Tror chos tsoz chos zax zênhz-Cux tsênhv yuôr ntâu cêr cxơưx

Thâuv ntêx tsi tâu uô lơưr BCH T.Ư Đảng chỉ thị 06/CT/TƯ, 2 huyện tox siêz Trạm Tấu thiêz Mù Cang Chải tâu seiz zos thax tsav qơư chos ntâu tsoz chos zax zênhz hâur tỉnh Yên Bái. Têx tsi jông uô muôx đros zos lok six ntâu lênhx nênhs trâul muôx zênhk zax zênhz, chuôz zis trâul puôk tsuôx tas, luz nênhx tsi truôx njês. Taz sik txix thâuv muôx Đảng, Chính phủ Chỉ thị 06/CT/TƯ thiêz têx Chỉ thị, Quyết tinhv, txos nhiv no phênhv ntâu sđ tưz tsi  chos têx zênhz ntơư lơưv. Zơưv Tôngx Xênhv Shôngx, nhoz jok Hồ Nhì Pá, xã Lao Chải, huyện Mù Cang Chải heik pâuz, tsôngv px hâur jok lênhx tưs cux shir phaz, jông siêz đros Đảng thiêz têz qơưk tsưr ziv tso tsês tsik uô tsik tsêz chos têx tsoz zênhz, viv txix thâuv ntêx txos nhiv no tsi pov lênhx tưs uô zênhz zuôr bluô nux tâuk, mak tsuôl pov ntâu lênhx chôngz tus trâul muôx zênhk zax zênhz thiêz luz nênhx pluôs, txov nhêv xưz:

“Trơưk li têz qơưk têx tsưr ziv lok hâur jok niêx luz hlik lol sik hâur shôngk shông cux muôx yax kriê, heik tsôngv px sđ tsi cxoz tror chos tsoz zênhz. Tâu Đảng, têz qơưk moz siêz txos, viv li px luz nênhx cux hlôngr yiêz jux juk thiêz tsi chos, tsi tror uô têx tsoz zênhz. Jok cux cxiv uô têx cui tinhv thiêz phênhv ntâu tsôngv px sđ cux pâuz ntâu lok têx li heik sâuv”.

Zơưv Por Xênhv Zax nhoz jok Tà Gênh, xã Xà Hồ, huyện Trạm Tấu cux heik, nhiv no hâur jok tưz tsi muôx lênhx tưs chos têx tsoz zênhz lơưv, no cux zos khov têx lênhx uô hâux lưv txiv ngaz px, ban côngz xưv mặt trận thiêz công an xã tsi so muk yax kriê, heik thiêz phênhz trâu px pâuz tsênhz lok zav tsoz chos no li têx tsi jông.

“Chor uô hâux lưv txiv ngaz muk yax kriê, heik px, uô têz zênhz lok px cux tsi uô, muôs zax zênhz cux tsi đros luôs cor luôs muôs tưz uô trơưk têx hloz fuô kriê. Nhiv no, px tsuôk uô liêx têz chos kôngz, tu zus tsiêx cxu xưz. Thiêz sđ cux uô lơưr jông têx chei kriê, thâuv ntêx mak mul uô têz chos zênhz, nhiv no cux tsi muk, sir jos, trâu siêz njo khưr huôv tsar uô nox uô hnar xưz”.

Tsênhv tsênhz, hâux lưv txưr tsêz chos zax zênhz cux li cui tinhv phênhv xưv bluô trâu chor nênhs tsêz chos tsoz zênhz tưz tâu fuô uô, yax kriê txos phênhv ntâu cxuô thax tsav qơư tưz muôx jiês chos, uô têx zênhz li: Điện biên, Sơn La, Lai Châu, Yên Bái, Nghệ An, Thanh Hóa, Lào Cai, Đắc Lắc, Kon Tum.... Thiêz lok six ntâu jok tưz uô jông trơưk têx chei kriê, tsi tror chos tsoz zênhz iz zav li: jJok Hồ Nhì Pá (xã Lao Chải, huyện Mù Cang Chải), jok Tà Gênh (xã Xà Hồ, huyện Trạm tấu) mak zơưv Tôngx Xênhv Shôngx thiêz zơưv Por Xênhv Zax gơưk nhiv kruôr heik. Taz sik iz chas ntơư, nhoz iz cxiê jok txơưr đuô, viv tsênhv muôx ntâu lênhx zôngv txos têx zax zênhz (phênhv ntâu zos chor nênhs lâuk, lâuk nênhs trâul muôx zênhk zax zênhz ntêr shông ntơư) viv li ntâu chuôz zis cux tsênhv nhiês chos iz kro mê njik hâur têx liêx têz nhoz đêz, tsi yuô muôx lênhx nênhs tưs muk txos. Iz zav li hâur ntu 2018-2019, tas nro têz qơưk qênhz pov thiêz ro por tsês tâu 28 cxênhz ntâu xưv phaz liêx têz chos têx tsoz zênhz. Chor têz px lơưr tror uô zênhz phênhv ntâu nhoz têx tỉnh li: Lai Châu (zuôr xar 7 cxênhz xưv phaz), Điện Biên (zuôr xar 200 xưv phaz), Sơn La (20 cxênhz xưv phaz), Cao Bằng (iz cxênhz ntâu xưv phaz), Lào Cai (ro por tsês 1.100 tsoz zênhz). Đại tá Vũ Xuân Việt, Tsar phongx cảnh sát qênhz yuôx têx nênhs uô cxâuv lok zax zênhz, Công an tỉnh Lai Châu heik pâuz:

“Pir li six hơưv thâuv nhiv kruôr fuô uô tsưr ziv li heik sâuv mak phênhv ntâu têx liêx têz chos tsoz zênhz tâu ro por tsês tas. Công an tỉnh tưz fuô luôs hâux lưv tso nzir têx canr bôv chiến sỹ muk trâu yênhx suôv qơư, thax tsav chiê qênhz shuôs, ro por tsês têx tsoz zênhz hâur thax tsav đêz đrôngs nhoz Tà Tổng, Mường Tè thiêz iz cxiê jok tox siêz hâur têx huyện txơưr đuô”.

Txơưv tiêk têx têz tror chos tsoz zênhz tưz txo grêk tsơưs ntâu, taz sik tsi tâu tâu truôx. Ntơưv iz cxiê thax tsav qơư, qênhx shênhx chos têx tsoz chos muôx tsơưr zax zênhz cux tsênhv muôx yưv phiv liv thiêz luôs nhiês uô, nhiês chos iz kro mê njik trâu têx qơư nhoz đêz jêx jok, hâur xuz jôngr xưz. Chiê tsi tror uô, tror chos tsoz zênhz, cxuô thax tsav qơư tsuv tror sir jos uô luôs hâux lưv chox kriê tsôngv px, hlôngr yiêz zuz nôngz tsoz chos, uô trơưk têx tsưr ziv yiêz hâur huôv tsar uô nox uô hnar, tu zus tsiêx cxu; cxơưz tiês hâux lưv chiv zênhk zax zênhz, muôz hâux lưv uô thiêz seiz car đhâu chiv zênhk zax zênhz. Iz chas ntơư, sir jos yax kriê, heik px sđ uô lơưr chei têz qơưk, xưv bluô hành chính; sir jos yax kriê, heik px lok sâuv hâux lưv phax tar zax zênhz, tso tsês tsi tsêz chos têx tsoz zênhz; xưv bluô ntov jông têx lênhx cxoz txưv tror chos tsoz zênhz; sir jos seiz kaz nhoz têx jêx jok khênhr muôx têx li tror uô zênhz, chos zênhz, lar heik zos têx thax tsav nhoz đêz đrôngs, ntus đriv...../.

(Giàng Seo Pùa-Riê Lâux cxeik, nhênhv)