Lai Châu uô jông luôs hâux lưv tir thêir ntux no njiv trâu tsiêx cxu

Jos Phìn Chải, xã Giang Ma, huyện Tam Đường (Lai Châu) nhoz siêz 1.300 thiêr pir li niêv đêx hiêr, thax tsav no chuôs li pok huôz niêz hâur yênhx shông. Hâur têx hnuz đhâu, muôx ntux no njiv txo grêk kik 10 độ C. Chiê tir thêir ntux no njiv trâu tsôngv px sđ têx tsiêx  cxu, cxuô chuôz zis  hâur jos tưz chaz têx nhux tưv nhux đas lok zus trâu saz qơư kik li jos Hon, jos Giang chiê đrêiv ntux no njiv. Đuô li iz cxiê tsiêx cxu, tsôngv px cux chaz chox lok zus cơư trâu têx guôx, muôz ntâuz tax thêir tsik chiê chuô yâu, nhux tưv nhux đas thiêx tsik trâus ntux no njiv uô ruôr hiêv. Tix lâus Cha x Zax, zos iz lênhx px nhoz jos Phìn Chải, xã Giang Ma, huyện Tam Đường hêik: Cur chuôz muôz ntâuz tax thêir thiêx tsik yâu chuô trâu nhux tưv nhux đas thiêz cur cux bax tâu kuôr blêx, jâuz tâux kruôr trâu nhux tưv nhux đas nox hâur têx hnuz ntux no njiv. Đros ntơư, cur chuôz zis cux chos jâuz tâux trâu hâur têx têz thiêz chos trơưk têx njưs liêx. Têx hnuz ntux no njiv hênhr mak cur chuôz ziv cux trâur tơưk trâu nhux tưv nhux đas ntê cov sor.

       Xã Giang Ma muôx 9 jos, hâur ntơư muôx 7 luz jos zos Hmôngz, oz luz jos zos Cho; 100% chuôz zis puôr lênhx khưr uô kôngz lôngk. Nhiv no, xã muôx 800 tus nhux tưv nhux đas, nênhk; hâur ntơư muôx ntâu chuôz zis tu zus uô cê muôx nto yênhx châuv tus. Zơưv Phạm Văn Kiện, Chủ tịch uỷ ban xã Giang Ma hêik pâuz: Sâuv thax tsav xã nhiv kruôr muôx iz jiês ntux no njiv txo grêk 5 đến 6 độ C. Đros ntơư, xã cux fuô yax kriê tsôngv px pâuz lok ntux yar ntux nas txơưr txar, chiê tsôngv px uô jông trơưk cxuô faz tsưr ziv tir thêir no njiv trâu tsiêx cxu,

Pêz tưz choz zok hâux lưv trâu têx cán bộ cxuô luz jêx jos, yax kriê tsôngv px sđ uô jông cxuô faz tsưr ziv tir thêir ntux no njiv trâu tsiêx cxu thiêz yax kriê tsôngv px bax cov txâuk  jâuz tâux, krâur trâu tsiêx cxu nox hâur têx hnuz muôx ntux no njiv.

          Chiê tu tsưx phưv cov tâu 32.000 tus nhux tưv nhux đas, uỷ ban huyện Tam Đường, tỉnh Lai Châu tưz tso tơưv cxuô chỉ thị, ntâuz ntơưr chox car cxuô xã, uô jông trơưk cxuô faz tsưr ziv tir thêir ntux no niv trâu tsoz chos thiêz tsiêx tu zus. Iz Chas yax kriê tsôngv px chaz têx nhux tưv nhux đas sâuv thax tsav tox siêz lok zus trâu saz qơư kik thiêz yax kriê tsôngv px sâu tsês têx kuôr blêx đhâu thâuv sâu tas 4 cxênhz ha blêx liêx thiêz tsuv  uô jông tu 70 ha jâuz tâux, cov muôx txâuk jâuz tâux trâu nhux tưv nhux đas nox hâur ntu muôx ntux no njiv. Zơưv Nguyễn Hồng Quân, tsar phôngx kôngz nuv huyện Tam Đường, tỉnh Lai Châu hêik pâuz:  Thâuv tưs muôx ntux no njiv mak tsôngv px sđ tsuv ndo njôngr chaz têx tsiêx cxu chox lok zus trâu saz qơư kik thiêz kho thêir têx guôx tu zus tsiêx tsik chiê yâu chuô trâu nhux tưv nhux đas.

          Hur si tỉnh Lai Châu nhiv no muôx zuôr xar 120 cxênhz tus nhux tưv nhxx đas, nênhk; hâur ntơư nênhs muôx chôngz đuô zos 92 cxênhz tus.  Trơưk li zơưv Nguyễn Mạnh Thưởng, Phưv Chi cục tsar Chi cục tu zus, Sở kôngz nuv-huôv tsar tox siêz tỉnh Lai Châu: Chênhr zos hâu nov ntơưv qơư uô jông luôs hâux lưv yax kriê tsôngv px cxuô faz tsưr ziv tu zus, tir thêir ntux no njiv trâu tsiêx cxu thiêz bax cov txâuk cxuô zav jâuz tâux trâu nhux tưv nhux đas nox hâur têx hnuz muôx ntux no njiv hênhr, tsik chiê ntux no njiv uô ruôr hiêv txos sđ têx tsiêx cxu. Hâur ntâu shông đhâu cux zos tâu hâu nov ntơưv qơư moz siêz yax kriê tsôngv px lok cxuô faz tsưr ziv tu zus, tir thêir no njiv trâu tsiêx cxu. Thiêz nhiv no muôx zuôr xar 70% chuôz zis cxiv uô tâu guôx tu zus zos đrêiv tsưr ziv kriê; bax tâu 60% jâuz tâux trâu nhux tưv nhux đas nox hâur têx hnuz muôx ntux no njiv hênhr

          Tâu tsôngv px sir tas đas jos tsưr ziv tu zus thiêz tâu hâu nov ntơưv qơư moz siêz paz max txos, txơưv li chas tsôngv px têx tsiêx cxu hâur thax tsav tỉnh Lai Châu cux zuôr tu zus tâu zos đrêiv tsưr ziv kriê, muôx txâuk tsiêx cxu muôs trâu tuz luôv ciêz đrôngl, tsôngv px sđ  muôx phênhv sâu tâu nhiêx txiêx chox lok cxiv kho chuôz zis, muôx luz nênhx truôx tuk tsâu sor./.

Tsu cxêik nhênhv- Khắc Kiên, VOV Tây Bắc

Lênhx pox niêv nênhs Tày huôv tsar cêr uô nox yênhx côngz txix tu zus kơx thiêz kar

          Ndaz ndơưv muôx pas đêx đar, côngv đros tu zus njês muôv muôs uô hax huv, shông 2019 niêv lâuk Vi Thị Đông, Bí thư Chi đoàn jos Vinh 2, xã Võ Lao, huyện Văn Bàn, tỉnh Lào Cai truôx siêz yưv pênhr xor their qơư tu zus kar uô hax huv. Cê tu zus cê cơưv shâuv, niêv lâuk Đông jux jus muôx tâu chênhz zênhv, muôx yênhx tưv, tsưr ziv tu zus, tiv zix zos tsưr ziv phax tar thiêz yưr lir trâus kar trâus moz, paz chuôz cxaz yar lengx, tsơưr lươngv kar. Niêv lâuk Đông pheiz kênh:"Tu zus kar cur pov muôx chêx cuk đuô tu zus njês, trâus moz cux zôngx ziv pov tâu. Kar khênhr nox têx zav nox ntaz sâuv đêx, viv li khênhr trâus moz lok cêr nox hâuk. Têx hnuz ntux lok nas, tiv đêx nas muôx acid, viv li thâuv puz kar nox tsi tsưv ziv mak zôngx ziv uô kar trâus moz".

          Tsi taz li ntơư, shông 2020, niêv lâuk Đông tror krêz đar qơư tu zus chiê zus kơx. Tsưr ziv tsoz phưz cux zôngx ziv, kơx li zav nox muôx ntâu zav, zôngx ziv nriêr tâu li txir ntông, kok, đrox…viv li nhiv kruôr tu zus tưz tso lok chêx cuk jông: "Kơx nhoz hâur kaz pas đêx viv li zus tsi pôngz nhiêx txiêx uô qơư their nzôngr nzông, tsuôk tso bèo trâu sâuv đêx, kơx nhoz co txơưv huôv tsar, muôs tâu grê siêz, thâuv txos six hơưv muôs tsi zuôr nriêr niêv ciêz mak chiv chir muôx tuz luôv tuôx zuôr"

          Zos lơưr tsưr ziv siz lơưr liês, iz fâuv niêv lâuk Đông zus 7-10 cxênhz tul kar thiêz 3 vav tul kơx, đhâu 3 txos 3 luz hlik ntâu txơưv muôs tâu. Viv pênhr yưv uô qir thơưx tsi ntâu, viv li xav txix phênhv sâu muôs kơx thiêz kar, niêv lâuk chuôzz is shông liv tâu 100 tsov đeiv ntâu thâuv tưz xav tas nhiêx txiêx yưv. Zos bí thư Chi đoàn, niêv lâuk Đông cux chuv tôngv pheiz kênh chênhz zênhv trâu têx đoàn viên hluôk nênhs txơưr nhoz tivphaz chiê sik đros huôv tsar cêr uô nox. Heik lok niêv lâuk Đông, tix lâuk Lương Viết Ngân, Bí thư đoàn xã Võ Lao, huyện Văn Bàn puz pâuz: "Zos Bí thư chi đoàn uô ntêx nyuok hâur huôx tôngv txưv zênhv viv côngv thôngx. Hâur hâux lưv paz đoàn viên hla đhau cêr pluôk, đồng chí cux tưz phuôx huiz jông pưs txux vênhv tôngv thiêz yax mông chiê đoàn viên huôv tsar cêr uô nox uô hâuk".

          Truôx siêz hlôngr yiêz, tsi so sir jos chiê tax tâu têx yênhx côngz jông, lênhx pox niêv Vi Thị Đông tsiv nhos zos đeiv iêr chi cax luk hâur hluôk nênhs mênhx cxưx tsơưs nênhs nhoz tox siêz txơưx huôv tsar cêr uô nox nhoz Lào Cai./.

An Kiên, Vân Anh-Txâur Vax cxeik nhênhv