv tas nro pêx xênhv. Thiêz pox nhuôs sơưr đơưk cux sir jos uô tas zuk txơưx jênhv, tiv zix zos phuôx huiz pox nhuôs li vax huôv dân chủ lok hâux lưv ntâuk  gri, nriêr pâuz chor nênhs ứng cử”

Tas nro huyện A Lưới, tỉnh Thừa Thiên Huế muôx 10 kror qơư bâux xêir têiv plor Hôiv đôngx cấp huyện, đros muôx 90 tôv bâux xêir thiêz zuôr xar 34 cxênhz cử tri. Zơưv Hồ Đàm Giang, Phưv Bí thư Thường trực Huyện ủy A Lưới puz pâuz:

“Ủy ban Bâux xêir cux tưz kriz uô tas nro têx tsênhv njiêz cik txos côngz xưv bâux xêir, tiv zix zos chox kriê cxuô thax tsav qơư, sir jos uô côngz xưv yax kriê, côngz xưv bax vax tsêr, trôngx tos cxuô zav ntơưv 10 kror qơư thiêz 90 tôv bâux xêir sâuv thax tav huyện. Taz por hâux lưv lo bê ntơưr cử tri ntơưv cxuô thax tsav qơư cux tâu uô jông đros kriz uô lo bê ntơưr ứng cử viên nhoz 4 cấp: Côx hôiv, tỉnh, huyện thiêz xar”.

Txos nhiv no, Ủy ban Bâux xêir tỉnh Thừa Thiên Huế tưz thôngx ziv bê ntơưr 10 lênhx ứng cử viên Têiv plor Côx hôiv khóa 15. Hâur 86 ứng cử viên têiv plor HĐND tỉnh ntu 2021-2026, muôx 6 lênhx zos mênhx cxưx tsơưs nênhs. Chor nênhs tâu hêik pâuz ứng cử zos chor đảng viên, chor nênhs jông, muôx coangz siv sưv jê đros pêx xênhv ntơưv qơư, tâu cử tri ntơưv qơư nhoz thôngx ziv siêz.

Nhiv no, Ủy ban Mặt trận Têz qơưk Việt Nam tỉnh Thừa Thiên Huế tsênhv sik côngv đros têx taz viv, cxuô thax tsav qơư, tsưr tsix chor jiês njiz cử tri, hêik sơưr đơưk bâux xêir trâu chor nênhs ứng cử lơưr chêi têz qơưk li cui tênhv. Zơưv Nguyễn Nam Tiến, Chủ tịch Ủy ban Mặt trận Têz qơưk Việt Nam tỉnh Thừa Thiên Huế puz pâuz:

“Pêz zuôr cử tri ntơưv qơư nhoz li ziv chênhv mak chuôs li chor ứng cử viên puôr lênhx tâu chôngz cử tri thôngx siêz siêz. Têiv plor uô tâu lơưr li pưk txux, muôx txơưx jênhv cux tsuv tâu pêx xênhv thôngx ziv đros thiêz. Zos chor nênhs muôx txux chi, moz siêz thiêz sir jos mak thiêz zuôr hlôngr tâu trâu pêx xênhv. Hâux lưv xêir tsov ứng cử viên zos uô chak cov lênhx têiv plor co thâuv lơưr tâu bâux xêir uô têiv plor Côx hôiv thiêz têiv plor HĐND mak tsuv phuôx huiz tâu lơưr li pưk txux thiêz uô tâu hâux lưv chiê paz trâu pêx xênhv”./.

(TTMT-Lik Thox cxêik nhênhv)