Ndo txos hli 5 sâuv thax tsav qơư lịch sử Điện Biên Phủ

Nghĩa trang Liệt sĩ Têz qơưk A1 ntơưv thành phố Điện Biên Phủ zos qơư tuôx txos xuz thơưx ciês thâuv cxuô lênhx nênhs tuôx ndis shuôk txos trâu ntơưv Điện Biên. Ntơưv no muôx txos 644 luz nza liệt sĩ, taz sik muôx tsik ntâu chor nza tâu sâu tsênhz mênhx bê, hnuz nhôngs xênhz zus, xor mông lok qơư nhoz, hnuz trâus tuôs, taz viv muk uô tuz lênhv…Đros yar ntux cuz sor hâur têx hnuz hli 5 muôx chor chuô sor saz têz qơưk Lào yuôz lok xưk li uô trâu cxuô kror ntơưv thax tsav vuôk har Điện Biên no kruôr đuô, cxuô lênhx nênhs tuôx ntơưv no mak muôx đros ntâu kror siêz xar. Tix lâus Bùi Văn Uẩn, nhoz xar Phú Cường, huyện Tân Lạc, tỉnh Hòa Bình, jiês xuz thơưx ciês tuôx trâu thax tsav ar Điện Biên no puz pâuz: “Cur cux sêiz lok six ntâu ntâuz ntơưr lơưv taz sik tsik tâu muôx jiês tưs tuôx txos trâu Điện Biên hlo. Tuôx txos ntơưv no mak cur thiêx pov pâuz tâu têx phiv liv, cêr txov hâur ntu ntâuk tros châuz, têx cêr pôngz siêz trâus tuôs thâuv co chiê muôx tâu luz nênhx xưk li nhiv no. Cur xar lok six ntâu kror thiêz uô tsâus lok six ntâu txos chor nênhs tưz trâus tuôs chiê pêz muôx tâu luz nênhx xưk li nhiv no”.

Tỉnh Điện Biên muôx 8 luz nghĩa trang liệt sĩ trâus tuôs hâur cxuô ntu ntâuk tros châuz đros tas nro muôx 6.600 ntâu luz nza, hâur co muôx nhos 5.280 luz nza mak pâuz tsik tsênhz nênhs trâus tuôs zos lênhx tưs. Lơưr Ban chox kriê 515 tỉnh Điện Biên, tas nro chor liệt sĩ trâus tuôs, phâuk uô nza muôx sâuv thax tsav zos 17.400 ntâu lênhx liệt sĩ, taz sik chor liêtk sĩ tsênhv nriêr tsik tâu pov sâuv thax tsav muôx txos 96% ntâu. No têx jâuv cux zos iz kror cxuô lênhx nênhs xar njôngr txos thiêz pôngz siêz thâuv tuôx txos trâu Điện Biên.

Đại tá Vũ Thanh Thảo, Hôiv bôv đôiv lâul thành phố Hà Nội hêik pâuz: đhâu 4 jiês tuôx trâu Điện Biên, tưz tsik zos zơưv xưz mak cxuô lênhx nênhs puôr lênhx xar txos thiêz pôngz siêz ntâu thâuv hlơưr shaz trâu chor nênhs tưz trâus tuôs co li têx nza taz sik txos nhiv no lok cux pâuz tsik tsênhz zos lênhx tưs. Têx co cux zos iz kror paz trâu sơưr đơưk sir jos uô nênhx nhoz cov jông đuô, sir jos đuô hâur côngz xưv cxiv tsa têz qơưk ntu tov ntêx no. “Pêz lok six uô tsâus ntâu txos chor nênhs tưz trâus tuôs viv mênhx cxưx chiê pêz têz qơưk hnuz no tâu tiêx tuk, muôx tâu luz nênhx jông, shir phaz thiêz huôv tsar. Pêz cux xar tiêk nriêr cov pâuz tsênhz bê, xor mông trâu chor liệt sĩ cux tsênhv yuôr ntâu kror phiv phiv, viv li vav tiêk chor cơ quan muôx vax huôv zuôr sir jos nriêr pâuz têx xor mông, zôngv têx chuôz zênhx, côngv nghệ yiêz tiv zix chiê nriêr pâuz cov tsênhz lok têx lênhx liệt sĩ trâu tuôs co zos lênhx tưs”.

Têx hnuz hâur hli 5 lịch sử no, têx nganhx muôx vax huôv tỉnh Điện Biên cux tsênhv sir jos uô cov tiêr đêiv đuôz Panorama tror piêr pâuz txos tas nro côngz xưv ntâuk châuv tros châuz Điện Biên Phủ xưk li iz kror xar txos thiêz ndo njôngr txos chor zênhz shôngx liệt sĩ ndax ciês trâu hnuz chiv nhênhv 67 shông ntâuk zênhx Điện Biên Phủ. No tâu sêiz zos iz côngz trinhx nghệ thuật lox tas nro têz qơưk muôx tsiv gri tuôr chiê lịch sử, hêik tơưv tsênhz mênhx txos ntu ntâuk tros châuz ntơưv thax tsav qơư no, uô muôx tâu zênhx liv lox nto bê sâuv ntiêx têz.

Lênhx nênhs điêu khắc Lưu Danh Thanh, Kuz chủ tịch Hôiv đồng nghệ thuật uô hâux lưv điêu khắc, Hôiv Mỹ thuật Việt Nam puz pâuz: Đêiv đuôz no tưz paz hêik tơưv tâu cxuô lênhx nênhx Việt Nam li jiês ntâuk châuv tros châuz lox no, hêik tơưv tâu quân đôiv li kror huôv tsar chiê ntâuk zênhx tâu tros châu ntơưv Điện Biên Phủ: “Cur lok six shir phaz, tas nro têx đuôz tưz hêik tơưv tâu cxuô kror muôx thâuv têx shông 1954 chiê paz kruôz kriê trâu cxênhx hluôk  pâuz tiêk jiês ntâuk tros châuz co txov nhêv thiêz phiv liv li chak. Pêz zuôr sêiz pov tâu tas nro luz nênhx nhoz Điện Biên thâuv têx shông 1954, mênhx cxưx li iz jiês sơưr tơưv txênhz, zênhx liv Điện Biên Phủ zos cxuô lênhx nênhs Việt Nam li iz kror zênhx liv lox”.

Đhâu 67 shông zênhx liv, Điện Biên cux tsênhv tuôr tsês chiê jông têx tsiv gri lịch sử, hêik tơưv iz mênhx cxưx li têx kror zênhx liv nto bê lox. Txix cxuô lênhx nênhs Việt Nam li siêz xar ndo txos thiêz têx hâux lưv uô tsênhv tsênhz, zênhx liv lịch sử co, têx kror nto bê co zênhx zuôr nhoz đrêiv tsik ploz ntơưv thax tsav ar lịch sử Điện Biên Phủ./.

(Vũ Lợi-Lik Thox cxêik nhênhv)

Taz por chor teiv plor Côx hôiv zos nênhs mênhx cxưx tsơưs nênhs

          Lơưr Côx hôiv li Hội đồng mênhx cxưx thôngz sâu, chor teiv plor zos nênhs mênhx cxưx tsơưs nênhs cxaz chuôz Côx hôiv chuôz ndê hâur yênhx khóa. Ntâu khóa jê ntơưv no, teiv plor zos nênhs mênhx cxưx tsơưs nênhs tưz tsav cxôngx 15-18% pir đros tas nro chor teiv plor Côx hôiv. Hâur co, Côx hôiv khóa 13 muôx 78 lênhx teiv plor, tsav 15,6% hâur tas nro 500 lênhx teiv plov Côx hôiv. Six cxiv Côx hôiv khóa 14, teiv plor zos nênhs mênhx cxưx tsơưs nênhs zos 86 lênhx tsav 17,3%.

          Hâux lưv tsôngv box têx mênhx cxưx sir jos cxaz chuôz thiêz por xeir tâu têx teiv plor côx hôiv jông, muôx pênhr xưv, moz siêz đros hâux lưv uô, muôx txơưx jênhv tưz gôngr phênhv lox lok hâur Côx hôiv li yênhx côngz, tiv zix zos hâur hâux lưv cxiv tsa thiêz tsưr tsix uô jông Đảng, têz qơưk li têx chính sách mênhx cxưx. No zos têx chính sách zov chênhr chiê cxơưz tiês huôv tsar thiêz muôz siêz tsôngv box thax tsav tox siêz, thax tsav tsôngv box mênhx cxưx tsơưs nênhs li luz nênhx. Viv teiv plor zos nênhs mênhx cxưx tsơưs nênhs zos têx lênhx nênhs pâuz tsênhz têx tsênhv tsi tâu uô tâu, têx phêv liv nhoz zuk tiv phaz thax tsav zuk nhoz uô nênhx cxôngx co muôx têx ziv chênhv tsênhv tsênhz. Hâux lưv no tâu cử tri Phạm Giáo, huyện Đức Phổ, tỉnh Quảng Ngãi heik li no: “Chuôz tsar teiv plor trâu thax tsav txov nhêv, thax tsav tox siêz, thax tsav tsôngv box mênhx cxưx tsơưs nênhs mak zuôr pâuz tsênhz mênhx đuô thax tsav mênhx cxưx tsơưs nênhs khênhr muôx têx phêv liv tưs, tsôngv box li yênhx tưv kis, kinh têr txov nhêv. Viv li, zuôr heik tơưv tâu tsôngv box li têx siêz xar njôngr trâu Côx hôiv chiê muôx têx chính sách đros thax tsav co, taz por muôz siêz luz nênhx thiêz car chêx tâu phênhv tưs lơưr li têx phêv liv”.

          Lênhx tưs cux pâuz tiêk, hâux lưv teiv plor zos nênhs mênhx cxưx tsơưs nênhs cxaz chuôz Côx hôiv li têx chiz coaz thiêz Hội đồng pêx xênhv têx cấp zuôr pâuz tsênhz đuô têx vênhv thix ntơưv tiv phaz, taz sik chiê uô li chas tax tâu 18% lơưr ploz tsênhr Côx hôiv chiz mak no tsênhz tsênhz zos iz hâux lưv lax uô tâu. Viv lơưr trơưk zơưv Quàng Văn Hương, Phưv Chủ tịch Côx hôiv li Hội đồng mênhx cxưx mak qir tiv zos nhoz thax tsav tsôngv box mênhx cxưx tsơưs nênhs thiêz tox siêz zos thax tsav lok six txov nhêv, tsôngv box li yênhx tưv tsi siz bâus, chênhr viv li mak uô zênhr shar ntâu txos chêx cuk por xeir, xeir teiv plor cux phêv liv, lok sik thâuv xeir tâu lơưv mak têx ứng viên ho tsi tuôv zênhv tâu têx ploz tsênhr huv đros: “Ứng viên muôx têx mak tsuv zos nênhs mênhx cxưx, hluôk, tsi nhoz hâur Đảng thiêz zos pox niêv. Tsênhz mênhx iz lênhx nênhs mak tuôv zênhv tsi tâu 4 ploz tsênhr co, lơưr tuôv zênhv tâu zoz qơưx chiê cxaz chuôz, taz sik ho zos phêv liv lox. Nriêr tâu lênhx nênhs li co mak lok six lax”.

          Lơưr pos Cao Thị Xuân, Phưv Chủ tịch Côx hôiv li Hội đồng mênhx cxưx mak iz hâur têx qir tiv txơưr uô muôx tsi txâuk teiv plor zos nênhs mênhx cxưx tsơưs nênhs cxaz chuôz lok têx chiz coaz Côx hôiv thiêz Hội đồng pêx xênhv têx cấp chênhr zos viv iz cxiê tiv phaz, bộ ngành tsi tsov cưv txos hâux lưv njuôs xav lênhx nênhs: “Zos tsi muôx cán bộ cxôngx xã mak zuôr tsi muôx cán bộ huyện, cán bộ huyện mak tsuv njuôs xav lơưr uô cấp phó phòng, tsar phòng thix muôx Giám đốc sở, thiêx muôx tỉnh ủy viên, đhâu co thiêx cxaz chuôz têx chiz coaz siêz đuô, truôx siêz choz jênhv vưv”.

          Li ntơư so pov iz hâux lưv zos viv li chas chor teiv plor zos nênhs mênhx cxưx tsơưs nênhs ho kis đuô pir đros plzo tsênhr tso tơưv, iz phênhv zos tiv yênhx tưv, cêr uô nênhx, têx phêv liv, muôx tsi txâuk pênhr xưv thiêz đros co zos hâux lưv njuôs xav cxôngx cấp cơ sở cux tsi tâu tsov cưv jông... viv li chiê car chêx tâu vênhv thix no mak tsuv muôx têx tsưr ziv uô tsênhz mênhx./.

(VOV4-Txâur Vax cxeik nhênhv)