Yên Bái: Qox muk lok paz hlôngr yiêz luz nênhx trâu tox siêz

Jok Đồng Song, xar Kiên Thành, huyện Trấn Yên zênhx trâus cêv kuôk tiv iz tuk đêx lox. Chiê hla đhâu đêx, tiv zix zos chêix ntux nas chuô, pêx xênhv tưz sik côngv hnuz côngz, chuôz lov chiê lav uô iz tuk qox shôngz. Tsik muôx qox khor truôx, chor chuôz zis hâur jok njiz ntâu phiv liv thâuv muk lok đhâu thiêz huôv tsar kinh têr. Tiv zix zos têx hax huv uô tâu cux lax muôs tâu, trâus nhov gri tiv nênhs uô lax luôv cux lax tuôx sâu zuôr. Đhâu 1 shông ntâu kriz uô, nhiv no iz tuk qox bê tông, kuôr hlâu đar 3 thiêr 5, đros tsiv gri xar muôx 8,6 tiv đêiv tưz tâu uô tiêr thiêz muôz lok sir zôngv, tax tâu pêx xênhv li zoz qơưx. Niêv tix Triệu Thị Mão, nhoz jok Đồng Song, xar Kiên Thành, huyện Trấn Yên shir phaz hêik “Muôx tuk qox no mak chêix ntux nas têx mê nhuôs cux tsik tsuv so ntơưr lơưv. Thâux xa hax huv mak zôngx ziv, muk zuôr muôs uz no lok cux zôngx ziv đuô lơưv”.

Tiv muôx tâu thôngx ziv thiêz pêx xênhv tiv phaz sik côngv ar viv li tsuôk đhâu 6 luz hli kriz uô, nhiv kruôr no, tuk qox Làng Lớn hla đhâu đêx Ngòi Bục muk hâur jok Làng Lớn, xar An Thịnh, huyện Văn Yên cux tưz tâu uô tiêr. Tok qox tâu cxiv uô đros nhiêx txiêx muôx 2,2 tiv đêiv ntâu, đros tâu uô txix kuôr hlâu thiêz bê tông, qox ntêr 24 thiêr, đar 3 thiêr, taz por trâu pêx xênhv muk lok tâu zôngx ziv, tiv zix zos chêix ntux nas chuô, đêx Ngòi Bục tsik so huôv lox muk lok tsik tâu đhâu. Pos Nông Thị Nghiệp, Tsar jok Làng Lớn, xar An Thịnh, huyện Văn Yên puz pâuz: “Nhiv no têz qơưk paz uô trâu jok Làng Lớn iz tuk qox, pox nhuôs lok six shir phaz. Chiêx ntux nas chuô lok cux tsik cxơưx txos têx tuz nhuôs muk cơưv ntơưr, pox nhuôs thâux xa, zuôr muôs hax huv lok cux zôngx ziv đuô lơưv”.

Dự án cxiv uô qox muk lok zos Zênhx hangx ntiêx têz paz tâu kriz uô sâuv thax tsav 50 luz tỉnh, hâur co Yên Bái tâu paz pênhr muôx 100 tiv đêiv chiê cxiv uô xar muôx 50 tuk qox. Iz tuk qox tâu uô đar muôx 3 thiêr tror sâur, ntêr txix 20 txos 50 thiêr, đros tsưr ziv uô têx qox zos qox khor, zôngv tâu muôx 50 shông tror sâur. Tsênhv tsênhz, hâur shông 2018, tưz muôx 19 tuk qox tâu yưv pênhr uô, thiêz muôz lok sir zôngv ntơưv têx jêx jok, xar nhoz đêz, tox siêz. Hâur shông 2019, tror kriz uô cxiv tsa yiêz 28 tuk qox. Shông 2020, njuôk xav zuôr uô nzir 9 tuk qox trâu pêx xênhv muk lok. Đros co, txix têx phênhv pênhr yưv uô sik txơưr, txos nhiv no sâuv thax tsav tỉnh Yên Bái tưz muôx 1.000 ntâu côngz trinhx qox cxuô zav tâu cxiv uô, hlôngr trâu têx qox đaz tuôs, lav uô muk lok đhâu đêx. Đhâu co tưz paz uô hlôngr yiêz trâu têx jêx jok. Zơưv Lê Anh Tuấn, Phưv chủ tịch UBND xar Kiên Thành, huyện Trấn Yên puz pâuz: “Hâux lưv yưv pênhr uô têx tuk qox muk lok đhâu chor cưx đêx, cưx ha têx thax tsav txov nhêv li xar Yên Thành zos kror muôx chêx cur siêz, lok six huv đros trâu pêx xênhv nhoz ntơưv têx thax tsav no luz nênhx thiêz muk lok”.

Chor qox no tưz tsik zos paz txuôk đros têx jêx jok nhoz đêz, paz trâu pox nhuôs muk lok tâu zôngx ziv thiêz ngaz tuk, mak đros cxiv uô tâu khor, truôx jông, chor qox no tsênhv paz tsar tov trâu thâux xa, zuôr muôs hax huv, thiêz paz uô hlôngr yiêz đuô trâu têx thax tsav tox siêz, nhoz đêz njiz ntâu cêr txov nhêv./.

(Đinh Tuấn-Lik Thox cxêik nhênhv)