Tsênhz câuz tôngx- Chuôz zênhx muôx đros đreiv hâur chuôz zis nênhs Thái luz nênhx

          Lơưr nênhs Thái li siêz xar: tsênhz câuz zos chuôz zênhx niêv txir tsês trâu mê nhuôs, taz sik tsuôk txir nênhx thiêx tâu zuôr tsênhz câuz chox lok sir zôngv, pox niêv mak zuôr têx chuôz zênhx txơưr. Pox nhuôs nênhs Thái xar tiêk, tsênhz câuz tôngx muôx pos zơưs li njux plis, viv li tsi khênhr puz luôk têx kir, phênhv ntâu zos tsês chiê zôngv hâur chuôz zis li tsêr. Đrâuv co, cux cxôngx cêr cor cav hâur luz nênhx, tsênhz câuz tôngx zôngv chiê Trâu đêx chuz mor blâuv, viv li chuôz zis nênhs Thái tưs cux muôx tsênhz câuz. Thâuv têx tuz hluôk zuôr pox niêv pheiz chuôz, pox nhuôs khênhr zuôr trâu tul tuz iz luz tsênhz câuz tôngx. Mul nhoz tsêr yiêz, luz tsênhz câuz tôngx zuôr tâu lênhx txir nênhx gra mul hâur tsêr uô ntêx, đhâu co thiêx li gra têx chuôz zênhx txơưr mul trâu hâur tsêr. Thâuv muôx zoz qơưx zuôr tsênhz câuz tôngx lok sir zôngv, pox nhuôs zuôr hu txir nênhz tuôx hu plis, njuôs xav chiê zuôr tâu luz tsênhz câuz tôngx jông, chuôz zis zôngv tâu lêx ntêr, tuz nhuôs uô tâu nox tâu hnar. Zơưv Lo Văn Thái, nhoz jos Mái, xã Mường Sại, huyện Quỳnh Nhai heik: “Tsênhz câuz tôngx mak chuôz zis tưs cux muôx, thâuv mul nhoz tsêr yiêz, tsưr tsêr tsuv gra tsênhz câuz mul hâur tsêr uô ntêx, đhâu co thiêx li gra têx chuôz zênhx txơưr, uô tsêr yiêz mul nhoz tsêr yiêz tsuv muôx tsênhz câuz thiêx li tâu. Nhiv no tsi muôx tsênhz câuz tôngx mak muôx tsênhz câuz hlâu...Cxênhx lâus li pêz mak zôngv tsênhz câuz tôngx”.

          Tsênhz câuz tôngx khênhr tâu pox nhuôs zôngv chiê chuz mor, tsi zôngv chiê uô têx zav nox txơưr. Đros tsênhz câuz mak muôx tsu tâu zôngv ntông lok sik shôngz uô. Tsu muôx 2 zav, 1 zav zos zôngv chiê chuz mor zôngv ntông uô, 1 zav tâu zôngv shôngz uô khênhr zôngv chiê chuz njuôs, jâuz tâuv cxuô zav...Tiv zix zos txos hnuz txi côngv pos zơưs, lơưr nênhs Thái mak 10 hnuz txi côngv pos zơưs iz jiês lơưr yênhx xênhv nênhs, pox nhuôs khênhr nzuôr tsênhz câuz hur, lâuz têx đêx muôx hâur co mul tas. Zơưv Quàng Văn Lanh, nhoz jos Bó, phường Chiềng An, thành phố Sơn La puz pâuz cxaz: “Cxôngx nzor lol nênhs Thái xar tiêk, txir nênhx cxiv tsa chuôz thênhx tsuv muôx iz luz tsênhz câuz, li uô tsêr yiêz, thâuv chuôz zis muôx hâux lưv, txi côngv pos zơưs puôr lênhx muôx tsênhz câuz, tsênhz câuz zôngv chiê chuz mor uô ntêx. Thâuv zôngv txos mak muôz chiê chiê txi côngv pos zơưs”.

          Viv tsênhz câuz tôngx muôx ziz njiêz coaz tsôngv li ntơư hâur tsôngv box Thái li luz nênhx, viv li tâu pox nhuôs tuôr tsês jông cxôngx ntâu cxênhx nênhs lol no, taz sik tsuôk chor tuz thiêx li tâu zôngv chuôz zênhx no. Zơưv Lò Văn Thâng nhoz phường Thanh Trường, đrôngs Điện Biên Phuv puz pâuz: “Cur chuôz zis zôngv tsênhz câuz cxôngx 3 cxênhx nênhs lol no, Nênhs Thái xar tiêk tsưr tsêr tsuv muôx tsênhz câuz, zos mul nhoz qơư yiêz cux tsuv gra lơưr tsênhz câuz chiê zôngv râuz đêx lok sik hâu jâuz tâuv hlôngr trâu têx chuôz zênhx txơưr, taz sik phênhv ntâu zos zôngv chiê chuz mor”.

          Luz tsênhz câuz tôngx tsi taz zos chuôz zênhx muôx ziz njiêz, muôx pos zơưs li njux plis chiê phôngv trâu tuz nhuôs muôx luz nênhx tsâu sor, shir phaz. Viv li, txơưv nhiv no tsênhz câuz tôngx tsi muôx ntâu li thâuv ntêx, hlôngr co zos têx luz tsênhz câuz hlâu muôs ntâu sâuv niêv ciêz, taz sik pox nhuôs nênhs Thái cux lok six seiz jông tsênhz câuz tôngx- jông li iz chuôz zênhx coaz tsôngv tsuv muôx đros đreiv hâur hêir nênhs Thái li luz nênhx./.

(Lường Hạnh- Txâur Vax cxeik nhênhv)