Nênhs Cho nhoz Sơn La chei tik bê trâu mê nhuôv thâuv nhiv kruôr xênhz zus tâu lok

Trơưk li nênhs Cho nhoz xã Cân Hồ, tỉnh Sơn La, chei tik bê trâu lênhx mê nhuôv thâuv nhiv kruôr xênhz zus lok, tâu chuôz zis uô thâuv lênhx nhuôs co nhiv kruôr xênhz zus tâu muôx 3 hnuz ntơư. Tsôngv box lơưr xar tiêk, thâuv tsi tâu tik bê mak lênhx nhuôv co tsi tâu muôx bê trâu luôs hu, tsi tâu tâu pos zơưs, têx lâuk tâu tas siv nênhx por hưv, côngk nhav zos zuk xênhz lênhx xênhz nzưr. Pos Triệu Thị mụi, nhoz jok Sao Đỏ 2, xã Vân Hồ, huyện Vân Hồ, tỉnh Sơn La heik: “Nênhs Cho chei tik bê trâu lênhx mê nhuôv yiêz thâuv nhiv kruôr xênhz zus lok, tâu lơưr lok six seiz hloz. Iz lênhx mê nhuôv mok nhiv kruôr xênhz zus tâu lol mak tsi tâu pox côngz zơưv côngz, pos zơưs, chor lâuk seiz zos lênhx nênhs hâur chuôz zis zos lênhx nhuôv tsi tâu tâu tik bê, tsi tâu muôx bê trâu luôs hu, iz zav li tsi tâu muôx cêr trâu luôs tâus. Đhâu tik bê tas lênhx nhuôv zuôr tâu pos zơưs, chor lâuk por hưv thiêz qir tâu zos iz lênhx nênhs yiêz hâur chuôz zis”.

Trôngx jâuz mor uô tik lênhx nhuôv mok ntơư bê thâuv tưs tưz zuôr tsuv muôx 4 ntiv mor, 4 ntiv cuô chơưr blâuv, iz huz chơưr, keiz hâu thiêz iz tus buô tưz tâu tuô tsênhr hur si tso trâu sâuv trôngx txi hu pos zơưs. Uô ntêx thâuv zuôr txi hu, heik chor lâuk pâuz tiêk, chuôz zis muôx iz lênhx nhuôv yiêz ntơư, mak lênhx txir nênhz khoz đruôl, khoz 3 tês hu pos zơưs, pox côngz zơưv côngz lok đros chuôz zis nox hâuk, đros pov, đros por hưv por zơưv trâu lênhx nhuôv ntơư cov hloz lox, tsi trâul muôx moz gênhs. Zơưv Triệu Văn Toàn, nhoz jok Hang Chồng, xã Vân Hồ, huyện Vân Hồ, tỉnh Sơn La heik pâuz lok tsênhv njiêz hu plis, tik bê trâu lênhx mê nhuôv yiêz li no: “Hnuz no zos jax hnuz, tsor hmo; hnuz đơưz hnuz hur, hmo đơưz hmo tok, đaz đrâuv trôngx đrâuv nja lok cur tsi hu, đaz xênhz têz xênhz qơư, đaz ntus jêx ntus jok lol tsi hu, đaz tuôs baz tuôs chês, đaz tuôs yeiz tuôs nrkik lol tsi hu, tuk nhuôv no luz bê hu li no, hnuz no zos jax luôr hnuz, hmo no zos jax tsor hmo zuôr hu lênhx nhuôv co lok tâu niêv tâu txir, tâu txax tâu qơư, tâu vax tâu tsêr, tsi cxoz kuôx, cxoz qiv lok nhoz uô txưx jâuv uô luôs lâuk, cxênhz shông tsi muôx moz tsi muôx gênhs”.

Đhâu thâuv lênhx txir nênhz khoz đruôl hu plis tas, lênhx nhuôv zuôr tâu tik bê, muôx bê hu. Thâuv tus nhuôv ntơư tưz qir tâu muôx bê hu thiêz tâu pos zơưs lênhk txeil zos zuk xênhz lênhx xênhz nzưr, mak cux zos trâu thâuv lênhx txir nênhz tiv 2 qir uô ntơưr sâu lênhx mê nhuôv bê, xênhv, hnuz nhôngs xênhz zus trâu hâur chuôz zis chiê muôx bê muôx xênhv cxix cxuô xưk iz zav li chor nênhs hâur tsêr. Đhâu ntơư lênhx pos puôs tus mê nhuôv muk trâu saz đrâuv jôngr đros thiêz tsưr ziv, siêz xar zos heik trâu pox sâuz zơưv sâuz pâuz, lênhx nhuôv no tưz qir lok zos iz lênhx nênhs hâur ntiêx têz, đros luôs muôx bê, muôx xênhv hu cxix cxuô, zơưv sâuz pox sâuz đros paz por hưv trâu lênhx nhuôs hloz lox jông, nox nhoz luôs nxi, tsi muôx moz gênhs. Niêv lâuk Bàn Thị Thanh, nhoz jok Suối Khem, xã Phiêng Luông, huyện Mộc Châu, tỉnh Sơn La heik: “Hnuz no cur lok six jông siêz viv tâu niêv pos thiêz txir zơưs gơưk hu plis, tik bê trâu lênhx nhuôv. Nhiv no mê nhuôv tưz qir muôx bê hu, muôx xênhv lơưv, tâu zos iz lênhx nênhs yiêz hâur chuôz zis, thor cov pox côngz zơưv côngz, pos zơưs paz por hưv trâu lênhx nhuôv hloz lox đhiê rênhk, tsi muôx moz gênhs”.

Nênhs Cho nhoz Sơn La chei tik bê trâu mê nhuôv thâuv nhiv kruôr xênhz zus tâu lok ntơư tưz muôx thâuv nzor nzor lok. Muôx liv lok six jông, heik thiêz kriê trâu têx tuz nhuôs tsuv ciêz thiêz mnôngs pos zơưs, niêv txir, têx lâuk lul, tâu pox côngz zơưv côngz, pos zơưs por hưv thâuv tâu zos iz lênhx nênhs hâur chuôz zis. Muôx têx chênhr zos li heik co, mak txux chi cêr chei vênhx huôv no cux tâu tsôngv box tuôr tsês, por hưv chiê txix tiêv no đhâu tiêv tov, iz cxênhx đhâu iz cxênhx tsi chiê pôngz plox./.

                         (Thiều Nghiệp-Riê Lâux cxeik, nhênhv)