Têx tsoz chos nhiêx tỷ nhoz suôv qơư Nậm Đét

Kaz cheix ntux no njiv, muk trơưk 2 saz ntus cêr luôv xuôz jêz txix tỉnh li txox cêr lox muk trâu Nậm Đét mak zênhx pok huôz niêz, tưz seiz njiê tsi pov kror tưs, lênhx tiz nênhs thiêz têx yêz tsuôk muôx têx seiz njiê pov mê njik ntơưv têx ntus cêr chiê muk lok đhâu xưz, tax txos thâuv tưz pov têx ntông ciêv fix jông njuôz xiêz thiêx zos txos Nậm Đét.

Zos lênhx tưs tuôx txos no thâuv xuz thơưx, muôx tsi tsơưs lênhx zuôr xar tiêk, chas thax tsav tox siêz đêz đrôngs Nậm Đét no ho muôx ntâu luz tsêr cxiv puôz uô tâu jông li ntơư. Trơưk tsôngv box ntơưv qơư, nhoz suôv qơư no, zos lênhx tưs cxiv uô tâu vax tsêr jông nhoz mak muôx têx, ntơư puôr lênhx zos khov têx nhiêx muôs ciêv fix. Xưk zơưv Triệu Kim Vảng, nhoz jok Tống Hạ hâur tsênhv qơư xã luz tsêr 3 yôngx tsênhv nhiv kruôr cxiv uô tâu yiêz, nhiv kruôr đhâu zos muôs 4 ha têx ntông ciêv fix, zơưv chuôz zis sâu tâu lok xar iz tỷ đeiv. Zơưv Vảng heik: “Heik cxuô thax tsav Nậm Đét no nhiv nor luz jok tưs chos tâu ciêv fix mak jok ntơư zuôr bluô nux đuô. Khov têx nhiêx muôs ciêv fix, ntâu chuôz zis tưz thiêz tsênhv taz tov cxiv uô tsêr, zos uô lơưr têx tsưr ziv tu zus tsiêx cxu, chos kôngz txơưr đuô li đrav ntêx mak zuôr uô tsi tâu li chos ntông ciêv fix”.

Zos li zơưv Vảng heik, nhoz Nậm Đét, iz chas tsơưs luz jok tox siêz, đêx ar tsuôs, uô tsi jông kôngz, mak nhoz têx jêx jok tsênhv yuôr, lax zok nriêr tâu chuôz zis tưs tsi chos ciêv fix. tsoz ciêv fix nhiv no txix têx ntông, tơưr, blôngx txos trâu têx chês….zav tưs cux muôs tâu nhiêx hur si. Tsi tiêk li ntơư, mak xưk zơưv Bàn A San nhoz jok Nậm Đét, 10 ha ntông ciêv fix, ciês têx nhiêx txiêr chês niêx shông muôs, zơưv chuôz zis tsi tiêk txâuk zôngv trâu xênhz huôx niêx hnuz, mak tsênhv zôngv chiê trâu 2 tuk nhuôv muk cơưv Đại học thiêz. Tov kaz no, thâuv têx ciêv fix txâuk shông chiê muôs, mak zuôr sâu tâu ntâu đuô, 2, 3 tỷ nhiêx. Zơưv San heik: “Xưk li đrav ntêx mak hur tiz si puôr lênhx tok trâu têx liêx têz, nhiv no nhoz Nậm Đét tas nro têx pênhr jos li: Cxiv uô vax tsêr, zuôr têx chuôz zênhx, yêz cheix mul lok phênhv ntâu puôr lênhx zos khov têx ntông ciêv fix. Ciêv fix tưz muôz hâux lưv uô trâu tsôngv box, paz sđ hla đhâu yeiz pluôs”.

Trơưk li pos Triệu Thị Ghến, Bí thư Đảng ủy xã Nậm Đét, tas nro xã nhiv no tsênhv muôx nhos 1.300 ha ciêv fix, đos thiêz 400 ntâu chuôz zis tsôngv box cxaz chuôz chos. Shông 2016, xã li phênhv sâu txix têx ciêv fix tâu 32 tỷ đeiv, bâuv 100 jiês pir li shông 2010. Ntông ciêv fix tưz yênhx zav tsoz chos xiv huv jông paz tsôngv box Nậm Đét huôv tsar kinh tế truôx vênhk. Pos Triệu Thị Ghến heik pâuz: “Nhiv no, tas nro tsôngv box xã Nậm Đét phênhv ntâu zos tok trâu têx ciêv fix. Đảng ủy xã thiêz Đảng bộ huyện Bắc Hà  Nghị quyết cux xav tinhv tsưr ziv, hâux lưv, iz shông sir jos huôv tsar chos nzir 70 ha têx ntong ciêv fix, yuôr li chas ar mak zuôr tror njuôk hov chiê trâu tsôngv box chos, muôz six hơưv paz tsôngv box huôv tsar uô nox uô hnar”.

Zos lênhx tưs muôx six hơưv, hnuz nhôngs tuôx txos Nậm Đét iz jiês no, hur si xã tưz tsi yuôr luz tsêr tưs lav uô lav nhoz tax, tsi muôx chuôz zis tưs tsi muôx yêz meir cheix, muôx têx ntâu ziv chuôz zis tưz muôx yêz lox cheix muk lok. Shông yiêz 2017 no, cxuô lênhx tsôngv box sđ puôr shir phaz lus hâur tsiêz 30./.

(An Kiên-Riê Lâux cxeik, nhênhv) 

          Tsôngv box Hmôngz têx nduôr blêx hâur hnuz tsiêz

Thâuv txos tsiêz pêz châus mak nhoz kror tưs pêz tsôngv box Hmôngz cux tuôr nduôr chiê nox, luz nduôr cux zos hêik tơưv tâu cêr shir phaz tsâu sor, sâu tâu kôngz lôngk ntâu. Niêv tix Nênhz Xênhv Tsaz, nhoz jok Pa Khen 2, Thị trấn Nông Trường Mộc Châu, huyện Mộc Châu, tỉnh Sơn La puz pâuz: Chiê uô cov tâu chor nduôr blêx, tsư kaz mak tsuv muôz chor blêx blâuv tsik txuôv lok tuôr thiêx lưx thiêz thiêx blâuv. Tuôr tâu mak muôz blôngx tsơưz lok krưr uô yênhx luz tsês chiê.

Njiê mak cux zôngx ziv uô, taz sik tuôr nduôr nyê zos kror tas ntâu đas jos tiv zix. Pêz Hmôngz luz đaz tuôr nduôr zos đaz ntông, chor đâux tuôr nduôr cux zos chor ntông tơưr thiêz hnhar. Viv li chiê tuôr tâu nduôr lưx jông mak tsuv zos chor hluôk tuz muôx jos. Thâuv tuôr mak tsuv 2 lênhx tuôr, txos thâuv gênhk mak ho hlôngr oz lênhx txơưr đuô lok tuôr tax thâuv tưs cxur lưx siz lo uô nduôr mak tâu. Li co tuôr nduôr tsuv muôx chôngz nênhs siz hlông nto tuôr mor thiêx lưx sêi, viv li muôx ntâu ziv chuôz zis zik đros tuôr iz kror qơư chiê muôx nênhs siz hlôngr tuôr thâuv txos tsiêz. Txos hnuz 29 tsiêz mak cxuô chuôz zis Hmôngz zênhx bax tsâu cxur, chuz mor chiê tuôr nduôr uô pêz châus. Thâuv chor nduôr tưz tuôr tâu chiê tsik lo têk mak zôngv gâuk kê kêi plênhr têk thiêz têx vaz mak li đơưk nduôr hâur đaz trâu sâuv vaz thiêz puôz uô yênhx luz nduôr. Thâuv tuôr tâu no nox ciês lok cux tâu, lok sik muôz muk cxiêz ntơưv ntus chuz nox cux lok six kaz.

Zơưv Nhiêx Ntax Xênhv Lâux, nhoz jok Pa Khen 2, thị trấn Nông trường Mộc Châu, huyện Mộc Châu, tỉnh Sơn La hêik: “Txos tsiêz mak txơưv lâul, hluôk lok lênhx tưs cux xar muôx nduôr nox. Luz nduôr xuz thơưx ciês tuôr tâu zos chiê bưk pos zơưs, đhâu co mak mav muôz chor puôz tov kaz trâu sơưr đơưk nox thiêz muôz têx fôngx zưs tuôx yax tsiêz gra muk tsêr nox”.

Txơưv nox tsiêz trâu luz hli tưs lok pêz Hmôngz cux tuôr nduôr hur si. Nhiv no txos thâuv tsiêz lok sik têx hnuz ntênhk hôiv, ntuôr uô cêr lov jêv, iz cxiê jêx jok Hmôngz tsênhv sik tưr tuôr nduôr sêz tos tưs tuôr nduôr lưx đuô, tuôr tâu sêi đuô…No cux zos iz kror chiê tuôr tsês chiê thiêz hêik tơưv pêz tsôngv box Hmôngz li têx cêr nênhx vênhx huôv jông trâu tsôngv kruô sơưr đơưk đros pâuz, đros pov./.

(Lik Thox cxiv sâu-cxêik nhênhv)