Têx phiv liv gra txux chi kriê trâu têx nhuôs tox siêz Mường Bám

Đros cưk kriê ntơưr Quàng Văn Ba, uô hâux lưv kriê txux chi nhoz tsêr cơưv cxênhx iz Mường Bám II muk txos qơư cơưv Pha Khương, kuôk đêz tsêr cơưv tsênhv qơư  zuôr xar 20 cêik. Muk ndê trôngz siêz, đhâu yênhx har  toz li pâuz tâu chor cưk kriê ntơưr nhoz no têx cêr txov thiêz phiv liv.

Cưk kriê Ba heik: Nhoz hâur jok Hmôngz, qơư cơưv Pha Khương zos qơư đêz thiêz phiv liv đuô hur si hâur tsêr cơưv. Nhoz no thâuv ntux nas lox mak cêr nhav, lok six bluô, thâuv tưs muk tsêr cơưv, tus no paz tus tov thơưz yêz, cur paz cox, cox paz cur xưz, lok sik thor tsôngv cưr tix nênhx tsa hâur jok đros paz thiêx muôx têx muk tâu; hur tiz si viv têx tuz nhuôs shux xênhz……:

“Nhoz tsêr cơưv tox siêz no, chor nhuôv shux xênhz 100% zos heir nênhs Hmôngz, lok six phiv liv lok sâuv kriê txux chi. Niêx hnuz chor nhuôv siz zâuv tuôx cơưv ntơưr cxix cxuô mak pêz lok six shir phaz lơưv, thâuv têx nhuôs tuôx cơưv cxix cxuô ntơư cux zos iz kro pêz xar njôngr thiêz zos đas jos cxơưz chiê pêz sir jos uô tiêr tâu jông luôs hâux lưv zok muôz, kriê txux chi, cêr uô nênhx trâu têx nhuôv, tov kaz no li muôx tsưr ziv đros luôs lưv tus huôv tsar uô nox…”.

Uô hâux lưv ntơưv tsêr cơưv jok Nà La, xã Mường Bám tâu 6 shông lok no, vax tsêr nhoz đêz tsêr cơưv muôx 20 ntâu cêik, cưk kriê Lò Thị Phúc, uô hâux lưv kriê txux chi hâur tsêr cơưv cxênhx iz Mường Bám II, iz shông tsuôk tâu muk shuôs tsêr 1, 2 jiês xưz. Taz sik cux tsi muôx iz jiês tưs zuôr xar tiêk, tso hâux lưv tsês hlo, thâuv tưs tưz sir jos  hla đhâu têx phiv liv, uô iz siêz sir jos hâux lưv kriê txux chi trâu têx tuz nhuôs shux xênhz nhoz thax tsav tox siêz tsênhv yuôr ntâu txov nhêv no. Cưk kriê Lò Thị Phúc heik:

“Đêz vax tsêr, đêz qơư nhoz, cur tuôx no uô hâux lưv, zuk zos pox niêv, hur tiz cxuô zav zos zuk tưx bax, tưx uô xưz. Viv luôs hâux lưv, viv têx nhuôv shux xênhz viv li cur tưz sir jos chiê uô tiêr tâu jông têx hâux lưv zok muôz nhoz thax tsav tox siêz no. Cêr shir phaz thiêz jông siêz yax zos thâuv tas shông cơưv, chor nhuôv pâuz nhênhv, pâuz sâu ntơưr, nhiêv thiêz ndo txos chor cưk kriê ntơưr xưz”.

Cưk kriê Lỗ Trắc Quyết, thơưx seiz car tsêr cơưv cxênhx iz Mường Bám II heik pâuz, nhoz thiêz uô hâux lưv hâur xã tox siêz, lok six txov nhêv hâur huyện Thuận Châu, cxuô zav uz no hâur tsêr cơưv yuôr lok six ntâu muôx tsi txâuk; ntâu qơư cơưv nhoz đêz tsênhv qơư, cêr muk lol phiv liv, tsôngv pêx xênhv sơưr đơưk cux tsi yuô tâu muôx txux chi tsưr ziv jênhv pâuz…. Taz sik, chor canr bôv, cưk kriê ntơưr hâur tsêr cơưv thâuv tưs tưz siz heik, siz paz, sik pheiz kênh têx cêr txov thiêz phiv liv; Ban giám hiệu tsêr cơưv cux muôz jông six hơưv chiê chor cưk kriê, shux xênhz tso siêz uô hâux lưv kriê thiêz cơưv ntơưr, uô li chas chiê tuôr truôx thiêz gra siêz tsơưr lươngv kriê txux chi, paz têx nhuôs shux xênhz nhoz no txơưx njê, pâuz ntâuz pâuz ntơưr li luôs lưv tus hâur thax tsav tsênhv qơư, tiêx đras:

“Hâur six hơưv đhâu, tsêr cơưv cxênhx iz Mường Bám II hux jos đros BCH công đoanx  muôz jông six hơưv chiê chor cưk kriê hâur tsêr cơưv muôx six hơưv cơưv cxaz têx tsưr ziv, txux chi yuôr trâul lok sâuv kriê ntơưr, lar heik zos cơưv tsôngv box heir nênhs tsơưs li têx lul heik, nriêr pâuz nzir iz cxiê tsưr ziv, cêr xênhz huôx hâur luz nênhx niêx hnuz chiê uô tâu jông luôs hâux lưv zok muôz”.

Nhoz thax tsav tox siêz, chor cưk kriê ntơưr hâur jok li cêr shir phaz zos têx tuz nhuôs zâu tâu cơưv ntơưr cxix cxuô, pâuz tsưr ziv, muôx txux chi chiê tov kaz no chênhr chor nhuôs zos têx lênhx cxiv tsa jêx jok, zuk qơư nhoz ziv hnuz ziv huôv tsar, vav mênhx đuô./.

(Trấn Long-Riê Lâux cxeik, nhênhv)

HTX yiêz cxiv tsa hâux lưv tsiv uô cungz hax huv trâu tsôngv box nôngx mênhx

          HTX kôngz nuv Ái Nghĩa, huyện Đại Lộc tâu seiz zos iz hâur têx HTX uô ntêx nyuôk lok phongz yaox kinh têr HTX tỉnh Quảng Nam.

          Xiv huv bánh tráng Đại Lộc tâu seiz zos zav nox nto bê chax chês nhoz tỉnh Quảng Nam, tâu côngz jênhv xiv huv OCOP. Lơưr zơưv Trương Cảm, Giám đốc HTX kôngz nuv Ái Nghĩa, viv tsiv uô mê, niêv ciêz sâu zuôr greiv viv li xã viên li xiv huv uô tâu tsi ngaz tul. Nhiv kruôr đhâu,HTX tưz sik côngv đros HTX jix vuv kôngz nuv Sunfood Đà Lạt sâu zuôr xiv huv. Zơưv Trương Cảm puz pâuz, hâux lưv sik côngv no krêz tơưv qơư sâu zuôr yiêz trâu xiv huv muk cxuô qơư hâur têz qơưk thiêz saz đrâuv têz qơưk:

          “Tiv tsiv uô tsi chêx chôngk viv li hâux lưv muôv muôs xiv huv cux lok six phêv liv. Thâuv cxaz chuôz sik côngv uô, cungz xiv huv thiêz sik côngv tas nro qơư sâu zuôr xiv huv sâuv hur si têz qơưk, xiv huv tâu muôv muôs zôngx ziv đuô thiêz tâu muôs trâu saz đrâuv têz qơưk”.

          HTX jix vuv kôngz nuv Sunfood Đà Lạt zos taz viv uô ntêx nyuôk thiêz yênhx côngz lok cxiv tsa tsiv grê sik côngv hâur nganhx kôngz nuv. No zos trâur nuv HTX yiêz, txix cungz nôngz, chuôz zênhx, heik kriê tsưr ziv uô, choz công nghệ txos tsiv uô thiêz muôv muôs xiv huv puôr lênhx sik côngv uô jông. Tiv zix, xiv huv kôngz nuv tâu thâux txos ciês nênhs sir zôngv, xiv huv taz por, tsôngv kruô tso siêz thâuv zuôr xiv huv.

          Zơưv Phạm Ngọc Thạch, Chủ tịch Hội đồng quản trị, Giám đốc HTX jix vuv kôngz nuv Sunfood Đà Lạt puz pâuz, taz viv muôx dự án 1 cxênhz hecta ntâu ntơưv tỉnh Lâm Đồng, sik côngv đros Hàn Quốc tsiv uô qir zuôv, chos trơưk tsưr ziv, muôv muôs lơưr trâur nuv. HTX tsênhv choz tsưr ziv chos, tsoz phưz, sâu zuôr xiv huv kôngz nuv trâu têx HTX thành viên thiêz pox nhuôs nôngx mênhx. Đhâu 4 shôngk huôx tôngv, taz viv tưz sik côngv tâu 20 HTX kôngz nuv, yênhx puôk ziv chuôz zis thiêz ntâu doanh nghiệp hâur tas nro têz qơưk cxaz chuôz. Zơưv Phạm Ngọc Thạch puz pâuz cxaz, HTX tsênhv krêz đar sik côngv đros têx HTX kôngz nuv ntơưv faz Trung chiê chos thiêz muôv muôs xiv huv:

          “Pêz sâu zuôr xiv huv thiêz tuôr truôx grê hâur yênhx shông. Pêz yưv pênhr muôx chor yêz muk lok têx tỉnh chiê thâux xiv huv, paz txu grês nhiêx txiêx trâu têx thành viên sik côngv, thâux xiv huv tuôx txos ciês nênhs sir zôngv sauv tas nro têz qơưk. Tsưr ziv txos shông 2023, pêz zuôr sik côngv đros 63 tỉnh, thành. Đhâu moz Covid-19, pêz zos iz hâur têx taz viv sik côngv chox xiv huv jông tiv zix txos têx tiv phaz thiêz saz đrâuv têz qơưk”.

          Tiến sĩ Lê Văn Nghị, Phưv CHủ tịch liên minh HTX VN xar tiêk, yênhx trus hlôngr yiêz trâur nuv tsiv uô kôngz nuv zos tsưr ziv uô huv đros thiêz niêv ciêz. Chêx cuk zos nôngx mênhx muôs tâu xiv huv trơưk grê, doanh nghiệp muôx xiv huv tsiv uô ngaz tul, tax tsơưr lươngv thiêz nênhs sir zôngv tâu zôngv têx xiv huv taz por vêv xênhz. Lơưr zơưv Lê Văn Nghị, trâur nuv HTX yiêz li têx kror jông zos sik côngv thâux hax huv tsi so, cê cxênhx txuôk, grê tâu tuôr truôx thiêz sâu tâu liv zix:

          “No zos têx têz qơưk sâuv ntiêx têz li jax cơưv chênhz zênhv, trâur nuv ziv lox mak ziv cuiz tênhv tâu grê sâuv niev ciêz. Viv li Liên minh HTX VN tưz thiêz tsênhv ndar txos yênhx lix têx trâur nuv HTX lox cấp tỉnh, cấp têz qơưk, cấp thax tsav. Têx HTX zâu, tsi muôx qênhx cuiz tênhv cungz sâuv niêv ciêz zuôr tsi cxaz chuôz hâur têx HTX lox no chiê paz trâu muôx qơư sâu zuôr xiv huv muôx chêx cuk tiv zix”./.

(Đình Thiệu-Txâur Vax cxeik nhênhv)