Sêiz car jôngr ntông cxôngx côngv thôngx nhoz Yên Bái

Ntơưv têx jiês khiêz phêv jos Giàng Cài, xã Nậm Lành, Ban seiz har jôngr côngv thôngx tưz sik seiz lax thiêz sâu zuôr tsôngv box hâur jos li ziv chênhv lok Ban seiz car jôngr côngv thôngx, tuêv por vêv jôngr li tsưr ziv huôx tôngv thiêz hâux lưv seiz car, sir zôngv nhiêx txiêx thêv jix vuv tênhx qơư jôngr…Phênhv ntâu tsôngv box hâur jos puôr lênhx thôngx ziv đros hâux lưv zôngv 70% chor nhiêx txiêx thêv trâu côngz xưv por vêv jôngr, 30% tsênhv yuôr zôngv trâu têx huôx tôngv cxuô hâur jos li: zuôr chuôz zênhx zuôr trâus, khiêz phêv, cxiv tsa têx côngz tsinhx. Zơưv Phùng Sinh Sương, Bí thư Chi bộ jos Giàng Cài puz pâuz: Ntu đhâu, jos Giàng Cài tưz tâu têz qơưk yưv pênhr cxiv tsa iz qơư khiêz phêv lox đar 200 yiv ntâu, muôx 5 qar, tsiv grê 700 tsov đeiv. Taz sik, chiê qơư khiêz phêv no jông đuô, jos tsênhv muôz cxaz yênhx châuv sov đeiv cxôngx nhiêx txiêx thêv tênhx qơư jôngr chiê uô trôngx vas, qar puôv thiêz qơư vêv xênhz:“30% zos chiê jos sir zôngv uô cuiv huôx tôngv lok têx hâux lưv muôx hâur jos, tsôngv box cux 100% tsa tês thôngx ziv đros tsưr ziv no”

          Nhoz jos Giàng Cài, têx shông thâuv ntêx, hâux lưv por vêv jôngr tâu choz trâu yênhx paz têx ziv chuôz zis seiz car; taz sik li ntơưv mak lok six lax chiê coar lik por vêv. Lơur tsôngv box, tsưr ziv uô li ntoưv mak tsi côngz fênhx lok qênhx liv, muôx têx thâuv tsôngv box muôx jôngr mak bluô nux, muôx têx chuôz zis tsi muôx jôngr mak txov nhêv, viv li muôx yưv têx hâux lưv tsi jông.   Cxôngx thâuv hlôngr yênhx coar lik jôngr lơưr côngv thôngx, tsôngv box li jênhv pâuz muôx têx hlôngr yiêz tsênhz mênhx hâur côngz xưv por vêv jôngr. Têx huôx tôngv xã hội hâur jos cxôngx co cux tâu krêz uô jông đuô. Zơuv Lý Văn Ngân, tsôngv box jos Giàng Cài, xã Nậm Lành, huyện Văn Chấn puz pâuz:  “Côngv thôngx lok six tsov cưv txos hâux lưv por vêv jôngr thiêz huôv tsar jôngr truôx vênhs, lêx ntêr. Nhiv no, tsôngv box nhoz saz đrâuv tuôx ntor luôx jôngr tsi tâu côngv thôngx hâur jos li jôngr”

          Pos Bàn Thị Náy, Phưv Chủ tịch UB xã Nậm Lành, huyện Văn Chấn puz pâuz: Thâuv ntêx, côngv thôngx li côngz xưv coar lik, por vêv jôngr nhoz xã Nậm Lành njiz ntâu phêv liv, chêx cuk kis tiv tsuôk khov txos iz paz chor ziv chuôz zis, tsi muôx pênhr huôx tôngv. Cxôngx thâuv tỉnh krêz uô chính sách thêv nhiêx txiêx jix vuv tênhx qơư jôngr, tiv zix zos hâux lưv krêz uô choz por vêv jôngr trâu côngv thôngx tsôngv box hâur jos têx huôx tôngv por vêv jôngr tâu uô jông đuô.   Xav hâur jos Giàng Cài txos nhiv no tưz muôx 900 ntâu hecta jôngr, hâur co 800 hecta ntâu zos jôngr lâuk phax phưv, chor nhiêx txiêx tâu sơưv cxôngx jix vuv tênhx qơư jôngr zos yênhx puôk tsov đeiv: “Jos Giàng Cài zos jos uô siv uô ntêx nhoz xã Nậm Lành lok tsưr ziv coar lik jôngr côngv thôngx, yênhx lix Ban coar lik jos, tror xênhv bo xeir tuêv tsar, pheiz côngz tsênhz mênhx yênhx tuêv coar lik jôngr muôx hor ntâu ziv chuôz zis thiêz tsuv coar lik hor ntâu jôngr…Ntu zuôr txos, xã zuôr tror krêz uô ntơưv têx jos tsênhv yuôr hâur xã”.

          Tsênhz mênhx tso pov, hâux lưv thêv nhiêx txiêx jix vuv tênhx qơư jôngr hâur côngv thôngx jêx jos thôngz đhâu Ban seiz car jôngr côngv thôngx tâu tsôngv box tox siêz Yên Bái thôngx ziv zos viv hâux lưv tâu krêz uô tsênhv tsênhz. Cxôngx co, côngz xưv por vêv jôngr reik đros côngv thôngx tsôngv box ziv tâu phuôx huiz thiêz muôx chêx cuk siêz./.

(Đinh Tuấn-Txâur Vax cxeik nhênhv)