Điện Biên: Sir jos chox têx tuz lênhv tâu tas siv nênhx hâur ntu tir ntâuk trol châuz đrav ntêx li têx poz cxa lok têz qơưk VN

Shir phaz tok pêz hâur qar tsêr uô hâux lưv, Đại tá Hán Văn Hùng, Đội tsar đội zok nriêr têx tuz lênhv tâu tas siv nênhx hâur ntu tir ntâuk trok châuz têx poz cxa (Quân khu 2) heik pâuz, tix lâus tsênhv bax têx ntâuz ntơưr, chuôz zênhx uz no chiê tror đros têx fôngx zưs, cưr tix mul trâu têz qơưs Lok Tsuôk uô hâux lưv zok nriêr chor tuz lênhv tâu tas siv nênhx li têx poz cxa. No zos hâux lưv phiv liv, taz sik tix lâus thiêz têx canr bôv chiến sĩ hâur đội thâuv tưs tưz xar njôngr, ntơư zos hâux lưv lox mak Đảng, têz qơưk, tsôngv px thiêz têx tuz lênhv tâu tas siv nênhx hâur ntu tir ntâul trok châuz đrav ntêx tưz choz zok.

          Đại tá Hùng heik pâuz: Ziv hnuz, hâux lưv zok nriêr ziv phiv liv đuô, viv tox trôngz hâur pêk tsi thôngx li đrav ntêx, têx mông heik pâuz iz hnuz tsơưs jux juk tiv têx lênhx nênhs đros tir ntâul trok châuz nhoz qơư tsav trol Lok Tsuôk, lok sik têx lênhx lâuk nhoz saz têz qơưk Lol Tsuôk nhiv no cux tưz pôngz lok sik lâul tas, tsi yuô ndo jông lok têx li heik co. Chênhr viv li, thâuv hnor mông heik txos, txơưv tsơưs tsi pâuz tsênhz, lok sđ cux sir jos hla đhâu têx phiv liv chiê sơưr cêr muk uô hâux lưv zok nriêr chor tuz lênhv tâu tas siv nênhx ntơư. Đại tá Hán Văn Hùng, Đội tsar đội zok nriêr têx tuz lênhv tâu tas siv nênhx thâuv ntu tir ntâul trok châuz đrav ntêx li têx poz cxa, Quân khu 2 heik:

“Nhiv no zos yuôr nhos 200 têx mông pêz xav tinhv muôx nhoz cxuô nro hâur 6 tỉnh faz Bắc Lok Tsuôk, taz sik zov chênhr muôx ntâu mông đuô cux zos ntơưv 2 tỉnh Luông Phra Băng thiêz U Đôm Xay. Pêz zuôr mul zok nriêr, xav jênhv sêiz li chas, zos njiz tâu têx mông jông mak pêz zuôr sir jos, txơưv ntux nas lok cux zuôr khơưz thiêz gra têx tuz lênhv ntơư chor poz cxa lok tso trâu ntơưv qơư chiê tok txos thâuv cheix ntux kruôr li chox lok VN”.

Đội zok nriêr têx tuz lênhv tâu tas siv nênhx hâur ntu tir ntâul trok châuz li têx poz cxa (Quân khu 2) nhiv no muôx zuôr xar 30 lênhx. Thiêz đội tâu yênhx lix shông 1994, đros thiêz hâux lưv zos zok nriêr, khơưz thiêz gra têx tuz lênhv VN tâu tas siv nênhx hâur ntu muk paz tir ntâul trok châuz đrav ntêx ntơưv Lok Tsuôk li têx poz cxa. Đros thiêz txơưx jênhv, sir jos uô nuv, txix shông 1994 txos nhiv no, đội tưz zok nriêr tâu thiêz chox lok VN 1.800 luz nza tuz lênhv, hâur co muôx 1.700 lênhx tuz lênhv tsi tâu pâuz tsênhz shor zos lênhx tưs; 123 luz nza tưz pâuz tsênhz qơư nhoz thiêz choz zok trâu chor tuz lênhv co li têx nênhs hâur tsêr. Ciês 6 luz hlik hâur shông shông 2018, Đội cux tưz zok nriêr tâu 34 luz nza tuz lênhv ntơưv Lok tsuôk gra lok choz zok trâu tỉnh Điện Biên. Hâux lưv zok nriêr têx tuz lênhv tâu tas siv nênhx ntơư njiz ntâu phiv liv, muôx têx muôx kênh lênhx tâu tas siv nênhx viv uô hâux lưv no. Taz sik, chor tuz lênhv uô hâux lưv zok nriêr têx tuz lênhv tâu tas siv nênhx thâuv ntu tir ntâul trok châuz ntơư cux puôr lênhx sir jos lês uô têx nuv co, viv lơưr puôr lênhx pâuz tsênhz txos chor tuz lênhv tâu tas siv nênhx ntơư li têx nênhs hâur tsêr  siêz xar thiêz tok njôngr chiê chox lok têz qơưk. Thiếu tá Dương Tiến Dũng, Đội phưv Đội zok nriêr têx tuz lênhv tâu tas siv nênhx thâuv ntu tir ntâul trok châuz li têx poz cxa Quân khu 2 heik:

“Muk hâur har jôngr, pêv têx tox siêz đêz đrôngs zos tsuv taz por muôx têx lênhx chơưv kho moz thâuv muôx moz lok sik hmôngr tsi jông ntos li uz li no thiêx chơưv kho tâu zênhx max. Muôx têx thâuv muk hâur đêx, đêx toz lok sik ndê trôngz jêz, pêz tsuv muôx hluô đei thâuv grik poz jêz, grik têx trôngz siêz. Muk hâur kror jêz, kror tsuô tsuv muôx tênhz tơưk pov cêr, qênhz shuôs uz no.... Đros thiêz uô têx hâux lưv no lok six phiv liv thiêz riêz nênhs, muôx kênh thâuv pêz uô têx nuv no thâuv luz cheix ntux nas viv li 8 six tsâuk ntux pêz cux tsênhv truz yêz pêv têx trôngz, hâur jok tsi tâu lok txos qơư, ntơư tưz tsi tâu heik txos muk hâur jôngr. Taz sik đros thiêz pêz sđ tsưr ziv, siêz xar zos sir jos zok nriêr cov tâu tas hur si têx tuz lênhv tâu tas siv nênhx thâuv ntu tir ntâul trok châuz đrav ntêx ntơư têx poz cxa chiê gra lol zuk têz qơưk”.

  Zơưv Nguyễn Thanh Sơn, Giám đốc Sở Lox tôngv Xaz pênhz thiêz XH tỉnh Điện Biên heik pâuz, uô lơưr Thủ tướng Chính phủ Quyết tinhv số 1237 lok thôngz đhâu luôs hâux lưv zok nriêr têx tuz lênhv tâu tas siv nênhx hâur ntu tir ntâul trok châuz têx poz cxa txos shông 2020 thiêz têx shông zuôr txos, ngênhx lox tôngv xaz pênhz thiêz XH tỉnh cux tưz sir jos đros cxuô cấp, cxuô ngênhx, lar heik zos Quân khu 2 têx lênhx canr bôv chiến sỹ lês uô luôs hâux lưv zok nriêr têx tuz lênhv tâu tas siv nênhx li heik sâuv têx poz cxa chiê sir jos zok nriêr, qênhz shuôs chox lok trâu zuk thax tsav qơư nhoz.

Txix shông 2013 txos nhiv no, tỉnh tưz lênhk tol 119 ntâu lênhx tuz lênhv tâu tas siv nênhx têx poz cxa thiêz uô jông hâux lưv tsoz phưz têx chuôz zis muôx lênhx nênhs hâur tsêr muôx côngz trâu têz qơưk:

“Têx shông jê lok no, hâux lưv cxiv tsa, kho đuô, taz por chor tuz lênhv tâu tas siv nênhx thâuv ntu tir ntâul trok châuz têx qơư nza tưz tâu tỉnh moz siêz chox kriê. Niêx shông puôr lênhx tsês têx nhiêx txiêx, thiêz tso nênhs muk cxiv kho têx tuz lênhv heik sâuv têx qơư nza. Thiêz niêx ciêz, niêx hli puôr lênhx muôx nênhs muk qêz suô, đoz têx đrox uz no ntơưv têx qơư nza co cov đu lus, hur si. Hâux lưv ndo côngz pâux txiêx njis tưz cxiv uô thiêz kho đuô tâu 217 luz tsêr, xav hur si tá smuôx 8 tỷ đeiv ntâu.......”.

Txos nhiv no, txơưv tiêk ntâu luz nza tsi tâu pâuz tsênhz bê, qơư nhoz, taz sik têx canr bôv, chiến sĩ lês uô têx hâux lưv heik sâuv tưz sir jos uô tas zuk txux chi tsưr ziv; đros trâu hâu nov tỉnh Điện Biên têx cêr moz siêz txos hâur tsoz phưz, tu têx tuz lênhv heik co têx qơư nza tưz sâu, gra lok tưz thiêz tsênhv iz phênhv tưs uô trâu têx chuôz zis muôx lênhx nênhs tâu tas siv nênhx hâur ntu tir ntâul trok châuz viv tsưx phưv têz qơưk muôx cêr sor siêz, uô nênhx shir phaz đuô./.

                                    (Vũ Lợi-Riê Lâux cxeik, nhênhv)

Phú Thọ: Lênhx bộ đội lâus sir jos uô bluô nux cxôngx txeik pênhr nhiêx têz qơưs

Sơưr cêr mul uô bộ đội shông 1974 chiê tir ntâus tros châuz Mỹ, lênhx hluôk nênhs Chu Văn Mạnh nhoz thax tsav 5, xã Đông Lĩnh, huyện Thanh Ba, tỉnh Phú Thọ tưz mul cxuô qơư tsav txênhz Tây Nguyên cux xưk li qơư tsav txênhz Campuchia. Shông 1980, tâu tror lol tsêr đros luz chêr trâus saz 51%, tror lol tsêr tsi muôx tul tsi ciês, tsi chưx luz nênhx yeiz pluôs, phuôx huiz cêr chax chês “Bộ đội zơưv Côngz Hôx” lênhx bộ đội lâus Chu Văn Mạnh tưz truôx siêz thor chinhr quyênx xã muôz 2,5 hecta ar chiê tsêz chos. Tâu paz txưv cxôngx ntâu saz, zơưv tưz uô trâur nuv VAC li tu zus tsiêx cxu, khơưz pak đêx zus njêk…. Khov gruôs uô hâux lưv, zơưv li trâur nuv VAC tưz huôv tsar uô tâu truôx. Cxôngx 5 gơưv buô têz chox lok huôv tsar tu zus, nhiv no zơưv tưz muôx 50 gơưv muôs trâu niêv ciêz hâur thax tsav thiêz oz chas tỉnh. Zơưv tsênhv truôx siêz khơưz pas zus njês, tu zus keiz, chos ntông uô jôngr.... Nhiv no, fênhx pheiz iz shông tsi xav têx nhiêx txiêx tưz yưv, zơưv sâu tâu yênhx puôk tsov đeiv. Zơưv Chu Văn Mạnh heik:

          “Cur txeik zênhx hangx pênhr thiêz sir jos uô kinh têr chox lol phênhv sâu trâu chuôz zis. Xar uô tul tsi zuk tsuv moz siêz uô. Cur cux xar njôngr cxôngx phênhv pênhr no zuôr paz cur mê nhuôs sir jos đuô hâur luz nênhx”.

          Lơưr zơưv Tống Như Hải, Chủ tịch Hội bộ đội lâus xã Đông Lĩnh, bộ đội lâus Chu Văn Mạnh zos iz lênhx saz pênhz thâuv tưs cux uô ntêx nyuôk hâur cxuô phongz yaox huôv tsar kinh têr hâur tiv phaz. Iz chas sir jos huôv tsar kinh têr trâu chuôz zis, zơưv tsênhv đros paz têx hội viên Hội bộ đội lâus hâur xã huôv tsar uô kôngz lôngk, txu yeiz cxuôv pluôs, muôx luz nênhx tsâu sor. Zơưv Tống Như Hải heik:

          “Đồng chí zos 1 lênhx nênhs sei đrơưv. Thâuv mul uô bộ đội tâu tror lol tsêr zơưv Mạnh sir jos huôv tsar kinh têr tiv phaz. No zos iz hội viên jông hâur Hội. Pêz cux yax six yax mông thiêz zâuv lơưr tuôx pov cov ntơưv phêv thaov, heik kriê trâu têx hội viên sik đros cơưv shâuv huôv tsar kinh têr, muôz siêz luz nênhx”.

          Lơưr Zênhx hangx tsênhv chei xã hội huyện Thanh Ba, tỉnh Phú Thọ li ntâus grê, têx lênhx bộ đội lâus li zơưv Chu văn Mạnh zos iz hâur têx lênhx nênhs jông txeik nhiêx txiêx zênhx hangx chiê huôv tsar uô kinh têr, gôngr phênhv txu yeiz cxuôv pluôs truôx vênhs. Zơưv Dương Anh Tuấn, Giám đốc qơư giao dịch Zênhx hangx tsênhv chei xã hội huyện Thanh Ba puz pâuz:

          “Đros thiêz têx lênhx nênhs txeik pênhr thôngz đhâu Hội bộ đội lâus mak muôx chêx cuk lok six siêz. Hâur co muôx ntâu trâur nuv thôngz đhâu pênhr co mak huôv tsar jông: Chos ntông nox txir, têx tsoz chos kôngz nuv, tu zus tsiêx cxu, keiz ok...”

          Tsi taz truôx siêz hlôngr yiêz tsưr ziv uô, ntâu lênhx hội viên Hội bộ đội lâus xã Đông Linh xưk li zơưv Chu Văn Mạnh tsênhv pâuz xeir trâur nuv tsiv uô huv đros tiv phaz. Zơưv tsiv nhos zos iz đeiv iêr chi cax lul lok cêr uô nênhx chiê sơưr đơưk cơưv shâuv uô trơưk./.

                   (VOV1- Txâur Vax cxeik nhênhv)