Lào Cai xar tsưr ziv txeik tok têx txir lưv tsiz txix thax tsav muôx moz  đhâu trôngx đriv muôs trâu oz chas têz qơưk

Tiv moz Covid-19 huôv xênhz phiv liv nhoz thax tsav chos ntâu lưv tsiz ntơưv Bắc Giang, Hải Dương, Ủy ban tỉnh Lào Cai tưz chox kriê uô luôs hâux lưv phax tir thêir caz moz gênhk thiêz uô truôx luôs hâux lưv zuôr muôs têx zav huv, txir ntông.

Iz chas co, hur tiz si têx yêz thâux txir lưv tsiz nhôngk txix chor tỉnh tiêx đras uô ntêx thâuv zuôr tuôx txos trâu Lào Cai tsuv muk đhâu iz kro qơư ntơưv qơư qênhz yuôx shuôs moz cêik cêr 237 sâuv txox cêr muk chênhr Nội Bài-Lào Cai chiê seiz njuôk shuôs caz moz SARS-CoV-2 lênhx tsar yêz thiêz tus nênhs đros cheix sâuv luz yêz thâux chor txir ntông co.

Iz chas ntơư, hur si chor nênhs sâuv luz yêz thâux têx txir lưv tsiz tsuv muôx cxix têx ntâuz ntơưr côngk nhav seiz njuôk shuôs moz tsi trâul moz SARS-CoV-2 uô ntêx thâuv zuôr tuôx hâur thax tsav txix 3-5 hnuz.

Zos tsi muôx têx ntâuz ntơưr heik sâuv, tsuv hlôngr đuô nênhs tsar yêz txix têx lênhx tsar yêz Lào Cai; hok lênhx tsar luz yêz co thiêz lênhx nênhs xuz thơưx đros cheix sâuv luz yêz zuôr tâu muk trâu qơư kuôk cêv ntơưv kror qơư qênhz njuôk shuôs yêz thiêz lênhx nênhs muk lol đhâu cêik cêr 237 nhoz tok thâuv tưs luz yêz ntơư tưz muk nquôr tas têx huv tror kaz lok.

Txơưv tưz muôx txâuk têx ntâuz ntơưr uz no muk hâur thax tsav trâu trôngx đriv, lênhx tsar yêz thiêz tus nênhs đros cheix sâuv yêz puôr lênhx tâu sâu bê, uô ntơưr chiê sox seiz đas jos, têx qơư muk lol đhâu. Chor nênhs no tsuv uô lơưr jông têx cui tinhv lok phax tir thêir moz, đhâu thâuv chor txir lưv tsiz tưz muôs pôngz tas, yêz thiêz lênhx nênhs zuôr tsuv zênhx max tis hlo tror kaz lol.

Trơưk li zơưv Hà Đức Thuận, Phưv Tsar Ban seiz car thax tsav Kinh tế tỉnh Lào Cai, tiv têx meir seiz njuôk shuôs moz sei li heik sâuv tsi zos zuôr 100% njuôk shuôs pâuz tâu mênhx hur si thiêz chor txir lưv tsiz phênhv ntâu zos ntơưv têx thax tsav muôx moz, viv li  cui tinhv lênhx nênhs tsar yêz thiêz tus nênhs đros cheix sâuv yêz muôx nzir ntơưr côngk nhav seiz njuôk shuôs moz SARS-CoV-2 zos zuôr tsuv muôx thiêz trâul txos. Nzir trâu co, thâuv muk txos trôngx đriv, tsuv hlôngr đuô nênhs tsar yêz, tso lênhx tsar yêz thâux chor txir ntơư tuôx nưk nhoz nưk iz kro uô ntêx thâuv yêz hax huv zuôr muk đhâu ntus đriv, taz por truôx tuk jông chiê uô tâu 2 luôs hâux lưv cê phax tir thêir moz, cê muôs tâu têx hax huv trâu luôs 2 chas têz qơưk, thax tsav đrâuv:“Pêz tsi so hux jos đros Ban seiz car Trôngx đriv Hà Khẩu (Trung Quốc) chiê phênhz cêr, tso têx yêz muk lol đhâu. Cux jông iz zav li cxiê shông, thâuv tưs tưz muôz jông six hơưv chiê têx txir lưv tsiz muôs tâu trâu luôs 2 chas têz qơưk đhâu trôngx đriv no; tsênhv tsênhz, phênhz têx yêz thâux txir lưv tsiz nưk muôx nưk cêr muk, tsov cưv têx yêz muk đhâu trôngx đriv trâu zar tas cik hâur hnuz; đhâu thâuv chor yêz txir lưv tsiz tưz muk đhâu tas, mav li tso lưv luz yêz thâux têx hax huv txơưr muk”.

Đros trâu Ban seiz car, chor tuz lênhv pênhz phax, Hải quan, têx lênhx nênhs uô hâux lưv seiz njuôk shuôs moz….ntơưv trôngx đriv cux muôz jông six hơưv trâu têx txir lưv tsiz muôs tâu đhâu trâu luôs 2 chas thax tsav; kriê doanh nghiệp đas cir, uô têx ntâuz ntơưr txix hnuz uô ntêx chiê tas cik hnuz tov kaz đhâu hlo thâuv krêz trôngx đriv tưz muôx ntâuz ntơưr thor muk lol đhâu; taz por tsi pôngz ntâu six hơưv, hnuz nhôngs nhoz tok, chor txir lưv tsiz lok cux muôs muk tâu đhâu sei, tsi trâul tuôs njưk. Zơưv Nguyễn Thế Hùng, Phưv Chi cục Hải quan Trôngx đriv tỉnh Lào Cai heik pâuz: “Pêz cux tưz hux jos jông đros chor lưv lươngv seiz car ntơưv trôngx chiê uô têx ntâuz ntơưr, qênhz njuôk shuôs caz moz uz no….cov têx hax huv kôngz nuv heik cxuô, txir lưv tsiz heik taz zênhx max muk đhâu, muôs trâu luôs 2 chas têz qơưk đrâuv; iz chas ntơư taz por phax tir thêir caz moz. Chox kriê cxuô lênhx sđ uô hâux lưv ntơưv trôngx đriv no tso lênhx nênhs nhoz trơưr ntơưv qơư chiê kriê, paz max doanh nghiệp uô têx ntâuz ntơưr uz no thâux xa hax huv muk lol đhâu, lar heik zos têx txir lưv tsiz”.

Txix hnuz xiêz 08/5 txos nhiv no, xav kror đruôz đraz iz hnuz muôx nhos 15-20 luz yêz lox thâux têx txir lưv tsiz txix Bắc Giang, Hải Dương tuôx Lào Cai đhâu trôngx đriv muôs trâu luôs 2 chas thax tsav, têz qơưk đrâuv. Xav txos iz jiês no tưz muôx nhos 4.500 tênhr txir lưv tsiz muôs trâu luôs 2 chas têz qơưk đhâu ntus đriv, tsiv grê 60 ntâu tyv đeiv./.

                                         (An Kiên-Riê Lâux cxeik, nhênhv)