Tox siêz Yên Bái chuôz tsar phax tar ntux no trâu tsiêx cxu

          Đros chênhz zênhv 11 shông tu zus tưv, ciês thâuv muôx xor mông hêik lok ntux no njiv, zơưv Nguyễn Văn Trụ chuôz zis nhoz jos Hương Hà, xã Thạch Lương tưz lơưr hur si 10 tul tưv chox lok cơư trâu hâur guôx thiêz cxênhx tsês jâuz krâur trâu tưv nox hâur cheix ntux no njiv. Zơưv Trụ puz pâuz, chuôz zis li têx tưv, txơưv tiêk zos nôngz tiv phaz, muôx đas jos tir no jông, taz sik tsi viv li mak tsi tsoz phưz cov jông, tul nhux tưv zos chuôz zis li phênhv sâu tsênhv hâur ntâu shông lok no. Zơưv Nguyễn Văn trụ heik:

          “ Hnhaz blês mak pêz tưz cxênhx tsês. Guôx thâuv txos cheix ntux no mak hnuz tưs cux their guôx tsi chiê nhux trâus no. Đrâuv co cux tsuv cxax yuôx phax moz lơưr cheix”.

          Iz shông xã Thanh Lương li chor tsiêx cxu muôx 1 cxênhz 400 ntâu tul chox lol phênhv sâu ngaz tul trâu yênhx puôk ziv chuôz zis, ntâu ziv pov bluô nux jux juk. Viv li, txos six hơưv no, xã tưz heik 100% chuôz zis tsuv lơưr nhux lol cơư hâur guôx. Viv tưz bax uô ntêx thâuv txos cheix ntux no, viv li nhux tưv nhux đas cơư hâur guôx cux taz por muôx txâuk jâuz krâur nox. Zơưv Hà Văn Sinh, canr bôv kôngz jôngr xã Thanh Lương, huyện Văn Chấn puz pâuz:

          “ Xã Thanh Lương tưz yax mông trâu pox nhuôs tsưr ziv chos đrox thiêz cxênhx tsês jâuz trâu tsiêx cxu hâur cheix ntux no. Pox nhuôs mak cux chiv chir muôx siêz por vêv zuk paz tsiêx cxu, phax tar moz trâu tsiêx cxu”.

          Huyện Văn Chấn, tỉnh Yên Bái muôx zuôr xar 30 cxênhz tul tsiêx cxu, chêx chôngk phênhv ntâu nhoz têx xã li: Thanh Lương, Thạch Lương, Hạnh Sơn, Nậm Búng, Tú Lệ....Cxơưx jiês no njiv xuz thơưx hâur cheix ntux no njiv no muôx ntâu paz tsiêx cxu tsi tâu tâu shưv đros, viv li chiê jav tâu têx trâus ruôr hiêv trâu tsôngv box, nganhx muôx txơưx jênhv huyện Văn Chấn tưz yax kriê, heik tsôngv box lok cxuô faz tsưr ziv taz por đas jos trâu tsiêx cxu hâur têx hnuz ntux no njiv li: tsi tso nhux tưv, nhux đas muk nox jauv pêv têx trôngz, their guôx, taz por jâuz krâur thiêz phax moz trâu tsiêx cxu. Zơưv Nông Ích Chấn, phưv chủ tịch UB huyện Văn Chấn, tỉnh Yên Bái puz pâuz:

          “ Ub huyện tưz chuôz tsar yax mông trâu tsôngv box lok têx tsưr ziv phax tar ntux no, moz gênhs trâu paz tsiêx cxu. Chox kriê canr bộ mul thax tsa, đros cấp ủy, chinhr quyênx heik kriê tsôngv box uô vêv xênhz guôx, cxênhx tsês jâuz krâur thiêz phax moz trâu tsiêx cxu”.

          Tas nro tỉnh Yên Bái nhiv no muôx zuôr xar 700 cxênhz tul tsiêx cxu, taz sik đros thiêz tsôngv box li chuv tôngv, hâu nov tiv phaz li yax kriê, xar njôngr hâur jiês no njiv no tsôngv box tox siêz Yên Bái li têx tsiêx cxu zuôr tâu taz por jông./.

(Trịnh Xuân- Txâur Vax cxeik nhênhv)

Chos chiêz, txir tuôz ziz, por hưv jôngr huôv tsar kinh tế

Zơưv Lường Văn Hợp chor ntông chiêz chos tâu muôx xar 150 ha tưz zuôr jông ntor muôs, zos ar jôngr ntông chos tâu ntâu yax nhoz jok Nông Cốc, xã Long hẹ, huyện Thuận Châu, tỉnh Sơn La. Iz chas têx ntông chiêz, zơưv Hợp tsênhv chos 15 ha têz txir tuôz ziz cê muôx nzir phênhv sâu taau nhiêx txiêx trâu chuôz zis, cê por hưv tâu têx har jôngr.

Đrav ntêx, zơưv Hợp chuôz zis lok six txov nhêv. Đros thiêz tox trôngz hâur pêk nxaz, liêx têz tsuôs tsi jông kôngz, zơưv Hợp tưz xar njôngr zuôr chos zav tsoz chos tưs, tu zav tsiêx tưs thiêx zuôr  muôx luz nênhx truôx tuk. Khov têx sir jos zok nriêr tsưr ziv huôv tsar uô nox, tâu cơưv têx lớp kriê cxaz txux chi tsưr ziv huôv tsar cêr uô nox, zơưv Hợp tưz xeir chos jôngr ntông, iz tsưr ziv mak trơưk zơưv chiê huôv tsar kinh tế truôx hâur iz ntu ntêr. Iz chas ntơư, zơưv Hợp tsênhv tu zus tsiêx cxu muôx phênhv sâu tâu nhiêx txiêx cxaz nzir trâu chuôz zis:

“Đrav ntêx tu zus têx tsiêx lox, txos thâuv cheix ntux no cux tuôs tas ntâu, viv li cur xar tiêk chos jôngr ntông, zuk uô nênhx nhoz pêv têx har jôngr xưz. Chos jôngr mak tsuv vênhv tôngv ntâu lênhx nênhs đrol chos, ntâu chuôz zis đrol chos thiêx por hưv tâu jôngr xưk li nno”.

Zos nênhs Maz, uô nênhx nhoz đreiv trâu thax tsav tox siêz, viv li zơưv Lường Văn Hợp pâuz tsênhz txos tsôngv box nhoz no luz nênhx nox nhoz muk lok hâur niêx hnuz. Đros trâu têx sir jos huôv tsar kinh tế, zơưv tsênhv sik pheiz kênh, paz têx ziv chuôz zis pluôs hâur jok, hâur xã lok zuz tsoz chos, nôngz tsiêx cxu. Ntâu chuôz zis tâu zơưv paz lok sâuv zuz nôngz kôngz, tsiêx tu zus thiêz pênhr chiê huôv tsar uô, iz thênhv jux juk hla đhâu yeiz pluôs. Niêv lâuk Tòng Thị Dủ chuôz zis tâu zơưv Hợp paz nôngz nhux zus, kriê tsưr ziv chos ntông chiêz, txos nhiv no niêv lâuk chuôz zis tưz muôx 3 ha ntông chiêz:

“Thâuv njiz txov nhêv, txir hloz cux paz pêz, xưk li têx mê nhuôv muk cơưv ntơưr tsi muôx nhiêx thêv tsêr cơưv, txir hloz cux paz mê njik nhiêx trâu têx nhuôs gra muk thêv tsêr cơưv. Iz chas ntơư txir hloz cux heik kriê chuôz zis chos jôngr ntông, viv li cur chuôz zis cux chos tâu 2, 3 ha ntông chiêz”.

Đros phênhv sâu tâu muôx nhos 150 tsov đeiv iz shông li nhiv no, txơưv tiêk tsi ntâu, taz sik nhoz thax tsav tox siêz li no, co zos iz phênhv sâu tâu truôx txix luôs hâux lưv chos jôngr ntông. Nhiv no zơưv Hợp tsênhv nhênhz chơưv chiê uô lơưr Irsaren tsưr ziv zưs đêx trâu têx ntông nox txir thiêz zuôr gra têx zuz ntông nox txir li: Txir lưv tsiz.....chox lok chos siv./.

                         (Thanh Thủy-Riê Lâux cxeik, nhênhv)