Blôngx kok ntông uô kâuz, tsôngv box mênhx cxưx Cho li iz zav nox kaz

   Thâuv têx tsoz kok ntông qir tuôx câuk, hlar blôngx mos, siêz muôx nhos iz yiv, cux zos ntu pox nhuôs mênhx cxưx Cho nhoz Yên Bái muk đê blôngx kok ntông lok uô kâuz, viv no zos ntu njik blôngx mos thiêz kaz tiv zix. Tsôngv box Cho nhoz Yên Bái tsuôk zôngv iz zav kok ntông chiê đê blôngx uô kâuz, co zos kok ntông blôngx liêz nôngz tiv phaz, tsi zôngv blôngx kok ntông njuôz thiêz tsik zôngv zav nôngz kok ntông têz qơưk muôz, viv oz zav kok ntông hêik no muôx tưx.

          Txơưv zos zav nox zôngx ziv uô, taz sik chiê uô cov tâu jâuz blôngx kok ntông kâuz kaz tiv zix mak hâux lưv uô tsuv lok six tsưv ziv. Fênhx yax pox nhuôs tsuôk đê njik thiêz 1-2 blôngx mos sâuv tsoz kok ntông, tsi zuôr blôngx lâuk viv thâuv uô kâuz nox tsi kaz. Njik blôngx kok ntông thâuv đê lok chox muk tsâus đêx cov hur, đhâu co chox muk cxôngr, tso trâu hâur luz fiêz, trâu mê njik njêr chiê jơưk. Thâuv jơưk tsi cxoz sir jos jơưk, jơưk njêr tas, muôz juôx tso tas chor cuô mis thiêz puôz uô yênhx luz, bax iz luz huz, luz teik chiê tsâu. Lơưr niêv lâuk Bàn Thị Đức, nhoz jos Khe Ván, xã Quang Minh, huyện Văn Yên, tỉnh Yên Bái: Viv blôngx kok ntông muôx ntâu cuô mis, nox muôx njik iêz, viv li tsuv jơưk njêr chiê uô kâuz thiêx li đax thiêz kaz jông:

          “ Xar cov uô tâu jâuz blôngx kok ntông kâuz đax thiêz kaz mak tsuv jơưk njêr, tso cov tas chor cuô iêz, uô li ntơưv jâuz kok ntông kâuz cê đax thiêz kaz thâuv uô nox. Zav nox no thâuv uô kâuz zos ziv đax mak ziv kaz”.

          Vâuv kâuz zos ntu coaz tsôngv tiv zix cuiz tênhv jâuz kaz  thiêz tsi kaz. Tsuv zôngv đêx râuz bâu tsês cov txiês muôx nhos 30 tưv, tsi zôngv đêx txiês chiê uô kâuz viv zôngx ziv uô jâuz trâus lưx thiêz tsi đax, đhâu co tso cxaz mê njik njêr đo đros chor đêx co. Muôz blôngx kok ntông tưz tso tas cuô mis tso hâur huz lok sik teik, niêk cov chênhr mav li lâuz chor cuô njêr tso hâur huz cov pur nto chor jâuz, muôz iz luz fax tso trâu saz sâuv chor jâuz cov hniês chor jâuz trâu hâur đêx...Ndâux huz, teik mak zôngv blôngx njê, blôngx tsơưz vor khi. Tâu muôx nhos iz ciêz, thâuv pov jâuz đêx jông, tsư kaz mak txơưv nox tâu.

          Jâuz blôngx kok ntông kâuz lok six kaz thâuv uô đros njês, ciz kê lok sik ciz đros greix nox...Tiv zix jâuz blôngx kok ntông kâuz ciz đros njês tâu pox nhuôs seiz zos iz zav nox kaz nto bê. Chiê uô zav nox no kaz, njês ntês tov đêx lok tsuv uô cov hur, juôx njêr, muôz cxiêz cov đax thiêz tsư kaz, đhâu co muôz tsuôr mos mav chox muk ciz đros jâuz blôngx kok ntông kâuz. Niêv lâuk Lý Thị Đức, jos Sâm Trân, xã Trung Tâm, huyện Lục Yên, tỉnh Yên Bái pheiz kênh:

          “Chiê jâuz blôngx kok ntông kâuz ciz đros njês uô tâu kaz đuô, njês thâuv cxiêz đax tsuv tsuôr mos thâuv ciz thiêx li kaz thiêz tsi tsư nhôngs. Greix njês tsuôr ciz cov tsư kaz mav muôz jâuz kok ntông kâuz tso shơư thiêz ciz cxaz 8-10 phênhz txơưv tâu. Tso mê njik njêr, mix chênhr cov huv đros. Jâuz kok ntông kâuz uô đros njês zos kaz tiv zix”.

          Têx zav nox tâu uô txix jâuz blôngx kok ntông kâuz nox đros mor blâuv mak lok six huv, lênhx tưs tưz tâu nox mak zuôr ndo njôngr thiêz ziv nox ziv pov lok six kaz. Niêv lâuk Nguyễn Phương Linh, phường Hồng Hà, Thành phố Yên Bái heik:

          “Jiês tưs muk uô tox siêz uô côngz xưv cur cux puôr lênhx gra jâuz blôngx kok ntông kâuz lok nox. No tsênhz tsênhz zos zav nox kaz, thâuv uô đros njês mak tsi pov njês tsư nhôngs lơưv thiêz. Nox mor lok six kaz, cur lok six nhiêv nox”.

          Tuôx txos têx jêx jos tsôngv box mênhx cxưx Cho nhoz tox siêz Yên Bái, tsuv ndo njôngr nox tsôngv box nhoz no li têx zav nox tâu uô cxôngx jâuz blôngx kok ntông kâuz, chiê pâuz txos tsôngv box tox siêz li têx zav nox kaz, nto bê./.

(Thiều Nghiệp- Txâur Vax cxeik nhênhv)

Hêir nênhs Maz nhoz Quỳnh Nhai têx txux chi, khoz ndak shôngz nthuôr uô cêr lov jêv

  Hêir nênhs Maz nhoz Quỳnh Nhai têx txux chi, khoz ndak shôngz nthuôr uô cêr lov jêv cxôngx nzor, têx chuôz zênhx nthuôr uô cêr lov jêv đhiê pax vuôs ntơư, zôngx ziv uô thiêz txơưv pox niêv txir nênhx, lâuk hluôk puôr lênhx pâuz txos zuk hêir nênhs têx txux chi co. Ntơư zos muôz iz zar trax shôngz chox lok uô thiêz thâuv nthuôr uô cêr lov jêv co, tsuv muôz zar trax shôngz co chox lok khoz trâu ntơưv zuk cxêik xiz têk đros trâu suôz trax thiêz suôz đruôk tôngx cxêz tôngx, suôz sênhr cưr cxiêx. Pos Lò Thị Phơưr, zos hêir nênhs Maz nhoz xã Chiềng Ơn, huyện Quỳnh Nhai, tỉnh Sơn La cux hêik pâuz tiêk: Hâur ntu đrav ntêx, hêir nênhs Maz huôv tsar cêr uô nênhx nhoz trơưk têx ntus đêx, khưr uô kôngz lôngk, têx shông muôx ntux nas paz sâu tâu kôngz lông, têx shông tsik muôx ntux nas paz sâu tâu kôngz lôngk tsơưs, luz nênhx txov nhêv njuôr. Chênhr zos li hêik ntơư, hêir nênhs Maz thiêx xar tơưv tsưr ziv muôz shôngz chox lok uô trax ndak shôngz chiê khoz nthuôr uô cêr lov jêv đhiê pax vuôs huv đros hêir nênhs Maz luz nênhx nox nhoz muk lok hâur niêx hnuz.

“Chiê uô cov tâu zav ndak trax shôngz no, Tsuv muk xêir têx shôngz lâuk, tsik khâuk chox lok kra trâu sâuv tsuôr nzêix cov kruôr đax, đhâu co mav muôz chox lok njuôk txiêr tho uô oz luz kror uô ndak trax shôngz, thâuv khoz thiêx đror jông”

Hâur ntu đrav ntêx, hêir nênhs Maz cxuô luz jêx jos, têx tuz nxêik hluôk tsik so muôz têx ndak trax shôngz co chox lok khoz nthuôr uô cêr lov jêv, đhiê pax vuôs. Lar hêik zos hâur têx hmo hli đra, hêir nênhs Maz siz zâuv tuôx uô cê khoz ndak trax shôngz đros trâu suôz sênhr cưr cxiêx, nthuôr uô cêr lov jêv  shir phaz lul. Đhâu ntơư, tưz muôx hôngz lênhx ntâu tus tuz nxêik hluôk yênhx txix gơưv txix, cxiv tsa luz nênhx truôx tuk, tsâu sor. Pos Lò Thị Phơưr hêik pâuz nzir:

“Hâur chêix ntux no, hêir nênhs Maz têx tuz nxêik hluôk khênhr trâur tơưk ntê, cê ntê tơưk cê khoz ndak trax shôngz, nthuôr uô cêr lov jêv, hêik cưr cxiêx, đhiê pax vuôs; tas ntơư cux tsênhv muôz chơưr xơưk chox tuôx hâuk uô si lov jêv”

Hâur ntu têz qơưs hlôngr yiêz nhiv no, txos trâu têx hnuz jêx jos tsưr tsix nox yôngz cok, hêir nênhs Maz nhoz huyện Quỳnh Nhai tsênhv cux tsênhv muôz têx ndak shôngz co chox lok khoz nthuôr uô cêr lov jêv, đhiê pax vuôs. Pos Điêu Thị Nhất, tsar phôngx vênhx huôv thôngz mông huyện Quỳnh Nhai, tỉnh Sơn La hêik pâuz:

“Hêir nênhs Maz têx txux chi, vênhx huôv jông cux muôx đhiê pax vuôs Tăng bu, đhiê pax vuôs khoz ndak shôngz. Hur tiz si cxuô hêir nênhs sđ têx txux chi, vênhx huôv jông cxôngx nzor tsuv tuôr cov tâu truôx muôx đros đrêiv hâur hêir nênhs co li luz nênhx tsik chiê pôngz plox”

Tsênhz tiês, đhâu ntâu tiêv lok txos trâu nhiv no, hêir nênhs Maz nhoz Quỳnh Nhai, tỉnh Sơn La cux tsênhv tuôr tâu truôx zuk hêir nênhs têx txux chi, vênhx huôv jông cxôngx nzor muôx đros đrêiv hâur têx hnuz kriz nthuôr uô cêr lov jêv hâur côngv thôngx tsik chiê pôngz plox./.

                                                       Tsu cxêik nhênhv-Đức Anh