Đhâu txuz 3 lênhx công nhân trâus tuôs tiv đêx cuôr yôngz, Lai Châu tsuv muôx tsưr ziv seiz car cov taz por cxiv uô côngz tsinhx hâur cheix ntux nas

Dự án cêr Pa Vệ Sử krêz cxiv uô shông 2018, sir jos uô cov tiêr lok shông 2020 đros pênhr yưv uô zos 100 tỷ đeiv. Lơưr Đại tá Vũ Văn Trào, Chỉ huiz trưởng Bộ chỉ huiz pênhz phax tỉnh Lai Châu, Tsưr yưv pênhr dự án no puz pâuz, jiês lok nas đêx cuôr yôngz nhiv kruôr đhâu uô 3 lênhx công nhân trâus tuôs, ruôr hiêv lok kinh têr njuôs xav zos 7 tỷ đeiv. Côngz tsinhx uô hâur cheix ntux lok nas mak lax txar jav tâu têx txiêz nanv muôx yưv:

          “Pêz cux thôngz pov, chox kriê têx tsưr cxiv uô, hâur co muôx têx zênhx pênhz phax tsuv seiz no zos jax cơưv chiê chuv tôngv hâur côngz xưv qênhz yuôx, pov nzor têx riêz nênhs njuôs xav muôx yưv li tox poz, đêx cuôr yôngz thiêz chuv tôngv khưx phưx chiê jav tâu têx trâus ruôr hiêv li nhiv kruôr đhâu”.

          Đros thax tsav ar uô côngz tsinhx zos tox siêz, tiv zix zos hâur cheix ntux lok nas, luôs hâux lưv uô 3 lênhx công nhân trâus tuôs thâuv muk njêis gra têx meir, chuôz zênhx thâuv muôx đêx nas lox tso pov tsưr yưv pênhr li hâux lưv seiz car taz por lox tôngv tsi tâu tâu uô jông. Heik lok vênhv thix no, đại tá Vũ Văn Trào puz pâuz:

          “Taz viv uô mak tưz muôx chênhz zênhv hâur côngz xưv cxiv tsa têx côngz tsinhx sâuv thax tsav ntus đriv. Taz sik qênhx shênhx trâus ruôr hiêv cux xưk li vênhv thix tsi taz por hâur six hơưv nhiv kruôr đhâu mak pêz xar tsi txos. Thax tsav ar têz nhoz Pa Vệ Sử tsik zôngx ziv njuôs xav tâu têx muôx yưv, tiv zix zos hâur cheix ntux nas”.

          Txiêz nanv tiv ntux nas, đêx ngaz khênhr zos têx mak xar tsi txos, têx chiz coaz muôx txơưx jênhv tỉnh Lai Châu tsuv uô tsênhz mênhx no pok zos txiêz nanv lox tôngv thâuv 3 lênhx công nhân no tsênhv uô hâux lưv? Tsưr yưv pênhr li txơưx jênhv zos li chas hâur hâux lưv seiz car taz por lox tôngv nhoz qơư riêz nênhs, njuôs xav muôx tox poz ar lơưk? Têx lênhx nênhs trâus tuôs li qênhx liv, tiv zix zos thâuv tsi muôx bảo hiểm lox tôngv zuôr tâu paz txưv li chas?

          Tsênhz mênhx nhiv no ntơưv têx côngz tsinhx uô cêr zaoz thôngz nhoz Lai châu, têx tsêr tax lav uô chiê nhoz uô hâux lưv, nox so puôr lênhx tâu tso ntơưv têx qơư njuôs xav muôx tox poz, ar lơưk siêz. Lai Châu tsuv tsov cưv đuô thiêz hâur seiz car, qênhz yuôx côngz xưv taz por lox tôngv sâuv têx qơư cxiv tsa têx côngz tsinhx, chiê jav têx ruôr hiêv li nhiv kruôr đhâu thâuv txos cheix lok nas./.

(Thanh Thủy- Khắc Kiên- Txâur Vax cxeik nhênhv)

Lênhx nênhs uô ntêx hlo trâu tsôngv box Hmôngz

nhoz jok Ón cơưv shâuv uô trơưk

(HLôngr suôz)

Trơưk li Txôngr Xênhv Zax hêik pâuz, Txôngr luz nênhx thâuv zâu zos cxuô jiês đros niêv txir tsir qơư nhoz muk trâu cxiê qơư, têx thâuv mak nhoz ntơưv huyện Phù Yên (Sơn La), têx thâuv mak nhoz ntâu qơư ntơưv huyện Mường Lát…thiêx lok nhoz truôx trâu jok Ón, zos Txôngr chuôz zis qơư nhoz nhiv no. Pâuz tâu txos zuk hêir nênhs luz nênhx, txov nhêv, ciês thâuv tâu niêv txir tso muk cơưv ntơưr ntơưv xar Tam Chung, Txôngr tưz xar tiêk tsuv sir jos cơưv cov muôx txux chi, tsưr ziv siêz thiêx paz tâu pox nhuôs hâur zuk jok. Jông siêz đuô hur si thâuv tix lâus zos lênhx nênhs xuz thơưx ciês nhoz jok Ón cơưv tiêr ntơưr lớp 12.

Hâur ntu ntơư, tsôngv px hâur jok tsik so muôx moz gênhs, cêr muk txix jok txos tsênhv qơư xar mak đêz, hâux lưv chơưv paz trâu chor nênhs lâul, nênhs muôx moz gênhs njiz ntâu phiv liv. Txix co, Txôngr Xênhv Zax thiêx cuêz tênhv cơưv lớp y têr jêx jok ntơưv tsêr kho moz đa khoa huyện Mường Lát. Thâuv nhiv kruôr cơưv tiêr lớp y têr jêx jok no cux zos ndax trâu six hơưv xêir zuôr muk uô tuz lênhv. Txôngr tưz sâu ciês ntơưr thor muk đros cxuô lênhx hluôk uô tuz lênhv. Xar muôx pêz shông uô tuz lênhv, tix lâus tưz tsik zos tâu taz viv tso nhoz hâur Đảng, mak tsênhv tâu Bôv chỉ huy quân sự tỉnh Thanh Hóa sik côngv đros Tsêr cơưv Chính trị tỉnh kruôz kriê 3 hli txux chi lok sêiz car têz qơưk chiê paz muôx tâu cán bộ trâu têx jêx jok nhoz thax tsav tox siêz, tsôngv box hêir nênhs tsơưs hâur tỉnh Thanh Hóa.

Nhạc cắt

Đhâu thâuv uô tiêr tuz lênhv tror lok tsêr, txix shông 2012 txos nhiv no, tix lâus Txôngr Xênhv Zax tâu bâux uô Bí thư chi bộ jok Ón thiêz txos shông 2019 no, tix lâus tsênhv tâu pox nhuôs njênhs njôngr chiê uô tsar jok. Đros siêz xar thiêz têx hâux lưv uô tâu, Txôngr Xênhv Zax tưz paz pox nhuôs nhoz no tso tsês têx phongx cxưx pôngz kaz, paz lok tsưr ziv huôv tsar cêr uô nox, tu zus, chos kôngz lôngk, paz uô trâu jêx jok muôx luz nênhx truôx tuk thiêz tsâu sor đuô.

Lênhx bí thư chi bộ co tưz paz trâu pox nhuôs hêir nênhs Hmôngz nhoz jok Ón nriêr tâu cêr uô nox yiêz, luz nênhx hlôngr yiêz jông đuô. Tiv zix, txix iz luz jok tsik muôx đảng viên, Chi bộ jok Ón txos nhiv no tưz muôx 10 ntâu lênhx đảng viên. Zơưv Hà Văn Thiếu, chủ tịch UB xar Tam Chung puz pâuz: “Txix thâuv muôx Txôngr Xênhv Zax uô bí thư chi bộ, jok Ón tưz hlôngr yiêz ntâu thiêz px nhoz jos co pov muôx luz nênhx tsâu sor đuô. Đros trâu cêr khưr huôv tsar  tsêz chos kôngz lôngk, pox nhuôs nhoz jos no cux pâuz tsưx phưv jôngr ntông, tsik ntor luôx jông uô liêx têz; têx phongx cxưx pôngz kaz lok chêi uô đaz uo kruô, nox yôngz cok tưz tâu tso tsês. Ngaz tuk hâur jêx jok tsik so tâu tuôr truôx. Tas nro jok muôx 100 ziv chuôz zis zos hêir nênhs Hmôngz, chor chuôz zis pluôs hâur jok têx shông uô ntêx muôx txos 90%, nhiv no tsuôk yuôr muôx 45%.  Txôngr xênhv Zax tsiv nhos zos iz lênhx đảng viên uô ntêx nyuôk trâu cxuô luôs hâux lưv, txơưx pâuz huôv tsar cêr uô nox, tâu pox nhuôs njênhs njôngr, cơưv shâuv uô trơưk”.

(Hlôngr suôz)

Phênhv “Nôngx mênhx zuôr tsuv pâuz” hnuz no tsuôk xâuk li no xưz, phênhv no zos Đaix TNVN nhoz iz suov faz Bắc sik côngv đros tsênhv qơư cxiz uô kôngz têz qơưk uô./.

(TTTB-Lik Thox cxêik nhênhv)